الصولجان

الحلقه الاولى

بليله من ليالي رمضان
بعد الفطور بدت  سعديه تحس بتقلصات والم بظهرها ... وكعادتها
تقيم صلاه العشاء ويا ملا يوسف
توجهت للرازونه الي بالحوش ( الرازونه مربع مبني  من الطابوق على ارتفاع قليل عن الارض  واعلاه حنفيه ماء ( مثل المغسله بوقتنا الحالي )
توضت الحجيه واستقامت بوگفتها على المصلايه  خلف  الملا
انتبه الملا على صوت انينها  وهي تصلي بعد ما انتهى  وسلم
التفت عليها
ها سعديه شو تونين

_ يوسف شكلي راح  اولد دز واحد من الولد ينطي خبر لكميله ( الدايه )
تجي تولدني

_ الملا يوسف من سمع  بالخبر على تعبير القلق بان على ملامحه واستعجل  بمشيته وهو يحاول ينادي على واحد من ولده
يابه (محمد علي )  وينك وليدي
اركض جيب  الدايه كميله لامك .
( محمد علي ) ابن الملا من احد زوجاته السبعه
راح تستغربون العدد لكن
الملا ما تزوج بنت بنوت غير بت عمه (فوزيه) زوجته الاولى
الي غرگت بالشط وخلفت  له( عباس وساكن )
والزوجه السابعه الي هي (سعديه )
اما البقيه (كلثم )ارمله ابن عمه  عمرها تجاوز ال٤٥ من تزوجها (وحمديه )مطلقه هداها اله ابوها حتى يتزوجها   وخلفت منه ولد واحد الي هو (محمد علي  )وتوفت بعد ١٥ سنه  زواج  اما
(سهام )بت خالته الارمله توفى زوجها والي هو ابن خاله الملا
ولانها يتيمه وعاقر تزوجها الملا حتى تكون بوصايته  و كانت احب زوجه للملا  اما
(شمه  )اصلها  تركمانيه مطلقه بعمر ال٣٥  وصديقه سهام  زوجة الملا 
كانت جميله الشكل وجريئه حبت الملا وطلبت من سهام تحجي ويا  الملا يزوجها  وبالفعل قنعت سهام الملا يتزوج شمه الي خلفت منه ياسين ومطر
اما (فهيمه) المسكينه جانت من ذوي الاحتياجات الخاصه توقف نموها بعمر ال٨ سنوات (جيران بيت الملا بعد وفاة امها والدها رجال جبير طلب من الملا مايتركها وحدها اذا صار عليه شي يتزوجها حتى نسوانه يراعوها   )
والملا اتزوج فهيمه على سنه الله ورسوله  من دون ان يلمسها زواج على ورق  بعد وفاه والدها حتى تحل عليه ويداريها اذا نسوانه تذمروا منها بيوم وحتى تسكن وياهم بالبيت كزوجه اب لولده الشبان
فهيمه توفت بعد سنتين من زواجها من الملا
سعديه كانت بعمر ال١٤ من تزوجت الملا هي ام الاولاد والبنات
(خلفت مهدي وحسن وسليمه وعطيه ورقيه وبعد ما وصلت لسن ال٣٠ شاء الله ان تحمل بالطفل الرابع الخبر كان مثل الصاعقه سقطت على راس شمه
الضره الوحيده الي بقت على ذمة الملا (بعد وفاة زوجاته الباقيات )
والاكثرهن خبث ودهاء
كانت سعديه مريضه بالسكر وتتجنب شمه حتى لا توگعها بالمشاكل ويا الملا بالحيله والكذب
لكن الملا كان فطن يعرف معدن كل وحده كان يتحذر يداري سعديه كدام شمه ( لان عدها غيره توصل حد الشر ) ولا يميل لشمه كدام سعديه حتى لا تنقهر يتعامل وياهن بحذر من ينجمعن بمكان واحد ويا ))))
بعد نصف ساعة
دخلت كميله بعد ما ترك الملا البيت هو وولده وما بقى غير النسوان
بي
بقى الملا يدز محمد علي كل حين وحين ياخذ الاخبار من اخته سليمه
ويسألها عن حال امها )
استمر وجع المخاض الى وقت متأخر ... اضطرت كميله تبقى ويا
سعديه بالغرفه
بين ما شمه تحضر السحور للملا وولده وبناته
وبين ما كان الملا واولاده مجتمعين حول السفره ويتحدثون
طلب منهم ان يستعجلون بالاكل قبل الامساك
حتى يصلون صلاة الفجر
اتوجه الملا للسجاده يقرأ قرأن قبل الاذان
وداير مدايره بناته يرددون من ورا نادت شمه
ملا ادعي لسعديه كميله تگول ولادتها عسره
بقى الملا واهل البيت قلقين يدعون لتسهيل ولاده سعديه
سمع الاذان طلب من ولده وبناته يتهيأون للصلاه ويا ما بدأ يؤم بيهم للصلاة
سمعوا صوت صريخ طفل
نادى الملا
ها شمه بشري