فاتت سمانة .. كان الصيف دخل يعني العطلة ولبحر حتى لسبتمبر .. فالوقت هذاك كان مروة وسفيان يحكو فالتلفون مرات .. ومرات يمشي للفيلا متحجج بخالتو .. ويشوفها تما .. بصح خلاص هو تاكد من مشاعره من اتجاها وقرر انه يعمل خطوة لامام ويشوف المستقبل نتاعه ..
بالرغم من كلشي وخلفية مروة وطريقة لقائهم هو شافها تناسبه وتفهمه وتعرفله يعني هي الزوجة المثالية الى رح يفوت معاها حياته
.. خمم بزاف ولأنه يعرف امه تفتش في كل صغيرة و كبيرة قرر انه يعمل حبكة مع صاحبه لحتى وقت يمشي يخطب يكون كل شيء مستف وحافظين الادوار الخ .. والحبكة هاذي انه مروة طفلة يتيمة امها ماتت وبوها عاود زواج .. ووقت مات ببطبيعة الحال مرت ابوها طردتها وهي مشات عند مسيكة كونها ريحة الريحة من بعيد
وكيما كان الحال ... قرات وربحت الباك وطلعت للفاك ولأنه هي امرأة عصامية حبت تخدم وتصرف على روحها وبعد جدال كبير مع مسيكة سمحتلها وهي لقات خدمة عند نجاة التى تكون خالة سفيان تمرض الجدة نتاعه وتما كان مكان لقائهم الاول .. وهو من وقت شافه اعجب بيها وقرر يزوجها .. وهذا الشيء كامل مكانش خوف من الناس ولا بصح ماحبش انه مروة تنقص قيمتها قدام عايلته
كيما كان الحال ..كان باقي فقط انه شوقي يسال امه ويشوف اذا كانت رح توافق تخلي مروة عندها وتقول انه هي قريبتها من بعيد .. وطبعا هو يعرفها شوي صعيبة ولهذا كان رح يزيد للأمور شوي بهارات لحتى يحنن قلبها ومن جهة اخرى كان رح يحرس انه يبنيلها انه نية سفيان مليحة ونظيفة والباقي على ربي يعني
يوم جديد طلع وشمس دافية حضنت الكل بالاشعة نتعها الصفراء .. سفيان كان في دارهم بايت .. بما انه عنده كونجي حب يستغل الوقت ويرقد شوي ..في الفيلا نتاعهم .. وبالتحديد فالايطاج الثاني فالشومبرا نتاعه ... في ذلك لوقت كان راقد وماشي حاسس ولكن فاق على الحس .. حل عينيه وصار يتكسل ..
سفيان ( مسح على وجهه ) باين اليوم تاع الميناج علابيها الحس هذا كامل راه لتحت ..
تلفت على جيه وحكم لفون وحله ودخل فالفايسبوك وبقى طالع وهابط ويشوف فالجديد .. وهو لاهي ما حس غير ب ميساج من عند شوقي صاحبه ..تما قراه ورجع يعيط .. ثواني فاتت حتى رد عليه
سفيان ( تعدل في جلسته ) صباح الخير السلعة
شوقي ( كان داخل للدار ورافد القضيان ) هذا وين راك تنوض .. صباح النور
سفيان ( شاف فالساعة ورجع يحكي ) صح بعدا هذا وين حليت عينيا على الحس مانحكيلكش تقول الكازرينا تحولت هنا
شوقي ( ضحك وبقى يحط فالقضيان فوق الطابلة تاع الكوزينة ) هيه واش تحكيلي
سفيان ( وخر الغطا ووقف من بلاصته ) كاش جديد عندك .. يعني واش قاتلك خالتي مسيكة .. وافقت على انه تستقبل مروة عندها وتقول نهار الخطبة انه تقربلها
أنت تقرأ
راقصة في عهدة ظابط / الكاتبة منال منولة
Romanceعندما تلقيك الحياة بقوة .. فترتطم على الأرض وفي تلك اللحظة لن تجد الا الذئاب التى لن تقصر في نهش لحمك دون رحمة اما هي كانت صغيرة للغاية عندما حدث ما حدث كانت مراهقة حلمها قطرة حب كانت لا تعرف اي شء وعندما وقعت في الخطيئة خافت وركضت ولكنها أضاعت طري...
