أروقة الزمن

بارت السادس عشر

أروقة الزمن
فاديه فهمي
.....................

ضلينا الليل كله نفكر بالحل وطلع علينا الصبح واحنا على نفس گعدتنا حسبه تجيبنا حسبه تودينا ومانتوصل لحل وبالمقابل الولد مصر لو اليوم نسدد الديون لو يشتكي علينا

صارت ساعه بالعشرة اجوي اصدقاء اسماعيل دكوا الباب گام اسماعيل فتحه واجى گال هالحقير مشتكي عليه راح اروح وياهم وانتي امشي خبري اخواني

طلع مدنك راسه وانه ضليت اباوع وراه ودموعي تصب ومو گادره افتح حلكي بكلمة شگول مااعرف .. مشيت گعدت زهور لزمت ايدها وشلت نجمة بحضني طلعت لبيت عمي امشي وابجي

وصلت دگيت الباب علي فتحلي بدون مقدمات گلتله

بسمه / خويه الحگ اسماعيل اخذوه للمركز راح يوقفوه

علي / بس اهدئي على كيفج فهميني منو اخذه وليش ..فوتي للبيت فهميني

فتت گعدت وانه اشهك والكل اتجمعوا عليه شرحتلهم كل إلي صار

علي / هسع بس اريد افتهم اشلون 12 مليون يداين شني السالفه صدك جذب

بسمه / وانه شمدريني غير ضباط ماخذين هواي ومقشمري گايلين اكتب يمك بعدين نسدد وهو كاتب حدما واصل هذا المبلغ والولد گايل عبرت حدك اريد فلوسي

علي / الله كريم هسع انه اروح للمركز وافتهم السالفه

گام علي بدل ملابسه وطلع وزينب مشت جابتلي ماي وعمي ضل يفشر ويغلط على اسماعيل مدري ليش گلبه هلگد قاسي على ابنه ويدور زله عليه علمود يرزله

اخذت الماي شربت هدئت اشويه ضليت گاعده انتظر خبر من علي .. صار الظهر وانه على نفس گعدتي واباوع للجهال يلعبون گدامي فات علي وجاي وياه امين گمت على حيلي وايدي على گلبي گال

علي / الولد ميقبل يتنازل اذا مانسلمه المبلغ كامل

امين / انه ادبر مليونين بس الباقي 10 منين نجيب

علي / والله انه يادوب اذا ابيع كل إلي عندي ادبر مليون والباقي اشلون مااعرف

اهنا عرفت ماكو امل واسماعيل وگع بيها

ضلوا يتناقشون بدون نتيجه اخذت الجهال رجعت للبيت وانه گاطعه الامل وماادري شسوي

صار 10 ايام واسماعيل بالسجن وانه دموعي مانشفت والأكل إلي عندي بالبيت خلصت وماكو احد يدك الباب علينا ويسألنا اذا محتاجين شي لو لا

گمت اقتصد قدر الامكان اتريك وما اتغدا او اتغدا ومااتعشى والجهال بدل مااوكلهن 3 مرات سويتها مرتين علمود الحليب يكفي والأكل يكفي بلكت الله يفرجها واسماعل يردلنا

گاعده ارضع نجمة وزهور تلعب يمي سمعت صوت الكهرباء طكت فزينا عالصوت زهور ونجمه گامن يعيطن من الخوف خليتهن بحضني وماادري شسوي المن اگول