انا صراحة خوفت من نظرتها صاح.. لكن في حاجة نطت لي في راسي .. لازم ابدأ بالهجوم لازم خالتي دي اهاجما هجوم ذكي .. الهجوم افضل وسيلة للدفاع .. من النقاش الحصل .. عرفت اهمية بيتنا .. وعرفت انو البيت بقى حقي.. وانا بس المفروض اتصرف فيهو ..
اها بعد ناس عمي حسين فاتو ..وودعناهم انا وعمي محجوب .. واتكيفو شديد من عمي محجوب ..لمعاملته الراقية معاهم .. وتفاعله مع الاحداث ..
طبعا الحاجة المهمة الما سألو منها والمهتمة بيها انا .. وهي وين اوراق ابوي .. وين صورنا انا وامي وابوي ..
الحاجات دي مهمة ابوي كان قافلها في شنطة بوسنايت وخاتيها في دولابو .. ورق البيت ممكن يكون معاها ..خالتي مابتكون فرطت فيهو .لكن انا اخاف انها اهملت الحاجات التانية .. بس لما الرجال كانو بتكلمو انا ما حبيت اتكلم .. قلت احتمال براهم يٍسألوها .. لكن ما سألوها ..
بعد ناس عمي حسين فاتو .. انا جيت لخالتي قلت ليها ياخالتي اميمة انا عايزة اتكلم معاك ..
قالت لي اها في شنو؟
قلت ليها انا ماعايزة اقعد في الحاج يوسف وماعايزة المدرسة دي .. انا ماشة اقعد مع ناس عمي حسين .. وح أكلم عمي محجوب يوديني .. بس عايزة منك تديني الاوراق بتاعة ابوي والاوراق بتاعة بيتنا .. والدهب القلتي تمن العفش .. عشان انا بحتاج ليهو .. انا لازم امشي ام درمان..
قالت لي اوراقك قاعدة ودهبك قاعد وكلو في الحفظ والصون .. لكن انتي تقولي كدا ليه ؟؟
ده حسين وصاك قال ليك كدا؟ الله لاغزا فيهو بركة .. قلت ليها ابدا والله ماحصل ..لكن ياخالتي .ناس عمي حسين ناس طبين وبعاملوني معاملة كويسة.. وبحنو علي ..
وانا حسيت اني مرتاحة في بيتهم .. وانتي ياخالتي ظاهر شديد انك بتكرهيني ومتضايقة مني .. انا ماعايزة اضيق عليكم عيشتكم .. وبناتك كمان مابحبوني .. ناس عمي حسين البيت كله بحبني ..
طبعا المراة دي اتهجمت من كلامي وطيرت عيونها .. وبقت شخصية تانية ..
قالت لالا والله يامهج ياحبيبتي نحن مابنكرهك .. نحن بس بنخاف عليك . وبناتي بحبوك والله .. وعمك محجوب بحبك اكتر من بناته ..
قلت ليها والله لو انا لقيت منكم معاملة كويسة.. ماعايزة احسن منكم ..لكن انا تعبت من العيشة دي .. وانا مابحب اغلط على زول.. وتعبت من السكات علي الاهانه. ومابكون مرتاحه. لو حسيت انو في زول متضايق مني ..
قالت لي خلاص من الليلة تاني مافي زول بضايقك.. ومافي زول بتعامل معاك معاملة كعبة .. بس الله يرضى عليك يابتي ماتقولي لمحجوب ماشة .. لانو عنيد وراسه قوي.. بسوقك طوالي يوديك ليهم .. وماح يسمع كلامي .وتتكلم معاي وخايفة ومهجومه من كلامي .. انا طبعا ماعندي نية اقعد مع ناس عمي حسين .. نفسيا كدا مابقدر ماااابقدر .. خالتي دي خالتي .مهما تكون صعبة .. اصبر عليها .وما اسكن مع ناس اغراب مني ..
اها انا طبعا قلت الكلام ليها لاني .عارفاها بعد تعبت .واجرت البيت .ولقت من وراهو قروش .. تاني مابتخليني لزول يستفيد مني . لاني لو مشيت لعمي حسين. هو الح يشيل قروش الايجار .. وهي ح تكون خسرت خسارة فادحة دي الضربة الاولى ..
والضربة التانية سمعتها قدام ناس الحلة ..
المهم انا حسيت بيها الكلام ده هزاها هزة شديدة .. وقعدت تحنس فيني بطريقة اول مرة اشوفها فيها ..
بس من اليوم داك انا عرفت اني عندي ..كرت ضغط. يمثل مصدر قوة لي .ونقطة ضعف ليها .. ممكن الحاجه دي تخليني احيا بطريقة افضل .. وهو البيت الخلاهو لي ابوي .. بس تاني لو عملت اي حركه اقول ليها انا ماشه ناس عمي حسين اديني اوراق البيت والدهب
ومن اليوم داك المعاملة اتغيرت .. بقت تقول لي تعالي يا مهج يابتي .. وامشي يامهج ياحبيبتي .. يعني زي مابتقول لي سلمى .. ههه
والله غايتو الدنيا دي فيها عجايب ..بس انا عارفه لو المعاملة دي بسببي .ولا بسبب قريشات الايجار البتجيها شهريا .. والدهب الداساهو .. .....
**
فاصل زمني .. .
ومرت الايام والشهور والسنين انا ماحصل يوم سألتها من حق ايجار ولاسألتها من الدهب بس عايشة باحترامي ..
وهي بقت تحترمني شوية يعني . ومابتحبني نهائي .. وبتقطع فيني .. وبتخاف مني .. وانا كاشفاها .. ممكن مرة تحرجني وبسكت .. اسمعها تقطع فيني وبسكت .. تظلمني وبسكت .. لانها اساسا مابتحبني .. والزول البكون منافقك ومابحبك .. مرة مرة بتطلع منه حاجات غصبأ عنه توريك دواخله ..
المهم انا كبرت ..وكل بعد فترة بمشي امدرمان لناس عمي حسين .. ومره مره كدا بغشى بيتنا .. وكل مرة يأجرو البيت ناس غير ..
ومتفوقة في دراستي . . تفوق فوق العادة .. في ثالث ثانوي .. ونحن مستعدين لامتحانات الشهادة السودانية ..
يوم من ذات الايام .. الكلام ده زي الساعة 2 ضهر في زول دقة الباب ..
مشيت انا افتح الباب .. لاقاني راجل في وشي بشبه ابوي بطريقة .. انا لمن اتخلعت وجاتني خوفة ورجفت ...
عاين لي كدا . وقال لي انتي مهج بت فيصل؟
قلت ليهو نعم مرحب منو انت؟
قال لي انا عمك فتح . قلت ليهو انا ماعندي عم اسمو فتح .. قال لي ابوك ما وراك انو عنده اخو اسمو فتح؟
قلت ليهو معليش ياعمو ..ابوي الله يرحمو مات وانا صغيرة.. ما متذكرة حتى الكلام القالو لي.. ونسيت حتى ملامج وشو ..
بعدين كيف يكون عندي عم.. ويلاقيني واشوفو بعد عشرة سنين من وفاة ابوي .. ابوي من اتوفى الليلة ليهو 9 سنين وسبع شهور .. انا طبعا عرفتو قبل مايتكلم لكن نكرتو حطب ..
قال لي ممكن ادخل .. احسن من نتكلم في الشارع .. خالتك وين؟ .. احتمال بتعرفني لو شافتني .. هسي انا مابشبه ابوك ؟
قلت ليهو شبهك لابوي مابثبت انك عمي .. ولو فرضنا جدلا انك عمي .......
في اللحظة دي جا عمي محجوب من جوة .. قال لي ده منو يا مهج الفي الباب؟ ..
قلت ليهو واحد كدا ياعم محجوب.. بقول انو عمي اخو ابوي .. محجوب جاهو قال ليهو اتفضل اتفضل ..
ودخلو البيت .. ده ياهو الزول الملعون .. الاذى ابوي واتهم امي .. ومطلعني بت حرام .. اعوذ بالله منه .. ده جاي لشنو ؟ يالطيف .. انا قدامي امتحانات بعد اقل من شهر الزول ده الله يكفيني شره ..
دخل جوة .. وقعد وجابو ليهو الموية ..انا دخلت غرفتي .. وماجيتو راجعة تاني هم قاعدين في الصالون..
بتكلمو .. خالتي قالت لي ده منو يا مهج الاتكلمتي معاهو في الشارع كتير ده ؟
قلت ليها ده واحد قال انو عمي اخو ابوي اسمه فتح .. خالتي قالت لي لاحول ولاقوة الابالله .. ده نط لينا من وين هسي؟ .. اعوذ بالله منه .. ده الكنت خايفة منو..
انا طبعا عارفاها قالت كدا ليه .
قلت لسلمي تعالي نقيف في الشباك ده نسمعو بقول شنو ؟؟ سلمى جات وقفت معاي شباك الصالون مقفول لكن صوتهم واضح هو وعمي محجوب ..
عمي محجوب قال ليهو مرحب والله حبابك ؟ انت اخو فيصل لزم ود امه وابوهو؟
قال لهو نعم. البت دي انا عمها اخو ابوها .. عمي محجوب سكت مسافة ...
قام فتح قال ليهو انا عارفك ح تقول .كيف اكون اخوه وماجيت لمرضه ولا لوفاته؟ .. ولا جيت سألت من البت طيلة السنين دي .. صاح ؟؟
انا واخوي كنا متقاطعين .. وبيناتنا مشاكل .. وهو كان بكرهني الله يرحمو ..واذاني اذى شديد وذلاني.. وكان بحرجني قدام الناس .. وانا فعلا كرهتو وقاطعتو وحلفت تاني لو مات مابقف فوق جنازتو ..
لكن هسي جيت اشوف البت .. ماعندها ذنب في الحصل ده كلو .. لكن هسي ماعرفتني.. واحتمال تكون عرفتني ونكرتني ..
جيبها لي اسلم عليها.. واسألها من احوالها وداير اسوقها معاي .. قال ليهو ما مشكلة بناديها ليك ولو رغبت هي تمشي معاك ..تمشي معاك ما بنمنعها ..
دي بت واعية وعارفة مصلحتها ..
اناطبعا لمن سمعت الكلام السخيف البقول فيهو الراجل ده .. دمي في عروقي بقى يغلي .. كمان قال يسوقني معاهو ؟ بالله عليك؟
طوالي عمي محجوب كورك لي.. يامهج يامهج تعالي يابتي ..
جيت قعدت قلت ليهو نعم ياعمي محجوب .. قال لي الزول ده عمك يامهج .. فعلا عمك ..اهو الشبه واضح بينو وبين ابوك ..
قلت ليهو نعم ياعمي محجوب .. لو فرضنا انو عمي .. دي عمومة شنو البجي يزورني بعد عشرة سنين من وفاة ابوي؟ .. وفي حياتي كلها ماشفتو.كان وين عمي لمن ابوي كان مشلول وانا ببيع في الطعمية؟ عشان ابوي مايحتاج للناس؟ ..كان وين عمي لمن ابوي مات وانا خفت لمن قربت اتشل من الوحشة والخوف من الضياع والمستقبل؟ .. يجيني هسي بعد كبرت وبقيت مامحتاجة لزول الحمد لله ..
انا ياعمي محجوب .. ما بقدر احس باي قرابة ورحم مع الزول القدامي ده.. هو ضيفنا نكرمو ويمشي ..
في اللحظة خالتي كوركت لي.. اظنها سمعت كلامي ..
قالت لي تعالي يامهج سريع .. مشيت ليها ..
قالت لي اسمعي الراجل ده اتكلمي معاهو كويس .. لانو عنده حق ورثة في البيت وشكله جاي يشيلو بالقانون..
لو اتكملمتي معاهو بقلة ادب.. حيجرجرك في المحاكم وينزع منك البيت .. وانت امتحاناتك قربت ..
قلت ليها ياخالتي الزول ده لو شال البيت كله .انا ماممكن اتعامل معاهو ..لو عنده حق خليهو يشيلو ..انا ماعايزة منه حق ..
قالت لي بس عشان خاطري اتكلمي معاهو كويس.. حتى لو بتكرهيهو عشان خاطري انا يابتي ..
قلت ليها حاضر ياخالتو جدا مابخيب ظنك .. قالت لي خلاص ارجعي ..اقعدي معاهو شوية شوفي فهمو شنو.
انتي قايلاهو جاييك انتي؟ .. ده جاي يشيل حقو ..
المهم رجعت وانا متضايقة من الزول ده ضيق ماعادي كل ما اعاين في وشو اتذكر الاذى الاذاهو لابوي ..
قال لي يامهج اناعمك اخو ابوك .. والله ..
وهاك اقري البطاقة حقتي .. قلت ليهو مصدقاك ياعمي مافي مشكلة. الفات مات والمضى لا يعاد .اي انت قصرت في اخوك. وقصرت فيني. لكن عفا الله عما سلف ..
قال لي ربنا يكبرك بعقلك
انا طبعا يامهج اول ما جيت مشيت لبيتكم في امدرمان. لاول مرة في حياتي. اصلا ماشفته ..ولقيت فيهو ناس قالو مؤجر .. وسألت ناس الحلة .. قالو لي انتي مع خالتك في الحاج يوسف. وفي راجل اسمه السر وصف لي بيتكم ده ..
ده السر ود عمي حسين متذكرنو؟ ..
اها العم العزيز ده .قال لي انا جيتك وعايز اسوقك معاي الحلة تشوفي عمتك سعاد .. قلت ليهو والله ياعمي مابقدر. لاني ممتحنة وشغالة مذاكرة .وامتحاناتي على الابواب .. لكن ان شاء الله في الاجازة احاول اجيكم ..
طبعا انا بقول ليهو كدا لكن ماعندي نية امشي لاني وعدت ابوي مابمشي مابمشي .. الراجل كان بتكلم معاي ببرود ماطبيعي .. واحد في الاتنين ياأما الراجل ده زول طيب ومسكين .. يا اما خبيث ومنافق ..
لكن التانية دي ارجح ..
قال لي خلاص مافي مشكلة لو ربنا مد في الاعمار. انا بجي في الاجازة اسوقك قلت ليهو ان شاء الله ..
قال لي يلا .. انا هسي عايزك تمشي معاي كدا على بحري ..في مواضع لازم نتناقش فيها ..
طبعا فهمت طوالي ده السبب الجابو .. جاي يتناقش معاي في موضوع البيت .. داير حقو في البيت ..
خالتي قالت لي حقو هو وعماتك .في البيت النص ..وانتي نص .. ههه.. طبعا خالتي سألت ماخلت شي .. انا ماكنت فاهمة الورثة بتكون كيف .. بس تاني عرفت انو البنت ترث النصف بالفريضة ..والأخ والاختان الاشقاء يرثون النصف الباقي .. للذكر مثل حظ الانثيين ..
المهم انا ماعندي مشكلة مادام حق فرضو ربنا ..يشيلوهو طوالي .. بس انا هسي مافاضية للموضوع ده .. الا لمن اخلص امتحاناتي .. بعداك يتباع البيت واديهم حقهم واشيل حقي .. ويادار مادخلك شر..
واي زول يمشي في حالو .. ماعايزة معاهم اي علاقة .. بس في حاجة.. الزول ده قبيل قال لي عمتك سعاد!!! وماذكر عمتي التانية .. ياربي تكون ماتت حتى هي؟؟؟
المهم هسي الزول ده دايرني اطلع معاهو .. ويتناقش معاي في الموضوع ..
مشيت كلمت خالتي وقلت ليها انا طالعة مع عمي وبجي قبل المغرب .. قالت لي تمشي طوالي.. وزي ما وصيتك ما تشدي معاهو في الكلام .. خليك زولة واعية .. قلت ليها جدا .. خالتي خايفة البيت يطير ..وتاني ما تلقى حق الايجار البجيها شهريا ههه
المهم طلعنا انا وعمي فتح .. لمن وصلنا كوبر قال لي ننزل هنا انا عازمك غدا .. دخلنا محل وطلب الغدا . وقعد فتح معاي الموضوع .. لكن الموضوع الاتكلم معاي فيهو موضوع مختلف تماما عن البيت والورثة ..
اتخيلووو
الى اللقاء ..
