أروقة الزمن

بارت الخامس عشر

أروقة الزمن
فاديه فهمي
.......................

بدون وعي سحبت زهور من حضنه وانتبهت على ايدها من الاصابيع حد الكوع كله احمر وجلد واكع طالع لحم احمر .. اتخبلت شني هاي كمت اصيح بوجه عماد

بسمه / ولللللك عماااد شمسوووي بطفله مووو انه انطيتها الك امااانه هيج ترجعلي ياهاااا محروگه لييش

عماد گام يرجف وارتبك من صوتي ومرته واكفه بزاويه ومدنكه وتبجي

عماد / شماتگولين ماالومج الذنب ذنبي ماگدرنا نديربالنا عليها وحطت ايدها بالمرگه

امي / ولك ثول حتى الثول وتجيبها للبيت متگدر گبل توديها للمستشفى

بسمه / سحرررر جيبيلي الشال بسرعه وانته الثاني دبرلنا سياره

سحر ركضت جابت عباتي والشال وهو طفر جاب تكسي لان محمد ماخذ السياره وطالعين هو وابوي

صعدنا للتكسي عماد گال ودينا لاقرب عياده .. وصلنا للعياده لگيناها مسدوده رحنا للمضمد دگينا الباب طلع رجال شوفناه الحاله فوتنا للبيت وزهور لحظه ما سكتت بس تعيط وانه ابجي

المضمد جاب معقمات وشاش ضمد ايدها رجعنا للبيت نص حيلي انهد وصار عندي مغص گلت هاي هيه راح اسقط الجنين بس مااهتميت هسع المهم زهور ..

ضليت احاول وياها اسكتها وعماد ومرته يعتذرون مني والندم واظح بعيونهم انقهرت عليهم گلتلهم خلص إلي صار صار قضاء وقدر لا تلومون نفسكم

وانه احاول اسكتها دگ التلفون انتبهت عالأسم اسماعيل اويليي والله اسماعيل هسع شني اگوله انه .. بسرعه حطيت زهور بحضن سحر وطلعت للحوش سديت الباب وراي جاوبته

بسمه / الو

اسماعيل / وينج ليش اتأخرتي ضل بالي

حاولت اصير طبيعيه اجاوب بهدوء

بسمه / لا مو جنت اتغدا والموبايل مو يمي بعدين سمعته

اسماعيل / اشلونج زهور اشلونها

بسمه / كلشي تمام الحمدلله انته اشلونك

اسماعيل / مشتاقلجن ممصدك اشوكت اكمل البيت اجي اخذجن

و ضل يسولف عن البيت ووين واصل بالبناء والمشاكل إلي صار وياه وانه بالي مو يمه بس اريده يكمل سوالفه اسد الخط

شافني ماجاي اتفاعل وياه ومااناقشه گطع كلامه فگتله

بسمه / يلا حبيبي بعدين اتصل بيك هسع اوكل زهور وانيمها

اسماعيل / زين عمري اخذي راحتج

سديت الخط بسرعه رجعت للبيت شلت زهور ضلت ساعه تعيط وراها تعبت وغفت وانه مددت يمها نمت من التعب

ضلت كلساع تفتح عينها تضل تبجي وتصرخ صوتها زرف اذني وبالليل كله ما نمنا وثاني يوم الصبح وديناها للطبيب فتح الضماد اتفاجأت الحرگ حييل قوي اليوم يلا بين اكثر