لم تكن خياري صيرت قراري (you weren't my choice but became my destination )

الحلقة الثانية والثلاثون

كان قد انهي تغير ملابسه واتجه الي باب الحمام كي يخرج ولكن كلامهما استوقفه ...خصوصا وهما يتحدثان عنه...

كانت قد انهت تغير ملابس بيرو لتحملها وهيا تتحدث الي زوجها ...

مني : عارف ... علي قد ما انا هموت من القلق علي بنتي ... بس الحالة اللي فيها فادي دي بجد تقطع القلب...

فتحي : ازاي يعني مش فاهم ...

مني : انت ما شوفتش وشه كان عامل ازاي ... دا كان اصفر زي الليمونة وكانه روحه مسحوبه منه وخلاص ... اللي يشوفه يفكره بعد الشر يعني ... اوقاته معدودة في الدنيا ...

فتحي : بعد الشر عليه ... ليه بتقولي كدا ... بس عارفة هو معذور ويمكن حالته اسوء مننا ...

مني : ليه يعني ... هيا اللي مخطوفه دي مش بنتنا والا ايه ...

فتحي : ايوة بنتنا ... بس سنة الحياة اللي احنا عارفنها بتخلي البنت تخرج من بيت ابوها وتروح لبيت جوزها ... واحنا بنتنا خرجت من البيت هنا بقالها تلات سنين ... يعني احنا اتعودنا علي غيابها وانها مش معانا ... لكن هو ... هو جوزها والطبيعي انها تكون موجودة عنده في بيته لحد ما ربنا ياذن بالفراق ... دي سنه الحياة ... والا ايه يا هانم ...

مني : ايوة معاك حق ... بس ما هيا ممكن تزعل ... تسيب البيت وتمشي ... يعني مش كل الوقت معاه برضو ...

فتحي : كل اللي بتقولي عليه دا انا فاهمه كويس اوي ... والحكاية بتبقا فترة وتعدي ... وبيكونوا عارفين كل واحد فيهم موجود فين ... وبيكون عارف انها راجعة له تاني ... بس في الحالة دي الموضوع اصعب منما تتخيلي ...

مني : ليه بقي ... يعني فادي مش زي كل الرجالة ...

فتحي : لا مش كدا ... فادي وجيني ... حالة عمري لا شوفتها ولا حشوف زيها ابدا ...

مني : ليه يعني ... مهما متجوزين زي كل المتجوزين ...

فتحي : هما اه متجوزين ... بس مش زي اي اتنين متجوزين ... دول لما تشوفيهم تحسي انهم روح واحدة... وعقل واحد واحساس واحد ... بس في جسدين ... فهمتي ...

مني : ياههههه ... دانت فاهمهم صح وانا مش واخدة بالي ... بس عرفت دا كله منين ...

فتحي : فاكرة يوم لما كنا عندهم وشديت انا وفادي وانتي اخدتي البنت ونزلت وجيني يوميها واجهتني ...

مني : ايوة فاكرة ... هو دا يوم يتنسي ...

فتحي : يومها لما وقفت قصادي وهيا بتدافع عنه ... حسيت ان الكلام اللي بتقوله ... هو نفسه الكلام اللي هو كان هيقوله لو كان هو اللي قصادي ...

مني : للدرجة دي ...

فتحي : للدرجة دي واكتر ... بنتك يومها ما كانتش هيا نفسها جيني اللي ربناها وعرفناها ... كانت واحدة تانية ... عندها قوة واصرار وتحدي ... كنت مستغربها في الاول بس من كلامها فهمت السر في تغيرها ...