الولد طفر جوة البيت .. وانا بقيت بعاين للاثر في الارض بتاع الاقدام .. لقيت اثر ابوي خشه لكن ماطلع .. والاثر جديد .. الولد من جوة البيت فتح لينا الباب
وانا جريت جري لغرفة ابوي .. هديك فاتحة .
معناها ابوي راقد بكون نايم بس لكن معقول ده كلو نوم؟؟ ..
لانو لو طلع بقفل غرفتو ..
لمن دخلت عاينت لسرير ابوي لقيتو فاضي . قلت ليهم ابوي مافي هنا .. وبقينا محتارين ..واقفين في نص الحوش ..شوية كدا نسمع ليك صوت الماسورة حقة الحمام بتكب.
قلت ليهم .. ياخي ابوي في الحمام وماسامعنا .. بس دقيقة ..
وجريت على الحمام .. وبقيت بكورك ليهو .. ابوي انت جوة ؟؟
ابوي انت هنا ؟
مافي اي رد ..
.. قلت ليهم ابوي جوة الحمام تعالو .. دقينا الباب مافي اي حركة .. دقينا ودقينا الباب دق شديد ..
..خالتو قالت ليهم اكسرو الباب ..الراجل ده جوة ..
قامو يتجارو.. الاتنين عشان يفتشو حديدة .. الحمد لله لقوها سريع .. وجو يضربو في الباب .. في النهاية دخلو الحديد كدا .. ولزوها الاتنين.. الباب اتعوج واتفتح ..
لقينا ليك ابوي واقع جوه الحمام .. لابس لباس بس .. تاني ما لابس حاجه ..ومافيهو حركة . زي الزول الميت ..ومطلع زبد بخشمو .. الاولاد وخالتو ظهر عليهم الارتباك والخوف .. بس انا اول شي عاينت لصدرو ..عشان اشوفو بتنفس ولالا .. لقيت صدرو بيطلع وينزل
قلت ليهم ابوي حي .. ماماميت ارفعوه .. فعلا شالوهو وجابوهو الغرفة ..ورشوهو بالموية ..عشان يصحى .. ماصحا .. المهم واحد قال للتاني ..شوف لينا عربية عشان سريع نسعفو .. دقيقة مافي الولد جا جاري.. وقال ليهو ارفعو ارح بوكسي الصادق واقف بره .. والله الاولاد ديل مابنسى العملوهو اليوم داك .. شالو ابوي الاتنين زي الشافع ..اصلا انا ابوي وزنه خفيف ..امكن وزنه مافايت الستين كيلو .. وجرو بيهو جري على البوكسي .. سيد البوكسي راجل صباح خير اسمو الصادق ساكن قريب لينا ..لقيناهو فاتح باب العربية وركبو ابوي
وابوي في غيبوبة كاملة .. زي الميت بس ..
الكلام زي الساعة 9 صباح .. خالتو نعمه جارتنا .قالت لي اقفلي بابكم ده وامشي بيتنا.. انتظريني هناك.. ماتقعدي هنا براك ..
امشي بيتنا .. واقفلي الباب عليك .. لمن يجو الاولاد من المدرسه .. وهي وركبت معاهم ومشت المستشفى .. وانا بقيت ببكي زي الكأنه ابوي مات.. ولانها خالتو منعتني امشي مع ابوي .. وزوجها مافيش .. انا بقيت قاعدة في البيت براي.. وماعارفة ابوي الحاصل ليهو شنو؟
.. وكنت خايفة شديد .. بس شوية كدا الباب دقه .. جاتني واحدة من الجيران .. وانا بس ببكي والمراة تسكت فيني.. وتقول لي ابوك مابحصل ليهو حاجة ..بكون فاقد سوائل او مرهق من سهر الفرن ..
لغاية ماجو الاولاد من المدرسة ..وانا اليوم داك طبعا غايبة من المدرسة .. لغاية بعد الضهر وانا مافطرت ولا اكلت حاجة وماحاسة بجوع .. وخالتو نعمة لسع ماجات من المستشفى .. زوجها وصل من الشغل وكلمناهو بالحصل ..
واتصل على زوجته بي تلفون اسود قديم وسماعتو خارجية .. خالتو قالت ليهو فيصل وعا ..وفتح عيونو .. لكن شكلو مشلول ..لانو شقو اليمين مابتحرك وكلامو ما واضح .. الدكاترة قالو جاتو جلطة .. تعال وجيب لي معاك قروش ..المعاي كلها اتقطعت .. انا طبعا بسمع في كلام المراة بالسماعة الخارجية .. وماعارفة الحصل علي شنو ..ماعارفة افرح بانو ابوي حي..
ولا اصرخ لانه ابوي اتشلا .. بس حاسة باني منهارة وعايزة.. ابكي وابكي لمدة عمري .. يحليلك يا ابوي الاتشليت .. يحليلك ..
بقيت قاعدة وابكي والراجل يسكت فيني ..ويقول لي ماتبكي يابتي ده امر الله ..قولي الحمد لله ابوك ما مات .. ربنا قدر ولطف .. هسي لو ما اسعفوهو سريع كان اتوفى .. لكن ربنا كريم ..
طبعا الراجل ده راجل طيب خلاص ..انا مامتذكرة اسمو منو يا عوض الله ..اوفضل الله .. مشى الدكان جاب لينا زبادي وعيش واكلنا انا واولاده .. انا بالجد جيعانة لمن مهبطة.. لكن الاكل ما قاعد ينبلع لي .. واللقمة دي بحس بيها زي الترابة .. الا انزلها بالموية .. المهم قدرت بلعت لي لقمتين او تلاتة عشان اقدر اصل ابوي ..
..
بعد ما اكلنا.. الراجل ساقني معاهو المستشفى.. ومشيت لقيت ابوي راقد في العناية ..ولمن شافني بس قعد يعاين لي ودموعو نارلات.. لمن وصلن اضنيهو وماقادر يطلع صوت بكا ..والله كأني بعاين لدموعه هسي قدامي ..
.. انا بس رقدت في صدرو وبكيت بكيت ..لغاية ما الممرضة جات ساقتني ..وقالت لي خلاص اطلعي بره ابوك تعبان ..عشان ماتحصل ليهو حاجة تاني ..
طلعت برة وقلت لخالتو اديني اتصل على خالتي اميمة واتصلت عليها اكتر من عشرين مرة بس تلفونها مقفول ..
وانا بقيت قاعدة في المستشفي ومامشيت من ابوي نهاي ..مرة يبيت معاي الراجل.. ومرة تبيت معاي خالتو نعمة .
اها يومين كدا وابوي طلعوه العنبر.. وبقى يتكلم .. لكن كلامو ماواضح شديد .. ومرات بنسى حاجات .. يعني يكون عايز موية .. بقول جيبو لي الكبريتة ..
وانا لمن بناديني.. بناديني باسم امي طوالي ..بقول لي يا اماني يا اماني .. يا حليل اماني ..
المهم قعدنا في العنبر ..خمس ايام في المستشفى.. وفي اخر ايام بقيت قاعدة مع ابوي براي .. وخالتو نعمه بقت مابتجينا في المستشفى .. طبعا ماعارف الحصل عليها شنو .. لكن لمن رجعنا عرفنا سيد البيت عامل معاهم مشاكل وعايز يطلعهم ..هم مؤجرين .
المهم نحن في المستشفى وانا ماعارفة اعمل شنو .. قلت لابوي يا ابوي اديني تلفون عمو فتح اكلمو ..
قال لي لالا ماتكلميهو هو لوفاة امك ماجا .. ما داير اكلمو .. غير مايشمت علي مابعمل حاجة ..
اها طبعا في احلك الظروف .. ربنا مابنسى المسكين ..
في شباب كدا جو وعملو معاي مقابله .. وانا شكلي ما بتقابل اسبوع ما مستحمية ,, وشعري منكوش وفستاني زي السجم .. غايتو حكيت ليهم الحاصل علينا ..والظروف المارين بيها .. ماعارفة تقريبا هم ناس منظمة ربنا يجزيهم خير
دفعوا فواتير العلاج.. ورجعوا لينا العصر ..جابو لابوي كرسي متحرك مستعمل .. ويوم الخروج من المستشفى.. جو وصلونا البيت بي هايس ..
وصلنا البيت وماعندنا حق الاكل .. والبيت فاضي .. المطبخ مافيهو غير البصل والملح والشاي الحب ..
ابوي رسلني للفرن ..لانه ناس الفرن ماعارفين الحاصل عليهو..ابوي اسبوع كامل غايب من الشغل .. مشيت لقيت عمو حسين سيد الفرن وحكيت ليهو ..
قال لي والله انا ذاتي كنت مسافر ومافي زول كلمني بانو ابوك ماقاعد يجي الفرن ..
المهم الراجل مشكور ..شال معاهو كيس عيش ..ومشى معاي البيت ..
وشاكل ابوي وقال ليهو ليه ما اتصلت علي؟ .. نحن البينا اكبر من الشغل .. ابوي قال ليهو والله انا كنت في غيبوبة .. ولغاية هسي مامجمع كويس ياحسين الحمد لله .. المهم الراجل اتاثر شديد .. واده ابوي قروش ..تقريبا حق شغلو ولاشنو..
المهم مافاهمة لكن ابوي شالا بدون تردد .. الراجل قال لابوي انا موجود ماتشيل هم انت راجل ماساهل ..
ابوي قال لي اتصلي على خالتك اميمة كلميها .. قلت ليهو اتصلت عليها كتير يا ابوي لكن تلفونها مقفول .. قال لي شيلي تلفوني ده شوفيهو لو مشحون اتصلي عليها تاني ..
اها اتصلت عليها يادوب تلفونها رنه وكلمتها .. بس مسافة السكة وجاتنا ..
جات وياريتها لو ماجات ..
الى اللقاء.
..
