دخلت فطم ادور على كميله لحد ما وصلت باب المطبخ لگتها مفرشه بالكاع وبيدها كرصه خبر وقطعه سمك وبجانبها سله الخضره التفتت كميله _ ها شعندج جايه ابتسمت فطم _ جاي اصالحج كعدت بصفها وهي داهرها ضربت كتفها بكتف كميله واخذت منها وجرت قطعه خبز من ايد كميله ومدت ايدها اخذت حفنه خضره ولفتها بخبزتها واكلت منها اول لكمه _عاد لا تسوينها زعله كميله انت تعرفين طبعي المفروض ما عزعلين تدرين بيه من اعصب افقد تالي اتندم _ اه وانا حايط نصيص لازم تقهريني واضحكلج _ بشنهي قهرتج انت تدرين انه احجي من ورا قلبي مو منه يعني المفروض ما تاخذين الحجي عليج كولي هبله وخليها تحجي كومي كومي عاد صبيلي استكانه جاي وجيبيلي كرصه خبر اريد اغمس بيها وانه اسولف وياج _ وكالعاده رجعت المياه المجاريها بين الاثنين بعد مده دخلت عليهن العلويه وهن مبسطات ياكلن ويضحگن _ ولج يمه فطم انت ليش ما دخلتي سلمتي مو عيب من المره _ يمه انت تدرين انه استحي من الاغراب وانوب دخلت بسرعة جفلت بعد ما كدرت ارد ادخل اسلم سلمت هيج بعد من فشلتي _ردت كميله تسأل العلويه وهي ترفع راسها يمه هن شيردن مسيرات عدنا وانت ما تعرفين غير ام عبد _ يمه المره تعرفني وانه هم شايفتها لكن من بعيد ما بيناتنا كلام لكن هي تعرف ام عبد ( زوجه المختار) وسامعه منها عني وحبت المره تتعرف جابتها ام عبد واجت والله المره تنحط بالقلب من اهل الله وحجيها حلو ما تجيب سيره احد بالباطل بس تمدح بالناس _ هذا الي افتهمته العلويه من زياره ام ظافر لكن الحقيقه غير ... ام ظافر كانت جايه تشوف كميله بتزكيه من ام عبد زوجه المختار بعد ما عرفتها ددور بت حلال لابنها طاهر الاصغر من ظافر ام ظافر عدها ٣ اولاد وبنات اثنين اكبرهم ظافر افندي دارس ببغداد ويشتغل موظف بميناء البصره ومن اشتغل شغل اخوته طاهر وياسر عمال بالميناء ولان الام عجزت من ان تردد موضوع الزواج على مسامع ظافر الي همه شغله وينتظر يكون نفسه حتى ياخذ انسانه مثله متعلمه تكون من بنات بغداد لذلك لبت طلب ابنها طاهر ان ادورله على مره وتزوجه واول ما وكعت عين الحجيه على فطم غيرت رأيها بعد ما لمحت عيونها وملامحها الجذابه صرفت نظر عن جمال كميله وقررت ما تذكر الشبب الحقيقي ورا جيتها عند العلويه بعد ان ودعت العلويه وطلعن من باب بيتها التفتت الها ام عبد _ ها حجيه شو ما حجيتي وي العلويه على كميله شو لفلفتي السالفه بحجه جايه تتعرفين _ ام عبد كميله حلوه لكن بت الملا احلى ودخلت قلبي هالبنت هيج حسيتها طالعه من لبة قلبي سبحان الي خلاني احبنها هيج من نظره انه اريد منج ادليني على بيتهم اروح احاجي الملا عليها _ جا الملا هيج وكت مو بالبيت خل ابو ظافر يروح يحجي ويا بالجامع ( الحسينيه ) رجعت الحجيه ام ظافر للبيت وبقت اتاني دخله ابو ظافر الي چان يشتغل نجار الى ان دخل منهك راد يكعد والحجيه تسلمه طاسه المي _ خضر لا تنام فوت اتسبح واطلع بوجهك للملا يوسف اليوم شفت بنته عند بيت العلويه هي الي ناخذها لطاهر _ حجيه سمي بالله انه جاي نگضان خليني ارتاح فد ساعة واطلع للملا _ انت دوم هيج يا رجال كلشي عندك برويه اگله السالفه سالفه زواج يگلي ارتاح _ يا مره شنهي البنت طايره خو ما طايره _ اريدن افهم احد حاجي بيها منطينها لاحد حتى ارد على كميله لا فطم راحت من ايدينا _ اها وانت لو هاي لو هاي ما الولايه متروسه بنيات وكلهن بنات اصل وفصل _ انه اريد اناسب من بيت الساده انت لا تدخل العلويه انه اعرفها مره معدله والبنت تطلع مثل امها وبنت الملا هم تربات العلويه يعني عز الطلب نسب واصل وفصل وجمال واخلاق وتربيه والبنيات سحيوات ماهن محيلات انه تدري بيه نظرتي ما تخيب بابن ادم اخ لو ظويفر يقبل يتزوج كان اخذت البنتين مره وحده وياسر بعده صغير _ يا مره استهدي هذا زواج من يگول يرضون يزوجونهن انت عرفتي البنيات ... بلغن لو هيج على شوف العين انثبرتي _ عادي لو ما بلغن ينتظرونهن يبلغن المهم اسميهن بأسم ولدي ما يصيرن لغيرهم خضر لا تبقى تاخذ وياي روح على الملا حاجي على بنيته وشوفه شيگول _ وتوجه خضر للملا ... وبعد ما دخل وسلم طلب من الملا ان يحاجي على انفراد لبى الملا ... لكن من سمع طلب خضر ابتسم _ خويه انه مابقى عندي بنات غير وحيده بس فطم وهاي صغيره _ خويه انه جاييك على فطم انه ما ادري بيها صغيره الحجيه ام ظافر شافتها عند العلويه واحنه رايدينها من تكبر عودك يتزوجها ياخويه غالي بس فطم يتيمه وانه ما اريدن تخش بخطيتها اعذرني _ رجع خضر للحجيه خايب الرجاء لكن الحجيه بقت مستمره بمحاولاتها كل فتره ولخ والملا يرفض بعد اشهر اخذت الحجيه نسوان من الطرف وراحت للعلويه تطلب تدخلها بالموضوع وبالصدفه كانت العلويه راجعه للبيت وياها عطيه اخت فطم التقت بالحجيه ونسوان الطرف وكعدت وياهن وافتهمت السالفه استغربت ان الملا ما بلغ احد بهالموضوع بتاتا لكن عطيه حبت الحجيه وارتاحتلها وبعد ما طلعت الحجيه ونسوان الطرف كعدت ويا عمتها العلويه تسألها عن هالعائله وهالحجيه وكان اغلب كلام العلويه عنهم مديح وذكر طيب دخلت السالفه براس عطيه ( والله ابوي لو ينطي فطم لهالمره الخيره بدل ما تجيها قسمه سوده مثل قسمتي ) عمه انه تأخرت وينه سجاد يردني لعيالي _على جيه انه ادري وين يروحن ما يلفي للبيت من اريدنه _ من تأخر سجاد اضطرت العلويه تاخذ كميله وفطم وياها وهي توصل عطيه لبيت عيالها والي هم بالاصل بيت خالها المتوفي الي كان يشبه الى حد كبير شخصيه اخته سعديه الضعيفه وكانت زوجته حربيه مسيطره على البيت لحد الاذيه ولما وصلت عطيه متأخره جانت خايفه من عقاب عمتها وزوجها بنفس الوقت تخاف تسولف لعمتها العلويه وما رادت تحجرجها قررت تجلب بفطم _ عمه ليش ما تخلون فطم عندي وابوي يجي ياخذها من يرد للبيت _ بعد اصرار وموافقه فطم وافقت العلويه و سلمت من الباب على حربيه الي دعتها تدخل لكنها اعتذرت منها لاستعجالها بالرجعه للبيت دخلت فطم ويا عطيه واول ما انسد باب البيت علطت حربيه _ ولج عطيه ليش تأخرتي مضروبه الجلوه والله اليوم لا اخلي يكسر راسج ورجليج _ عمه والله سجاد ابن عمتي تأخر وعمتي حانت تخبز كملت الخبر يله كدرت توصلني حتى ابوي ما شفته والله كضيتها ببيت عمتي _ فزعت فطم من منظر حربيه وصريخها وخوف عطيه وتبريرها وهي تشوفها تركض على معجانه الخبز وتاخذها يم التنور ورحعت تطلب منها _ فطم تعالي خيه اكعدي يمي بين ما اخبز _ كعدت فطم تتفرج على عطيه وهي تشنگ الخبزات وتضحك وياها وتمازحها وهي تكترلها عجبنه صغيره _ وهاي حنونتج يا فطم وابتدت عطيه تخبر وصوت ادردم حربيه يسببلها الخوف والعبوس _ انت ليش تخافين منها وليش تخلينها تأذيج ما تحجين لابوي والله لا يهد عليهم _ فطم ذول ما يرحمون لو هد عليهم ابوي ياخذني منهم يطلگوني وياخذون فريخاتي ( ولدي) خل يولون انه اتحملهم لا تخافين وبعد مرور مده من الوقت التموا اهل البيت وبينما كانت فاطمه تسولف ويا ابن خالها وهو يسألها عن احوالها متعجب منها كبرانه انتبهت فطم عطيه اختفت ورجلها هم ماموجود ويا الموجودين يمها بعد دقايق طلعت عطيه وعيونها تصب دموع وهي تركض تخلي كدام الكاعدين سفره العشه انهضمت فطم لحال اختها وعرفت ان الي بي ورا كامل زوجها وهي تشوفها مثل الخدامه والكل ياكلون ولا كأنه احد شاف دموعها الي ما فهمته فطم بلحظتها خوف الكل من امهم حربيه كامت فطم من مكانها وهتفت بعصبيه وهي تخاطب اختها _ انه اريدن اروح اگل لابوي عليهم يبچونچ اصبرولي انه اعلمكم _ وبحركه سريعه لبست نعالها وفتحت الباب وهجت فطم بوقت قبل الغروب _ ارتعبت حربيه وطلبت من كامل يلحگ فطم يوصلها للبيت وهي تهدد عطيه _ انه الج لو دخل ابوج وگلتيله كلام فطم صدگ الا اخلي كامل يطلگج ويتزوج عليج وعودك لو شفتي فريخاتج غميني _حاول كامل طول الطريق يحتال على فطم خويه انه شلي غرض هي اختج شو شبيها يمكن انجوت بالطباخ _ ها وجا انت ليش ما سألتها شبيها وهي كاضه الصحون ودموعها تجري _ فطم انه راح اشكيج للملا اگله لسانها طويل وي الاكبر منها ما تحترم وتدخل بامور الكبار _ گله تردوني اشوف اختي تبجي وخالتي حربيه تزفها واسكت _ بعد ما التقت فطم بالملا وسولفتله الي شافته كان كامل خجلان وخايف لكن سرعان ما نكر كلام فطم وتحجج كدام الملا _ عمي ترى امي تحبها لعطيه هي بعد بتها لو حجت عليها تريد تعلمها تعال وياي اسأل عطيه لو احد عال بيها بس الله يحفظها فطم صغيره ما تعرف تخمن غير الي تشوفه عمي عطيه تبچي ( ممغوصه ) البنت صغيره ما تعرف بمرض النسوان _ احتار الملا بين كلام فاطمه وبين كلام كامل خجل يكذب كامل وما كدر يكذب وغزه قلبه قرر ان يبتكر حجه تخلي يزور بيت حربيه ويتعرف على حال بنته بويه فطم عيب مايصير تحجين على ام كامل انت بعدج صغيره بويه لا تلاسنين الكبار يله خلينا نروح وي كامل نسلم ونستسمح المره اعترضت فاطمه وحاولت تحتج لكن نظره الملا الها حذرتها وردعتها حاول كامل ان يمنع الملا من الحضور وهو يتحجج ان هم اهل مابينهم اعتذار وملامه او زعل لكن الملا اصر اخذهام ويا لبيت حربيه بقى كامل طويل الطريق قلق وخايف من الي راح يعرفه الملا وشنو حيكون موقفه اذا عرف بالسوايات الي مسويها بعطيه هو وامه الى ان وصلوا الى باب البيت طلب من الملا يدخل قبله يبلغ امه تتلفلف حتى يدخل الملا بهالاثناء دخل وهو يتراجف ... ولج يمه الملا بالباب وينها عطيه امشي خلي يدخل لا تخاف حذرتها او حجت نطلگها صاح كامل ... عطيه _ نعم _ خزرها والله لا حجيتي شي تحرمين عليه انه طالع هسه ادخل الملا _ ما الله ما احجي _ دخل كامل ومن بعده الملا وهو يلقي السلام بصوت عالي السلام عليكم ردت حربيه _ هلا هلا خويه بعد ان كعد الملا وهو يترقب حال بنته عطيه ... استغرب الوضع بخير والعلاقه بين العمه والكنه طيبه وادعى المزاح بحجه ان يريد يقنع فاطمه وبنفس الوقت يوصل تهديد مبطن لكامل في حاله اساء لبنته _ ها بويه عطيه ياهو الي بچاچ _ لا بويه محد بچاني انه موجوعه اسم الله عليك _ اها زين ما طلع كامل كان خيج محمد علي تكاون وي ابن خاله بعد تدرين بيه ما ينحط بالعب ما يتحمل الهوا يأذي خياته _ خويه يوسف بعد هي بنيتنا خذيناها منكم صغيره صارت تربات ادينا لو ردنا نعلمها ونحاسبها على العلط خو ما بيها زعل هو هم رجلها واله حق يقومها وانا بحسبه امها بعد انت لا تگويها علينا _ انه مربي بناتي خويه يخافن الله ويعاملن الناس بالحسنى وما تطلع منهن العيبه لو علمتوها وقومتوها انه ممنون لكن بالمعامله والكلمه الطيبه انا ما ارضى وحدتهن تنهان وتنذل اخذتوهن مني معززات مكرمات ومدللات ودكيتوا الصدر اداروهن وتباروهن لانهن يتيمات وانه تعشمت خير انتهت الزياره بتأكيد عطيه انها تنعم بحياه طيبه عند بيت خالها وما كان كدام الملا الا ان يصدگها ويعز كلام فاطمه كطفله حللت الموقف بعاطف من دون ان تفهم الحقائق .............. لكن بعد اشهر وبينما كان الملا مسافر للكوفه كانت فاطمه بالسطح تساعد صبيحه وهي تخبز _ فطم بسرعة غطي الخبر لا يضربه الهوا ويَبَس وبين ما فطم تلم الخبز وتلفه بقطعه قماش سمعن صوت طفل تركت صبيحه الشنگه الي بأيدها وهي مكمبصه كدام الصينيه ووگفت بسرعة وتجهت لسياج السطح الداخلي الي يطل على حوش البيت دتتعرف على صاحب الصوت _ ها ولك حسوني شبيك تصيح _ خالتي جدتي طگت امي وابوي يريد يدفن امي سمعت فاطمه واستشاطت غضب اخذت روحها ونزلت بهمه مسرعة اخذت عبالتها وهفت بيها ويا حسون وصبيحه تنادي عليها من فوك من دون ما حتى تلتفت لصياحها _ ولك حسون امشي نروح لخالك عبد علي بالاول _ وصلت فاطمه لورشه النجاره الي يشتغل بيها اخوها محمد علي ودزتله حسون ينادي طلع عبد علي شايط ومفزوع من الي سمعه والدم صعد لراسه وهو يتوعد ويتهدد _ ردي انت فطم _ لا خويه اجي وياك بلكن خيتي احتاجتني اسندها _ وتوجه محمد علي وفطم لبيت خالهم يهدون عليهم بالرغم من عصبيه محمد علي الا انه دخل فطم بالاول حتى يحشم حرمه البيت لو وحده مكشوفه تلف فوطتها او تتخبئ دخلت فطم وهي تهد وتتوعد حربيه _ وينج يا متخافين الله ما لگت احد بلغها حسون _ خالتي يم الزرع دخل عبد علي ويا فطم وهم يتبعون خطى حسن لحد ما سمعوا صوت ونين وبجي عطيه ركض محمد علي وركضت فطم وبطريقها لمحت كرك اخذته وهي شبه تركض التفت كامل مرعوب وهو يشوف محمد على ينقض عليه طرحه بالارض وفطم انجنت وهي تشوف عطيه مدفونه لنص جسمها وحربيه تتهدد عليها وتشمت بيها لحد ما اقترب عبد علي وفطم هربت العجيز ومن خلفه فطم تريد تثأر لاختها بيدها الكرك تريد تضرب بي حربيه لكن العجوز كدرت تبتعد رجعت فطم وهي تحفر وعبد علي مجتف كامل يأمر حسون يجيبله حبل رفض الطفل خوفا من عقاب ابو لحد ما خلصت فطم اختها مدتلها ايدها وطلعتها وهي تتوسل بعبد علي خويه اتركه لا ياخذون مني فريخاتي صاح بيها عبد علي _ يا هو الي ياخذ فروخج وانه موجود امشي لمي بقجتج وانت حالي جيب اخوتك واخذ امك وخالتك فطم ردوا للبيت وانت يا كامل والله لا اخليك عبره انت وامك لكل واحد يمد ايده على خياتي عمت عين الزلم الي ما تحافظ على عرضها ولك شني لكيتها وي واحد الله واكبر عليكم شنهي مكطمه ماعدها اهل متولينها _ رجعت فطم وهي تلهث شايله بقجت اختها فوك راسها وبيدها الخ تكود بنت اختها الصغيره والثلاثه الباقيين يمشون ورا امهم عطيه دخلوا البيت تلگتهم صبيحه تستفسر مفزوعه من منضر عطيه كسر الي يكسر ايديهم ان شاء الله تعالي خيه تعالي ... دخلتها للحجره حتى ترتاح واخذت الاطفال قدمتلهم الاكل حتى يلتهون اما فطم فدزت حسون يبلغ خواله يلحگون عبد علي وبعد اقل من ربع ساعة دخل عبد علي هو وعباس متعبين تلگتهم فطم ها خويه _ ربطنا بجذع النخله عودك خل تصكعه الشمس منا لحد ما حربيه تخلصه وينها عطيه حاجيها ما الها رده على ذاك البيت وانه هم الي تصريف وياها مستعبدينها وشابعينها كفخ وهي ساكته ليش ماعدها اهل لو كاعدها زلم وراها تاخذ حقها خل يجي ملا يوسف يشوف كامل وحربيه شمسوين ببنيته اخ الله كله من عباس ما خلاني اكسر ايده ورجله بالكرك كله منك شعندك جيت وراي _ جا خويه تعوق الزلمه ونبتلي بي هم هو ابن خالنا وفروخه ما يرضون نضر ابوهم تريدهم يكرهونا ويكرهون امهم لا تخلي الشيطان يا خويه يعمي عينك وقلبك ها هي عطيه وحسون يكلك فطم ما مقصره مخليه حربيه تتجبح بالبستان وهي تركض وراها وتهد عليها جا خويه فطم الي يشوفج ها كدج ما يكول انت هيج سباعيه انه اليوم حسيت بيج كبرتي خويه ما ينخاف عليك والله عفرمن عليج _ ورجع الملا بعد ايام استاء لحال عطيه والي جرى عليها وقرر ان يطلكها من كامل بعد ما اخذ موافقتها وهي وافقت تخلص منه بعد ما اطمنت اطفالها يبقون عدها وهنا رجعت عطيه لبيت ابوها وقريبه من احتها فاطمه صارت الها ام وصديقه وبعد ملحه الحجيه تم ظافر لاشهر وتدخل عطيه ورقيه والعلويه والحاحهن على الملا ان يوافق على هالقسمه وبعد ما الحجيه دزت عليهم زلم من الطرف والمختار وناس رايحه وناس جايه وافق الملا بعد تقريبا سنه وشويه من اول مره خطبتها وتمت خطبه الرجال بالجامع وهم يقرون الفاتحه ابو ظافر وظافر وطاهر وياسر والمختار واعيان الطرف والجيران والملا وولده اما الحجيه ام ظافر زارت بيت الملا وتمت خطبه فاطمه بلمه نسوان الطرف وحضور خواتها والعلويه وكميله والهلاهل والصفكات وهوسات اهلنا بهاليوم نولد حب جديد لحظه الي دخل محمد علي بنهايه النهار بعد ما الضيوف راحوا للبيت حتى يرجع عمته العلويه انتبه على كميله وهي خاطه الكحل كانت طويله وضخمه عكس فطم قصيره ورشيقه لكن عودها متوسط مو نحيفه حاجى نفسه وهو مصدوم ( يمته كبرت هالبنت انه اخر مره شفتها اكثر من سنه اها من هاي عمتي العلويه بعد ما تخليها تطلع من البيت لا هي ولا فطم البنيات كبرن وانت هم كبرت يا عبد علي ليش ما تتعوذ من الشيطان ومادام عجبتك كميله تحاجي عمتك وتاخذها بالحلال ) وبالطريق وهو يوصل العلويه وبجانبها كميله اتحرج يحاجيها انتظر يوصلهم لباب البيت ويترخص من العلويه بحجايه على انفراد _ بعد اقل من عشر دقايق كان واگف بنص حوش العلويه وهو يحاول يحاجيها بخجل عمتي انه _ شبيك يا عمه احجي _ عمتي لو ردت كميله تنطونياها _ ابتسمت العلويه بين فرحانه وبين مستغربه ومتفاجئه يا عمه انه انطيك عيوني مو بس كميله بس اخذ الحجايه من ابوها وانت تحاجي ابوك وهو يطلبها من الحجي ما اتصور يدركم يا يمه _ وتمت خطبه عبد علي الي كان يعتبر كبير عمره ٢٦ وكميله ١٤ سنه ——— اما فاطمه بعد ايام من خطبه اخوها محمد علي اتوفى خطيبها طاهر الي حتى ما كانت شايفته وكان من المفروض يتم زفافه عليها بعد اسابيع ولزمت الحداد على خطيبها بحكم الاعراف والتقاليد وساند الملا عائله ابو ظافر بمصابهم وتأجل زفاف عبد علي وكميله احتراما لاهل المتوفي _ ————————- بعد مرور اكثر من ستة اشهر _ بينما مزل ظافر بدشداشته المقلمه بيج وجوزي فاتح ومخلي المنشفه على كتفه متوجه للرازونه حتى يغسل وجهه كالعاده كل صباح وهو يتهئ يروح لشغله بالميناء بعد ما انتهى من تنشيف وجهه وهو مكمبص حس بأحد خلفه التفت جانت الحجيه ام ظافر رفع راسه الها _ صباح الخير يمه _ صباح الخير عندي حجايه وياك _ وگف وقابلها خير يمه شو تعبانه _ ما نايمه من ليلة امس _ ليش يمه _ اريدك تاخذ فطم
