"إذا بغيتو هذو الناس الأبرياء يخرجو حيين منا ..يلزم واحد برك يخرج حي من هذيك الدار "
قال أدهم بنبرة تخوّف ..تبسيمة مرسومة فوق وجهو
جيهان فتحت يديها و وقفت مقابلا ياسين بتبسيمة
"ياسين ..يلزم واحد منّا يخرج حي ..و هذا الواحد هو نتا "
مدّتلو السلاح برعشة و وقفت مقابلاتو ..
"جيهان ! علاش .." كانت هذه الجملة اللي خرجت من فم ياسين ..بصح هي برك عيطت فيه و قاتلو
"كيفاش علاش تتمسخر بيا ! نتا عندك ناس يستناو فيك أما أنا ماعنديش ..ياسين كي نروح كامل راح تعيشو غايا بلا بيا ! راح تكبرّ ولادك و ترعاهم و راح تتزوج و تجيب ذراري واحدوخرين و راح تنساني"
ياسين رفد السلاح بتردد و قالها و عينيه ترفد كسر و قهر و وجع "جيهان ! علاش حسبالك كامل الناس يكرهوك؟"
هي برك دارت يدها من جيهة قلبها و قاتلو
"باباك علاجال كذبة تافهة راهو بين الحياة و الموت و عايلتي عانات معايا و بزاف ناس فقدو حياتهم علاجالي ..تحسبني مانيش نشوف ؟ زيد ولادك يستحقّو واحد معاهم و ماراحش يزيدو يذوقو الألم تاع فقدان الأب مور ما فقدو يماهم"
طاحت دموعها و غمضت عينيها تستنا الوقت اللي تخترق الرصاصة صدرها و تموت ..فاتت عليها كامل حياتها بمّرها و حلوها
أما ياسين كانت جاثي في الأرض و السلاح بين يديه اللي يرعشو ..دموعو لأول مرة طاحو قدام واحد ! ماراحش يفرط فيها ..مايقدرش ! صح سودّتلو حياتو بصح في نفس الوقت خلاتّو يبتسم و يضحك بكل إختصار بدّلاتو بزاف
"أحم واش تستنا ياسين ؟ أقتلها" قال أدهم ببرود يستفزّ في ياسين ..سامي اللي كان واقف حذاه مع نور حط يدو على كتفو ينكز فيه و همس "ااي و جيهان ؟ تموت ؟"
أدهم خزر فيه بالقاوي و قالو "و نتا واش كنت تتوقع ؟ "
نور تبسمت بحقد و قالت لجيهان "تتفكرّي نهار درّتيلي نفس الجاست ؟ الدنيا ياه"
جيهان خزرت فيها و قالتها "اسمحيلي نور ..اسمحيلي بزاف ماكنتش حابة نقتل خوك بصح هو.."
قاطعتها نور بالعياط "بصح هو واش ؟ اااه واش برك كان يدروڨي ؟ "
جيهان هبطت راسها ..ياسين كان في عالم واحدو ، بحور القلق تديلو عقلو و ترجعو
" نحسب للعشرة ما يقتلش واحد لوخر نبدا نقتل هذي الزينة" قالها أدهم و واحد مجهول داير قناع شد شعر ايلان و هي بدات تتخبط بين يديه
"واحد"
"-اقتلني ياسين ..واش تستنا ؟ "
"مانقدرش جيهاان"
"زوج"
"هيا تيري على راسي ! أقتلني "
ساكت برك
"ثلاثة"
"ياسين ماتحسش بالندمة بيسك انا بغيت هذا الشيئ"
"جيهان ..اسمحيلي بزاف"
سامي بالعياط "جيهاان لاا ..اقتليه نتي !!"
بصح برك جيهان تبسمت في وجهو و قاتلو ببحة "سامي ؟ مالڨري كنتلي الحياة في وقت فات من عمري ..بصح رجعت نفضّل عليك الموت "
"ستة" صوت أدهم و هو يحسب ببرود
"ياسين !! هياا" عياط جيهاان خلا ياسين يوّقف و سلاحو موجه لجيهان
"سبعة"
"هذي هي النهاية ياسين حيدرخان ..تشرفت بلقاءك بزاف"
"ثمنية...احم راح نتأثر " قالتها نور و ختمتها بضحكة صفراء
زوج شعرات برك يفصلوها على سلاحو و الموت ..شعور الموت البارد و هو قريب ليها خلاّها تشهد آخر مرة و تغمض عينيها
"جيهان أنا عشقتك ..حبيتك و غصت معاك في بزاف ليسمونتيمون بصح ..."
هي توسعو عينيها بصدمة و طاحو دموعها ..همست بالمقابل " و أنا عشقتك ياسين ...."
-عشرة-
قبل ماتكمل كانت الرصاصة في قلبها مخترقة صدرها ..ياسين هبط للأرض و شعرو طايح على وجهو
هي طاحت جثتها على الأرض بلا حول و لا قوة ..تبسمّت بودية و همست "ء ء ء اتهلى في روحك .."
"جيهاااااان تعيشي جااااوبيني جيهااان"
كان صوت عياطو و هو حاطها فوق رجليه و هي برك جثة هامدة ..دموعها بين عينيها المحلولين بصدمة حاصلين
"هذي هي النهاية حفيدتي ..النهاية تاع جيهان تاكيلجاد على يد ياسين حيدرخان " قال أدهم بنبرة شريرة أما سامي كان مهبط راسو و نادم ..بصح واش من الندم و هذي في البداية كانت الكُل خطتو!
ياسين فوّت صبعتيه الباردين على وجه جيهان ..حبس عند عينيها المحلولين ..غلقهم بيديه و دموعو يطيحو فوقها كي المطر
باسها من جبينها بلاك يقدر يطلب السماح بهذي الطريقة ؟ شكون يقدر يعرف ؟
طفا التلفزيون و رجع كل شيئ كيما كان ..السكات برك و الظلمة ! الظلمة اللي رجعت لحياة ياسين من هذي النقطة
و هذيك الليلة برك طاحت الشتاء كيما ماطاحتش من قبل ..روسيا تلونّت لأخرى بيضة بالثلج و ياسين مابكاش كيما بكا هذيك الليلة !
------------------------------------------
لا سلام لا كلام الدعوة مخلطة 🌚💔
نلقى تفاعل هذي الليلة حتما ..سورمون و بشكل مأكد نحط بارت جديد
مزالو كاينين واحد 15 بارت للنهاية ..مكلاه تنخعلو بيسك راح تعرفو في البارت الجاي واش راهو صاري
واش هوما إقترحاتكم 💭!!
أنت تقرأ
كوليناك - Culinak
Açãoمامعنى كوليناك ؟ .. كوليناك في دستورنا تعني الهلاك لك ، أما لنّا فهي النعيم ، كوليناك حيث لا مكان للهارب أو الأثيم .. كوليناك هي الياء في الميم ، جذورنا في الصميم إن أخطأت نرسلك الى الجحيم مهلا فإنّها قادمة ، تلك الحسناء .. تلك التي ترعى الياء...
