أروقة الزمن

بارت العشرون

أروقة الزمن
فاديه فهمي
.......................

نجمة / انه نجمة عمري 13 سنه اتقدملي واحد مطلق اسمه جميل عمره 30 سنه وعنده ولد وسبب طلاقه لمرته حسب ما گالت امه انه لازم مرته وهيه تخونه ومدخله رجال لبيته وكل المنطقه شاهدة على الخيانه وگايلين اكثر من مرة نشوف مرت جميل اتفوت زلم للبيت من يطلع هو  .. فمطلگها وهيه ماخذه ابنها ورايحه

انه اترددت وخفت اوافق واختي زهور همين شجعتني ارفض وگالت كملي دراستج احسنلج لاحگه على ضيم ومسؤوليه بس ابوي گال هو خوش رجال وسبب الطلاق من مرته هيه الخاينه هو ماله ذنب ووافق عالخطوبه وبنسبه لأمي هيه مالها رأيي لان القرار اول والاخير بيد ابويه

حددو موعد الخطوبه بعد اسبوع واتصلت زهور خبرتها وعزمتها عالخطوبه گالت انتي تعرفين وظعي ومااعرف اذا شهاب يوافق اجي لو لا بس احاول اقنعه واذا ماگدرت اجي راح ادبر عذر لأمي

رحت بهالأسبوع ويه امي اشترينا غراض بس صراحتآ الولد قصر ويايه من ناحية الماديه وامه گالت هو مديون مليونين والسبب من مرته مشتريه غراض من محلات وما دافعه فلوس گايله بعدين زوجي ينطي ومن صايره هالمشكله ومطلگه اصحاب المحلات لازمين جميل وطالبين من عنده فلوسهم وهو بعده مامنطيهم هاي حسب ما گالت ام جميل واهلي اقتنعوا

                        ..................

زهور /  اشگد حجيت ويه نجمة گلتلها لا توافقين ديربالج اولا فرق العمر بيناتكم هواي ثانيا الولد مطلق وعنده ولد بس حسيتها موافقه يجوز لان ابوي ضغط عليها لان ابوي مقتنع انه الابنيه اشگد متكون صغيرة وتزوج تتأقلم وتتعود على زوجها اكثر وهو يربيها على ايده. بعد ماادري .. المهم اتصلت وعزمتني عالخطوبه انه بعدني مااعرف الولد بس اتمنى يطلع گد الثقه ويديرباله على اختي وميعاملها مثل ميعاملني شهاب

گدرت اقنع شهاب بأسلوبي الخاص بلسان حلو لان مجبوره .. واختي توأم روحي مستحيل مااحظر خطبتها لميت غراضي جهزت جنطي وصح هو اقتنع بس بقى يسبني ويسب اختي ومن شاف اخذ ويايه جنطه گال

شهاب / خير ان شاءالله تاخذين هاي الجنطه الجبيره وياج خاف مفكرة مترجعين بعد احجي ولج

زهور / لا شسالفه شهاب ترى الجنطه مو جبيرة وقطعتين ملابس مخليه بيها ومكياجي بس

شهاب / امشي يلا ثوله من انعل والديج ادورين ونسه متگدرين تگولين رجلي ميقبل اجي طايحة الحظ

زهور / سكتت ادري اذا اجاوب راح تصير مشكله ويحرمني من الروحه دنكت ومشيت وهو يدردم وبس يكفر صعدنا عالسيارة طول الطريق ما سكت يشتم اهلي من الجبير للصغير وانه حابسه دموعي وساكته بس اريد اوصل لأمي

اول ما وصلنا نزلت من السيارة بدون مااودعه ولا احجي شي بسرعه طبكت باب السيارة حيل و ركضت للبيت ضل يصيح ورايه ثوله اهلج ممعلميج ووووو