နှောင်းဦးသက်လည်တည်စေအံ့

၂၈

(Unicode)

ခြံတံခါးတွင် တပ်ထားသော bell ကို နှိပ်ရနိုးနိုး မနှိပ်ရနိုးနိုး စဉ်းစားနေသည်မှာ ဆယ့်ငါးမိနစ်ခန့်ရှိနေပြီဖြစ်သည်။ ခြံရှေ့တွင် ကားရပ်ကာစောင့်ကြည့်နေသည့် ဆယ့်ငါးမိနစ်ပါထည့်ပေါင်းလျှင် စဝ်စံဦးသာ ဤခြံရှေ့သို့ရောက်နေသည်မှာ နာရီဝက် တင်းတင်းပြည့်ခဲ့လေပြီ။

"တင်းတောင်"

အားတင်းကာ bell နှိပ်လိုက်သော်လည်း လူထွက်မလာသေး။

"တင်းတောင်"

"သား ဘယ်သူနဲ့ တွေ့ချင်လို့လဲ"

ခွန်နှောင်း ဖခင်ဟု ထင်ရသည့် ဦးလေးတစ်ယောက်က ခြံတံခါးလာဖွင့်သော် ပြုံးရယ်ပြလိုက်ရသေးသည်။

"သျှန်ခွန်နှောင်းရှိလားဗျ"

"အော် သားအသိလား၊ သားကနေမကောင်းဘူး အိပ်နေတယ်ကွာ"

"ဟုတ် ကျွန်တော် သူ့ရဲ့ senior ပါ၊ ကျောင်းပျက်တာ စာလေးလာပို့ရင်းနဲ့ လာသတင်းမေးတာပါ"

"ဝင်လေ သား ရတယ်၊ ဦးလေးက သူ့အဖေ၊ သူ့အမေက ကျောင်းသွားတယ်၊ သူ့ကြီးကြီးက စျေးသွားတယ်၊ ဦးလေးပဲရှိလို့"

အိမ်ထဲအထိ ခရီးဦးကြိုပြုသော ခွန်နှောင်းအဖေက အလွန်ပင် သဘောကောင်းပါသည်။ ဦးလေးက ခွန်နှောင်း၏ အခန်းရှေ့အထိပို့ပေးပြီးနောက် "ဧည့်သည်အတွက် တစ်ခုခုလုပ်ဦးမယ်" ဟုဆိုကာ အောက်ထပ်ပြန်ဆင်းသွားလေ၏။

"ဒေါက် ဒေါက် ဒေါက်၊ ခွန်နှောင်း ကိုယ်ဝင်လာခဲ့မယ်နော်"

အိပ်နေသည်ဟုပြောသော်ငြား ခွင့်တော့ တောင်းမိပါသေးသည်။ တော်ကြာ ပိုင်စိုးပိုင်နင်း ဝင်သွားမိလျှင် မကောင်းပေဘူးမို့။

ပထမနှစ်ကျောင်းသားကလေး ခွန်နှောင်းသည် အလွန်ဆုံးရှိမှ ဆယ့်ခုနှစ် ဆယ့်ရှစ် အရွယ်။ အိပ်ခန်းကလေးမှာ ကလေးဆန်စွာ ကားအရုပ်လေးများ၊ ဆိုင်ကယ်ပိစိကလေးများ၊ lego များနှင့် toy story အရုပ်လေးများ ပြည့်နှက်လျက်။

အိပ်ယာခင်း အပြာနုနုကလေးအပေါ်တွင်မူ သျှန်ခွန်နှောင်းကလေးက မှောက်လျက်လေး နှစ်ခြိုက်စွာ အိပ်မောကျနေပုံရသည်။ ဆံပင်အုပ်အုပ်ကလေးများက မျက်တောင်ကော့လေးများအထိ ဖုံးအုပ်လျက်။ ပါးတစ်ခြမ်းကိုဖိအိပ်ထားသဖြင့် နှုတ်ခမ်းလေးက စူလျက်သား။