أروقة الزمن

بارت السابع

أروقة الزمن
فاديه فهمي
.......................
ركضنا ورا امي گالت بصوت مذبوح بدلن ملابسجن نطلع ..وهيه گعدت تبدل لعذراء وعماد گلتلها

بسمه / يمه وين راح انروح
باوعتلي بنظره مخيفه عاگده حواجبها گالت

امي / سمعتي شگلت لو لااا

خفت سكتت بسرعه بدلت وخواتي بدلن سحبتنا من ايدينا وطلعت هيه شايله عذراء ولازمه ايد عماد وتمشي بسرعه واحنا نركض ..طلعنا جدي گاعد بالهول باوعلنا وگام طلع بدون ميسولف شي وامي طلعت وراه

جدي وگفلنا تكسي صعدنا بس هو ما اجى ويانه گال لأمي خاف امج تحتاج شي لازم اضل يمها ومن يرجع سيف للبيت اجي يمكم وامي چنها متسمع شي بس تهز براسها اي ومدمعه صعدتنا للتكسي وانطت العنوان للسايق

طول الطريق هيه تباوع للطريق وتمسح دموعها واحنا گاعدات وساكتات حدما وصلنا لبيتنا اكو هوواي زلم گدام الباب وحاطين خيمه والمنطقه هوسه امي گالت

امي / تمام خويه نزلنا اهنا

وگفت السياره نزلتنا وانه احس رجليه ميشيلوني من الخوف امي مشت بسرعه طبت للبيت واحنا واگفات الخوف والصدمه والقلق والهوسه احس گمت مااشوف ولا احس بشي بعد جمدت ووگفت

اشويه وصحيت على روحي خواتي ماكو يمي ركضت عبرت الزلم وطبيت للبيت مديت راسي للهول اكو كوومه نسوان گاعدات هاي تملخ بروحها هاي تلطم هاي تملخ بشعرها وامي جاي تفوت يمهن تمشي وتضرب بخدها وتعيط

اتخبلت من شفت هالمنظر سديت اذاناتي بيديه واتراجع خطوه خطوه ليورا وگلبي احسنه راح يطلع من صدري ركضت للمطبخ همين اكو نسوان جاي يطبخن مدري شيسون عبرتهن بصف المطبخ اكو غرفه فتت وطبگت الباب حطيت ايديه على اذاني وارتجيت للباب

انتبهت اكو وحده گاعده وبحضنها طفل جاي ترضعه باوعتلي گالت لتخافين بنيتي تعالي گعدي يمي

عگدت حواجبي هاي منو گاعده بغرفتنا شعدها اهنايه

گالتلي تعالي بنيتي شسمج لتخافين

رحت گعدت يمها اباوع عليها گامت تمسح براسي گالت انتي بت منو المرحومه شتقربلج

بسمه / بنت عباس

جاوبتها وماافتهم عليها منو مرحومه .گالت

الله يرحمها بيبيتج ام عباس خوش مرة جانت وفقيره مالها اذيه بأحد الله يغفرلها

هاي شبيها ليش هيج تسولف هاي الجذابه تفاول على بيبي ماحبيتها ..گمت طلعت من الغرفه ركض ادور على صبا وسحر

مديت راسي للهول شفت صبا گاعده يم امي تبجي خفت اروح يمهن منظر النسوان ايخوف ..دورت بعيني على سحر. لگيتها واگفه بزاويه اشرتلها تجي يمي واجت گلتلها