الصولجان

الحلقه الثانيه

غضب الملا من اقتراح شما وخجل من تحرج الحجيه المازه لكونها الغريبه بينهم
_ يا مره شنو عدنا حراميه بالبيت مو عيب هالحجي طلب من
فاطمه ترجع ادور بحجرتها
_ رجعت فاطمه تبحوش بين اغراضها من دون  ما تلكاهن بدت دموعها تنزل وهي بحاله يأس
طلعت من حجرتها والدموع تجيب عن تسأل الملا  اذا لكت التراجي
تلگتها المازه بعد ما حزنت على حال الطفله و حبت اطيب خاطرها
— فطم لا تبقين تبجين خلينا نذكر وين ضميتيهن
_ بالكنتور جوه الملابس
_ اتذكري بيبي ماطلعتيهن وخليتيهن بغير مكان
_ بس راويتهن  لكميله ورجعتهن
ادخلت شما مداخله سريعه غريبه
_ لعد يجوز كميله خذتهن
_ شما عيب هالحجي العلويه تعرف تربي
_ شبلاك  ملا منو جاب طاري العلويه كميله طفله ويمكن  عجبتها التراجي اخذتهن ما تعرف قيمتهن حسبالها  تلعب بيهن  وترجعهن
انه باجر من تجي اسألها
الكل بقى باهت ماكدروا يستبعدون الاحتمال وبنفس الوقت الملا ما حب يثير الموضوع اكثر ويسبب  احراج للحجيه 
_ لا خلي الحجيه تسألها وهي تلعب ويا فطم  بصوره غير مباشره مثلا تخليهن يدورنها  بالغرفه 
_ كلام شما اثر بفاطمه وصدكت ان كميله هي الي اخذت تراجيها
التفتت حزينه وغضبانه  للملا وهي تجهش
_ والله لا ما رجعتها  بعد ماهي صاحبتي
ادخل الملا  محتج خوفا من ان هالموضوع يتسبب بزعل اخته العلويه
_ فطم بويه حرام  نتهم البنت شلون ترجعها اذا  ما خذتها
_ انتهى اليوم  بحزن رافق فاطمه لليوم الثاني وهي تنتظر
جية العلويه  وكميله
بقت كاعده على دچة الباب متربعه وايدها بحظنها وشعراتها السود مبعثره فوگ راسها وظفايرها المرتخيه  لكونها رفضت ان تمشطلها الحجيه كأنها ملتزمه الحداد على تراجيها وما الها خلك اي شي حتى
ما لعبت كعادتها كل يوم قبل ما تجي كميله
بقت تراقب الرايح والجاي بعيونها الكبار  والحجيه كاعده قريب منها ورا باب البيت تسألها
_ ها فطم ما جنت
_ لا
_ جا بيبي ادخلي  امشط شعراتج  هسه تجي العلويه تزعل لو شافتج
بهالحال بنفس ملابسج وشعرج من امس
_ رفضت فاطمه بطبعها العنيد ان تستجيب لاي محاوله  من المازه
الى ان شعرت بالعطش التفتت
_ يمه المازه اريدن ماي
نهظت الحجيه بصعوبه بعد ان صاب رجلها الخدر من الكعده الطويله بدت تحاول تفرك رگب رجلها حتى تعينها على حمل جسمها  الجثيث ( طويله وعضمها خشن )
توجهت للحب ( جره كبيره من الفخار مخصصه لتبريد الماء) بداخل البيت بخطواتها السريعه وهي تكزل بسبب الم ركبها  مرت من كدام شما
_ ها حجيه لازم العلويه جتي
_ لا بس فطم رادت مي 
مدت ايدها لكته فارغ استغربت  التفتت لشما  ليش الحب فارغ
الملا والوليدات من يجون يردولهم ميه بارده
_ انه فرغته اريدن انظفه  
_  جا خليتيها غير وقت العلويه على جيه داكه الدرب هم تريدلها ميه بارده
_ عساها ما ارتوت شبلاج يا المازه  عودك تشرب من الحنفيه
تكلمت الحجيه بداخلها متذمره
_ لا حول الله عفيه مره الحقد ماكل قلبج 
_ رجعت الحجيه  بيدها طاسه المي  وهي تصيح فطم لما وگع نظرها على مكان كعده فطم وما لگتها
استشاطت وسرعت بخطواتها قلقه وهي تمد راسها يمين ويسار
وتصيح يمه فطم وينج  من ما اجاها جواب  طلعت للباب ما كو اثر لفاطمه
صاحت الحجيه على  طفل يلعب قريب منها
_ ولك ناجي ما لمحت فطم
_ مشت هَج ( هيج ) وهو يشير بأيده على نهايه الشارع
_ ولك نويجي اركض وراها جيبها
ركض الطفل مشافه ٤ بيوت ووصل لنهايه الشارع التفت يمين ويسار التفتت وهو يشير للحجيه بأيده معنى ماموجوده
_ ضرب الحجيه على خدها ودخلت تركض للحجره تاخذ عباتها حتى تطلع ادور فطم
استوقفتها شمه من شافتها تلبس عباتها بسرعة وسط الحوش
_ ها المازه شو لابسه عباتج
_ البنت ما ادري وين سيرت
تركت الحجيه شما وطلعت شايطه تدعي وتنخي تلگى فطم
طلعت للشارع احتارت بأي اتجاه تروح بالدربونه الي على اليمين لو الدريونه الي على اليسار  وهي تصيح يمه فطم وينج
وتسأل المار والواگف  على مواصفات فطم ان كان احد لمحها
بقت الحجيه تفتر بالافرع
اما فطم الي ركضت بنيتها تروح لبيت عمتها العلويه بعد ما نفذ صبرها من الانتظار
تيهت طريقها بعد ما كانت مستمره بالركض خوفت من ان يلمحها احد من اهلها ويمنعها ان تروح لبيت عمتها وتسأل كميله عن التراچي بقت تفتر بالافرع تحاول تتعرف على طريق بيت عمتها
وتستذكر الدرب
لحد ما تعبت وبدت تحس بالغربه  وهي ما لكت بيت عمتها ولا تعرف ترجع لبيتهم
بقت تمشي وتبچي لحد ما  صادفتها مره مخليه على راسها طبك مغطى بقطعه قماش
_ شمالج تبجين
بقت المره تستفسر من فاطمه والطفله بس الدموع تنزل من عيونها وتشهگ
_ بيبي وين هلج وين بيتكم ... ما تندلينهم
هزت فاطمه راسها بأيجاب
لا تبجين تعالي وياي هسه نلكاهم
بعد ان بدت فاطمه تسير ويا المره  بدت تطمئن وتهدأ
استغلك المره هدوء فاطمه وبدت تسترسل وياها بالاسئله
انت شسمج بيبي
_ فاطمه
_ ابوج شنهو اسمه  شيسمونكم بيت منو
_ ابوي ملا يوسف
وخواني .....
رجعت المره لبيتها  دخلت على اهلها  وياها طفله
اجتي بنتها تركض بطتسه  المي لامها المنهكه من التعب 
والمره اخذت الطاسه من بتها والبنيه تتسأل
يمه من هاي
تجاوب المره وهي ترتشف المي على جرعات
بنت متيهه اهلها  ابوج وين
_ بالحجره
_ ابو عون  ابو عوت وينك
_ شكو شكو يا مره
دخلت ام عون على ابو عون للحجره ...
_ تعرف الملا يوسف
_ شلون ما اعرفه
_ دگوم گوم وديله البنت   لا يستبطوها هسه اميمتها  مفرفحه عليها
_ يا بنت
_ لكيت بنت بالطريق متيهه اهلا سألتها انت بت منو
گالت بت ملا يوسف .
لبس ابو عون دشداشته بسرعة ودنگ يدور على  تك نعاله جوه الجربايه مد ايده بسرعة طلعه لبسه وطلع
شاف فاطمه ها بويه  امشي وياي اوديج لابوج .
_ اخ ربي هيج وتضيع وما يلگوها واخلص من هالفاطمه 
ب الاثناء دخلت العلويه وياها كميله  لبيت الملا انصدمت شما من شافتها كدامها بعد ان مر اكثر من عشر دقايق على طلعت الحجيه من البيت
_ السلام عليكم  شما شو بابكم مفتوح
فكرت شما ان الي ديصير هو فرصه حتى تتخلص من كل الي تعتبرهم مصدر ازعاج بحياتها واستغلت الموقف
بلمح البصر صارت تون وتندب
_ هلا هلا بالعلويه  اويلي عليج يمه فطم وين صرتي
_ شكو شبيها فطم
_ كله منج علويه ماعرفتي تربين بنتج  خلت البنيه تفرفح من البارحه لليوم بايكه تراجيها والبنيه بقت اتانيكم باب البيت
بلمح البصر ما لكيناها
اويلي عليه يمه فطم اويلي عليك ملا راحت عزيزه قلبك
واستمرت شما بالتمثيل لدرجه ربكت العلويه الي بقت من دون حولا ولا قوه لا تكدر تردها ولا تكدر تعرف بت الملا ضايعه 
طلعت العلويه كايده كميله  تجر بيها  (ادور على فطم بين الافرع )وهي تستفسر منها بخصوص التراجي وتحاول تفهم منها ان صدك هي الي اخذتها
_ ولج كميله انت صدك ماخذه تراجي فطم والله لا طلعتي ماخذتها الا اجويج على ايدج
_ يمه والله ماعندي
_بقت العلويه تفتر بالافرع  وهي تهمس ويا نفسها وتدعي  يمه بنيتي وين رحتي  ياربي كون الكى هاليتيمه
للحظه فكرت العلويه ان فاطمه كانت تنتظرهم معنى توجهت لبيتهم
همت العلويه واخذت كميله كعدتها على جتفها وانطلقت بخطواتها بأتجاه طريق بيتهم
_ مشت فاطمه بصف ابو عون وهو كايد ايديها ويسولف وياها حتى يطمنها
لحد ما اقترب من المكان الي يدرس بي الملا قرأن
صاح الله بالخير ملا
_ رفع الملا راسه وهو مندهش من شاف بنته فاطمه ويا ابو عون
تحرك من مكانه مسرع وهو يرد التحيه لابو عون  الي ما عنده سابق معرفه بي  لكن الملا كان معروف بحكم ترتيله للقرأن بالفواتح وتدريسه للقرأن للرجال والاطفال
_ اهلا اهلا  ها بويه فطم شجابج
_ انه ابو عون خويه وام عون لگت البنت تايهه بالدرب  وجبتها لك
_ رحم الله والديك ووالديها  تفضل عندي بالبيت
_ لا ملا مشكور يادوبك ارجع للبيت انام ساعة وابسط العصر بالخضره
_ زين انتظر اجيبلك ماي حگ دكت الدرب
هم الملا يجيب كاسه مي لابو عون  بعد ان شرب الرجال ودع الملا وفطم
وبدا الملا يستفسر من فطم عن الي صار وياها
_ بويه شطلعج من البيت
_سردت عليه فطم من لحظه ما ركضت الى ان وصلها ابو عوف اله
_ بويه لاتسويها بعد امشي امشي  هسه تلگين الحجيه گلبت الدنيا عليج
بويه فطم مايصير انت صغيره ماتندلين الدرب  لو هالرجال ماعارفني شنهو حالج ياهو بعد الي رجعج الي
ياخذونج غير اهل يربونج وبعد ما نلگاج ... بعد تطلعين وحيدج
_ لا
_ عفيه
لمن وصل الملا قريب على الدربونه صادف الحجيه وهي واگفه تعاين يمين ويسار ودموعها تجري على خدها اتعابن على الرايح والجاي بلكت تلمح فطم
وبالفعل لمحتها من بعيد وركضت عليها مفرفحه  ضمتها وهي تنوح
وجرتها من ايد الملا
( يمه فطيم  ليش يمه هيج تسوين بيه يمه ما بقى  بيه حيل ولا قطره دم 🩸 من كد ما رجفت عليج شطلعج شوداج للملا )
_ حجيه الحمد لله  لگوها الوادم وجابوها الي 
انت شلون غفلتي عنها
_ والله ملا رادت مي على كد ما دخلت طلعت ما لگيتها
طلعت ادور عليها
_ يله يله ملا هسه يظل بالهم خلي نرد البيت
جانت الحجيه المازه تقصد شما)
_ اول ما دخل الملا وخلفه الحجيه وما كانت فطم مبينه
لطمت شما على خدها كدام الملا  وادعت قلقها وانهيارها  لمن ما شافتها وياهم
_ صخام بوجهه شما راحت البنت
_ بويه لكيناها هياتها
تحرك الملا خطوه للجانب حتى تبين فطم خلفه
_ وگع هالخبر نقمه على شما بعد ما تأملت تخلص من فاطمه
ارتبكت وهي تتذكر كلامها ويا العلويه  ركضت على فاطمه واحتضنتها وتقبلها من خدها  تذكرت و
انبت نفسها بداخلها ( اويلي عليج شما اذا حجت العلويه للملا شيخلصج منه )
لالا اذا كالت اگله جنت شايطه على فطم وقلبي محروك وانهديت بيها من حلاة روحي على الطفله  بس لازم انطي خبر بجيه العلويه
_ كامت من مكانها وهي تلتفظ انفاسها
يمه الحمد لله  جسمي كله يرچف يا ملا من الهبطه  صدك العلويه دزلها خبر لگينا فاطمه  هسه رجعت لبيتها
_ طلع الملا  وبيده فاطمه  لليت العلويه يطمنها
اول ما دخل للبيت تلگته العلويه وتلگت فاطمه وكان باين عليها الخوف والقلق والتعب
وين لگيتوها دزيت سجاد يدور عليها من مساع  لحد الان ما  رد
وجهت العلويه العتاب لفاطمه
ليش يمه اطلعين بدون ما احد يدري لو ضايعه وين ننطي وجهنا
شلون تغافلين الحجيه وتنهزمين
_ جيت على كميله چا باكت تراجيتي  اريدن تراچيتي انت اخذتيها
خجلت العلويه من الموضوع وبررت للملا
_ والله خويه خميت البيت مابقيت مكان حرام اذا جان لكيت تراچي
غضب الملا من سمع تبرير العلويه  وافتهم احد حاجي وياها بهالموضوع مسبقا قبل ما فاطمه تنطق بي
_ خويه انت ياهو الكلج على  التراچي يمكم  حتى تخمين البيت شما ؟
_ خافت العلويه ان تفتن على شما وتكون طرف سبب لاثاره مشكله بينها وبين الملا  قررت تبسط الكلام
_ لا خويه مو هيج انه من دخلت لگيت المره  شايطه عادك سولفتلي
على فطم ما لاگينها كالت بقت تنتظر كميله دتسألها على تراجيها ضايعات واستبطتنا طلعت الحجيه ما لگتها
الملا يعرف طبع العلويه وعزه نفسها ويعرف طبع شما لكن ما راد يظن بيها السوء راد يحل الامر
التفت لفاطمه بويه فطم كميله خيتج مايصير تحاجينها هَج انت شفتيها خذت الترتجي
_ لا
_ خلص اذن ماخذتها عيب وحرام تبلينها انه شعلمتج عن الشيطان
شلون يوسوس لابن ادم
_ نظره فاطمه للملا بحيره وهي تحاول تستذكر
_ اها تظكرت ( تذكرت) ( من شر الوسواس الخناس) يعني بويه هو مايريدنا انه وكميله نصير صاحبات
_ ابتسم الملا بعد ما ابتسمت العلويه لذكاء هالطفله
_ اي بويه
_ خويه انه اريدن منك طلب
_ تامرين خويه
_ تدرس كميله وي فاطمه وتحفظها القرآن
_ تامرين خويه ان شاء الله
يله انه اترخص نرد للبيت .
امتنعت فاطمه عن فكره الرجوع للبيت بعد ما التقت بتؤامها كميله
حتى التراجي نستها اول ما التقتها وبدن يلعبن سوا
گامت كميله تطالب خالها
_ خالي بعدنا ما كملنا اللعب خليها تضل وياي
التفت الملا للعلويه وهو يترخصها
فهمت العلويه نظرته وجاوبته بسرعة
_ خويه خلها تضل تلعب لا رادت  ترد للبيت ادزها وي سجاد
ترك الملا بيت العلويه وتوجه للسوگ حتى يروح يشتري
تراجي تراجي تشبه التراجي الي انفقدت من يعقوب الصايغ اليهودي الديانه
_ السلام عليكم
_ وعليكم السلام ملا
(رد يعقوب السلام على طريقه اهل المدينه الي انولد بيها وتربى بيها هو واجداده واطبعوا بعاداتها وتقاليدها وامتهنوا بيها مهنة التجاره وحده منهن صياغة الذهب )
لازم عدكم زواج ملا صار مرتين تمرلي خلال ايام
_ ياريت   يا يعقوب ازوجهم كلهم
لكن  التراجي لبنتي ضاعت وما ردت اكسر بخاطرها
جيت اشتري مثلها
_ عندي احلى منها
حاول يعقوب يطلع التراجي الي قصدها مثل الورگه
لكن الملا طلب منه نفس الترجيه
دفع الملا حسابها وطلع متوجه لبيته دخل بوقت كالعاده نسوان البيت مشغولات الي تعجن وتخبز والي تنظف والي تطبخ
اتلگته شما
الله يساعدك ملا وين فطم
_ استغرب الملا سؤال سما عن فاطمه وبحسن نيه ظن سالفه ضياع فاطمه لينت قلب شما عليها وبدت تظهر مشاعر الخوف على بنته
فرح الملا بداخله وجاوبها
_ بقت تلعب وي كميله العلويه گالت خليها عدنا لو رادت ترد للبيت
يردها سجاد
الحجيه وين
_ الحجيه بالسطح وي هضيمه ( الكنه او الچنه) يشرن الملابس ويسولفن
طلب الملا منها طاسه الماي وبقو ينتظر فرصه تلتهي بيها شما ويدخل لحجره فاطمه والحجيه يذب التراجي بمكان
لحد ما استبطت شما كناينها الثنتين والحجي وهي ادردم
_ ادري صعدتن نسيتن رواحجن بالسوالف ما تگولن خاف المره تريد شي
تركت الملا وصعدت الهن وهو استغل هالفرصه واتجه لغرفه فاطمه ذب الترجيه جوه الكنتور وخرج ... صاح بعالي صوته
انه طالع
رجع الملا لشغله وهو مرتاح
اما فاطمه الي كانت ترتاح ببيت عمتها الي تربت بي حد الي تنسى حتى بيتها واهلها
وهي كاعده على السفره ويا العلويه والحجي وبقيه العائله تاكل هي وكميله كعادتهن الا بصحن واحد ويتبسمن ويتهامسن وحده ويا الخ
_ الحجي نهرهن 
_ مايصير الواحد يطك سوالف كدام نعمه الله اكلن وكملن بعدها سولفن
ولا تاكلن من وسط الصحن اكلن من الطرف الي كدامجن لحد ما توصلن للوسط من دون ما اطلعن صوت
_ الاثنين بقن رافعات روسهن ونظرهن للحجي يسمعن بتمعن وتركيز اداب الطعام وسنه رسول الله بالاكل بعد ما انتهى اتاكد ان كان كلامه مفهوم
هزن روسهن ورجعن ياكلن بمحاوله لتطبيق نصائح الحجي
لحد ما رفعت فاطمه راسها نحو العلويه
_ يمه انه اعرف اسمي على اسم السيده فاطمه الزهراء
بس ما اعرف كميله ليش مسمينها هَج( هكذا)
_ الكل كان يصحك ويستغرب اسأله هالطفله الي تفاجئهم بالمواصيع الي تطرحها والي تفكر بيها الا العلويه كانت تبتسم لان تعرفها ذكيه
وما تتحمل يبقى سوال براسها من دون ما تعرل اجابته
_ والله يمه كميله طلعت روحي بيها وانه اولدها ومن انولدت
سألتني الدايه شنسميها من التعب وما الي خلگ احجي صار اسم كميله الدايه كدامي گلتلها على اسمج وسميناها كميله
_ ابتسم الكل على هالقصه حتى فاطمه الي التفتت لكميله وهي تبادلها الابتسامه وتهمسلها اذا كملت اكل يتركون  السفره حتى يلعبون
رجعت فاطمه بعد ساعات للبيت وهي قريبه من الملا تسردله
مغامراتها بهاليوم ببيت عمتها
سألها
_ بويه ما لكيتي التراجي يم كميله
_ لابويه ماعدها
_ شفتي بويه طلعت البنت ماماخذتهن هسه انت اذنبتي لان تهمتيها وگلتيلها انت اخذتيهن لازم تستغفرين وتتأكدين مره ثانيه يله تحچين
روحي بويه خميها زين  خاف ما شفتيها لو طاحت منج جوه الغراض
بعد مده رجعت فاطمه وهي تصيح والترجيه بأيدها
_ بويه لگيتها
كمزت الحجيه  فرحانه ها فطم لگيتيهن  مو كتلج لا تبچين هسه نلگاهن
اتفاجئت شما بالمنظر وبدا قلبها يدك بسرعة وهي تحجي ويا نفسها
( صخام هاي وين لگتها )
تركت الهول  بعد ما ادعت فرحها بعثور فاطمه على التراجي وصعدت تركض لحجرتها فتحت الصره  استغربت التراجي طلعتهن خلتهن على كف ايدها تفكر لعد التراجي الي عند فاطمه منين
انفتح عليها باب الحجره فزت ووكعت التراچي من ايدها على الحصيره

يتبع بوم الجمعه ليلاً تكمله البارت بأذن الله