أروقة الزمن
فادية فهمي
........................
ابوي / والله يا مرة شمدريني اذا تريدين باجر اوديج للمستشفى العام اكو اهناك اطباء مختصين يشوفون حالتج
امي / اي والله احسن لان خايفه تكبر اكثر
جميله / يمعوده شبيج ياخوافه ماكو شي لتشغلين بالج ولتضلين تفكرين
ثاني يوم العصر طلعوا للمستشفى واحنا ضلينا عالنار بس انريد نعرف شني صار وياهم .. صار المغرب رجعوا وجههم متتفسر مندري من التعب لو اكو خبر مو زين
فاتوا گعدوا ابوي بس يتأفأف وامي مصوفرة چنها ممفتهمه شي
جميله/ اي ابو عماد سولف شبيها مرتك
ابوي / الطبيبه تشك عدها مرض خبيث بصدرها وحللنا ننتظر نتيجة التحليل
جميله / ضربت ايدها على رجلها ..يمه اسم الله ياستار ... لتخافين خيه بلكت تحليل طلع نضيف وماكو شي زين يمتى تطلع نتيجة التحليل
ابوي / بعد يومين وان شاءالله ماكو شي
امي واظح عليها خايفه بس متريد تبين خوفها وجاي تحاول تتصرف طبيعي ويه الوظع بس احنا گصنا الخوف
گامت فاتت للغرفه تغيير ملابسها جميله گالت يلا بنات امشن يم امجن ضلن يمها خاف تحتاج شي
گامن سحر وصبا فاتن للغرفه وانه جاي امشي سمعت خاله جميله تحجي بصوت ناصي فأنداريت وگفت باب الهول اتنصت
جميله / ابو عماد شراح نسوي ترى هذا المرض خطير وين نعالجها واكو علاج بالبصرة؟
ابوي / هشش نصي صوتج لا تسمعج ..والله ماادري غير نمشي على كلام الطبيبه شماگالت انسوي والله كريم
من سمعت كلامهم اتخبلت يعني امي يجوز تم.....بسرعه نفضت الفكره من بالي لا شجاي افكر انه مستحيل امي تعوفنا ماممكن ..مشيت للغرفه گلت ملامح امي راح تفسرلي اذا خايفه معناه فعلآ شي خطير هالمرض واذا طبيعيه ماكو شي
ضليت مركزه على ملامح امي وهيه تغيير ملابسها وعلگتها بالكنتور وگفت مسحت المكياج وايديها يرجفن وصبا تسولف وياها هيه بس تهز براسها ومتجاوب چنها بالها مشغول بشي اهنا صدك فات الخوف بگلبي
گمت اسمع عمامي هم يسولفون ويه ابوي ويگولون هالمرض خطير فگمت اخاف اكثر صح گدام امي اسوي روحي مامهتمه ولا خايفه واضل اضحك بس اول ما يطفون الضوا بالليل واحط راسي عالمخده اضل ابجي واندعي ربي يشافي امي كلش اخاف اخسرها واتمنى يومي گبل يومها وكون مااشوف مكروه يصيبها
مرن يومين چنها سنتين گعدنا الصبح امي وابوي رادو يطلعون انه من الليل حاطه ابالي اروح وياهم للمستشفى فضليت ابجي واصرخ لزمت عباية امي چلبت بيها لو مااعوفها تطلع لو تاخذني وياها وكلهم ابتلوا بيه يريدون يسكتوني وماكو چلبت
أنت تقرأ
أروقة الزمن
ChickLitأنا امرأة خلقت من قوة النيران ... صبورة صامدة كجبل شامخ وسط الرياح العاتيه .. أنا التي ناضلتّ لنيل كل ماهو مسلوب مني .... لبوة وسط الذئاب المتوحشه .. أكتم صرخات اوجاعي تحت رداء القوة .. واتلحفِّ بالتجاهل اتجاه كل ما يؤلمني. أنا ابنة الرافدين الصامد...
