أروقة الزمن

بارت الرابع

أروقة الزمن
فادية فهمي
......................

بيبي / بنيتي حبيبه عوفي هذا دومه يسوي اللي براسه لتقهرين روحج فكري بجهالج وبروحج حبيبه فدوه

تسولف وتمسح ايديها على وجه امي وتلزمها متتهجم على ابوي ..وهيه واگفه عيونها تجدح نار وشرار تريد تفلت وتملخ ابوي

ابوي / هسع ليش قاهره روحج هم سمعتن مره تاكل مره هيه بغرفه وانتي بغرفه

امي / يااا حيييف عليييك لو مقصره وياك گووول وعاااتبني وو..اا ن .

امي جانت تعيط بعلو صوتها حدما صوتها بح وماكملت كلامها طاحت بحظن بيبي وهيه ماگدرت تسندها ابوي ركض عليها مددها بالگاع

انه بهالمواقف مااگدر اتقرب وحيل اخااف واضل واگفه بعيد و اسد اذاني بيدي ودموعي كفيله بشرح خوفي

ابوي / صبا ركضي جيبيلي عطر ..سحرر جيبي ميي يلااا

كل وحده ركضت جابت شي وانه جامده بمكاني اباوع ابوي جاي يذب مي على وجهها ويحط عطر على ايده ويقربه من خشمها اشويه فتحت عيونها بيبي اشرت على ابوي يطلع

ابوي گام فتح الباب وطلع صعد سيارة وراح ..بيبي وصبا اتعاونن شالن امي گامت تمشي وانه امشي وراهن طبينا للغرفه مددوها عالجربايه وگعدنا يمها وهيه ساكته دموعها تصب

ضلينا للعصر هيجي وبدون غدى امي متقبل تاكل واحنا همين منشتهي ولا نتحرك من مكانا وامي على نفس وظعها متمدده واحنا گاعدات بس نسمع صوت طكطكه برا مندري يجيبون غراض يجهزون شغلات مندري شي

فاتت بيبي للغرفه گعدت يم امي وزمت ايديها وحجت بحزن ومدنكه

بيبي / فدوه بنيتي سامحيني والله انتي تدرين بيه انه ماعندي بنيات واعتبرنج بنيتي واعز ولا وحده تاخذ مكانج بگلبي بس بعد عباس سواها راح يجيبها للبيت وانه ميطلع شي من ايدي حجيت واعترضت ومنعت بس ميفيد وياه اذا امنعنه اكثر اخافن يمشي بدرب اعوج

أمي بس تباوع عالسگف وساكته

بيبي / ميخالف بنيتي اصبري انتي مو اول وحده ولا اخر وحده يجيها ضره گولي ياالله شوفي بنياتج اشگد خايفات عليج من الصبح ما اتحركن من يمج فكري بيهن وبصحتهن وفكري بروحج گومي وياي غسلي وجهج وصحصحي اجيبلكم لگمه يله حبيبه

رادت اتگوم امي بس هيه دفعت ايديها وجرت الشرشف على راسها ودارت وجهها انطتنا ضهرها

بيبي / بنيتي سامحيني انه لازم اطلع عيب گدام الناس اذا ماطلعت شيگولون عليه لازم استقبلهم

گامت دنكت راسها وطلعت من الغرفه واحنا فتنا للفراش حضنا امي نمنا بصفها

شويه وسمعنا صوت الهلاهل هزت حياطين البيت واغاني وهوسات بس بنسبه النا ما حسبنا فاتت عروسه لبيتنا بالعكس چنها جنازه وفوتوها علينا ..امي ساده اذاناتها بيديها وتشهك واحنا اتقربنا الها اكثر وحضناها احس بجسمها ترجف ومتكوره ودموعها كفيله بشرح كلماتها اللي ماجاي تحجيها ..

بعدتنا عنها وگامت على حيلها چنها سكرانه وشكلها ايخوف عيونها حمر تجدح نار مشت فتحت الباب واحنا گمنا وراها ميتين خوف بس لا تسوي شي مشكله لو همين تفقد الوعي ..

طلعت من الغرفه وفاتت للحمام صايره بصف غرفتنا واحنا رجعنا للغرفه والتوتر ياكل بأرواحنا اباوع على سحر وجهها اصفر وصبا دموعها بطرف رمشها بس عذراء وعماد جاي يلعبون .. وصوت الهلال يهز البيت هز

شويه ورجعت امي للغرفه غاسله وجهها فاتت وسدت الباب وگفت گدام المرايه مشطت شعرها وحطت حمره حمرة وكحلت عيونها واحنا نراقبها وكاتمات نفسنا ..

باوعت علينا من المرايه وابتسمت گالت

امي / صباوي غيري ملابس عماد سحر وانتي غيري لعذراء يلا بسمه وانتي جهزي روحج كملن حتى نطلع

ضلينا كل وحده صافنه بوجه الثانيه شني نطلع ليم الناس يعني ..شجاها امي مو جانت مساع رافضه الموظوع وهسع تتمكيج ومبتسمه ورايده تطلع صفنت عليها وانه بداخلي الخوف ياكلني واحس راح تصير مشكله جبيره مثل ميگولون هاي الهدوء ماقبل العاصفه ..........يتبع

.........................................