﷽
الحلقه الاولى
_يوم جعل حياتي جحيم _
❥ حنين الموسوي ❥
انا جروحي محطه وناس تدفع ناس
ركب بيه الحزن والنوح والدمعه
وجرى بروحي الحزن مجرى النهر لو فاض
وغرگ ناعور حزني وما نشف نبعه
انقفل باب الفرح وسئلت عالمفتاح
اضنه بير يوسف وياهو الي يطلعه
صبح خشبه الكَلب يتونس عالنار
حرك هندام روحي وياهو الي يصلحه..
.
.
ام مها: بنياتي يمممه يله اگعدن شوكت تشبعن نوم كافي يايمه اگعدن صارت الدنيا ألضهر
زهراء: يمه اليوم عطله خلينه نايمين نشبع نوم حبابه
فدوة اروحلج نبع الحنان.
مها: صحيت گوة افتح عين واغمض عين نهضت روحي من الفراش بكسل شفت العافيه گدامي بتسمت ابتسامه خفيفه وگتلهة
.. هلا يممه صباح الخير...اليوم صدك تأخرنه ولله بس هاي بنتج ام السان السبب بيهة تلغي النص اليل
احنه شوكت انام من وراهة.
ام مها: هله يبعد روحي صباح الخير والعافيه ادري بيهة هاي الشيطانه ام الوكاحه ماتنااام.
_ هاا شو گلبتن عليه طلعت اني شيطانه وام الوكاحه...وصنعت ملامح الحزن ع وجهي وگتلهن اعرفجن ماتحبني عاددي.. أمي صدگت گالت
_ ياااا ليش يبعد روحي انتِ العزيزة الغاليه وأخر العنقود بزر الكعدة وين اكو اعز منه هوه البيت ينطب بدونج زوزايه
مهاا: اهوو اشتغلت المحبه ولله يممه بنتج عيارة واني لان فقيره ما اعرف اسوي هاي الحركات وأصير ملعبه مثلهة... زهراء تباوعلي وتعيب ولله لو مو فشله من امي واكفه چان سحلتهة من كفشتهة.. أمي شافت المشاحنات گالت
_هسه كافي عوفن هاي السوالف كلجن عزيزات اكو واحد يكره بزره كومن غسلن خل احضرلجن الريوك يله حبيباتي بعجل ..
مها: صدگ گمنه غسلنه وتريگنه وطلعنه شويه بالحديقه اني وام الزوز صح نوبات نتكافش بس نرجع حبايب عبالكم ماصاير شي گعدنه نسولف
وأمي راحت يم جوارينه أم قصي اكثر وحدة علاقتهة قويه بأمي وأمي تحبهة حيل علاقت جورة قديمه ....
ام قصي: هلا بأم مها شلونج يخيتي ولله مشتاقتلج شبيج ماكو هل أيام مختفيه گطعتي بيه
_ هلا بيج يبعد اختج ولله يا ام قصي بهاي الدنيا تدرين بعد بيت وشغل والبنات هم مچلبات بيه ابقه يمهن.. تعرفين هم يضوجن خطيه لاطبه ولاطلعه يگللي يمه ابقي يمنه نضوج وبالذات اذا زوزه راحت للمدرسه تبقه مهاوي وحدهة
_ يا يختي شبيج هم خطيه طلعي البنات خل يغيرن جوو نهار كله محبوسات بهل المگموع
شدگولين ما تسجلين ويانه انتِ والبنات بحمله لبو الجوادين نروح لبغداد يوم الخميس هم خطيه يزورن ويغيرن جو... ولله صدفه اجيتن ع بالي بلكت مقسومتلچن زيارة
_ ولله خيتي شكوو بيهة اكو احلى من الزيارة چا خل اشوف ابو مها والبنات واردلج خبر.. اني هم اترخص وان شاءالله أردلج الخبر باليل يله خيه يلا مع السلامه
_هلا بيچ أم مهاوي خوش انتظرج علمود اسجلچن ويانه
_ الله كريم خيتي ان شاءلله
مها: چنه گاعدين اني وزوزه بالحديقه مخلصيهة وحدة تچذب ع الثانيه شويه وأمي رجعت من
ام قصي وجهة يبشر بالخير مبتسمه گالت
_ ها يمه بعدجن گاعدات هنااا ولچن رحت ورديت وانتن نفس الگعده.
مهاا: ايي والله يمممه ضايجين وين نروح مخلصيهة ظحك وسوالف
_ چا ماطولجن منجمعات تعااالن عندي وياچن موضوع وشغيله حلوة
زهراء: يممه نسمعج ولله بس احچي گولي شكووو حبابه الفضول گتلني يعني شي حلوو... شنوو هوة بروح شمخي
مها: اسكتي زهرة شبيج خلي امي تحچي شكد تحجين طفي المسجل.... كولي يمه شكوو خير
ان شاءلله
_ يله طفيته وروح شلش بس يممه احچي يله حباابه
امي گالت
_ من رحت لخالتچن ام قصي كالت اكو حمله لبغداد يزورون الامام الكاظم مسجله هيه وكالت سجلن ويانه وروحن انتِ والبنات...
زهراء: هلا هلا هلا بالطلعه هلا هلا بيج هلا هلا بالسفافه هلا هلا..... اي يمه اي يس يس اي يمه خل نروح نطلع نزور... اعتراضاات ماكووو الشؤون والداخليه لايعترضون فدووة... مو ولله ملينه وطلعت ارواحنه من هذه البيت
مها: شوووف هااي الخبله شبيج ولج ملگوفه يمه
الله كريم خل نشوف ابويه وذا قبل والله قاسملنه نروح.... زهراء تباوعلي وتعيب ع كلامي ولله خبله
أمي گالت
_ ان شاءلله يمه يله ادخلن جوه سولنه غدة ابوجن واخيجن ع جيه..
مها:.....
♡ لم تنتهي الحكايه بعد لنا تكمله اخرى♡
عطروا آنفسـكم بــآلصـلآة ع مـحـمـد وآل مـحـمـد
💟.. اللهم صلي على محمد وال محمد 🌺
أنت تقرأ
يوم جعل حياتي جحيم
Randomتبدأ حكايتنا من يوم مشؤم يوم جعل حياتي جحيم الذي انقلبت فيه الموازين لتغير مجرى حياتي رأساً ع عقب، تشتت، ضياع، ظلم ، وحق مغصوب، قاروره من زجاج وأئوهن من ذلك تكسرها حتى الرياح...... 🦋 فهل ستنصفها الأيام.... أم يبقا الحال كما هو... أم للقدر حكاي...
