أصبحــــــت ٱسيــــــرآ

6

الســــلام عليـــــكم

الكـــــاتب

احمــــد الخفــــــاجي

/////////////////////

أصبحــــــت ٱسيــــــرآ

صدفه لمن چنت أبآوع ..

دنيه بـ عيونك لگيت

آنتَ آول بآب مآ آكدر آغمك

آنتَ تنشآف من آسولف وين آضمك !!

………………………………………

تتغير الحياة وينضج الشخص عند الدخول في الازمات والاخطاء
بعد ما خلصت الايام بسرعه وبدون توقف
جاء الموعد النهائي

وفي  يوم 1/10/1983

يوم 1 من شهر العاشر هو يوم السبت

لبست ملابسي وحضرت جنسيتي والمستمسكات الثبوتيه للتجنيد في الجيش العراقي الباسل 
كان الموعد في مديرية تجنيد ذي قار ولكيت جماعتي هلال وقاسم وعباس  سلمت عليهم كان بالباب داكين قوائم الي بيها اسماء الجنود المكلفين في الخدمه

كان التسلسل على الحروف الابجديه  وعلى ايام الاسبوع وكان مراجعتي يوم الاربعاء شفت الشباب عددهم كلش جبير ومن جميع المناطق ومن الارياف والخوف مبين بعيونهم والبعثيه يدققون بالاسماء ويبحثون عن احد متخلف او ما حاضر في هذا اليوم

رجعنا مشي للمنطقه ونسولف وخايفين وما النه خلك كان مرورنا على دكان حجي حمادي
قاسم كال خلي اشربكم شربت
وكفنا في باب المحل ونشرب الشربت
وحجي حمادي كال اليوم چنتو بالتجنيد

هلال كاله اي حجي صرنا زلم كبار ولابد اندافع عن الوطن ونكمل الخدمه العسكريه غصبآ عنا وعن اهلنا

الحجي سكت ما يكدر يحجي ايخاف من الحزب
كملنا واذا اشوف المدرسه مفتوحه والطالبات مستلمات كتب وطلعن من وقت وكان العدد كثير

هلال باوع عليه وماكدر يحجي

كتلهم خلي نمشي لان اني تعبان ومالي خلك
رحنا ولكيت امي منتظرتني  وجها اصفر من الضوجه والحزن

امي كانت محضره الغده ما اكلنا قليل ورحت نمت لان الجو بعده بي حر قليل وتغير جو

العصر اجه عليه هلال  طلعنا اني وياه على الشط بالمكان الي يكعد بي الولد هو وجماعته
من وصلنا بس اندخن وضايجين ومالنا خلك لان وضع البلد في حرب طاحنه وهذه الحرب تحرگ الاخضر قبل اليابس

اجه الولد هو جماعته ايضحكون ويشاقون بصوت عالي

هلال من شاف الولد وياهم كال صباح راح احجي وي الولد هذا

كتله….  لا هلال عوفه يولي مالي خلكه وحتى لو عرفنا كلشي بعد فات الاوان ونسدت نفسي
هلال…  معقوله بهل الاسبوعين تغير كل تفكيرگ وصرت مالك خلك