الصولجان

تكمله ح/٢

دخل عليها الملا واندهش لحالتها وارتباكها نظر للارض استغرب من غير ان يفهم  الي شافه رفع نظره الها وهو عاقد حواجبه بغضب
_ شما  هذن تراچي فطم شيسون عندج
نظرتله بخوف وتوتر وهي تنزل للكاع تلتقطهن
_ انه احاجيج شيسون عندج تراچي فطم
_ ملا لا تجبرني احجي انه حالفه
_ حالفه على شنو
_ ملا كل الي اگدر اگوله انه ماخذيتهن شخص سلمنياهن من برا البيت
وترجاني  اردهن لمكانهن لكن انت سبقتني واشتريت وحده جديده لفطم
_ من الي مو من البيت
استغرب الي سمعه الملا وقلق
بنفس الوقت
_ ملا الله يخليك لا توگعني بالمشاكل ويا ناس عزاز عندك وعندي
صفن الملا واحتار من هم العزاز استبعد ان تكون العلويه طرف بالموضوع لانه يعرفها صادقه
ومن كان يمهم حلفت ان دورتها وما لگتها بقى محتار بكلمة مو من البيت قصدها غريبه فكر
_ماكو  غير الحجيه  لكن مستحيل تسويها
سأل نفسه  
-لنفرض الحجيه عليش تسلمهن لشما خو هي تذبهن بالحجره بأي مكان حتى تلگاهن فطم
استبعد الحجيه والعلويه وبناته المتزوجات هن خوات فطم واحرص الناس عليها
بقى الملا محتار وقلبه مامرتاح لكلام شما وبنفس الوقت ما يريد يسئ الظن بيها يمكن تكون صادقه
اتحير والوسواس اكل قلبه وبنفس الوقت تردد يعرف منو المقصود خوفا ان ينصدم بذمه شخص عزيز
قرر يترك الامر لله من دون ما يعرف منو المقصود بالكلام
انتبهت شما لصفنته وتقدمت منه مدت ايدها تسلمه التراچي
_ هاك ملا حتى ابري ذمتي الي عليه وصلت الامانه
بالاول گلها
_ لا خليها يمج ... لكن بعدها تراجع واخذها من ايد شما
من تذكر اتهام فاطمه لكميله
وحب يرضي العلويه وكميله ويعلم فاطمه درس ان ما تجرح احد او تتهمه بدون دليل
وقرر ينتظر جيه العلويه وكميله وينفذ فكرته
طلع الملا من الحجره وهو منهك من التفكير
ابتسمت شما بعد ان حست كدرت تحتال على الملا وهي تضرب عصفورين بحجر
_ وهاي خلصت من العلويه اذا زعلت  من كلامي وبعد مامرت
الملا يرجح السالفه لان كميله اخذت التراجي والعلويه رجعتها
فشلانه من عملة بتها
وبالفعل هذا الي صار انبه الملا  على غياب العلويه عن الحظور لبيتهم وكم مره ادز سجاد حتى ياخذ فاطمه لعدهم ويرجعها بليل
احتار الملا بأمر العلويه وبدا يستنتج ان كميله هي الي اخذت التراجي والشخص العزيز من خارج البيت الي قصدته شما هي العلويه
احتار الملا بأمره بين مامصدك العلويه تحلف وتحاول تخفي
غلط بتها وبين القصه الي ذكرتها اله شما
لا يكدر يتركها بدون ما يستفسر ولا يكدر يستفسر خاف تطلع السالفه صدك (ويحرج العلويه) تاليها يتسبب بزعل بينها وبين  شما لان سرتها وطلبت مساعدتها وتصور هي الي فتنت عليها وذكرت اسمها كدامه
_اه يا ملا يوسف شنهي هالبلوه الي طاحت على راسك
يارب انت دلني  على الحقيقه لا تخلي الوسواس يلعب بعقلي واظلم احد
قرر يتراجع بالوقت الحالي عن ان يروح لبيت العلويه ويا فطم ويهدي لكميله الترجيه
فكر ان يمر يشوف العلويه لحاله  وهو بطريقه الها بقى يفكر شلون يعرف حقيقه هالامر من العلويه
ولمن وصل ورحبت بي العلويه لان مشتاقتله
_ خويه والله زارتنا البركه لو تدري شكد  متانيه اشوفك
_ انه عندي عتب عليج علويه ماهي عوايدج تمر ايام وانت مامعتبه  باب بيتي انه  عضيدج ومن حقي افهم شصاير وياج
استبطيتج گلت امر اشوف خيتي شنهي الي مانعها عني
_ يا خويه بعد انت تعرف مشاغل الحياة والبيت وفطم سجاد يجيبها لي يوميه  تبقى عندي لليل واردها الكم بعد ما الها داعي امر  وانت يا خويه اسأل عليك الحجي يطمني انت بخير وبعافيه
_ علويه لاتخلين شي او شخص يدخل بيني وبينج انه ماعندي
غيرج بهالدنيا ولا انت عندج غيري
انه ستر وغطى عليك يا خيتي مهما كان وحصل انه وياج واحد لا ادخلين بيناتنا ثالث امرنا بينا
فهميني دخيل جدج شنهي بيج تراني قلبي معصور صارله ايام افكر بأمرج ولو ما روحي فرفحت على شوفتج جان بقيت انتظر شوكت تحنين على يوسف وتجين لحد بابه
_ ياخويه انه ما عندي شي يمنعني عنك بس هاي كميله شوي حركه وانه ما اريدن تصير مشاكل بسببها هن صغيرات جوه عيني
ساعة يلعبن ساعة يتغاربن انه اعرف احنن قلوبهن على بعض ومأمنه عليهن كدام  عيني  انت بعد تظكر  يوم الي طلعت فطم من البيت  وتاهت بسبب ظنها ان كميله اخذت تراجيها  خويه انه اعرف شما مره تحب راحه وحقها تريد حق ولا باطل البيت بيتها تريد ترتاح بي ماهي ملزومه بهوسه البنيات وفطم ما ترضى تلعب وحدها وكميله نفس الشي انه تراوالي الاحسن يبقن يمي  كل ما في الامر انه ما اريد يحصل سوء فهم ومشاكل من ورا البنيات والكبار يتخاربون خويه لا تصعبها وهي سهله
انه اعرف اتصرف لا تخاف انه احرص منك عليك اطمئن انه اختك مايفرقني عنك شي مهما حصل  بس انت لا تفكر وتهتم ريح راسك انت تدري بخيتك حقانيه وما ترضى بالباطل لجل هَج  خليني براحتي لا تاخذ الامر بحساسيه وسوء ظن
_ ماشي خويه انه المهم عندي اطمنت انت بخير وما بقلبج عتب علي
_ اها يوسف ردينا  جا لو عندي عتب شنهي  اضم عليك لو استحي منك وما احاجيك يا خويه انه شعندي غيرك الله لا يجيب زعل وعتب بيناتنا ولو شما يصير ويبدر منك انه قلبي وياك ما يشيل عليك 
______
هالزياره ما ريحت الملا ولا حصل على اجابه لتسأولاته وشكوكه
وبقى متحير ليش العلويه بقت مصره انت ما توصل لبيته  وحاولت تخفي شي
_ انه اعرفها لخيتي ماهي حقوده ولا صاحبه مشاكل ولا تكذب
معقول سالفه الترچيه تكون حقيقيه وتطلع كميله هي الي خذتها
والعلويه فشلت لجل فطم رادت تضيع بسبب كميله ردت التراجي
لشما وطلبت منها تساعدها ترجع التراچي لمكانها بدون زعل ولا مشاكل وبسبب هالموضوع بعد ما وصلت للبيتي  ولا دزت كميله لجل خجلانه من شما بسبب فعله كميله
ماكو غير هذا السبب 
بعد هذا الاستنتاج ترك الملا العلويه براحتها  وصار هو يروح يزورها كل كم يوم
اما فطم رجعت شبه مقيمه ببيت العلويه يوما ادز عليها من الصبح
ما يردوها لاهلها الا للمغرب
ومن هالمرات بيوم من الايام  كناين الملا فوگ بالسطح وحده ادگ
للثانيه وشم
صعدت فطم يمهن بين ما تنتظر سجاد يمر عليها
ثار فضولها وهي تشوف
نسوان اخوتها يدگن بالفحم ويبزن الابره على ايديهن حتى يطلع الدم  وبعدها يخلون عليه طوز الفحم ياخد الجلد لون
انتبهن عليها مركزه وهي تحاول تفهم وتفسر الي ديصير ويا بز الابره بالجلد ترفع عينها لملامحن تريد تعرف اكو ألم
ضحكن وگاللها
_ فطم ليش ما تخلينا نسويلج وشم على ايدج
_ اخاف اتأذى
_ لا ما يأذي
_ سحبوا ايدها وعلى سطح كف ايدها دكولها وشم مثل النجمه او الزهره
فرحت بي برغم تألمت
نزلت للحجيه  مخبوصه تريد تراويها الوشم
_ يمه المازه يمه المازه
_ ها فطم يمه انه بالحجره  دا اكنس
دخلت فاطمه للحجيه ومكان الدك بي ورم ولونه ازرگ
لكمت الحجيه على خدها
_ شبيها ايدج يمه
— يمه دكولي وشم
_ صخم الله وجهن منهو گلهن يسونلج مايصير يمه بعدج صغيره
عيب اليوم الملا لا شافه يعتب علي  انه الهن 
_ ارتعبت الحجيه من منظر ايد فطم الصغيره بنصها الوشم وهو
منتفخ وبقت تخلي عليه ثلج حتى بيومها ما دزتها ويا سجاد لبيت العلويه خافت لا العلويه تزعل منها وتعاتبها ان ماماخذه بالها من الطفله من تنتبه على الورم
_ يمه  سجاد اليوم فطم تريد تروح لبيت السيد  لو ردينا من وكت انه اجيبها الكم واذا بطينا بعد خليها على باجر
وبالفعل الحجيه اخذت فطم وودتها لبيت السيد
بعد ما وصلت ورحب بيها السيد والعلويه وبيدها فطم
رفعت ايدها كدامهم تراويهم الورم
_ سيد انه ما اريدن احجي وي فطم لانها ما تسمع كلامي
اريدك انت تگلها هذا الشي صح تسوي بدون ما تسألني او تسأل ابوها
يصير سيد يجي الملا يلگى ايدها هج شيگول عندي ما ماخذه بالي من بنيته
_ التفتت فطم للحجيه المازه وهي مبتسمه بتمرد بسبب ابتسامه السيد وهو يفهم طبيعه هالطفله العنيده ويبتسملها
بين الفرحان ان شخصيتها قويه وعدها شجاعه وبين افتعالها للمشاكل بدون قصد بين فتره والخ للحجيه
_ اها حجيه انت روحي وي العلويه حضرولنا استكانه چاي بين ما انه احجي وي فطم
_ جدي انت ليش ما تاخذين كلام  شنهي الي مسويته بأيدج
ابتسمت فاطمه كعادتها البشوشه وهي تراوي الوشم بفخر كأنه مسويه انجاز
_ جدي شوفه شكثر حلو ابوي لو شافه ينجن عليه
_ ولو شافه وزعل منج شلون
_ عودك اغسله بالماي والصابون
ضحك السيد ضحكه من كل قلبه وهو يحتضن هالطفله بحب ابوي
_ بويه فطم انت ياهو اليكدر عليج هذا ما ينشال يبقى طول العمر لما تصيرين عجوز
_ يعني مثل امي العلويه
_ ابتسم الملا وهو يهامسها
لا سمعتج العلويه تگولين عليها عجوز تزعل كل النسوان بويه
يردن يبقن صغيرونات مثلج كدامن زلمهن
_ بس جدي انت هم شايب
_ هههههههه بويته تدرين انه شكثر احبج بس احب صراحتج ودهريتج بالكلام
الله يكون بعونه الي ياخذج يا فطم كون يطلع مثل حد السيف يله
يكدر يجاريج
بعد ان  اتحايل عليها السيد بالكلام بطريقه نصح مبطن ان ما تغامر وتنفذ الي يجي براسها من دون ما تاخذ اذن الكبار
اترخص من الحجيه المازه واخذ فطم لعند الملا  دخل عليه وهو يلقي السلام
رد الملا السلام  وهو مبتسم لزهرته
_ سيد خو ما متعبتك فطم
_ اها ليش اكو مثل فطم يا يوسف بنيه حبابه ومأدبه
بس احنه اليوم جايينك لان فطم تريد تگلك سالفه خاف تزعل منها لان سوتها بدون ما تگلك وتگل للحجيه
_ بويه فطم شنهي الي مسويته
_ مدت ايدها وهي خجلانه وحاسه بالذنب
فزع الملا  وتقدم منها يتلمس ايدها
_ بويه باهو الي سوالج الوشم
_ ردت بطريقه للحظه تحولت الطفله الى سيده مسنه وهي تتكلم
وتحرك ايدها  وتذكر اسماء كناين الملا
_ بويه هن ما الهن دخل انه گلتلهن اريد تسونلي وهن سمعن كلامي مايدرن انت وامي المازه ماترضون
_ بويه انه شلون بيج  انت ليش ماتسمعين كلام الحجيه
المره لو زهگت من افعالج تراها  تهج
_ بويه هي ما تريد تهج بس تخافن منك لا ما ترضى على الوشم
شوفه شكثر حلو
_ ابتسم الملا وهو يحاول يضبط اصراره وموقفه من الموضوع
لا ماهو حلو لبنت صغيره
وبعد لا تعيدينها يا فطم  لان لو عدتيها  اجويج بمكان الوشم
لو ردتي تتملعبين من يجن خواتج خلهن يخللج حنه
رجعت فاطمه للبيت وهي تحس بالندم بقت تحاول تغسل ايدها
مرات حتى تزيل الوشم والانتفاخ لكن من دون فايده  نامت
وهي متعبه وحزينه
لحد ما  فزت الحجيه على هذيان الطفله توقعت بالاول
تكون حلمانه
لكن من تقربت يمها لگتها تهذي ووجها احمر
خلت ايدها على گصتها نار وواجه  گامت الحجيه على حيلها
وجابت فوطه بيضه مخمل خفيف وطاسه مي
وبقت تسويلها كمادات  لحد ما رادت تغيرلها ملابسها لان بدت الصخونه ( الحراره ) تنزل وتعرقت الطفله انتبهت على ايدها منتفخه بصوره مخيفه
بقت محتاره وقلبها واجعها لا يصير بالبنيه شي
ماكدرت تصبر تركت فاطمه وراحت تركض لحجره الملا وهي
تطرق الباب عليهم
_ فزت شما ونزلت من فراشها مفزوعه  فتحت الباب وهي تحاول تصحصح وتركز
ها حجيه خيرج
_ يمه البنت ايدها وارمه وانه ما اعرف شسويلها  صحيت لگيتها مصخنه سويتلها كمادات نزلت حرارتها
_ هسه هسه اصحي الملا
_ بعد ساعة تقريبا دخل الملا ويا الشيخ عابد ( يداوي الناس بالاعشاب والطب النبوي)
سوالها خلطه وخلاها على ايد فطم ولفها عليها
بقت فطم مريضه كم يوم لكن بهالايلم تعلمت درس قاسي لطفله بعمرها
تعلمت ما تجازف ولا تغامر بدون تفكير واستأذان  وصار عدها نوع من الخوف والحذر
وهنا لكت شما فرصه تحرض الملا على المازه  (استغلت قلقه وحزنه على حال بنته وهي واصله لهالحاله  )حتى تتخلص منها
وبدت تخطط  وتنفذ
_ والله يا ملا هالمره كبرت بعد مدري بيمن حايره دوم تصفن وتاركه البنت وهاملتها وهاي احنه يوميه بالهباطه على فطم
انه بعد ما اامن بالمازه ابقي فطم جوه عيني لا يصير بهاليتيمه  شي وناكل برواحنه
تأثر الملا بكلام شمه بساعتها لكن سرعان ما بقى يدافع عنها
ويذكر مواقفها ومحاسنها ومداراتها لبنته وتعلق فاطمه بالحجيه
من شافت شما الموضوع ما اخذ مجال بدماغ الملا قررت تخطط لشي اكبر
_ وبعد ايام من استعادت فاطمه عافيتها بينما الحجيه كاعده تظفر بشعر فطم
دخلت عليهن شما
وطلبت من فطم تروح تلعب عدها حجي ويا الحجيه
_ حجيه انا محتاجه مساعدتج بسالفه
_ كولي انه حاضره
_حجيه راح اسرج سر بس تحلفين ما تحجي لاحد غير الي اگلج عليه
_ قلقتيني يا شما
_ حجيه العلويه ردتلي التراچي من مده طويله لگتهن عند كميله بيوم الي اشترى الملا تراچي جديده
وانه من ذاك الوكت لليوم ماكدرت اتصرف واساعدها والمره بعد ماعتبت باب البيت والملا دوم مقهور مايعرف السالفه وظن بيه سوء يتخيله انه غاثه العلويه وهي زعلانه مني ماتوصل للبيت
وانه واكعه بين حانه ومانه لا انه كادره اگله العلويه جابت التراجي ومنها خجلت وبعد ما اجت  ويفتهم السبب  واخلص من سوء ظنه
والمصيبه ضيعت التراچي يعني ما راح يصدكني مدري وين خليتهن بصره ووحده من البنيات ذبتها بالزباله فص مخل وذاب
وانه كلت اشتري مثلهن وابري ذمتي لكن ما اامن بأحد غيرج على سري
وبنفس الوقت مايهون عليه هالعشره اريد اگلج شي
_ ترى العلويه حاجيه ويا الملا بسالفه تخصج بس امانه احلفي ما تجيبين سيره لاحد ليوم الدين
بعد ان حلفت الحجيه بدت شما تسرد عليها اكاذيب من تأليفها وتحرضها على العلويه
_ العلويه تحب فطم وهاي صار كم مره البنت توكه بمشاكل هي ما ترجحها لان صغيره تگول الحجيه كبرت بعد مو حمل شغل وتربيه
وبدت تخاف على البنيه وطلبت من الملا يحاچيج شكلهم يردون يجيبون مره ثانيه لو العلويه تاخذ فطم عدها مره ثانيه بس حسيت الملا خجلان منج  والعلويه دتلح عليه انه اشهد انج مداريتها بس المره  ماتدري هم حقها مو كدام عينها مداراتج بعد تسمع بيها ساعة تايهه ساعة واگعه ورجلها مكروده وساعة ايدها وارمه وتنام بالفراش ايام لحد ما طيب  تتخيل انت ما تدرين عنها
انا كلت امهدلج السالفه حتى يوم الي يحاچيج الملا  ويكلج ردي لاهلج
ما تنقهرين وتشيلين بقلبج عليه بعد يا المازه العالم الها الظاهر
مايغزر بيهم لو تعلگين العشره شمع اسأليني انه صارلي عمر
اداري واباري وما يصيبني منهن غير سوء الظن وهاي العلويه يوم الي نختني لبيت على حساب نفسي وادري الملا ظالمني لكن ما اكدر افضح سر اخته
_ يمه انه هنا اشتغل عندكم  وحقه الملا يعتب هو والعلويه عليه
لو انه ماخذه بالي ما كان البنت وصلت الموت لاسامح الله كان تسممت لو ما رحمه الله
انه لا اريدن اقهر احد ولا اريدن اخجل احد انه هالايام ورا ما يطلع الملا اخذ بقچتي وارد لهلي 
_ بس حجيه انه نخيتج تساعديني
_ شلون
_ اريدن منج تاخذين كم قطعه ذهب تبيعيهن لي عند الصايغ يعقوب وتشترين ترچيه نفس ترچيه فطم اردها للملا وباقي الفلوس
فد يوم اخذ فطم اخذلها قطعه على مرامها هديه بيهن
_____
نفذت الحجيه كل الي اتفقت  بيه ويا شما
وبعد يومين افتعلت  شما مشكله ويا الملا  بليل حتى تفتح موضوع التراچي ويا
وافتعلت العصبيه والانفعال والتحجج على الملا انه هو دائما يظلمها ويطن بيها السوء
حتى بدا يستفسر منها
_ بشنو انه ظالمج لو سئت الظن
_ هن يادمكثرهن ملا اخرهن سالفه التراچي انه ما اريدن اسوي مشاكل لهيج اتحمل واسكت  بس الله هم ما يرضى الانسان ينظلم
انه ردت اساعد الحجيه جابتهن الي كالت العلويه سلمتهن الها حتى تخليهن بالغرفه وهي  ما تريد تتحمل المسؤوليه تخاف تنبلي بيهن طلبت مني انه اتصرف وانت جبت غيرهن 
انبو انه جبت المشكله لروحي هم انت ظلمتني وانه لليوم ما ادري سالفه العلويه صدك لو الحجيه خذتهن وخافت لا نكشفها وردتهن وباقيه مثل بلاع الموس لا اكدر اواجه العلويه ولا اظلم الحجيه
وانت فوگه فوگه ما ترحمني كل تصوجني لا عدالك انه ما ادري بيك تحسب كطعة رجل العلويه بسببي بس اگول  ميخالف يا شما انت صيري احسن
_ صدك الملا المشهد الي اتقنته بجداره وشعر بتأنيب الضمير
ورجعت الافكار ووسوسه الشيطان لعقله وهو يحلل ويفسر كلام شما والمواقف
وقرر  بين الي ناوي وبين الي متردد من يرجع الظهر ياخذ الحجيه على صفحه ويستجوبها
اخر شي گال
_ خل انام ومنا لباجر اكعد افكر شلون راح احل هالسالفه.
مانامت الحجيه بذيج الليله كاعده تعاين على فطم ودموعها تكت
تنحسر وهي تهمس
يايمه يا فطم شلون راح  افارگج يمه صرت عزيز نفس يصعد وينزل ويا الروح
اخ يا فطم يمه انه لو بيدي اضل بس يايمه الوادم يردون الحيل
وانه اظاهر صدك انعد حيلي كبرت اخافن عليج لا اسهى عنج ويصير عليج شي وابقى الوم نفسي العمر الي بقى واحرگ قلب
الملا عليج
انه يايمه على عمى عيني نويت ارد لهلي بس هم يله ارد مابقى بالعمر هواي وانت هم صار الوكت تفارگيني وتتعلمين لو متت يمكم يايمه شيصير بحالج
_ بعد ما طلع الملا والكل نيام
اخذت الحجيه بقچتها وطلعت من البيت
بذاك اليوم انقلب حال البيت بين تحليل وتفسير سبب اختفاء الحجيه وبين حزن وبكاء فطم تريد الحجيه ما لگى الملا حل غير يدزها لبيت العلاويه تلتهي ويا كميله ويبلغ العلويه بالسالفه
تفاجئت العلويه وبقى الملا ينتظر منها تكشف عن اي سر او احتمال يكون سبب بأختفاء الحجيه
بقى يلوب يريد يصارح اخته ويخاف لا يخسرها ويفتح على روحه باب ويجرحها جرح ما يندمل العمر كله
بقت فاطمه عند بيت عمتها خلال هالايام الي كان يستجوب الملا بيها اهل بيته كل ما ذكر سالفه عن الحجيه لكن من دون اجابه تريح باله وتكشفله الموضوع
لحد ما بعد كم يوم كعدت بجانبه شما وهي تمثل شايله هم الملا وحيرته وتحاول تخفف عنه وتفرحه
_ ملا ليش ما ترد فطم للبيت قلبي مفرفح عليها حتى لو تردها كم ساعة ولو رادت ترد لبيت العلويه ردها بس انه تعلمت على حسها بالبيت
_ خلي البنت يم العلويه لبين ما تنسى الحجيه الي ما ادري وين صفى بيها الدهر
_ ملا انه عندي ذهبات اريدن ابدلهن لفطم شوكت ما صارلك مجال
خذهن للصايغ بدلهن وله اگلك انه اخذها ابدلهن الها
_ فرح الملا لمجرد فكره ان شما تفكر بفطم مثل بتها وما استخسرت بيها حتى ذهبها
رفض الملا الفكره وطلب منها تحتفظ بيهن
لكن هي بقت مصره وطلعت من الهول للحجره بحجه تجيبهن اله
تثبتله ما تريدهن
_ وهنا بعد ما دخلت حجرتها بدت تنفذ باقي مخططها وصاحت
يم الذهبات راحن ياهو الخذاهن
نزلت تركض بالبيت وهي تمثل الدهشه وتدب حظها
ويلي ملا ذهباتي ما الهن اثر اويلي عسى بحظه وبخته الي اخذهن
انه هسه عرفت سالفه العلويه جذب
ماكو غير الحجيه هي الي باگتهن وشردت وله ليش تهج بدون ما احد يدري بيها
_ انصدم الملا مامصدك الي يسمعه وبنفس الوقت تحير كل الي ذكرته شما يأكد الحجيه متهومه
استغفر ربه وسلم امره لرب العالمين وطلع من البيت ميريد يسمع بعد شي عقله بعد ما يستوعب ولا يصدك وهو يتسأل ويجاوب نفسه
معقوله الحجيه
لا والله وبالله ما اصدك المره صارلها عمر عدنا ما شالت كشايه
شلون بعد هالعمر تسويها
لا ملا لا لا تخلي الشيطان يلعب بعقلك
_ جا منو خذاهن والتراچي هي الي سلمتهن لشكا وادعت ان العلويه امنتهن عليها
ماكو غير اطكها طك بطك وي العلويه يا ملا وتعرف منو الصادگ ومنو الكاذب
_ بعد ما وصل لبيت العلويه وسردلها الي صار
انصدمت العلويه وهي تحلف وگامت من مكانها مفرفحه جابت كتاب الله
من شافه الملا خجل وتوتر
_ خويه انه رايد منج تحلفين بروح امج وابوج رجعي كتاب الله
كلمتج عندي قسم لحالها ليش انه ما اعرفج جا ما سألتج
بس خيج تاه دليله وكلت حتى لا اظلم حظ وبخت اجي استعين بخيتي هي الوحيده الي شما جنيت عليها ما تحقد علي حتى لو ظلمتها بدون قصد
خويه يواش يواش انه اريد اعرف سالفه التراچي
خويه انه ما وصلت بيتكم من يوم الي دخلت ولگيت فطم تايهه وما حجيتلك الي صار لان ما ودي يصير زعل بينكم بس انه هسه مجبره احجي
من دخلت تلگتني شما صايره نار تنتظر الحجيه بعد ما طلعت ادور على فطم
المره مفرفحه سألتها شبيج وليش بابكم مفتوح
كلتلي كله من بنتج علويه (سكتت شويه ما رادت تگله شما گلتلي ما تعرفين تربين )  ماخذه تراچي البنت والبنت جانت تنتظركم حتى تسألها يا خويه انه من عتبت برا بيتكم رحت ادور على فطم بعد ما رديت ولا شفت شما ولا شفت الحجيه
شلون يتهمني سلمتهن التراچي وانت شلون تصدگهن وانا يوم الي اجيتني وي فطم وهبت بكميله كلتلها ردي تراجيتي
تظكر لو نسيت حتى بدون ما تسألني انه
گتلك خويه ترى والله خميت البيت ما لگيتهن يعني انه لو لاگيتهن اتستر على بنيتي يا ملا لو امون على شما لو الحجيه خو امون عليك انت تسترني وتستر بنيتي واسلمهن الك انت اقرب لي لو هن
اما سالفه الحجيه عجيبه يا خويه ما تدخل العقل ربي لا يجعلنا
ظالمين ولا متحيرين
انه اگول لو نسأل بيت المختار يمكن يعرفون طريج اهلها
وساعتها نروح انه وانت نشوف السالفه
_ يا خيتي انه ما اريد اظلم المره لكن ماطول كذبت بسالفتج معنى
الشيطان لعب بعقلها يمكن شافت نفسها كبرت وبعد مو حمل شغل وهي على كد حالها طمعت بهالذهبات كالتك اخذهن للزمن خاف
يكسرها وتعتاز وتدري احنه ميسورين بفضل الله خلص خويه
انه مسامحها ومحاللها ومواهبها المره مابدر منها شي طول هالسنين ما نعرف الظرف الي هي بي وخلاها تنجبر تبوك يا خيتي
الفقر ظالم وهي المره كضت عمرها تخدم بالبيوت حتى حيلها نهد
يمكن فكرت لو ردت لاهلها محد يعيلها ويمكن ما يدارونها
نعتبرها صدقه والله انه عن طيب خاطر احجي المره ما قصرت ويا فطم دارت وبارت ورايتها بيضه من لا يرحم الناس لا يرحمه الله يا خيتي خلي السالفه بيني وبينج لا نفضح المره
انه رايح امرلج غير وكت خيه
_ خويه احلف بالله ما تجيب سيره ولا تعاتب شما لو تعزمي وما تريدلي الزعل بغلاوة فطم عندك هي المره بساعة عصبيه حجتها بس انه يا خويه اعرف بنتي حركه الله يسلمها ومتعبه خلينا هج
احسن وفطم خلها عندي انت ترتاح وانه ارتاح والبنت مرتاحه ويا خيتها
مهما طال الكذب واتفنن المحتال بالكيد والمكر
لكن يمكرون ويمكر الله والله خير الماكرين بعد اكثر من شهرين
بيوم من الايام
اندك باب بيت الملا
فتحت وحده من كناينه الباب وتفاجئت بالحجيه المازه كدامه
_ الحجيه سلمت وسألتها على حال فطم
من دون ان تطلب تدخل حتى لا فطم تشوفها وتنقهر
جاوبتها الكنه بأستغراب وهي تفكر بسالفه الذهب
يا حجيه البنت ماتت قهرعليج وداها الملا عند العلويه ادخلي
انتظريها هسه على جيه
(رادت تحتال على الحجيه وتخليها تدخل للبيت خافت لا تگلها ليش سرقتي الذهب وتنهزم )
_ فوتي فوتي حجيه
_ رفضت الحجيه ورادت تترخص تروح لبيت العلويه تسأل وتطمن على فطم
لكن الكنه اصرت ان تأخرها بالباب بحجه تجيبلها مي لكن بنيتها تروح تبلغ عمتها شما حتى يلزمن الحجيه وترجع الذهب
دخلت الكنه مسرعة وهي تنادي
_ ويا ما دخلت الكنه نادت عليها الحجيه يمه ما اريد مو عطشانه
لكن الكنه دخلت بسرعة وهي تصيح
_ يمه شما يمه شما
_ شكو شكو
_ يمه الحجيه برا بالباب حاولت ادخلها ما رضت يمه بسرعة خلي نطلع نلزمها حتى ترجع الذهب قبل لا تنهزم
_ ارتعدت شما من الخوف وحاولت تفكر بسالفه تخوف بيها الحجيه حتى تروح قبل لا احد يشوفها
طلبت من كنتها تروح تجيب طاسه مي طلعت للباب شايطه
ما لگت الحجيه مدت راسه يمين يسار ماكو
_ ولج وينها تگولين بالباب يمكن راحت
_ يا يمه راحت وذهبج شلون
_ يمه ربج يعوض شريد اسويلها مره چبيره ومريضه مو مال ابهذلها وافضحها حرام هاهيه هي وربها تنجاز
بعد ما سمعت الكته حديث شما انهت الموضوع بدون ما تناقش
_ لكن بعد اكثر من نصف ساعة بعد ما كانت خايفه ومرتبكه هدأت واستعادت تركيزها سألت كنتها
اكلج هي شگلتلج
_ يمه سألتني على فطم گتلها عند العلويه
_ صخام الصخم وجهج انت شكو تگليلها عند العلويه
_ انه شمدريني هي سألتني
_ صعدت شما شايطه لغرفتها جرت عباتها لبستها بسرعة وطلعت لبيت العلويه
ولان ما عدها علم بالحديث الي دار بين العلويه والملا سابقا على سالفه الذهب
جانت مأمنه العلويه متعرف شي عن الموضوع وراح تكدر تلفلف الحجيه بدون محد يكشف الموضوع
لكن لما وصلت وفتحتلها كميله الباب
دخلت وتفاجئت بوجه العلويه ثگيل رحبت بيها من ورا خشمها
دخلتها للهول لكت الحجي ضامه وجهها بأيديها وهي تنوح
اول ما گالت السلام عليكم حجيه البنات كالن ماره علينا جيت اشوفج
_ الله لا يوفقج يا شنا عساها بحظج وبختج اذا انه ماخذه منج
درهم مو عاد ذهب
انه حجيت كلشي للعلويه وهي امام الله شاهد تردلي حقي وتبريني انه وانت بينا نحلف على كلام الله
علويه مشكوله الذمه وحوبتب برگبتج ليوم الدين اذا ما تجيبون الملا لو انه اروحله اجيبه واجي ويشهد بيني وبين مرته
نحلف على القرآن ويعرف بكل السالفه
رفضت شما بعد ما واجهتها العلويه ان تحلف لكن العلويه بقت مذمومه تركت الحجيه وشما يتعاركن وراحت لكميله طلبت منها تروح على الجيران (رادت واحد من ولدهم ادزه للملا يبلغوا ضروري يحضر لبيت العلويه )
خوفا من ان تطلع شما من البيت وتفر السالفه بكيد وكذب جديد
رجعت يمهن وهي تحاول تاخذ وتنطي وياهن بالحجي وتبين تريد تحل الاشكال لبين ما يجي الملا
دگ الملا باب البيت ( مفتوح ) تلگته فاطمه وكميله
يبلغوا وجود الحجيه وشما والعلويه بالداخل
استغرب منصدم يستفسر عن اي حجيه يقصدن
_ امي المازه بويه
_ دخل الملا مسرع ومتفاجئ ويا دخلته شما فزت وعاطت
تتوسل بي وتحاول تحتال
ملا تعال شوف العلويه وهالحراميه يردن يوگعني بسالفه
وگفت العلويه
شما انه ادري بالسالفه من يوسف من اول ما صارت يوسف
يعرف انه بريئه
وهسه بقى يعرف الحجيه بريئه وانت الي ما تخافين الله
انه مذمومه وله ما كان انجبرت اخليج بخالموقف لكن
الي سويتي ظلم بحق هالمره وانه صرت شاهد احلفي
اذا انت صادگه
بعد ان كعد الملا وسمع كل الملام بالتفصيل ورفض شما الحلف
واصرار الحجيه تحلف حتى بعد رفض الملا والعلويه
ان يخلوها تحلف لان مصدگيها
خلت ايدها وهي تنوج ودموعها تنزل على صفحات القرأن
وحق كل حرف بالقرأن انه ما بايكه وشما طلبت مني اروح ابيعلها ذهبها والصايغ يعقوب موجود انه وانتم نروح عليه نشهده وتسألونه
التفت الملا على شما حزبن مكسور العين والخاطر
نعلة الله عليج يامره
طلب من الحجيه تربي هو والعلويه الذمه وتسامحهم
بعد ما سامحته طلب منها ترجع للبيت لكنها رفضت
_ انه بعد مو حمل شغل ملا وفطم لو ردت اشوفها امر للعلويه
وگف الملا منهك وخجلان مايعرف شيصرف ويا شما
لكن وصل الصبر حده ومواصيله ويا شرها وكيدها
التفت الخا اول ما خطت رجله برا باب غرفه الهول
رمى عليها اليمين قبل لا تحاول تركض وتتوسل بي كان خارج البيت
بقت تلطم متندب حظها وتدعي على الحجيه والعلويه الي
غلبها القهر وبچت على حال شما وخافت لا تكون سبب بطلاكها
تأنيب الضمير خلاها حتى وهي متأكده هي الي ظلمت نفسها والله عاقبها على سوء افعالها
لكن اتعاطفت وياها وطلبت منها ترجع للبيت وهي تهدي الملا
لكن الملا طلگها طلاك تام رجعت لبيت اهلها وبقوا ولده منها عنده
رجعت فاطمه من جديد لبيت ابوها
وهالمره كانت الي تعتني بفطم زوجه اخوها من امها الي اتزوج بت خالتهم (صبيحه )
مرت السنوات وكبرت فطم صار عمرها نهايه ١١ سنه
وبيوم من الايام جانت كميله يمها بالبيت تعلب وياها بالحجره بعد ما منعوهن من اللعب بالشارع لان كبرن
صار بينهن سوء تفاهم زعلت كميله ورجعت لبيتهم زعلانه
جانت صبيحه شاهده على السالفه انتبهت على فطم زعلانه وحزينه وتاكل بروحها ما مرتاحه
حاولت تضحكها
_ ها ولج فطم حنيتيلها هسه من زعلت وراحت قلبج متگرضم عليها تردين تصالحيها تدرين بروحج علتي بالبنت بس ما تردين تتأسفين تردين تمشين الامور طبيعي وهي ترضى
لا يا بت خالتي لازم تتعلمين من غلطين ويا احد تتأسفين اله
انه اگول لو ترحين العصر تصالحيها لا تاليتج ما تنامين الليل اعرفج من تتعصبين ما تشوفين ومن تهدين يأنبج ضميرج وتتندمين
ابتسمت فطم وافقت على اقتراح صبيحه وقررت العصر تروح
تصالح كميله
انتظرت الملا يطلع حتى ياخذها ويا
وصلها لبيت عمتها واترخص لان عرف عدهم ضيوف نسوان
من الطرف
دخلت فطم مدت راسها من باب الهول شافت ٤ نسوان بينهن مره
مثل الشيخه بكعدتها ونضرتها
خجلت فطم وارتبكت واتلافت خجلها بسرعة بدون ما تسلم سألت عمتها
يمه وين كميله
_ يمه غير تسلمين
_ حجلت فطم وكالت السلام عليكم بعد ما خفت وجهها بعيد عن نظر النسوان
_ سمعت المرأه الي لفتت انتباهها
تسأل العلويه
_ علويه هاي منو هم بنتج عندج غير كميله
_ لا ام ظافر هاي فطم بنت اخوي ملا يوسف
يتبع في حلقه جديده