السلام البنات معاكم نهى عندي 17 عام شعري بوكلي و طوييل فالعسلي انا بيضة ومتوسطة فالطول وحتا الوزن عادية وعائلتنا ميسرة الحمد لله حنا ساكنين فالخرجة دالجديدة عندي ماما بشرى وبابا عبد الكريم الله يطول ليا فعمرهم وخويا كبر مني سميتو الصديق عندو 24 عام هو بيض بحالي وحروفو عسليين و بنت عمي سميتها سلمى تا هي قدي فايتاها أنا ب 22 يوم سميمرة وحروفها كحلييين وزن عادي ولكن طول مني وخوها سميتو جاد هو الكبير فينا عندو 29 عام طويل وسمر وعندو اللحية ورياضي بحال خويا هما صحاب بزااف وبحكم أن عمي مات وهما مازال صغار جاد هو اللي واقف على الشركة حيت بابا وجدي عيااااو وخويا مقابل قرايتو . نسيت ما قلت ليكم بلي جدي و جداتي مللي كنا صغار و هما مقررين بللي أنا لجاد و سلمى للصديق قاليك ما بغاوش البراني يجي للثروة ... الصديق و سلمى أصلا كايبغيو بعضياتهم وكلشي عارفها ولكن أنا و جاد ماكانتفاهموش حيت شخصيتي قبيحة و متسرعة ودغيا كانتعصب ( بنات برج الأسد ها واحد السلام عليكم ) أما جاد قاليا ما تعرفيش دكشي علاش عمرنا زعمنا نهضرو مع بعضياتنا زائد ديما كانشوفو مع واحد البنت ومافهمتش كيفاش جدي ساكت وماتايقوليه والو كون كنت أنا كون راه قطع ليا رجلي ..( المهم نبداااو القصة ديالنا و نتمنى تعجبكم راه أول قصة ليا ❤) .
أنا : اوووف أ ماما عافاك خليني راه الصيف هذا .
ماما: واش باغة تبقاي خامرة ليا هنا يا ويلي نديرو عليك النوبة باش تنوضي وتاكلي ؟
انا: صافي هاني نضت ... اجي نبوسك بعدا 💋
ماما: اللي يبوسني هو اللي يسمع ليا هضرتي وما يفقصنيش ويعااوني ...
انا: صافي صافي 😂 ويلي ندمتيني ههههه ... مهم غسلت وجهي وهبطت بالبيجامة ديالي لقيت كلشي مجمع خاص غير أنا .
نادية ( مرت عمي و مامات جاد و سلمى ) : نضتي يا سحت الليل؟ هاد المرة غانخليوك بلا فطور باش تولي تفيقي بحالنا بكري .
انا: وصافي آ طاتي راغا مع كانبقا نتسنا فالنتيجة فالليل ماكانعسش دغيا و فالصباح كايشدني النعاس.
جدي: واراك غاتهلكي صحتك و عينيك آ بنتي ونتي مازال صغيرة .
انا يالاه غانهضر و قاطعني جاد اللي كان جالس وتايشوفينا هو والصديق وقال: نتي وديك السليعفانة كاتلاقاو غا على التحرميات وإيلا بغيتي تكدبي تا مانكونش أنا ،مسار باين وواضح والتاريخ اللي تايقولو هو اللي تايحطو فيه النقط بلا ما ديري بيه السبة و من اليوم أنا اللي غانولي نوض تال عندك و نفيقك حيت خالتي ماشي خدامة عندك.
انا( هضرت وانا عيني فالماكلة حيت فيا جوع): ونتا مالك أصلا انا ماشفتكش واش كاين ولا ماكاينش يعني بالدارجة ما كاين لاش نكدب مالي خايفة منك؟
جاد: مللي نهضر تشوفي فيا ومازال مبرد دكشي لاش ماكاتخافيش راني غير محتارم جدي وعمي أما راه دوك العينين نتقبهم ليك .
(قاطعنا بابا وهضر ببرودة حيت صافي ولفونا ديما هاكا و كل واحد راسو قصح من لاخر) : صافي فطرو وهنيوني واش مابقيتوش كاتحشمو؟ مافهمتش هاد ولادكم كي غاتربيوهم .
(درت راسي ما سمعتوش وبقيت كناكل وملي كملت نضت وقفت ) بالصحة انا غادة .
الصديق: فين؟ انا نوصلك
انا: بلاش را غير لاصال( لاصال ديالنا داكشي علاش كلشي مفورمي بنات أو ولاد 😂 كانقيلو خيطي بيطي ولكن الصراحة والله إيلا دايرين المزيان ولينا على مزيناتنا )... بابا عافاك فكرتي فدكشي اللي قلت ليك ديال القراية ؟ فكر و قوليا حيت دابا هو الوقت . بابا: ان شاء الله آ بنتي نهضر مع الحاج ونشوفو .
جدي: آشمن موضوع؟
بابا: باغة تكمل القراية برا المغرب.
جدي:من بعد ونهضرو فهادشي دابا يالاه الصباح.
جاد جمع النوضة وقال: بسلامة عندي ما يدار ... (داز من حدايا و خبطني بكتفو تا كنت غانطيح مي شداتني سلمى حيت باغيني نبقا فالمغرب ... واخا جدي تايضور فيا وكايبغيني نحتارم جاد ولكن فالقراية تايقوليه يسكت ومايهضرش حيت عارف الدنيا غدارة هذا هو السبب الوحيد اللي مخلي جاد ساكت كون ماكانش جدي كون بدا يغوت تاني)
مشييينا لاصال ترينينا تا عيينا وشبعنا ضحك من بعد رجعنا للدار وبحكم دارنا فالخرجة دالجديدة كلشي بعيد علينا ودييما كانتعطلو المهم دوشنا وتعشينا وطلعنا لبيتي سدينا علينا وبغينا نشوفو النقاط راه واخا كانضحكو مخلوعين من الباك .
