أروقة الزمن

بارت الثاني عشر

أروقة الزمن
فاديه فهمي
..................

بسمه / شكريه گولي غيرها ولج مااگدر اخبز بهذا التنور وشدعوه هلگد جبير شني تنور لو بير

شكريه / والله يابه صدك گالو اسمه بالحصاد ومنجله مكسور امشي امشي لميلي الحطب وغصون يابسه

بسمه / لا عليج الله گوليلي شني معنى الگلتي

شكريه / قصدي شاطره كلش امبينه

بسمه / اي فديتني انه سبع صنايع بس بختي ضايع شسوي

شكريه / امشييييي جيبيلي حطب اتجمدنا حطي لسانج بحلگججججج

مشيت بسرعه ادور عالحطب والهوا بارد لعب بيه لعب لان مكان مفتوح ومساحه جبيره لكيت اشويه حطب واغصان لميتهن جبتهن الها وايديه كلها انجرحت

بسمه / ولج خيه انجرحت ايديه اخخخخ الاغصان زرفن ايديه زرف

شكريه / اي عفيه وهسع باعي اشلون اشغل التنور واتعلمي ياست الحسن

شعلت الحطب وحطتها بالتنور وانه اراقبها كالت وهسع ننتظر اشويه الحطب تشتعل ونبدي نخبز .تعالي مدي ايدياتج للتنور دفيهن

بسمه / اففف ايديه يوجعني مااريد

شكريه / اتأفأفت اميرة ديانا

انتظرنا اشويه انوب گامت تخبز وانه اساعدها على كدما اكدر وكملنا شلت الخبزات وانه فرحانه لأول مرة اخبز بتنور الطين رجعنا للبيت حضرنا العشا جاي نتعشى گلت
بسمه / اشلون خبزات خبزتلكم چنه بقلاوه

شكريه / اويلي گامت تتباهى الگرعه بشعر خيتها

بسمه / ههههه خليها سكته لا تفشليني

كملنا العشا وكلمن فات غرفته ومن التعب گبل نمت گعدت ثاني يوم الصبح طلعت من الغرفه لگيت شكريه مجهزة روحها تريد تطلع

بسمه / وين خيه اخذيني وياج ههه

شكريه / رايحه بيت اهلي خاف يصير عندي حالة ولاده لان فتت بشهري اذا اضل اهنا منو تولدني قابل اميرة ديانا

بسمه / ههههههه بس والله اتعودت عليج واضوج بدونج

شكريه / ميخالف ذبيلج دمعتين وگعدي اروح وحده ارد اثنين

مشيت يمها بوستها گلتلها ديلا ان شاءالله تگومين بسلامه وسلمي على اهلج

شكريه / يوصل عيني الله يسلمج

طلعت راحت ويه علي حسيت بعدهي ما رايحه اشتاقيتلها جنت متونسه وياها تعلمني عالشغل اضحك على سوالفها وعلى مشيتها چنها بطريق وزرايلها همين حلوه

بعد ضليت وحدي وكل المسؤوليات برگبتي اطبخ اروح للنهر اجيب مي واخبز بس اشلون خبزات تفتح النفس وحده تحترگ والثانيه تطيح لان انه قصيره وماألوح التنور حيل جبير .. ومرات يجي امين وجايب جهاله يگعدون يتغذون بس انه اخجل اگعد وياهم اضل اشغل روحي بالمطبخ ومن يكلمون اشيل الغذا اجيبلهم الجاي واغسل المواعين بعدين اگعد اكل