أروقة الزمن

بارت واحد وثلاثون

أروقة الزمن
فاديه فهمي
.....................

ورا ايام هوه اتحسن ورجعتله عافيته بس انه ادهورت صحتي فگال بعد لا تفوتين غرفتي ولا تتقربين مني خاف يرجعلي المرض ومابيه بعد ومااريد اموت بهالعمر بعدني شاب .. فگمت انام بالهول بس الحمدلله گدرت انقذ نفسي بأتباعي خطوات الصحيه من النت ودوم اعقم مكاني بالديتول وكذا فعبرت المرحله ..

فأتخلصنا من المرض وبيوم هو لازم يرجع للدوام بعد فگمت بالليل اطبخله مركة فاصوليه و اجمدها اله ثاني يوم الصبح ياخذها وياه

فگمت خليت الفاصوليه بالجدر ورحت طلعت معجون لگيت بالقوطيه ربع المعجون باقي وما يكفي للمرگة .. وانه جاي اطبخ جدر جبير مال عشر نفرات مو مال نفر واحد لان همه متفقين بالدوام كل مرة الاكل على واحد منهم

فجبت قوطيه ثانيه من المخزن وكسرتها اخذت منها اشويه وجاي اكمل الطبخ جتي إيناس شافت القوطيه بيدي وعاطت

إيناس / انتي منو گالج اشلون من كيفج تكسرين قوطيه جديده اشگدددد مبذرة انتي

زهور / جا شسوي غير بالقوطيه الثانيه ما جان باقي غير اشويه وما كفاني

إيناس / منين متعلمه هالتبذير انتي .. جنتي ببيت ابوج هيج تبذرين لو جيتي اهنا لگيتي كلشي جاهز جوا ايدج فما تعرفين قيمته .. لااا ومن يا نوعيه مستعمله التون سا خووش عايشه ملكه وشكو نوعيه زينه تمدين ايدج عليها

زهور / يمعوده هو معجون قابل اشصار واذا تريدين هسع اجيبلج فلوسه .. وبعدين هو الطبخ ما خليتوني اطبخ وگلتوا مبذره بس هسع مجبوره اطبخ لرجلي

إيناس / سمعيني ولج لسانج مال گص سدي حلگج لا اتصرف غير تصرف

سكتت فعافتني واخذت المعجون وطلعت من المطبخ تصيح بالهول

إيناس / تعااالوا شوفوووا زهور اشلون تبذر الأكل قوطيه كامله مخليه لمرگة وحتى بعد المعجون ميكفينا لنهاية الشهر

راكان / خير يا الله شني هالصوت اشصاير

إيناس / تعال شوف خويه .. مرتك جاي تبذر هوايه بالأكل اذا ضلت هيج تطبخ شنلحك عليها بعد

راكان / اهووو حتى الطبخ متعرف تطبخ ترى صدك طكت روحي منها .. عوفيها خيه خلي هالمرة هم تطبخلي لان اخر مرة

زهور / طلعت من المطبخ من سمعت كلام راكان يگول اخر مرة فگلتله راكان شقصدك بأخر مرة

راكان / ماااكو شي

عافني وراح للغرفه وانه رجعت طفيت الغاز و مشيت للغرفه لگيته گاعد يلعب بالموبايل گعدت يمه گلتله

زهور / راكان شني قصدت بأخر مرة

راكان / ما قصدت شي

زهور / راكان ترى والله ما خليت معجون هوايه و لا انه مبذرة عوفك من كلامها هيه تدور حجج عليه