السلام عليكم
الكاتب
احمد الخفاجي
/////////////////////
أصبحـــت أسيــــرآ
الغربة
من ترجع ادور
بالصور والذكريات اليوجعنك
الغربة
من روحك تگلك دنسه فنك
……………………
لزمت الورقه وضليت محتار ما اعرف شسوي
شنو اروح للمحكمه وشنو الي ما اعرفه اكيد اكو. شي عن امي
هذا الشخص الي كتب الورقه مراقبني واكيد من المنطقه مالتنا لان الورقه جديده ومو قديمه
ما عندي غير اروح لبيت هلال رحت عليه لكيته بالدوام ما نازل رحت لبيت قاسم هم بالدوام وعباس بالدوام
كان دوام العسكريه 21 يوم ب 7 ايام اجازه
رجعت للبيت ومحتار بهذه الكتابه لان كانت الورقه السابقه الي مكتوب عليها انته ميت على قيد الحياه
اكيد اكو شي جبير ما اعرفه
ومنو هذا الشخص الي يكتب الي
طلعت العصر اتمشه وحدي على نهر الفرات وتراكم الافكار الي براسي وماكو اي حل اكدر اسوي
تعشيت بمطعم ورجعت للبيت كان وضعي صعب ومحتار اروح للمحكمه. لو لا وشنو الي اعرفه معقوله امي مسويه شي
واذا رحت للمحكمه اروح وين ومنو احجي وياه ضليت الليل كله افكر واريد اعرف من هذا الشخص المجهول الي يعرف عني كل شي
كعدت الصبح رحت للمحكمه وصلت للباب ورجعت ماعندي موضوع جاي عليه قابل انطيهم الورقه اكيد راح ايضحكون عليه ويطردوني رجعت للسوگ فتريت بي
وكانو الانضباط العسكري يفترون واي شاب ايوفوكه اذا كان ماعنده نموذج اجازه ياخذونه ويسفرونه للفرقه مالته
وكفوني انطيتهم النموذج مالتي عافوني رجعت للبيت لان السوگ مليان مصرين الي يشتغلون بالعراق
اني كل شكي الي يكتب الورق كان. الرفيق الحزبي الي انقل بسببي وشكي بي قليل لان. دوامه بعيد ومن الصعوبه يكدر يرجع للناصريه وحتى بأجازته مايكدر يعرف كلشي عني
لكن هذا الشخص الي يكتب هذه الاوراق اكيد ايريدني اوكع بالفخ او هو ابراهيم احتمال بعده حاقد عليه
منطقتنا هواي بيها شهداء والناس بس تريد تعرف يمته تخلص هذه الحرب الطاحنه لان الشباب خلصت
كنت مشتاق لجماعتي ومشتاق للوالده الي صار هواي مشايفه وما اعرف شنو مصيرها
الظهر طلعت شفت الجهال ايلعبوني بالشارع صحتهم كتلهم عمو منو يجي على بيتي واني مامجود
كالو ماكو احد يجي على بيتك
اكو احد صغير كال عمو صباح اكو مره لابسه شي على وجها وكفت شويه راحت
أنت تقرأ
أصبحــــــت ٱسيــــــرآ
General Fictionالقصه حقيقيه كتبت باللهجه العراقيــــه شاب عراقي يتيم الاب تختفي امه بدون سبب ولا يعرف مصيرها المجهول ويعتقل ويدخل السجن وبعدها يلتحق بالجيش العراقي ويشارگ بالحرب العراقيه الايرانيه ويصبح اسير حرب الكــــاتب أحمد الخفـــــاجي
