في اللحظة دي انا وانا في احلك لحظات الضيق .. حسيت فعلا بالظلم والخوف والضياع .. اتذكرت امي وابوي .. وفي كسر من الثانية مرت علي احداث .. بس اتذكرت انو ربنا موجود ..ولا ح يغيب عني في يوم.. ولا ح يضيعني ..زي ماكان ابوي بقول لي.. براحة في سري قلت يا الله تحميني .. وفعلا ربنا مابنسى عبده..
في الحظة دي .. ربنا مداني بقوة .. وشجاعة ..
دنقرت لي تحت .وزوغت من بينهم الاتنين .. بطريقة حرفة انا ذاتي استغربت فيها .
وجريت مسافة كدا وشلت لي طوبة .. وقلت ليهم والله بكورك وبضرب .. ابعدو مني بعيد ..
والله تتقدمو علي خطوة بصرخ الم فيكم الحلة ..
بس ربك رب الخير ..عاينت في نهاية الشارع ..في واحد شاب كدا .. في عمر العشرين برضو .. طلع من بيتو .. لابس شورت وفنيلة .. وماسك ليهو فرشة معجون في خشمو.. وشاف المنظر.. انا شايلة الطوبة ورافعة يدي كدا زي الزول المستعد للضرب . وهم ماشين علي ..
بس الولد ده طلع الفرشة من خشمو ..وصفر صفارة مميزة كدا .. الولدين ديل خطفو عجلتهم ..وركبو وهربو ..
الولد ده جا ماشي علي .. انا ماخفت منو ..لانو شكلو ود ناس ..
بس استغربت ليه هم هربو لمن هو صفر؟ ..
بس قبل ما هو يصلني .. البيوت الفي الشارع ده يمكن طلعوا منها اكتر من 11 نفر اولاد شباب وناس كبار .شايليين عصايات وعكاكيز وبساطين ..
ده شنو ياربي؟؟ ..
انا صراحة خوفت شديد ..
الولد الصفر ده وصل جنبي وقال لي ماتخافي.. انا والشباب جينا ندافع عنك.. انتي منو؟؟ وجاية من وين؟ ..
قلت ليهو انا اسمي مهج بت اخت اميمة جارتكم دي ..
قال لي ليه طالعة براك في الوقت ده ؟
قلت ليهو رسلوني البقالة .. قال لي وخالتك وين وبناتها وراجلا؟
قلت ليهو عيانين ..
قال لي ياخ رسلوك بدري .. وهسي احتمال البقالة تكون مافتحت ..
وقال لي شفتي الشباب الطلعو من بيوتهم ديل..ديل شباب الحلة ..
شايفة الحرامية والمجارمة كرهونا الحتة .. اتفقنا وكونا مجموعة من شباب الحلة .. وبقينا حارسين حلتنا برانا.. اي حرامي ولا حيوان يظهر ..بننادي بعض بالصفارة دي ونجي نطقطقهم .. هسي ديل عرفو اني صفرت لاصحابي عشان كدا قامو جارين .. اوعه يكون عملو ليك حاجة؟ ..
قلت ليهو ابدا .. ولاهبشوني .. في البداية خفت منهم لكن تاني ربنا قواني .. وكنت عايزه ادافع عن نفسي بالطوبة دي .. لكن الحمد لله انت ظهرت ..
الولد قال لي ياسلام عليك ..والله انتي بت واعية وفاهمة ..وماضعيفة ابدا ..
.. يلا ارح اوصلك البيت . قلت ليهو لالا ..لازم اصل البقالة .. وصل معاي البقالة ..
اشتريت الحاجات وجا.. ولمن جينا راجعين على البيت ..
قال لي اقيفي انتطريني هناك .. وقف دقيقة بتكلم مع شباب الحلة الطلعو .. وحكا ليهم الحاصل ..
في واحد منهم قال ليهو ايوة .. ديل كانو ح يضيعو البت . لانها مسكينة .. من ذوي الاحتياجات الخاصة .. جايبنها من ام بدة عندها متلازمة تخلف عقلي موش كدا؟؟
قال ليهو يازول البت دي افهم مني ومنك .. ماعندها اي عوجة ..
قال ليهو ياخي عاين شكلها وشعرها المنفوش ده ..
قال ليهو بقول ليك البت طبيعية انت مابتفهم يا بشار؟
انا طبعا سامعة كل شي اضاني خفيفة بسمع ليك الهمس .. ودي بتكون من محاسن الصمت الطويل ههه
المهم خلاهم وجاني راجع لي انا منتظراهو ..وصلني لغاية باب ناس خالتي ..
قال لي انا اسمي هشام .. ساكن في البيت الشوفتيني جنبو ده .. انا عايز منك تتعلمي الصفارة دي.. لو اتعرضتي لاي تهديد ..بس صفري ونحن بنجيك طايرين ..
قلت ليهو مابعرف اصفر .. لكن ممكن اشتري صفارة من الطبلية ..بتنفع ؟؟
قعد يضحك وقال لي بتنفع .. يلا مع السلامة ورجع ..
ما ح انساك طول عمري ياهشام .. تسلم البطن الجابتك ..
ياسلام شباب الحلة الواعين .. الاتفقو على انهم يحمو الحي بتصرفات ذكية .. وخوفو الحرامية والنيقرو وغيرم .. بالجد المفروض الناس تاخد فكرة منهم. والشباب يكونوا واعين.ويحمو نفسهم وبيوتهم واعراضهم .. لانو في نهب وسلب واعتداءات في الزمن ده اعوذ بالله ..
لو الحرامية والشفاتة .عرفو انو الحي ده فيهو شباب.. مكونين عصابة لحماية الحي مابجو . والناس بتعيش في امان .. بدل الخوف والرعب العايشين فيهو الناس من الحرامية الايامات دي ..
المهم .انا وصلت البيت وابيت اكلم خالتي باي حاجة .. لانها ح تطلعني غلطانة بس شكرت ربنا وفضلت السكات ..
لكن المشكلة وين؟ .. الخبر لغاية النهار ملا الحلة كلها ..
الاولاد الشباب الطلعو من بيوتهم عشان يدافعو عني .. تقريبا بعد رجعوا لاهلهم .. كل واحد كلم ناس البيت.. انو البت الجديدة الساكنة في بيت ناس اميمه .. حصل معاها كدا كدا ..
طبعا طوالي بقولو البت العيانة .. او البت المسكينة .. لاني بقيت معروفة في الحلة متخلفة عقليا ..
يلا الحريم بقن يتناقلن الخبر .. وطبعا الاشاعة لمن تطلع ..اي زول بزيد فوقها حبة .. لمن تعدي ليها وقت .. بتبقى قصة مختلفة ..
زي العصر كدا جات مراة من الجيران . وقالت لي خالتي اميمة.. سلامتها بت اختك .. الحمد لله ما قتلوها اولاد الحرام.. الاغتصاب هين..
وديتوها الدكتور؟
قالت ليها في شنو ياسيدة؟ اغتصاب شنو؟ ودكتور شنو؟
قالت ليها يعني يا اميمة دايرة تعملي فيها ماعارفة الحصل؟؟ ..
النكران مافي ليهو داعي.. الحصل حصل.. والناس سمعت بيهو ..
الحلة كلها من الصباح تتكلم بي بت اختك المسكينة الاغتصبوها اولاد الحرام في حوش ناس الامين ؟
انا طبعا لمن سمعت الكلام ..من جوه غرفتي بدون ما احس جيت طايره طوالي بسرعة قبل ماخالتي ترد ..
قلت للمراة اسمعي ياخاله .. انا مافي زول اغتصبني.. ولا في زول هبشني .. في اولا اتنين عاكسوني في الشارع .. واولاد الجيران طلعو ليهم ..وهم جروا ... ماتزيدو الكلام ساي ..
مافي شي حصل زي ده خالتي ..
خالتي اميمه قالت لي الكلام ده متين يابت؟
قلت ليها الصباح.. لمن رسلتيني للبقالة .. لاقوني في الشارع لكن ما فيهم زول هبشني ..
قالت اصبري لي بعدن الليلة بكتلك .. ليه ما كلمتيني يابت؟
قلت ليها ماكان حاجة مهمة .. وماعايزاك تقلقي ساي ياخالتي .. بس عشان كدا ..
المراة بقت تعاين لي مستغربة ..
وقالت هوي هوي عاينو دي؟؟؟.. ماقلتو عيانة ومتخلفة؟؟ .. وحات الله خوفتني البت واعية شديد ..
خالتي قالت لي يلا خشي جوة .. هسي انتي الجابك شنو؟
المهم بعد طلعت المراة انا خالتي دي سمعتني جنس كلام اخير منه الدق ..
بس الشي المهم الشاكلتني فيهو .. ما الاولاد العاكسوني وماكلمتها .. لا شاكلتني اكتر في اني طلعت من جوه والمراة عرفت اني طبيعية ..
قالت لي .. هسي انتي تطلعي من جوة تتكلمي مع المراة ليه؟ موش شايفاني بتكلم معاها..
قلت ليها بس ياخالتي المراة كذبت .. انا مافي زول هبشني ..
قالت لي امشي عليك الله . هم لو ما مغفلين ..هسي انتي المفروض يعاينو ليك .. ياقبيحة .. وشك يلعن قفاك .. تجيبي الغم يا الشوم كتلتي امك وابوك وقعدتي .. دايرة تكتليني انا .. لكن انا مابموت ليك بكتلك ..
وانا بس صامتة زي الحجر مارديت عليها ولابكلمة .. لاني ماغلطت في حاجة.. عشان اتأسف واعتذر .. لقيت انو الصمت افضل وسيلة ..
وهي تزل فيني وبناتها الاتنين يتبسمن ..
لكن الشي المهم . انا شعرت انو ردت فعلها .. كانت ماقدر الحدث الحصل لي ..
يعني المفروض تخاف وترتبك من يكون حصل لي حاجة .. او تزعل شديد .. وتمشي تسأل من الاولاد الاتحرشو بي بنت اختها ..
تشتكيهم تفتح فيهم بلاغ .. تعمل اي حركة تدل على اني بهمها . لكن ده كلو ماحصل ..
بس ياها هرجتها ديك في موضوع مرقتي من الغرفة .. في النهاية القدرت عليهو قالت لي لو جا محجوب وحكيتي ليهو الكلام ده بقطع لسانك .. نحن مافاضين لمشاكل مع الناس ..
قلت ليها حاضر ياخالتي . مابكلمو ..
اليوم ده كلو وانا برجف وجسمي منهار من الخوف الحصل علي الصباح .
المهم باختصار عمي محجوب جا .. ومافي زول قال ليهو حاجة وانا اساسا ماكان عندي نية اكلمو ..
ماعايزة اي مشكلة تحصل بينو وبين مرتو بي سببي ..
نادى خالتي اميمة في البرندة .. قال ليها انا موش قلت ليك قعدة مهج دي معانا فيها بركة ؟
تتذكري القروش العايزها من الجماعة ليها ستة شهور ..وابو يدوني ليها ؟؟.. الليلة استلمتها منهم على داير المليم ..
يعني سفرتي ماطلعت فاشلة زي كل مرة .. الحمد لله ..
خالتي قالت ليهو عليك الله هاا .. هي كان فيها بركة .. كانت كتلت امها وابوها وقعدت .. اريتها مابركتي يايابا ..
قال ليها ياخي استغفري الموت والحياة بيد الله ..
والاعمار محسوبة والاجال مكتوبة ..والموت مامعروف ليك ولا لغيرك ..
الغريبة بتتكلم بصوت عالي وانا بسمع .وهي ماعندها مشكلة اسمع ولا ما اسمع.
ولا عندها مراعاة لمشاعري..
عمي محجوب مشكور تاني يوم جاب لي التحويل .. وحولوني لمدرسة خاصة في شارع واحد .. نفس المدرسة الكانت بتقرا فيها سلمى بت خالتي .وعمي محجوب دفع لي الرسوم ..
ناس المدرسة اتعاملو معاي برقي ماعادي .. لمن عرفو اني فايتاني سنتين .. عملو لي امتحان شفهي .. واتفوقت فيهو الحمد لله .ونزلوني في نفس الفصل البتدرس فيهو سلمى .. يعني فططوني زي مابقولو .. وانا بالفرحة طلبت من عمي محجوب.. يتصل علي عمي حسين سيد الفرن صاحب ابوي .. وكلمتو قلت ليهو انا نزلت المدرسة .. وفرحانة فرحة نفسي اصرخ واكلم الدنيا كلها .. نفسي ابوي يعرف ..اني خلاص بديت ادرس ..
ومرت الايام ..
وكل يوم بنجي من المدرسة .نلقى خالتي اميمة في البيت مافي..
بتجي قريب المغرب قبل مايجي راجلها بتمشي وين ماعارفة
بس ح نعرف ..
وعدت ايام كدا بقت ماشغالة بي..ومشغولة في موضوع هو شنو؟ الله اعلم ..
وانا مستمرة ف قرايتي.. وقاعدة في اوضتي وبذاكر.. في دروسي اللية والنهار ..
بس من يجي زول داخل البيت بتمنعني اطلع .
ولسع الفكرة مازالت في اذهان الناس اني عيانة.. بالرغم من اني بطلع الصباح نضيفة ..
ولابسة لبس المدرسة .وبجي انضف من سلمى ..
حتى البنات في المدرسة كانن خايفات مني.. ومافي واحدة بتقرب مني ..
وماعندي اي صاحبة..عشان سلمى ادتهم فكرة اني عيانة وبتجيني حالات وشنو وشنو ..
كم مرة بجي بلقى البنات بتكلمو عني .. بعمل فيها طرشاء وبتبسم وبقعد ..
مرة في بت من البنات مفترية كدا اسمها شيماء .. دخلت يدها في شنطتي وشالت القلم .. لمن عاينت ليها ..جدعتو بشباك الفصل .. تقريبا عايزة توري البنات انها ماخايفة مني .. كلهم متوقعين اني اضربها لاني مجنونه..
بس انا طلعت برة جبت القلم بتاعي وجيت قعدت .. وقلت ليها شكرا ليك ياشيماء.. انا كنت بحترمك شديد ..وبحبك ليه عملتي كدا؟
اتخيلو الفصل ده كلو صنه زي الصبت فوقهم مطره .. وشيماء دي خجلت من روحها وبقت تتلفت ..
وقالت لي انا اسفه يا مهج .. قلت ليها معليش ولايهمك .بس الاهانة حارة ياشيماء ..
وانتي لو في زول عمل فيك كدا مابنرضاها ليك .
في واحدة من البنات قاعدة وراء .. قالت ليهم انتن بتقولن البت دي عيانة . وبتهيج وممكن تضرب .. يهدي البت اعقل منكم كلكم .. والله انتو المريضين .. والفصل كلو قالو والله صحي ..
معليش يامهج . الكلام ده كله سببو بت خالتك سلمى.. قالت لينا انك عيانة وبتكسري العدة في البيت.. ومرة حرقتي ليهم بيتهم .
قلت ليهم والله ماحصل الكلام ده .. متين ياسلمى؟ حرام عليك تكذبي فيني .. وبكيت شديد .. والبنات اتلمو فيني وبقو يسكتو فيني ويواسوني .. من الغل الحسيتو من كذب بت خالتي فيني ..
قالو لي والله نحنا كنا عايزين نهييجك ..متخيلين انك حتضربي شيماء وتمرمطيها ..لكن معليشش سلمى غشتنا ..
وسلمى ساكتة ماقادرة ترد بكلمة والفصل كله عرف انها كذابة ومنافقة .. وبقو يعاملوها أسواء معاملة.. ولمن تتعرض لاي موقف . مافي زول بدافع عنها ويقيف معاها غيري .. لاني الحمد لله مابعرف اشيل حقد على انسان خلي بت خالتي .. اللهي زي اختي ..
واحكي ليكم واحدة بس من القصص الظلموها فيها وانا وقفت معاها . بتذكر يوم كان في واحدة رشت باقي اسكريم في السبورة .. بس نحن ماكنا حاضرينها .. لمن دخلنا انا وسلمى يادوب جايين من البيت .
لقينا السبورة مجلبطة باسكريم الحليب .. واي واحدة تحاول تمسحو. عشان تنضف السبورة... البنات بمنعوها.. ماعارفة هدفهم شنو؟؟.. لمن جات الاستاذة ..قالت العمل كدا منو يابنات ؟
البنات بصوت واحد قالو ليها دي سلمى محجوب ..
انا طوالي وقفت علي حيلي ..قلت ليها يا استاذة سلمى جات معاي .. ولمن جينا لقينا السبورة موسخة .. والله سلمى ماعملت كدا يا استاذة .. الاستاذة قالت للبنات صحي كلام مهج ده يابنات؟؟.. البنات سكتن صنننن..
الاستاذة راسها اتملا وبقت محتارة .. تصدق البنات كلهن .. ولا تصقني انا؟ ..
اتخيلو هن عملن كدا عشان ينتقمن لي من سلمى.. وانا جيت خذلتهم ودافعت عنها .. لاني مابكون مرتاحة نفسيا لو عاقبوها .. بسبب اتهام كاذب .. وكلو يكون بسببي ..
من اليوم داك سلمى بقت صاحبتي .. وما بتأذيني ولا بتتكلم عني كعب.. الا قدام امها .. لمن تكون مع امها بتتعامل معاي بحقارة ..ولمن نكون برانا او في المدرسة بتكون صاحبتي .. ههه شوف العجايب دي بالله عليك ..وانا متقبلة الوضع على الاقل .. مامعادياني على طول زي زمان .. وما بتكذب فيني للبنات ..
حتى في البيت لمن نكون برانا الاتنين.. بتقول لي امي دي مريضة نفسيا ماتشتغلي بيها ..
ومرت الايام .
يوم كنا قاعدين في البيت العصرية .. في زول دق الباب .. مشى عمي محجوب فتح الباب .. لقى ده منو؟؟
اتخيلو .. عمي حسين .. وخالتو علوية زوجتو ..ياسلاااام والله انا فرحت فرحة حسيت انو في زول من اهلي جانا ههه .. عمي حسين جا وجاب لي معاهو هدايا .. انا بالجد الليلة سعيدة بشوفتو .
بس جية عمي حسين دي.. ماساي . انا حسيت انها وراها موضوع .. كدي نشوف ..
الى اللقاء ..
