الصولجان

ج٦

_ كمزت زهره وفزعت فطم من هالصوت
الي ركزن بي  وكان للحجي خضر هي ثانيه وطلعن من باب السطح
تسحبت فطم للداخل حتلت ورا الدنكه الي بصف المحجر الي يطل على حوش البيت وهزلت زهره مثل الطلقه
وهي تشوف الحجي
يدوس الركيات برجليه
هو لمحها وهي خايفه منه

_ زهيره الخايبه امج وذيج چك النداف وينچن  انه شايل الركيات
الدرب كله افوت اريد وحده منجن
تجي تاخذهن من ايدي ما الگى
طلعت الحجيه طاهره من حجرتها  وهي تهوس

_ شبيك يارجال ما تكول يجوز يصلون بحمام
يعني بدل ما مردتنهن او ماشي بعد متر ومخليهن على الكرويته
الله واكبر عليك ما تنجرع شكثر اتحمل بعد

_ وهنا شبت مشكله بيت الافندي ببن امه وحجي خضر الي بقى
يدردم ويتذمر 
بهالاثناء وبنص المشاده الكلاميه ذكر الحجي جنته ( وهاي جك النداف وينها  لا شغله ولا عمله هم ما تعرف تاخذ من ايدي الركيات )
( اها وانت تريد بنت صغيره تشيل ركياتك الي انت تعبت منهن ومردتهن حتى حرام عليك يا رجال انت شكو تصلي هاي نعمه الله هيج ماردها مرد 
اكلج زهره وين فطم

_ يمه خاتله فوگ خايفه

_ خايفه منين جگ النداف خبصتونه بيها وهي ها كدها

_ خضر لا تخلي راسك وي بنت العالم ولدك وبناتك يتحملونك هاي
البنت اهلها مدللينها لا تخليها تهج من سوالفك
وترى ظافر ما يرضى على حجايتك هاي لو سمعها يگلب الدنيا
لاتقهر الولد وتنكد عيشته

_ كل هالحديث كانت فطم سامعته ومستغربه عصبيه عمها الي كانت مثل الطفل من يعصب وتجي امه تهدده وتهدي يسكت ويتندم ويبقى يبرر
برغم عصبيته ليانه السليط لكن قلبه طيب اكتشفت هالامر بعد ما
كانت تراقبهم وهو يستمع للحجيه تأنبه لعدم احترامه نعمه الله
بقى يتذمر الى ان طلع من البيت 
بعد ها صاحت الحجيه يمه فطم وينج

_ نزلت فاطمه وهي تتبسم منظرها صدك الحجيه وزهره الي ضحكت على ضحكتها

_ يمه فطم لا تزعلين من عمج ترى هو يهذري من يهوس
يمه مخبل بس قلبه طيب

_ ليش يمه ازعل

_ يمه حجايه چك النداف بعد انت تعرفين تنگال على الگصير
يعني ما هو قصده يغثج هيج يمون عليج مثل بناته

_ ضحكت فطم ضحكه من القلب وهي تستذكر لقبها بصوته وبطريقته
وبادلتها زهره الضحكه وبدن وحده تحلل وتفسر حركات الحجي من اول ما دخل الى ان طلع بفكاهه ومزاح
والحجيه تضحك وياهن وهن لافه فوطتها على وجهها لازمه عيونها ويهتز جسدها 
زاحت طرف فوطتها ودموع الضحك تغلغل عيونها على سوالف فطم
ولقب چك النداف   وبلحظه اندكت الباب طفرت زهره فتحت الباب
دخلت وياها ظافر وياسر
شافوا الحجيه وفطم منهكات من الضحك
ابتسم ظافر وهي يلقي التحيه فرحان بالود الي بين امه  ومرته
السلام عليكم
ها شكو ضحكونه وياكم