إنصاف القدر(كامله)

الحلقة العاشرة

جلست حكمت تقوم بقطف وريقات الملوخيه لصنع غذاء دسم لها ولابنها.

الى ان دق جرس الباب يعلن عن قدوم زائر.

وقفت تنفض جلبابها البيتى من بعض العوالق به وذهبت لفتح الباب.

أدرك عقلها كل شئ سريعا وهى ترى يوسف يقف يسند ذراعى جدته التى تناظرها بعدم رضا.

تحدثت الجده(جليلة) :جرى ايه مش هتدخلينا ولا ايه يا بنت اختى؟

ابتسمت حكمت سريعا بسياسة وقالت :ازاى ياخالتى ودى تيجى ده بيتك... اتفضلى اتفضلى.. سند ستك يا يوسف.

قالت الاخيره وهى تنظر له بغيظ تعلم ابنها جيدا وتعلم ما قاله فجعل خالتها تخرج من بيتها وهى خطوتها للخارج عزيزه.

ساعد يوسف جدته كى تجلس براحه بعض الشئ. وحكمت ذهبت لعمل الشاى.

بعد دقائق كانت تخرج من المطبخ تحمل صينيه بها كوبين من الشاى.

حكمت :منورانا يا خالتى. اتفضلى الشاى.

مطتت جليله شفتيها وقالت:شاى.. جيبالى شاى فى عز الحر... ياختى هاتيلى ساقع الجو نار.

حكمت :قوم يا يوسف هات لستك حاجة ساقعه من عمك لطفى البقال.

يوسف :حاضر.

ذهب يوسف سريعا وجلست حكمت تنتظر ما جاءت لاجله خالتها :منورانا ياخالتى.

جليله :مش هتكلم الا اما اشرب الساقع انا حلقى بقا نار.

تنهدت حكمت وجلست بغير راحه تنتظر قدوم يوسف.

بعد عشر دقائق وضعت جليله الزجاجة النصف فارغه وهى تنظر تجاه حكمت تقول :بقى انتى تبقى على علم بكل إلى حاصل والى بيعمله رجب وساكته.. الا ماجيتى تقوليلى عشان نشوف حل للمصيبه دى.... لولا يوسف جه وقالى ماكنتش هعرف.

نظرت حكمت ليوسف بتوبيخ وقالت :كل واحد ينام على الجنب الى يريحه ياخالتى... ورجب راجل حر يعمل الى هو عايزه انا ماليش عنده حاجة.

احتد صوت جليله بانفعال:يعنى ايه مالكيش عنده حاجة... يعنى ايه مالكيش عنده حاجة مش ابو ابنك ده وجوزك.

حكمت :قصدك طليقى يا خالتي... احنا اتطلقنا من زمن.

جليله :مافهموش انا الكلام ده.. عندنا مافيش حاجه اسمها طلاق ولو حصل فأنا سبتكوا عشان كل واحد فيكوا كان راكب راسه قولت شويه لما النفوس تصفى وهرجعهم... لكن اجى الاقيكى عارفه بالفضيحه الى هو عايز يعملها وساكته.

حكمت :فضيحه ايه يا خالتى كفالله الشر واحد وهيتجوز فى حلال ربنا فين الفضيحة في كده.

اهتاجت حليله :انتى عايزه تجلطينى يابنت اعتماد؟؟

حكمت :الله يرحمها.

حليله :ايوه الله يرحمها ماهى لو كانت عايشه كانت كسرتلك دماغك على الى بتقوليه ده... ياختى يابرودك!!.. ده جواز الراجل زى ضربة المرزبه على النفوخ... بتوع زمان قالوا (جنازته ولا جوازتوا) وانتى بتقولى كده؟!