المهم ..انا وابوي هسي سعيدين ومرتاحين في احسن احوالنا الحمد لله وبقينا ما محتاجين لاي انسان .. وعايشين حياتنا..طول وعرض ..
تمام ؟
ومرررت الايام ..اها قبل ماتفتح المدرسة .. بشهر او كم وعشرين يوم تقريبا ..وانا في الوقت داك كنت بشتري في حاجات المدرسة حبة حبة .. في التوقيت داك بالذات
ابوي مرض مرض شديد .. جاتو ملاريا و تايفويد والتهاب في الدم الابيض .. وبقى راقد طريح الفراش يمكن قريب العشرين يوم ..
وديتو مرتين للمستوصف القريب مننا .. بسوقو بكرسيهو بلزو قدامي لمن نصل .. وعملو ليهو فحوصات وتحاليل ..
وادوهو ادويه وماجابت اي فائدة .. ماشي تعبان وجسمو ناقص ..
و انا بقيت خايفة انو ابوي يكون عنده مرض خطير زي حق امي ..
قلت ليهو يا ابوي المستوصف ده ما نافع .. ارح نمشي لدكتور بتاع عيادة .. انا سمعت انو الدكتور البكون عندو العيادة .. بكون غالي بس احسن ونحن بقروشنا .. او نمشي المستشفى الكبير الفي امدرمان .
قال لي انا ماشي كويس مافي داعي ..
قدر ما حنستو عشان نمشي المستشفى ابا ..
بعد قنعت منو مشيت كلمت عمو حسين سيد الفرن ..
قلت ليهو ياعمو انت قلت لي لمن تحتاجي لي تعالي لي .. انا احتجت ليك شديد .. ابوي عيان تعبان .. عايزاك تجي توديهو دكتور اخصائ او مسشتفى كبير .. ..
وفعلا الراجل مشكور جا بعربيتو وشاكل ابوي قال ليهو ليه تمرض الفترة دي كلها وماتكلموني ..
وساقو وداهو الدكتور .. والدكتور عمل لينا الفحوصات .. بس ماظهرت حاجة خطيرة الحمد لله .. ياها الملاريا والتايفويد .. كتب ليهو علاجات ..
شكلها علاجات اقوى من الاولى ..
ابوي بعد يومين فقط العلاجات اتعبتو..
وجسمو بقى يضرب .. وريقو ينشف ومرات يتكلم غلط .. وقرر يوقف العلاجات براهو .. قال لي غير ما زادتني مرض .مانفعتني بحاجة ..
وقفنا العلاجات طوالي ..
تاني يوم او تالت يوم حس انو بقى كويس ..ونشيط ومرتاح ..وبقى ياكل كويس يرتاح في النوم .. يوم بعد صلى العشا .. قال لي تعالي اقعدي جنبي هنا انا حاسي بضربة قلب ماطبيعية ياوهج .. لمن جايبه لي خوفه .. تعالي احكي ليك .. نتونس كان تخف علي شوية ..
حكا لي قصص وحكاوي ومشاكل حصلت ليهو مع اهلو واخوهو ..
وسبب المقاطعة الحصلت بينو وبين فتح عمي .
مختصر الحكاية الحكاها لي كالاتي ماعايز ادوشكم بيها كامله بس بختصرها حلو؟
قال لي .. عمك فتح .. وعماتك ساره .. وبت وهب .. ديل اكتر ناس بكرهوني في الدنيا .. لازم تكوني عافة الحتة دي قبل كل شي ..
انا .. قبل امك .كنت متزوج بت عمتي .. (عمتي بت خال ابوي) ماعمتي اخت ابوي .. وزوجتي زولة جميلة ..اسمها سوسن ..
وكنت بحبها جدا ..
عشت معاها اجمل سنين حياتي بس . السعاده مابتدوم ..
فترة كدا حسيت انو علاقتها مع فتح اخوي ماطبيعيه .. يعني بقيت شاكي انهم بيناتهم علاقة عاطفية او شي زي ده .. انتي فاهمة ولا اشرح ليك؟
قلت ليهو فاهمة يا ابوي واصل ..
قال لي بس انا قلت اتأكد من زوجتي قبل ما اظلمها
وفعلا اتأكدت يوم جيت بيتنا بالليل.. لقيت اخوي ود امي وابوي بتكلم معاها .. وقفت عشان اسمع الكلام شكله شنو.. عرفت واتاكدت من الحاصل .. الحاصل بيناتهم ياوهج .. ما اظن وصل لدرجة الفعل الحرام ..
لكن انا بطني طمت .. لاني سمعت الكلام كله ..يعبر ليها عن حبه . وتعبر ليهو عن حبها .. انا يامهج في الوقت داك .حسيت بالارض بدور بي .. ورجعت بدون مايحسو بي .. وعشان مايعرفو اني كشفتهم ..
ربنا امر بالستر يابتي .. كان ممكن اعمل مشكلة كبيرة وعريضة .. افضح المراة وافضح اخوي .. واسرتي كلها سمعتها تبقى في الواطا .. لكن الحمد لله فكرت قبل ما اتصرف .. وماخليت الغضب يعمي بصيرتي ..
وفي النهاية ده اخوي ودي بت عمتي .. وزيتي في بيتي .. والحمد لله على كل حال .. الزول مابحب الفضيحة لاهله ..
فضيحة اهلك ياها فضيحتك ..
بس انا انصدمت و جاتني حالة نفسية ..
بس الحمد لله المراة ماكان عندي منها جنا .. لاني كنت ح اكون شاكي في جناي طول عمري .. المهم
طوالي مشيت قلت ليها البسي نمشي زيارة لبيتكم ..
سقتها لناس عمتي في البيت ..بعد صلاة المغرب اتونسنا وشربنا شاي المغرب عندهم ..والوضع كان طبيعي جدا ..
لمن خلاص دايرين نطلع .. ناديت عمتي وزوجها .. يعني ام زوجتي وابوها ..
وقلت ليهم انا دخلت عليكم بالمعروف .. وعايز اطلع منكم بالمعروف .. انا بتكم دي قنعت منها ..ولا عندي معاها اي مشكلة .. بس القسمة انقطعت بينا .. بتكم طلقانه ..
قالو لي السبب شنو لكين؟ .. قلت ليهم مافي اي سبب ..
بس مابقدر اعيش معاها .. والموضوع لاحد هنا ينتهي ..
وما كلمت اي انسان بسبب الطلاق ..
والشي المضحك المبكي يا مهج .. انو اخوي لمن سمع بالكلام ده ..
كان معترض على طلاق المراة ..وقال لي لو مارجعتها تاني لابيني لابينك .. رديت عليهو بي ضخكة وابتسامة ومشيت .. ولاقلت ليهو كويس.. ولاقلت ليهو لالا ..
وبرضو انا ابيت اوريهو انا كاشف العلاقة
..بس طلقتها ..وقعدت في بيتي براي عزابي .. بيتي كان جزء من بيت ابوي الكبير ..
واخوي من اليوم داك بقى بكرهني وانا بكرهو ومابينا اي علاقة .. وكل يومين تلاتة هو وين ؟؟ عند ناس عمتي .. مع سوسن .. والله اعلم بالحاصل ..
وعمل لي في حياتي فتن ومشاكل .. وفتن بيني وبين اهلي .. واخواتي .. وفتني في ابوي .. وما خلا زول ما خرب علاقتي معاهو ..
وطلع فيني دعاية انو انا ما راجل وما بلد ..
يعني لايمكن انجب واجيب ذرية ..
قال عشان كدا انا طلقت سوسن ..
ومافي زول لغاية الليلة عارف السبب .. ولاسوسن ولا فتح اخوي ..
والسبب يا مهج في الطلاق ده من اساسو ..عارفاهو شنو؟؟؟
انو نحن السودانيين بنتهاون بالشرع .. يعني زوجتي كانت انسانة جميلة .. وكانت بتمشي قدام اخوي بكامل زينتها.. وبملابس البيت .. واخوي شاب في كامل قوته ومامتزوج ..
وانا ما كنت بعترض لاني مصفي النية .. وما كنت بظن انو ممكن اخوي يكون بالوساخة دي ..
وكلنا ناسين حديث الرسول عليه الصلاة والسلام ..
قال اياكم والدخول على النساء .. قالو افرأيتم الحمو يارسول الله ؟
قال الحمو الموت ..
والحمو ده ياهو اخو الزوج اوقريبه ..
يعني لو نحن مشينا بالشريعة ..وبتعاليم المصطفى صلى الله عليه وسلم .. ده كله ماكان حصل..
لكن في النهاية نقول القسمة .. ولي خير والخير فيما يختاره الله .. يعني انا لو كنت قاعد مع سوسن لغاية هسي .. كان من وين القى بت اسمها مهج زي القمر؟ ..
اها انا العداوة الحصلت بيني وبين فتح اخوي ..
بدل اخواتي الاتنين يكونو محايدين بقو الاتنين ضدي وواقفين مع فتح .. والسبب انو فتح انسان كذاب وبشيل كلام بالكضب لاخواتي مني وهن الاتنين مابجو يتأكدو مني ..
وده كلو بسبب انو الناس ماماشة بكلام ربنا ..لانو ربنا امر انو المسلم مايصدق كلام في مسلم الا يتأكد بنفسه ..
انا بصراحه البلد ضاقت علي .. وزهجت منها ومليت من النكد العايش فيهو مع اسرتي .. قمت يوم اخدت عفو امي وابوي .. وطلعت من البلد وجيت اشتغلت هنا .. في اشغال كتيرة .. واشتريت نص البيت ده . واتزوجت امك .. اخوي كان متابع اخباري ..هو بيراهن .. وبقول للناس فيصل ماراجل . والمراة العرسها دي مابتلد ليهو..
وفعلا سبعة سنوات انا ما انجبت من اماني .. وهي صابرة وانا صابر ..والناس عندهم الفكرة انو انا عاقر ثابته ..
اها يوم امك اماني حملت بيك .. والناس سمعت بالموضوع .. عمك طلع دعاية في البلد.. انو الجنى الفي بطن مراتي اماني . ماجناي ..
اتخيلي ده اخوي ود امي وابوي .. وكنت بحبو اكتر من روحي .. وكنت بقطع من لحمي واديهو ..
لمن يقع في مشكلة ..كنت بدين قروش عشان احل ليهو مشكلتو ..
المهم كل الكلام الكان بقولو فيني .. بوصولني ليهو الناس النمامين من ناس الحلة .. وانا صابر وساكت ومفوض امري لله ..
يوم اتوفى ابوي وامي .. جدك وحبوبتك ماتو الاتنين في شهر واحد بي مرض الكوليرا ..
انا سافرت البلد .. ولاقيت اخوي وريتو بالكلام البجيبوهو لي الناس منه ..
ومانكر ..يعني كلام النمامين طلع صاح ..بالرغم من اني ماكنت متأكد انو قال..
لكن هو مانكر الكلام ..بالعكس بقى ينبذ لي في مراتي ..اللهي اماني امك ..
واخواتي الاتنين لسع واقفات معاهو .. وبكرهو اماني زوجتي بدون اي سبب وهم مابعرفوا عنها شي .. كمان قالو لي سمعنا انو مراتك سمعتها ماكويسة .. سبحان الله اماني كانت طاهرة زي موية زمزم ربنا يرحمها ..
المهم ديك كانت اول سفرة واخر سفرة .. تاني مامشيت البلد ولا ح امشي ..
وقطعت خبري منهم .. وماعندي معاهم اي تواصل ..
وانا لومت لو حييت.. انتي يامهج الناس ديل ماعندك معاهم اي علاقة..
انتي ماعندك اهل ابو .. فاهمة؟؟
قلت ليهو فاهمة يا ابوي. فاهمه.. ماتقول كدا ان شاء الله بعد طول عمر .. انت لو مت انا البحصل لي شنو ماعارفة..
ان شاء الله يا ابوي اموت قبلك انت سبب حياتي ..
اقول ليك حاجة لو جاتك فكرة تموت نموت الاتنين مع بعض وخلاص ..
قال لي يامهج الحاجة المطمناني عليك اني ماقاعد احس بيك صغيرة ..ومابخاف عليك زي الاطفال ..
قلت ليهو يا ابوي هموم الدنيا بتخلي الزول يكبر قبل مواعيدو . ابو ده ضحك جنس ضحك من كلمتي دي .
من زمان ماشفتو ضحك كدا .. قال لي انتي مسلطه ..
..المهم ابوي اليوم كان كويس ومبسوط كدا ..بعد حكا لي الكلام ده حيت هم نزل منه ..
وحالتو كانت مستقرة يعني ما كنت مقلقة من مرضو ..
لدرجة انو اليوم داك انا نمت بدري بدري من دون الايام الفاتت .. الكنت مساهرة فيها طول الليل بصحى تلاتة اربعة مرات.. عشان اقوم اشوف ابوي والمسو من الحمى واعصر ليهو كرعينو ..
لكن الليلة الحمد لله.. ابوي كان في احسن حال .. ونام طوالي سريع بدون اي قلق زي الايام الفاتت .. انا قعدت شوية بفكر في القصص الحصلت لابوي ..
واتذكرت امي واتخيلتها قدامي .. ودموعي جرن وانابعاين لابوي .. نايم ..
بعد شوية .. ومازال خيال امي في عقلي رقدت و نمت نومة عميقة ..
و في النوم بتذكر حلمت احلام كدا ملخبطه وفيها احلام جميلة .. حلمت انو امي جاتني في البيت وقالت لي انا عطشانة واديتها موية شربت لامن روت .. وانا بعاين ليها مبسوطة .. قالت لي نحن ماعندنا ازيار
واتألمت الم لمن صحيت من النوم لقيتو حلم..
ولقيت االناس بصلو في صلاة الفجر ..
لكن ابوي لسه نايم .
قمت عاينت ليهو كان نور الحوش من الشباك ضارب في وشو..
وشو ده كأنه منور والنور طالع منه ..
ونايم نومة حلوة خلاص ومريحة .. انا بقيت مترددة ياربي اصحيهو يصلي ولا اخليهو ياخد راحتو ويقوم على راحتو؟ ..
وخليكم فاكرين المدرسة باقي ليها اقل من اسبوع ..
الى اللقاء ..متعة الصمت
الحلقة 6
بقلم طارق اللبيب
المهم ..انا وابوي هسي سعيدين ومرتاحين في احسن احوالنا الحمد لله وبقينا ما محتاجين لاي انسان .. وعايشين حياتنا..طول وعرض ..
تمام ؟
ومرررت الايام ..اها قبل ماتفتح المدرسة .. بشهر او كم وعشرين يوم تقريبا ..وانا في الوقت داك كنت بشتري في حاجات المدرسة حبة حبة .. في التوقيت داك بالذات
ابوي مرض مرض شديد .. جاتو ملاريا و تايفويد والتهاب في الدم الابيض .. وبقى راقد طريح الفراش يمكن قريب العشرين يوم ..
وديتو مرتين للمستوصف القريب مننا .. بسوقو بكرسيهو بلزو قدامي لمن نصل .. وعملو ليهو فحوصات وتحاليل ..
وادوهو ادويه وماجابت اي فائدة .. ماشي تعبان وجسمو ناقص ..
و انا بقيت خايفة انو ابوي يكون عنده مرض خطير زي حق امي ..
قلت ليهو يا ابوي المستوصف ده ما نافع .. ارح نمشي لدكتور بتاع عيادة .. انا سمعت انو الدكتور البكون عندو العيادة .. بكون غالي بس احسن ونحن بقروشنا .. او نمشي المستشفى الكبير الفي امدرمان .
قال لي انا ماشي كويس مافي داعي ..
قدر ما حنستو عشان نمشي المستشفى ابا ..
بعد قنعت منو مشيت كلمت عمو حسين سيد الفرن ..
قلت ليهو ياعمو انت قلت لي لمن تحتاجي لي تعالي لي .. انا احتجت ليك شديد .. ابوي عيان تعبان .. عايزاك تجي توديهو دكتور اخصائ او مسشتفى كبير .. ..
وفعلا الراجل مشكور جا بعربيتو وشاكل ابوي قال ليهو ليه تمرض الفترة دي كلها وماتكلموني ..
وساقو وداهو الدكتور .. والدكتور عمل لينا الفحوصات .. بس ماظهرت حاجة خطيرة الحمد لله .. ياها الملاريا والتايفويد .. كتب ليهو علاجات ..
شكلها علاجات اقوى من الاولى ..
ابوي بعد يومين فقط العلاجات اتعبتو..
وجسمو بقى يضرب .. وريقو ينشف ومرات يتكلم غلط .. وقرر يوقف العلاجات براهو .. قال لي غير ما زادتني مرض .مانفعتني بحاجة ..
وقفنا العلاجات طوالي ..
تاني يوم او تالت يوم حس انو بقى كويس ..ونشيط ومرتاح ..وبقى ياكل كويس يرتاح في النوم .. يوم بعد صلى العشا .. قال لي تعالي اقعدي جنبي هنا انا حاسي بضربة قلب ماطبيعية ياوهج .. لمن جايبه لي خوفه .. تعالي احكي ليك .. نتونس كان تخف علي شوية ..
حكا لي قصص وحكاوي ومشاكل حصلت ليهو مع اهلو واخوهو ..
وسبب المقاطعة الحصلت بينو وبين فتح عمي .
مختصر الحكاية الحكاها لي كالاتي ماعايز ادوشكم بيها كامله بس بختصرها حلو؟
قال لي .. عمك فتح .. وعماتك ساره .. وبت وهب .. ديل اكتر ناس بكرهوني في الدنيا .. لازم تكوني عافة الحتة دي قبل كل شي ..
انا .. قبل امك .كنت متزوج بت عمتي .. (عمتي بت خال ابوي) ماعمتي اخت ابوي .. وزوجتي زولة جميلة ..اسمها سوسن ..
وكنت بحبها جدا ..
عشت معاها اجمل سنين حياتي بس . السعاده مابتدوم ..
فترة كدا حسيت انو علاقتها مع فتح اخوي ماطبيعيه .. يعني بقيت شاكي انهم بيناتهم علاقة عاطفية او شي زي ده .. انتي فاهمة ولا اشرح ليك؟
قلت ليهو فاهمة يا ابوي واصل ..
قال لي بس انا قلت اتأكد من زوجتي قبل ما اظلمها
وفعلا اتأكدت يوم جيت بيتنا بالليل.. لقيت اخوي ود امي وابوي بتكلم معاها .. وقفت عشان اسمع الكلام شكله شنو.. عرفت واتاكدت من الحاصل .. الحاصل بيناتهم ياوهج .. ما اظن وصل لدرجة الفعل الحرام ..
لكن انا بطني طمت .. لاني سمعت الكلام كله ..يعبر ليها عن حبه . وتعبر ليهو عن حبها .. انا يامهج في الوقت داك .حسيت بالارض بدور بي .. ورجعت بدون مايحسو بي .. وعشان مايعرفو اني كشفتهم ..
ربنا امر بالستر يابتي .. كان ممكن اعمل مشكلة كبيرة وعريضة .. افضح المراة وافضح اخوي .. واسرتي كلها سمعتها تبقى في الواطا .. لكن الحمد لله فكرت قبل ما اتصرف .. وماخليت الغضب يعمي بصيرتي ..
وفي النهاية ده اخوي ودي بت عمتي .. وزيتي في بيتي .. والحمد لله على كل حال .. الزول مابحب الفضيحة لاهله ..
فضيحة اهلك ياها فضيحتك ..
بس انا انصدمت و جاتني حالة نفسية ..
بس الحمد لله المراة ماكان عندي منها جنا .. لاني كنت ح اكون شاكي في جناي طول عمري .. المهم
طوالي مشيت قلت ليها البسي نمشي زيارة لبيتكم ..
سقتها لناس عمتي في البيت ..بعد صلاة المغرب اتونسنا وشربنا شاي المغرب عندهم ..والوضع كان طبيعي جدا ..
لمن خلاص دايرين نطلع .. ناديت عمتي وزوجها .. يعني ام زوجتي وابوها ..
وقلت ليهم انا دخلت عليكم بالمعروف .. وعايز اطلع منكم بالمعروف .. انا بتكم دي قنعت منها ..ولا عندي معاها اي مشكلة .. بس القسمة انقطعت بينا .. بتكم طلقانه ..
قالو لي السبب شنو لكين؟ .. قلت ليهم مافي اي سبب ..
بس مابقدر اعيش معاها .. والموضوع لاحد هنا ينتهي ..
وما كلمت اي انسان بسبب الطلاق ..
والشي المضحك المبكي يا مهج .. انو اخوي لمن سمع بالكلام ده ..
كان معترض على طلاق المراة ..وقال لي لو مارجعتها تاني لابيني لابينك .. رديت عليهو بي ضخكة وابتسامة ومشيت .. ولاقلت ليهو كويس.. ولاقلت ليهو لالا ..
وبرضو انا ابيت اوريهو انا كاشف العلاقة
..بس طلقتها ..وقعدت في بيتي براي عزابي .. بيتي كان جزء من بيت ابوي الكبير ..
واخوي من اليوم داك بقى بكرهني وانا بكرهو ومابينا اي علاقة .. وكل يومين تلاتة هو وين ؟؟ عند ناس عمتي .. مع سوسن .. والله اعلم بالحاصل ..
وعمل لي في حياتي فتن ومشاكل .. وفتن بيني وبين اهلي .. واخواتي .. وفتني في ابوي .. وما خلا زول ما خرب علاقتي معاهو ..
وطلع فيني دعاية انو انا ما راجل وما بلد ..
يعني لايمكن انجب واجيب ذرية ..
قال عشان كدا انا طلقت سوسن ..
ومافي زول لغاية الليلة عارف السبب .. ولاسوسن ولا فتح اخوي ..
والسبب يا مهج في الطلاق ده من اساسو ..عارفاهو شنو؟؟؟
انو نحن السودانيين بنتهاون بالشرع .. يعني زوجتي كانت انسانة جميلة .. وكانت بتمشي قدام اخوي بكامل زينتها.. وبملابس البيت .. واخوي شاب في كامل قوته ومامتزوج ..
وانا ما كنت بعترض لاني مصفي النية .. وما كنت بظن انو ممكن اخوي يكون بالوساخة دي ..
وكلنا ناسين حديث الرسول عليه الصلاة والسلام ..
قال اياكم والدخول على النساء .. قالو افرأيتم الحمو يارسول الله ؟
قال الحمو الموت ..
والحمو ده ياهو اخو الزوج اوقريبه ..
يعني لو نحن مشينا بالشريعة ..وبتعاليم المصطفى صلى الله عليه وسلم .. ده كله ماكان حصل..
لكن في النهاية نقول القسمة .. ولي خير والخير فيما يختاره الله .. يعني انا لو كنت قاعد مع سوسن لغاية هسي .. كان من وين القى بت اسمها مهج زي القمر؟ ..
اها انا العداوة الحصلت بيني وبين فتح اخوي ..
بدل اخواتي الاتنين يكونو محايدين بقو الاتنين ضدي وواقفين مع فتح .. والسبب انو فتح انسان كذاب وبشيل كلام بالكضب لاخواتي مني وهن الاتنين مابجو يتأكدو مني ..
وده كلو بسبب انو الناس ماماشة بكلام ربنا ..لانو ربنا امر انو المسلم مايصدق كلام في مسلم الا يتأكد بنفسه ..
انا بصراحه البلد ضاقت علي .. وزهجت منها ومليت من النكد العايش فيهو مع اسرتي .. قمت يوم اخدت عفو امي وابوي .. وطلعت من البلد وجيت اشتغلت هنا .. في اشغال كتيرة .. واشتريت نص البيت ده . واتزوجت امك .. اخوي كان متابع اخباري ..هو بيراهن .. وبقول للناس فيصل ماراجل . والمراة العرسها دي مابتلد ليهو..
وفعلا سبعة سنوات انا ما انجبت من اماني .. وهي صابرة وانا صابر ..والناس عندهم الفكرة انو انا عاقر ثابته ..
اها يوم امك اماني حملت بيك .. والناس سمعت بالموضوع .. عمك طلع دعاية في البلد.. انو الجنى الفي بطن مراتي اماني . ماجناي ..
اتخيلي ده اخوي ود امي وابوي .. وكنت بحبو اكتر من روحي .. وكنت بقطع من لحمي واديهو ..
لمن يقع في مشكلة ..كنت بدين قروش عشان احل ليهو مشكلتو ..
المهم كل الكلام الكان بقولو فيني .. بوصولني ليهو الناس النمامين من ناس الحلة .. وانا صابر وساكت ومفوض امري لله ..
يوم اتوفى ابوي وامي .. جدك وحبوبتك ماتو الاتنين في شهر واحد بي مرض الكوليرا ..
انا سافرت البلد .. ولاقيت اخوي وريتو بالكلام البجيبوهو لي الناس منه ..
ومانكر ..يعني كلام النمامين طلع صاح ..بالرغم من اني ماكنت متأكد انو قال..
لكن هو مانكر الكلام ..بالعكس بقى ينبذ لي في مراتي ..اللهي اماني امك ..
واخواتي الاتنين لسع واقفات معاهو .. وبكرهو اماني زوجتي بدون اي سبب وهم مابعرفوا عنها شي .. كمان قالو لي سمعنا انو مراتك سمعتها ماكويسة .. سبحان الله اماني كانت طاهرة زي موية زمزم ربنا يرحمها ..
المهم ديك كانت اول سفرة واخر سفرة .. تاني مامشيت البلد ولا ح امشي ..
وقطعت خبري منهم .. وماعندي معاهم اي تواصل ..
وانا لومت لو حييت.. انتي يامهج الناس ديل ماعندك معاهم اي علاقة..
انتي ماعندك اهل ابو .. فاهمة؟؟
قلت ليهو فاهمة يا ابوي. فاهمه.. ماتقول كدا ان شاء الله بعد طول عمر .. انت لو مت انا البحصل لي شنو ماعارفة..
ان شاء الله يا ابوي اموت قبلك انت سبب حياتي ..
اقول ليك حاجة لو جاتك فكرة تموت نموت الاتنين مع بعض وخلاص ..
قال لي يامهج الحاجة المطمناني عليك اني ماقاعد احس بيك صغيرة ..ومابخاف عليك زي الاطفال ..
قلت ليهو يا ابوي هموم الدنيا بتخلي الزول يكبر قبل مواعيدو . ابو ده ضحك جنس ضحك من كلمتي دي .
من زمان ماشفتو ضحك كدا .. قال لي انتي مسلطه ..
..المهم ابوي اليوم كان كويس ومبسوط كدا ..بعد حكا لي الكلام ده حيت هم نزل منه ..
وحالتو كانت مستقرة يعني ما كنت مقلقة من مرضو ..
لدرجة انو اليوم داك انا نمت بدري بدري من دون الايام الفاتت .. الكنت مساهرة فيها طول الليل بصحى تلاتة اربعة مرات.. عشان اقوم اشوف ابوي والمسو من الحمى واعصر ليهو كرعينو ..
لكن الليلة الحمد لله.. ابوي كان في احسن حال .. ونام طوالي سريع بدون اي قلق زي الايام الفاتت .. انا قعدت شوية بفكر في القصص الحصلت لابوي ..
واتذكرت امي واتخيلتها قدامي .. ودموعي جرن وانابعاين لابوي .. نايم ..
بعد شوية .. ومازال خيال امي في عقلي رقدت و نمت نومة عميقة ..
و في النوم بتذكر حلمت احلام كدا ملخبطه وفيها احلام جميلة .. حلمت انو امي جاتني في البيت وقالت لي انا عطشانة واديتها موية شربت لامن روت .. وانا بعاين ليها مبسوطة .. قالت لي نحن ماعندنا ازيار
واتألمت الم لمن صحيت من النوم لقيتو حلم..
ولقيت االناس بصلو في صلاة الفجر ..
لكن ابوي لسه نايم .
قمت عاينت ليهو كان نور الحوش من الشباك ضارب في وشو..
وشو ده كأنه منور والنور طالع منه ..
ونايم نومة حلوة خلاص ومريحة .. انا بقيت مترددة ياربي اصحيهو يصلي ولا اخليهو ياخد راحتو ويقوم على راحتو؟ ..
وخليكم فاكرين المدرسة باقي ليها اقل من اسبوع ..
الى اللقاء ..
