أروقة الزمن

البارت الثاني

أروقة الزمن

فاديه فهمي

.........................

انه وخواتي نسمع سوالف بيبي بس ما نفهم شي شني عجز الكلى ليش يبات بالمستشفى

كمال / اشوكت تروحون للمستشفى ومنو يبات يمه

بيبي / منو اكوو غيري انه .. انته واخوك عدكم شغل وامه متكدر تعوف البنات وحدهن

ثاني يوم عمي اخذ بيبي وامي بالسياره وطلعوا للمستشفى بعدين امي رجعت ويه عمي بس بيبي ضلت  يم عماد ومن بعد ذاك اليوم امي يوووميه تروح للمستشفى وترد ونوبات تبات اهناك وبيبي ترد تضل يمنا ..

انه متت قهر اباوع على امي اشگد تعبانه وضايجه وتقريبآ هملتنا وحتى من تشتغل بالبيت بالها مو يم الشغل احسها بس كجسد فارغ بلايه روح .. اضل الليل كله ابجي بدون مااحد يحس وامسح دموعي وانام

وابوي نزل اجازه بس مو مثل كل مرة وماكو فرحه من سمع عماد بالمستشفى طلع يمه وقليل كلش يرجع للبيت لو نشوفه لو منشوفه وضل الوظع عالتناوب بين امي وبيبي.. وابوي خلص اجازته والتحق ... نوبات اسمع سوالف بين عمي وبيبي يگولون الطبيب يگول من يصير عمره 6 سنين يزول الخطر ويطيب بس هاي المده لازم وضروري يبقى تحت المعاينه

مرت مده نوبات عماد يردوا للبيت يبقى اسبوع اسبوعين وهم يودوه للمستشفى واستمر الوظع هالشكل سنه كامله ورا سنه اشويه اتحسن وظعه وصار عمره سنه و ردوه للبيت بعد الطبيب گايل اخذوه حالته زينه ماكو داعي يضل هنا و رجع ابوي و رجعت الفرحه للبيت نوعآ ما

بهالمده امي حبلت وجابت اختنا الرابعه وسموها عذراء و رجعت نفس المعاناة وياها لأن حالتها نفس حالة عماد عدها التهابات قويه وامي خلت اهتمامها كلها لأختي هالمره چنه احنا مموجودات .. صار النظام بالبيت اخدم نفسك بنفسك

امي بالمستشفى وبيبي وظيفتها طبخ وصبا تروح وترجع للمدرسه تعبانه تحظر دروسها وتنام .. انه وسحر صح زغيرات بس نشتغل ونتعاون ويه بيبي ونديربال على عماد

گعدت الصبحيه على صوت صبا وهيه تبجي شلت راسي باوعتلها مبدله هدومها لابسه قميص ابيض وصدريه نيلي گاعده متكوره حاضنه جنطتها وتنزل دموعها ..

فركت عيوني فتحتهن هاي شعدها من صباحية الله تذب دموع گمت گعدت گتلها

بسمه / اشبيج خيه شكو تبجين

من سألتها انفجرت تشهك وتبجي خوفتني عليها

بسمه / صبا شبيج انه خايفه راح اصيح بيبي اكيد هيه بالمطبخ

ردت اگوم لزمتني

صبا / لا تصيحيها گعدي ماكو شي

گعدت وگالت
صبا / اليوم عدنا مجلس الامهات بالمدرسه