غرام العالم الاخر

غرام العالم الأخر (٢٢)

(البارت الثانى والعشرون ) غرام العالم الأخر
بقلم /ندا مصطفى عبد السلام
ــــــــــــــــــــــــــــــــــــــــــــــــــــــــــ
كادت ورد انت تسقط من الصدمه : انت بتقول اى ...بابا انت اتقتلت ازاى ....مين قتلك ....وده ليه علاقه باللى بيحصلى دلوقتى
فاروق : اى اللى بيحصلك احكيلى
ورد بدات فى البكاء واحتضنت والدها مره اخى وقالت : احكيلك اى ولا اى بس يا بابا انت وحشتنى قوى وغيابك فرق قوى معايا عدم وجودك معايا شبه مدمرنى
مرر فاروق يده بين خصلات شعر ورد وقال : متخافيش يا حبيبتى انا جنبك اهو احكيلى بس وانا هساعدك
فاروق بص لنور وقاله : انت تعرف ورد
نور : ايوه ياعمو فاروق بس والله مكنتش اعرف ان هى بت حضرتك
ورد : انتو تعرفو بعض
نور : ايوه عمو فاروق ده راجل طيب الكل هنا بيحبه بس انتى مقولتليش اسمه عشان كده معرفتهوش
فاروق : طب يابنتى اقعدى كده واحكيلى براحه اى اللى حصل معاكى يمكن اقدر افيدك او اساعدك
ورد : مفيش غيرك هيقدر يساعدنى
فاروق : لا يابنتى متقوليش كده ربنا قادر يساعدك طبعا .... قوليلى ياورد انتى بتصلى
ورد اتكسفت من السؤال ده وردت عليه : بصراحه انا مقصره قوى مع ربنا ... انا مبصليش .... بس عندى ظروف يا بابا
فاروق : مهما كانت الظروف يابنتى شكلها اى او حجمها كبيره او صغيره مينفعش ننسى ربنا ولو مش عارفه تصلى على الأقل استغفرى ده الأستغفار مفتاح الفرج
ورد : حاضر اوعدك انى هصلى وهستغفر
فاروق : طب احكيلى يلا
بدأت ورد تقص عليه من الألف الى الياء
*******************************
إسلام : بس هنا على اى جنب لو سمحت
نزل إسلام من العربيه امام عيادة الدكتور شريف عبد الله دكتور نفسانى
اتردد إسلام فى الدخول ولكن كله يهون امام حبيبته ورد
دخل اسلام للدكتور
دكتور شريف : اهلا اهلا اتفضل يا إسلام
إسلام : اهلا يادكتور
شريف : اتفضل اقعد
قعد إسلام وكان متوتر جدا ومحرج
شريف : طيب يا إسلام متتوترش وعايز اعرفك حاجه مش معنى انك جيتلى هنا تبقى مجنون زى ما الناس بتقول يعنى لا ...بل بالعكس انت لو مجتليش هنا هيتطور المرض اللى انت بتعانى منه وهتبقى مجنون بجد فمافيش داعى لأنك تكون محرج
هدأ إسلام قليلا من كلام الدكتور
شريف : تقدر دلوقتى تقولى انت بتعانى من اى
إسلام : الغضب والعصبيه .... بحس نفسى شخص تانى لما بغضب وبتعصب مبعرفش نفسى ....بزعل اللى قدامى بكلامى لانى مش بعرف اسيطر على غضبى وممكن اقتل حد فى لحظه غضب ولما افوق اندم
شريف : طيب اولا كده يا إسلام العصبيه والغضب مايفرقوش عن بعض كتير الأتنين شبه بعض بس بتفرق فى حجات صغيره العصبيه دى بسبب انك شخص حساس جدا وبتحب التملك ولو حد منفذش طلبك فورا بتتعصب
إسلام : فعلا ده اللى بيحصل
شريف : العلاج عندك انت انت اللى هتعالج نفسك عشان العصبيه ممكن تخسرك اعز الناس ليك وممكن تخسرك شغلك كمان
إسلام : وانا جيت لحضرتك عشان اتعالج
شريف : يبقى تركزمعايا الموضوع بسيط بس محتاج تركيز رقم واحد انت هتبعد عن الناس اللى بتستفذك وبتنرفزك وقرب من الناس اللى بتدعمك
ثانيا لازم لو وراك شغل تخلصه كله فى وقت واحد ومتراكمهوش لأن التراكم هيخليك تفكر وده هيخليك تشعر بالتوتر وبذلك هتتعصب وتغضب على اتفه الأسباب
ثالثا لما تحس نفسك متعصب او غضبان استعيذ بالله من الشيطان الرجيم وحاول انك تغير مكانك اللى انت متواجد فيه او تغير موضع جسمك يعنى مثلا لو انت قاعد قوم اقف ولو انت واقف اقعد
رابعا بقى وده الأهم لما تتعصب قوم اتوضأ لان الماء بيخفف من تأثير الشيطان اللى بيحاول دفعك للغضب والعصبيه
خامسا عود نفسك انك تتكلم بهدوء وتسمع لوجهات النظر المختلفه وتحترمها علشان كل شخص مننا ليه وجهة نظر غير التانى والنقاش يا إسلام مش ساحة حرب وإنما اختلاف الرأى لا يفسد للود قضيه
خليك دايما فاكر ان غضبك وعصبيتك ممكن تخسرك الشخص اللى واقف قدامك وكتر من استغفارك والتسبيح عشان السكينه الداخليه وقرب من ربنا عشان يقل تعلقك بالدنيا فمتخرجش عصبيتك على امر من امورها واهم حاجه انك تاكل حجات طازجه ومفيده وانك تنام كويس
ونفس الكلام بالنسبه للغضب لاكن الغضب ده مجرد شعور طبيعى بيصيب الانسان فى بعض الاحيان نتيجة لظروف خرجت عن السيطره والغضب بيكون الطريقه اللى بينفس بيها الشخص عن ما يشعر به من مشاعر سلبيه داخليه وده طبعا بيؤدى الى انه ممكن نكسر اى شئ حوالينا ده غير ان الغضب فى بعض الأوقات بيصيب الشخص بأضرار جسديه
إسلام : اضرار جسديه ازاى ؟
شريف : زى السكتات والجلطات الدماغيه وعلشان كده لازم نسيطر على الغضب علشان النتائج متكونش مش كويسه
إسلام : طب ازاى مغضبش او ازاى اسيطر على الغضب
شريف : الأجابه سهله وبسيطه بس عايزه تركيز وإراده من جواك انك فعلا عايز تسيطر على غضبك
اولا كده عود نفسك كل يوم الصبح اول ما تصحى تاخد نفس عميق وتكلم نفسك داخليا وتقول ان كل اللى هيحصل انهردا هيقضى ان شاء الله ومفيش داعى للعصبيه
حاول تسترخى على قد ما تقدر اول ما تحس انك هتغضب
وزى ما قلتلك حاول تغير المكان او تغير الموضوع اللى بتتكلم فيه
استنشق هواء نقى
وطبعا استعيذ بالله من الشيطان الرجيم علشان الشيطان بيوسوس للشخص عشان يذيد من حجم المشكله عشان يوقع الفتنه بين الناس
اقعد مع نفسك وفكر فى المشكله هل هى تستحق كل الغضب ده ولا لأ ... وفكر كويس قبل كل كلمه هتنطقها ... حاول انك تفكر فى المشكله بشكل إيجابى وسليم وتخيل انها مجرد شئ مكنش يقصدك بشكل شخصى ولو منجحش الموضوع فمن الأفضل انك تصرف التفكير عنه
وبردو متنساش انك تغتسل بالمايه البارده عشان تطرد وسواس الشيطان
ابعد عن الأشخاص اللى بيستفذوك وتخالط مع الناس اﻷيجابيه
فكر نفسك دايما ان الغضب ليه اضرار على نفسك وعلى كل اللى حواليك وانك ممكن تاخد قرار ومتقدرش ترجع فيه
وطبعا فى تمارين جيده للتنفس لازم تعملها لو حابب تجيلى فى جلسه تانيه
إسلام : والله يا دكتور انا فعلا مش فاضى انا شاب بشتغل وبدرس فى نفس الوقت معنديش وقت خالص
شريف : يبقى خلاص تعمل اللى قلتلك عليه وإن شاء الله مفيش داعى للتمارين
سؤال يا إسلام
إسلام : اتفضل
شريف : انت لاحظت انك عصبى امتى
إسلام : ياااه ده من وانا صغير جدا بتعصب بسرعه وبغضب على اتفه الأسباب
شريف : طب اشمعنى قررت دلوقى تتعالج
إسلام : الاشخاص اللى بحبهم بيتئذو منى وللاسف انا بتسرع فى قرارى وانا متعصب وده بيخليهم يبعدو عنى مهما حاولت اقرب المسافات بينا
**********************************
فاروق : الكلبه الخاينه والله لأوريكى يا صفيه ازاى تعمل فيكى كده ولا منى ماشى يامنى
ورد : بابا انا عايزه اعرف مين قتلك انت مش لازم تفضل هنا انت لازم روحك تتحرر انا لازم انتقملك واحررك من هنا وتروح لربنا انا مش هقدر اسكت بعد ماعرفت انك اتقتلت
فاروق : نفسى ياورد اتحرر واروح عند ربنا ..... ثوانى يابنتى هروح مشوار ومش هتأخر عليك وهحكيلك كل حاجه ..... نور اقعد مع ورد وخلى بالك منها
مشى فاروق
ونور قعد جنب ورد نفسو يحضنها نفسو يبوح باللى فى قلبو هو مش قادر يشوف حبيبته وهى بتعيط كده
نور : انتى كويسه
ورد : لا
نور شعر بوخزه فى قلبه فأغمض عينه
نور : ورد انا اسف
ورد : ههه عادى هى جت عليك ما انت دبستنى فى إسلام خلاص ..... انت كنت شايفه لأنك كنت قدامى وهو ورايا وشوفته ومردتش تقولى ... انت كنت قاصد ان هو يسمع الكلام ده ويفتكر انى بكلمو هو لأنك طبعا محدش شايفك .... انت قاصد تكسر قلبى .... طب بتقولى بحبك ليه من الأول ليه بتخلينى احبك وتسيبنى انت مش متخيل انا موجوعه قد اى وجاى تسألنى انتى كويسه ولا لأ جاى تقولى اسف اعمل بيها اى دى هتشفيلى جرحك اسف دى هاااا رد عليا
وفى اللحظه دى نور مقدرش يسيطر على نفسه ونسى كل شئ عايز يعملو واخد ورد فى حضنه جامد لاكن هى كانت بتعافر عشان تبعد عنه ولاكن هو كان اقوى منها واستسلمت فى الاخر لحضنه وظلت تبكى
ورد : انا حاسه بحبك انا سامعه نبض قلبك بينبض اسمى طب فى اى مش عايزنى ف حياتك ليه
نور : مش عايزه تفهمى ليه انى ميت
ورد : ميت بس روحك عايشه ... قلبك عايش وبيدق وبيحب كمان
نور : تقدر تقوليلى أخرة الحب ده اى .... تتخيلى هيكون جواز
صمتت قليلا لتفكر وقالت : وليه لا انا بحبك وانت بتبحنى واللى بيحبو بعض بيتجوزو
نور : حبيبتى هو الهبل اشتغل .... ورد انا مش هقدر اسعدك كفايه ان انا مشوه لا كمان مش هينفع نخلف عشان انا ميت افهمى ياورد ..... انا بحبك وانا اكتر حد هتعذب عشان انا حبيتك بجد انتى اللى رجعتى قلبى ينبض بعد ماكان مقفول من سنين
ورد : يعنى اى بردو ..... افهم ان انا عايزاك انت مش مهم عيال عندى شكلك حلو مش مشوه ولا حاجه انا حابه كل تفصيله فيك والشكل مش بيهمنى
هنا جه فاروق
نور : طب اسكتى ياورد عشان عمو فاروق بيقرب مننا
ورد : هتجوزنى ولا لا
نور : اسكتى ياورد
ورد : قلت هتحبنى وتتجوزنى ولا لا
نور :اسكتى يازفته
ورد : تمام انا هقول لبابا انى انا وانت بنحب بعض
فاروق : معلش يا حبيبتى اتأخرت
ورد : بابا انا كنت عايزه اقولك على حاجه تانى .... وبصت لنور
نور بتوتر : ورد بتحب زميلها إسلام وهو اتقدملها وهى وافقت
ورد نظرت اللى نور وقلبها تحطم بالفعل وكانت تشعر فى هذه اللحظه انها تريد قتل نور ...لماذا هو يفعل بها هكذا ... مره يتركها ومره يضمها مره يكذب ويقول لى احبك والمره الاخره يريد الانفصال
فاروق : بجد يا حبيبتى الف مبروك كان نفسى اكون عايش يا حبيبتى واحضر معاكى اهم يوم فى حياتك
ورد فى نفسه : ( ﻻ يا بابا ده اسوء يوم هشوفه فى حياتى )
***************************
هنا حصل شئ غريب بين ابطال القصه كل شخص بيحب قرر ان يقول للطرف التانى واللى يحصل يحصل
مريم بعت رساله لإسلام واتجرأت لأول مره ...الرساله بتقول : اول حاجه انا حابه اعتذر عن كل اللى حصل بينا اخر مره بس كنت عايزه افهمك انك كل ده صدر عن غيره ... ايو غيره متستغربش ... غيرة الحب ايوه بحبك ... بحبك ومن اول يوم شوفتك ف الكليه وكنت محرجه جدا انى اكلمك لأن التعامل ما بينا منعدم....كنت بحاول الفت انتباهك.... بأنى اكون اكتر بنت جميله ...اكتر بنت متميزه .... اى حاجه بس مكنتش بتاخد بالك
اتمنى يا إسلام متكونش بتحب ورد واكون اللى شوفته من نحيتك تجاه ورد هو مجرد تعامل انسانى وانك بتعتبرها زى اختك لأنى انا بحبك وهى متستحقش حبك انت تستحقنى انا.....مستنيه ردك
*****
فى نفس الوقت على قرر انو يعترف لمريم بحبه ليها لأنو مش قادر يتحمل فعلا
وكان مضمون الرساله : ازيك يا مريم اسف لو ازعجتك عشان انا عارف ان انتى مش بتكلمى شباب وكده وبالرغم من انى عارف دخلت وكلمتك بس هستأذنك تسمعى كلامى للأخر .... فاكره زمان فى الحى البسيط اللى كنتى عايشه فيه كانت احلى ايام بالنسبالى انا على ... على اللى كنت جارك وكنا بنلعب مع بعض على اللى انتى كنتى بتلبسيه فساتين وتعمليه عروسه ده شئ محرج ليا انى اقول كده بس عشان اعرف افكرك هههه المهم....بصراحه كنتى كل يوم تكبرى قدامى وتحلوى فى عينى اكتر يوم عن يوم بحبك اكتر ومش عارف اعترفلك لانى كنت مجرد طفل وبعدين انتى عزلتى ويشاء القدر بجمعنا تانى فى الكليه انا عرفتك من ضحكتك الهاديه من ملامحك البريئه من عنيكى الى بتدوبنى وكنت عايز اعترفلك بس انتى مشدداها قوى يعنى مبتتكلميش مع حد فى الكليه كتير وده عجبنى فيكى اكتر بصراحه ....انا بحبك يامريم وشاريكى برغم انى عارف انك معجبه ب إسلام ومتسأليش عرفت ازاى عشان عيونك فضحاكى ومحدش هيفهمك قدى .... بس انا لو شايف سعادتك مع إسلام مكنتش بعتلك الرساله دى ..... إسلام ده اكتر من اخويا وانا مردلهوش حاجه وحشه بس عايز اعرفك ان إسلام بيحب ورد وورد كمان بتحبه وهو اتقدملها وهى وافقت وهيتخطبو قريب وبعد التخرج هيتجوزو .... انا بحبك وعايزك تكونى ليا
مستنى ردك
*******
كان فى نفس اللحظه إسلام بعد خروجه من عند دكتور شريف حجز فى مكان جميل جدا ورومانسى عشان يتعشى مع ورد ويعترفلها بحبه ويتقدملها بطريقه رومانسيه
******
حازم بعت رساله لهناء بأن هو تعبان ومحتاجها جنبه
ـــــــــــــــــــــــــــــــــيتبعــــــــــــــــــــــــــــ
بقلم /ندا مصطفى عبد السلام

ياترى إسلام هيوافق بطلب مريم
ياترى نور هيقنع ورد ازاى انو مينفعش حب بينهم
ياترى مريم هتسمع لعلى وهيكون رد فعلها اى
وردت فعل ورد بعد اتعرف مين قاتل باباها ومين
وياترى ورد هتتقبل عرض إسلام
كل حاجه هتبان البارت الجاى بس عايزه تفعال بتوقعاتكو