الصولجان

ح ٤/ج٢

_ ارتبكن فاطمه وزهره وبقت الحجيه تتلعثم متكدر تختلق كذبه
وتكول هي الي طلعت اخذته لان الافندي كان يدري بيها خارج البيت
تشجعت زهره وهي خجلانه تنوي الكلام 
تقرب منها كريم وشاورها عمه امي ما كالتلج لا تحجين گولي انه
ابتسمت زهره والتفتت لطافر
_ انه خويه طلعت ملفلفه بعباتي للرجال  انطاني كريم ورديت دخلت
لان ما جان اكو احد فاطمه بيدها سليم يبچي وهي تبچي كاعده بالحوش مفرعه ( من دون غطاء رأس) وامي وانتم كل واحد بصوب بعد شسوي من حلاة روحي على كربم من شفته ما وعيت الا وانه جارته من ايد الرجال ودخلته
التفتت زهره تهمس الكريم شوف ابوك ما يحب الي يكذب عن حاجيته بالصدك ما حاجاني 
التفتت زهره للافندي
_ ارون حاچاچ خويه
_ لا خويه لاسلام ولا كلام
_ تمام
_ يمه انت ليش رديت خيرك
_ والله يمه ما كدرت بعد اروح يبقى بالي
اشرلها  بنظراته على كريم
_ ابتسمت الحجيه والبنات على حركة الافندي وافتهمن بدا يتحذر بالكلام لكون الطفل فطن ويلتقط بسرعه
_ انت تحركت من مكانك
_ لا والله  ما تحركت بس امي طاهره خذتني للحمام شيل روحه رده
_ عفرمن عليك
_ يبى انه ما اجذب ولا عمتي زهره ولا امي طاهره بس امي تجذب
يوم جابني صديچك
_ خوف الحجه والبنات من كلام الطفل وبالخصوص زهره الي خافت لا يكون فهم كلام ارون وناوي يسرده
حاولن يلهن الافندي ويكذبن الطفل والحجيه اخذته كعدته بحطنها
_ خل ابوك يروح يرتاح يمه انت لا تصير الو لسان ولا تعلموا تسمعواه تالي يكوم يفتن ويتبلى
_ خويه هذا مايفهم مو فطم نوبات تچذب عليه من يريد شي حتى يسكت
_ صفن الافندي للحظه راد يتركهن ويسعد لكن فضول بداخله رايد يسمع من هالطفل ويشوف مدى استيعابه وفطنته  التفت عليه
تعال كريم اصعد ويايه
اخذ الافندي ابنه من ايده وصعده ويا  اما الحجيه والبنات فخلن ايديهن على قلبهن لا يسولف هالطفل بعض الامور الي يحاولن بيها يتملصن من عقاب وحساب حجي خضر وولده
دخل الافندي الحجره وجلس على السرير واخذ كريم وكعده على رجله
_ هسه سولفلي امج شلون تجذب
_ يبى عمتي زهره ما تجذب امي گالتلها گولي انه طلعت اخذ كريم
بس عمتي ما قبلت
_ ابني انت ميصير تتنصت لكلام الكبار وحتى لو تسمعه يحجون مايصير تفتن وتنقل حجي حرام وما يصير تگول على امك تچذب
عيب هاي امك الله ما يدخلك الجنه اذا تكول عنها چذابه
هي يمكن جانت تضحك ويا عمتك وانت فهمتها تريدها تجذب
عيب بابا تدخل بكلام الكبار وتلاسن صير رجال الرجال ما اله شغل بسوالف النسوان ولا يخلي اذنه يمهن ويحفظ حجيهن ويحجي بي كدام احد فاهم
_ فاهم
_ يله روح لامك كلها ابويه يريدج
_ يبى انت ليش تحجي مو مثلنا
_ ابتسم الافندي وهو يجاوبه
لا انه احجي مثلكم بس انه دارس ببغداد هسه اخذك فد يوم الها
الناس بيها يحجون بلهجه ثانيه اني تعلمت منهم
_ يبى يمته توديني لبغداد
_ اوديك اذا الله راد يله روح ناديلي امك
_ اول ما نزل كريم تلگته زهره ولك شسولفت لابوك
_ ابوي مايقبل بعد اسولف الي اسمعه
ترك عمته وركض لامه يمه يمه ابوي راح ياخذني لبغداد
يمه ابوي يتانيج فوگ بالحجره
_ لا تصارخ ولك لا تكعد اخوك هسه صاعده
_ بعد دقائق دخلت فاطمه قلقه لكن مو خايفه لكونها ما مسويه شي يغضب الافندي لكت الافندي جالس جلسه توتر وانتظار
كريم كال رايدني خيرك
_ فاطمه بعد لا تچذبين كدامه ترى يتعلم الچذب والفتانه واني ما احب
ابني يتعلم سوالف النسوان قال وقلت
_ والله ما قصدي اچذب بس خفت لا من تسمع زهره هي الي طلعت
تزعل وتزعلها حاجيتها لو سألج ظافر تگلك فاطمه طلعت اخذت كريم من ارون ولا فاطنه على ابنك سمع وحفظ
_ وانت ادارين لزهره حتى ما ازعلها ما تخافين ازعلج الج
قربها منه وهو على نفس جلسته وحاوطها بذراعه وهو مبتسم
اتذكر سالفه الحمل والطفل الجديد
كم شهر عليج فطومه
_ لا ما ازعل منك حتى لو تزعلني اعرفك عصبي وقلبك طيب
خمنت الدايه علي اربع تشهر صدك هذا كريم نزل يگول ابوي راح ياخذني لبغداد
_ ابتسم الافندي انه الكاها من كريم من امه عمي ابنج زرف راسي بالاسئله ردت اخلص منه گتله عود اخذك لبغداد
_ اها من يمي فاطمه لاتجذبين والولد بتعلم وانت تجذب عليه مايتعلم بعد ياهو الي يهدك خليتها بلسانه شدوا روسكم يا كرعان
بعد اشهر وضعت فاطمه طفلها الثالث والي سمتها  سهير
وبعد ما صار عمر سليم اكثر من السنه ونص ما يقارب السنتين
وبيوم عمته دتسبحه بالحوش حست بدوار صاحت على الحجيه طاهره
يمه لحگيلي اخذي الولد مني
ركضت الحجيه اخذت سليم وصاحت على زهره الي سندت روحها على الحايط وهي شبه مغمى عليها
شبيج يمه زهوره 
ومن هاليوم
—————————-
بدت معاناة زهره تظهر مع اعراض ما عرفولها علاج
نحول وضعف وخساره وزن وصداع مستمر ما بقى الافندي حكيم ( طبيب) ما وداها اله ماكو فايده
واستمر وضعها على هالحال والحجيه واهل البيت مهمومين
صارت كل وحده من نسوان الطرف والاقرباء من تزور الحجيه وتسمع بسالفه زهره
تفتيلها فتوه
الي گالت سوولها حجامه والي كالت خاف عدها تابعه ودوها لشيخ والي تكرل خاف عليها نذر ما موفيته ووووو حتى العطارين اخذوا نصيب من علاج زهره
احتارت الحجيه وهي من حلاة روحها اطبق اي نصيحه تسمعها
بس تريد زهرتها تزهر من جديد
لكن من دون فايده اخر شي قنعوها البنيه مسحوره  والحجيه اقتنعت بعد ما عجزت هي والافتدي يلگولها علاج
بدت الحجيه من ورا الافندي وابوها تاخذها لشيوخ وسحارات ما بقت على امل احد يفكلها السحر  وكل واحد منهم يأملها وياخذ منها  حق تعبه حتى يخلصها من السحر
وما  جابت هالروحات اي نتيجه بالعكس حالتها بدت تزداد سوء
وبيوم من الايام دخل ظافر افندي
ينادي على الحجيه امه
_ يمه وينج رايدج بسالفه
_ گول يمه
_ يمه حاجيت ارون يتوسطلي  اعرض زهره على دكتور انكليزي
موجود عدنا ويا الكادر الطبي الانكليزي  الخاص بيهم
والولد وعدني هاليومين يدبرلي موعد
والولد رجع حاجاني رايدها  گلي قبل لان مو مسلم رفضتوني وهسه اني مسلم من اكثر سنه وعايش وياكم وصرت منكم واعرف كلشي عن حياتكم مو غريب مثل قبل
واني الصدك يمه  اكو شي بداخلي مثل تأنيب الضمير ودي اوافق على ارون  لو موافقين عليه من زمان  ما صار بزهره كل هذا
زواجتها يا يمه كسرتها انه الي جنيت عليها قبلكم لو قبل لا اسافر مزوجها لارون ما جان ابوي زوجها لمرزه وتعذبت ويا ويا اهله الظلام
يمه روح ابن ادم من تحترك  ويكتم قهره تطلع بمرض وهاي طلعت بالبنيه
شوري عليه حتى احاجي ابوي
_ والله يمه انه ما الي شور انت وابوك الكم الشور
_ وفاتح الافندي الموضوع ويا حجي خضر الي كالعاده يقيم الدنيا
بصراخه
تحجي صدك انت تريد العالم تاكل وجوهنا ولك ظويفر تخبلت
تالي عمرك انطيها لواحد لا من ملتنا ياهو اليقبل ينطي بنته لانكليزي
بس الكواوله ( الغجر ) ( تشبيه كان يطلق على من لا غيره له )
_ عجز الافندي ان يقنع الحجي خضر واستسلم لاوامره
برغم تهديد  الافندي لوالده ان يزوجها لارون من دون موافقته لكن
الي ردعه دعوة حجي خضر وتهديده ان يغضب عليه ليوم الدين و
عقوق ظافر افتدي تطلع بولده
هالكلام خوف الافندي وبقى حاير بزمانه حتى تكتم ان يبلغ والده
بسالفه يعرض زهره على دكتور انكليزي
وطلب من والدته تتكتم عن الموضوع
ورا ايام رجع الافندي قبل موعد رجوعه دخل مستعجل وهو يهم
وينادي على الحجيه
_ يمه وينج
_ نزلت الحجيه من السطح وهي مسرعه
_ اول ما لمحها الافندي
_ الله يساعدج يمه بسرعة صيحيلي زهره وخل تجي وياها فاطمه
ارون يتنانيني بالباب جابني بسيارته حتى ناخذ زهره للدكتور
وبعد اقل من عشر دقايق طلع الافندي وخلفه زهره وفاطمه
ركبهن السياره والتفت يصعد بجانب ارون الي بقى محتار بين خجله من ان يلمحه الافندي ويزعل ويكون خان الامانه بأعتباره فهم الاعراف
بهالمكان وبين شوقه وقلقه على حاله محبوبته وصحتها 
انطلق ارون بعد ما قرر ما يحاول ان يرفع عينه او يلمحها والسبب الثاني الافندي رتب كعده فاطمه وزهره بالطرف الي خلفه وقريب من الوسط بعيد عن المرأه الاماميه لكونه يعرف السائق مجبر ان يرفع عينه عليها خلال القياده ولا راد يحرج صاحبه ولا يحرج نفسه
بعد اكثر من ساعة
كان ارون ينتظر خارج غرفه الفحص بعد ان لمح محبوبته فقدت بريقها وكانت نحيله ومتعوبه
اما الافندي فمان ينتظر بداخل الغرفه
وفاطمه وزهره خلف الستاره
والدكتور وياهن يحاول يفحص زهره الي من حياءها وخجلها تعبت الدكتور وهو يحاول يفهمها بلغه غريبه عنها ما تفتهمها ان لازم يفحصها
وكان صوت الافندي من خلف الستاره يجيها بالترجمه وشنو ديبلغها الدكتور
_ خويه انه استشرعت ماهو حرام ماطول ماكو دكتوره فاهمه حالتج
لا تخافين خل الرجال يفحصج ويعرف علتج
_ من شده الحياء ما هان على فاطمه ولا على زهره ان يكشف الدكتوره على زهره غمضت عيونها  خجله
وهو لحظه يتلمس عيونها ولحظه يتلمس راسها
وانكشف شعرها عليه وبعدها نزل على صدرها بسماعته وتقريبا كان الفحص عام
بدا الدكتور يستفسر من الافندي عن الاعراض الي تحس بيها
وبدا الافندي يسأل زهره ويترجم للدكتور
_ خويه الدكتور يريد يعرف انت شنو الي يوجعج والي تحسين بي
_ خويه دورات يجيني الم بالراس يهدني هد
ونوبات هيج الدنيا تتراكص بيه ونوبات ابقى انام واصحى ما اكدر انام
طول الليل
_ نقل الافندي كلامها بالحرف الواحد للدكتور الي شخص حالتها
تشخيص كان هو المعلوم ان ذاك ( وهو الصداع النصفي ) وكتب الها
دواء خاص لحالتها
اول ما خرج الافندي ومن خلفه زهره وفاطمه اتفاجئ بدموع ارون
وهو يزيحها عن خدوده
سأله الافندي عن حاله
_ جاوبه متحجج
تذكرت والدي من توفى بالمستشفى
وكان ارون كاذب وما هذة الدموع الا بسبب حزنه على من سرقت فؤاده وسلبه الحجي خضر الامل بأن تكون من نصيبه
مرت الايام وحال زهره مثل ما هو او يمكن بدأ يشتد
وبيوم من ايام شتاء سنه ١٩٥٢
بين ما كانت فاطمه تسخن المي حتى تحمم ولدها بمساعده الحجيه
وبينما كانت زهره شاده عصابتها وتعجن
وبجانبها كريم وسليم الي لابس كل واحد منهم بجامه بازه
وهو مكنبص ( بوضع البروك على الركبه ) يستمعون لعمتهم زهره وهي توعدهم
بحنونه ( قرص خبز صغير جدا ) لكل واحد منهم وبين انشغال
زهره بالصعود لاشعال النار بالتنور الحجري ( الفرن الحجري ) وبين انشغال فاطمه بغسل ملابس اولادها بين ما يسخن المي حتى تحممهم ( تغسللهم ) وبين انشغال الحجيه بمساعده زهره تنقل الحطب للتنور استغل كريم الموقف
واخذ اخو سليم وتسحب هو ويا وطلع من البيت وبقى مستمر بمسيره
الى ان وصل للشط وهو يتفرج على الصيادين
والأبلام والشباك بين رغبه للهوا ولعب وبين فضول طفل مشاغب استغل وقت انتهاء وغياب الصيادين
اخذ اخو وصعد على الگنطره ( لوح خشب عريض يطفو على الماء و
يرسوا قريب من الجرف واحيانا يسحب بالزورق الخشبي الصغير لتحميل الاغراض عليه )
تحركت الگنطره وعليها كريم وسليم ومن بدت تبتعد حس الطفل بالخطر وبدا بالصراخ وهو حاضن اخو سليم
ومتشبث بي يخاف عليه لا يتحرك ويوكع وهنا سمع صوتهم شخص
وبدا يصرخ على الصيادين ويطلب من احدهم
ان ينقذ هالطفلين
بعد دقائق ركض واخد من الصيادين وسبح لحد الگنطره  سيطر على وضع الطفلين بالجلوس وبدا يدفع القنطره الى الجرف
بالجانب الثاني الحجي ونسوان البيت من انتبهن على غياب الطفلين صابهن الفزع واخذت الحجيه عباتها  وهي تهبد بين دربونه ودربونه
ادور عن كريم وسليم
_ بينما وصلهم الصياد لبر الامان
احتاروا هالطفلين يعودون لمنو ولاي بيت
واحد منهم سأل كريم الي بقى مبهوت بالزلم الي حواليه واخو يصرخ
ميعرف يسكته
_ بابا انت شنو اسمك
_ انه كريم وهذ الي يصارخ اخوي سليم
_ انتبه الرجل لفطنه الطفل
_ بويه انه تندل بيتكم ياهو اهلك
_ اهلي بيت حجي خضر يسمونه ابو ظافر افندي
رفع الرجل راسه للزلم الي حواليه
يابه تعرفون بيت حجي خضر لو ظافر افندي
جاوب شاب ابن ١٤ سنه
_ انت عندك عم اسمه ناجي
_ اي عمي ناجي اخً ابوي
_ الكل التفتوا للشاب
ها بويه تتدل بيتهم
_ اي عمي اعرفهم ناجي صديج اخوي جزاع
سامع من اخوي اخو يصيحوله افندي لچنه متعلم ويرطن انگليزي
يشتغل وي الانگليز كلهم ربعه
_ تاخذ الوليدات تردهم لاهلهم لو شلون
_ لا عمي انه ما اعرف هساع اروح لاخوي جزاع اجيبه وياي
هو ياخذهم يردهم
_ بهاليوم من رجعت الحجيه تولول مو لا گيه الولد وبين خوف
وبكاء فاطمه وقهر زهره وقلقها
وكعت زهره من طولها
صار الهم همين ما يدرون يحيرن بزهره وهن يحاولن يصحنها
طلعت الحجيه مفزوعه ادور على احد ادزه مرسال لحجي خضر
يرد للبيت بأسرع وقت
وبين هالنظرات لمحت جزاع وهو يمشي ويا الطفلين
من حلاة روحها دخلت حتى نست بتها اخذت عباليتها وطلعت
بسرعة  من قهرها وخوفها عليهم وعلى بتها اخذتهم من الولد
جزاع الي قصلها قصتهم
بالكامل وطلب منها ان تنتبهلهم ولوما ستر الله جان غرگوا ومحد
حس بيهم ولا عرف
اتشكرت الحجيه منه وقلبها محمل على الي سمعته هبطت اول ما
دخلت كريم للحوش ووين الي يوجعه بكف ايدهها تضربه على رجله تعاقبه
على الي مسوي
وهي تصيح عليه ولك انت ولد لو جني
ولك لو ميت شگله لابوك لو غراكان انت وخيك شيطفني نار امك وابوك
ولك جان ظافر مات وراكم يا مكموع
ولج فطيم تعالي خلصي عليه لهذا كرَيم كسري رجليه
_ طلعت فاطمه مهبوطه على ولدها وهي تغلي بينما دتمشي الحجيه
تروح لحجره بتها تطمئن عليها  تسولف لفاطمه عن سوايه كريم وشلون جان غرك وغرك اخو ويا
دخلت الحجيه يم راس زهره الي كانت متمدده ومالها خلگ تون من راسها
سمعت صراخ كريم
_ يمه شبي يصارخ وين لگيتيه
_ ما لگيته ولد الناس الله يوفقهم تلاحگوله لهالمكموع تكسرت رجله ماخذ اخو للشط ومركبه الگنطره ربج من فوگ لعيون امه وابو
خله زلمه يلمحه ويصيح احد ينجدهم
لو صاير بيهم شي شجان حال خيج يتوسد الگبور وراهم من القهر بعد تدرين بي روحه بيهم
والله لو ما اگولن صغير ودي اروح  اخلي ايدينه على الجوله حتى بعد لا يعيدها بس
اخاف من اخوج لا يسويلي هوسه على وليده وينقهر مني
_ كافي فطيم خلي يولي جيبي انه من اليوم اربطه هنا يمي بالحجره
برجل الچربايه
_بعد ان رجع الافندي صابه الهم للي سمعه من احداث اليوم
وانختم هاليوم بأخبار تعيسه لمن الكل منجمعين بالهول على وجبه العشى و
صاحت زهره على الحجيه  من حجرتها
_ يمه وينج الحگيلي اريدن اروح للحمام
ماني شايفه
دخلت الحجيه وظافر افندي مفزوعين
_ سندها الافندي وهو يحاول يفتهم حالتها
خيرج خويه
_ خويه كمت على حيلي عبالي الدنيا ادور بيه ما اشوفن شي
بس هسه عيوني تسورب
اشوفك بس شوي
_ لا تخافين خويه تعالي وياي انه اخذج للحمام
زهره دخلي ساعديها
_ من هاليوم بدت زهره حالتها تسوء بشده للدرجه الي خلت الافندي يرجع
يستعين بأرون حتى يدخلوها المستشفى الخاص  وبدت تذبل
زهره  يوم بعد يوم  فقدت القدره على الوقوف والمشي
واحيانا تفقد التركيز وتنسى بعض الامور مثل فقدان الذاكره
المؤقت لبعض المواقف والذكريات
وبيوم ماطر والبرق شديد الحجيه بدت تشوف بتها  تنازع وحالتها
تعبانه من قهرها  وامتناعها عن الاكل وكعت من طولها
حار بيها الافندي وطلع بيها خارج الغرفه تلگى ارون الي كان مرافق
للافندي طوال الوقت في حال احتاج شي
طلب منه يشوف ممرضه او دكتور لوالدته
وبعد ان اخذت الممرضه الافندي ووالدته وانشغالهم قرر ارون
ان يستغل الفرصه ويرجع  يدخل على محبوبته يطمئن عليها
_ دخل وهو يذرف الدموع لان هي ماكدرت تميزه واول ما نطقت
تصورته اخوها وسألته عن امها طاهره
_ جاوبها ارون
ام ظافر  جيده  هسه يرجع
تمام ويرجع هنا
_ انت ياهو
_ انا ارون زهره  انت في قلب ارون
_ نطقت زهره بصعوبه
_ روح ارون لا يدخل ظافر ويلاگيك هنا
_ خرج ارون بعد ما حاول يسمعها مشاعره  وعدد المرات الي طلبها من اهلها وابوها رفض وهالرفض ما غير هالمشاعر
لان هي اول حب حقيقي بحياته وحتى لو ما قبل ابوها يزوجها اله راح يبقى يحبها طول عمره بس يكفي هي تكون بخير وتگوم بالسلامه  
بعد ان انتهى ودعها على ان يمر يزورها بوقت ثاني من تصير الفرصه
هم يخرج وهو حزين لان ما كدرت تميز ملامحه  فزع من صوت البرق العالي والتفت الها
زفر الهوا واستنشقه خوفا وقلق وحب لهالانسانه طريحه الفراش
خرج ووگف خارج الغرفه ينتظر ظافر الي وصل بعد ربع ساعة تقريبا
وبجانبه الحجيه
دخلت على بتها وارون سأله يطمئن ان الحجيه (اصبحت بخير )
بلحظتها سمعوا صياح الحجيه ركض الافندي وارون على صوتها
طلب الافندي من ارون ينادي احد ظنا منهم ان   زهره فقدت الوعي
لكن
بذاك اليوم  وبذيج اللحظه ذبلت زهره ارون وصعدت روحها  للسماء
موتها كان فاجعه لاخوها الحنون الي فقد طفلته وهي بريعان شبابها
وانفجع من رد فعل صاحبه  الهستيري الي حب زهرتهم وحرموا  منها بسبب اعراف وتقاليد 
لزم الافندي حداد مكسور القلب  لرحيل اخته الصغيره وحال امه المكسوره
لدرجه  كره ابو والمكان الي يجمعه بي
لكونه حمله مسؤوليه العذاب الي تعذبته اخته والي كان مصيرها من هالعذاب المرض والموت
ومن جهه  ثانيه كان سعد كل ما يلتقي بالافندي ينقله سوء حال ارون 
بسبب هالاخبار صاحب الافندي شعور بتأنيب الضمير لحال ارون الي اصبح جسد من دون روح  بعد موت زهره
وبقى يتذكر كلامه  بالمستشفى بلحظه  هستيريه ممزوجه بحزن وفقدان للتعقل وعاتبه   بلحظة موت محبوبته
( انه هو والحجي خضر  وظلموا لان حرموا منها الى ان الموت اخذها منه وضيعوا بداخله اخر امل يجمعه بيها  وانهى حديثه بألم وهو يودع الافندي وينهي صداقته بي من غير رجعه )
وفقد الافندي زهرته الصغيره وصديقه الوفي بيوم واحد
كل الي الامور والضغط النفسي والحزن وصلت الافندي لقرار
يودع البصره  لسنوات ويفارق اهله وينتقل بعمله الى بغداد
——————-
ماتت زهره   الله يرحمها وهي بسن العشرينيات بمرض سرطان الدماغ  الي كان بالسابق مرض غير معروف ولا اعراضه معروفه 
وتوفت بعد معاناة من اعراض اخرها عدم مقدرتها على الوقوف ولا
الرؤيه الواضحه شبه عمى 
كان بودي اكتب مشاعر اكثر لكن الاغلب يعرف مشاعر الحزن تأثر عليه صحيا لذلك اكتفيت بهالقدر من نقل الاحداث بدون دموع

————-
يتبع بدايه الحيل الثاني لروايه الصولجان