قال لي انتي وافقتي علي الموضوع علي ياتو اساس؟ ؟راغبه فيهو من نفسك..ولاعشان رغبة عمك؟ ..
قلت ليهو والله انا وافقت من غير تحكم. عشان مابكسر كلام عمي ..ولاني بثق فيهو ..وفي اختياره لي .. وافقت من دون اعرف عنك اي حاجة ..
والرغبه الجواي دي مابقدر احددها هسي.. لاني ماعرفتك كويس.
وفي النهاية لو في قسمة.. لا أنا ولا انت مابنقدر نوقفها .. ولو مافي قسمة .. عمي وعمتي ماح يقدرو يعملو شي طبعا ..
قال لي صدقتي .. طيب انتي رايك فيني شنو كبداية كدا ؟..
قلت ليهو والله ما اعرف عنك الا الخير.. كفاية انو امك بتدعي ليك.. وبتقول ليك يانور عيوني .. مافي احسن من كدا ..
بس من قلت ليهو كدا .. عيونو اتملن وبكى .. داير يدس دموعو مني ماقدر ..
بسم الله.. هسي ده مالو بكى ؟؟
قش دموعه ورفع يديهو.. وعاين للسما وقال لك الحمد يارب..
قال لي انا الحمد لله ماشي في الدنيا.. دي بدعوات امي ربنا يرزقني برها..
ان شا الله ربنا مايحرمني منها..
انا لمن قال كدا.. اتذكرت امي اماني نور الكون.. زي مابسميها ابوي.. قلبي وجعني بس الحمد لله مابكيت..
قال لي طيب.. ليه ماسالتيني انتي عن راي انا فيك؟..
قلت ليهو والله برضو ما ح تكون مكون عني فكرة.. وصورة مكتمله.. لانه دي اول مرة تسمعني واسمعك..
عشان كدا زي ماقلت انت في الاول الناس تدي نفسها مساحة وزمن .. وتتريس ..
قال لي لكن انا مصر اقول ليك راي عنك..
انا قلت خلاص الزول ده ح يمسح بي الواطه.. ويندمني علي قعدتي معاهو دي ..
ما كنت عايزاهو يقول رايو عني قبل مايعرفني كويس..
اتوكلت علي الله .. وقلت ليهو قول ما في مشكله..
قال لي والله انا لمن خالي كلمني عنك.. كنت قايلك زي بقية البنات .. قلت في نفسي بس الاقيك.. واقول ليك عايني يابت الناس.. انا بنفذ في كلام الكبار ..خلي عندك كرامه وارفضي..
لكن صراحه لمن شفتك. غيرت راي.. ولقيت فيك صورة الانسانه الكنت بتمناها.. نفس الملامح والشبه المخزنه في راسي..
لكن طبعا الشكل ماكل شي ..ومن طريقة كلامك.. والحياء المامصطنع.. الشايفو قدامي ده . وانخفاض صوتك. واختيارك للكلمات بعنايه..
عرفت انك انتي زولتي الانا منتظرها.. وبرفض في البنات عشانها ..
انتي عارفه انا بكيت ليه؟
قلت ليهو ليه؟
قال لي لمن سالتك عن رايك الابتدائي فيني .. كنت بتمنى يكون راي ايجابي..
وكنت خايف تترددي .. والحمد لله رايك ايجابي. فرحت لمن بكيت ..
بس ان شا الله تكوني فعلا في قسمتي .. طبعا هنا انا حسيت بقلبي بتبسم خجلان بالجد حقيقة ..
اقول ليكم صراحه ياجماعه .والله الزول ده بعد قعدت معاهو خمس دقايق بس حسيت بالكون ده انقلب جنه.. يعني من طريقتو البتكلم بيها .. وصوتو هادي كدا ومابعاين لي في وشي .. بتكلم مدنقر ويقبل كدا ويقبل كدا ..
لمن انا اعاين ليجهة القاهو خطف نظره سريعه ودنقر راجع ..
انا كنت قايله دمو تقيل ..لكن الزول ده طلع مهذب اكتر من اللازم ..
اها انا بعد عرفت الزول ده خلاص معجب بي فعلا. وكاتم الريد في حنانو..
قلت اتقل عليهو واعمل فيها مهمة هه..
قلت ليهو بس في مشكله يا ودعمتي..
قال لي اي مشكله عندك محلوله باذن الله.. قولي المشكله شنو؟
قلت ليهو انت عارف انو انا امتحنت وهسي منتظرة النتيجه..فقدامي سنين الجامعه يعني حتى لو اتفقنا ووافقنا علي بعض.. الموضوع ح يكون لقدام..
قال لي ما في اي مشكله لو القسمه حصلت ..انتظرك عشرة سنين ..(الموعود بالجنه. مابغلبو يستنه).
اول مرة اسمع بالمثل ده انا هه..
والله الزول ده كلامو زي نقاط المطر من الصباح.. الزول البسمعو يتمنى اصلو مايسكت..
قال لي ولو قلتي نتم الموضوع وادخلك ارقى جامعه في البلد. برضو موافق.. اصلك تاني ماتقولي في مشكله.. اعتبري امنياتك محققه ..
بس انتي اتأكدي من رغبتك الحقيقية في الموضوع. وامشي اخدي راحتك في التفكير وقولي لي ..
انا طبعا قربت اقول ليهو ياخي موافقة هسي ماعايزة تفكير..
بس قلت ليهو حاضر.
والله قلبي بقى يضرب جنس ضرب ..
غايتو سبحان الله. ربنا ده عندو تصاريف عجييه..
ولسه مامون . مواصل في كلامو الهادي البراحه داك ...كلمة .. كلمة .. زي الزول البأكل فيك بالملعقه.. وجبة رز بلبن فوق جوعه..
قال لي بس بوصيك ..لو الموضوع تم لينا. ولا ماتم لينا..اصلك ماتخلي قرايتك وماتضحي بمستقبلك .. كفايه انا ضحيت بمستقبلي عشان ابوي .. لو غير كدا كان ندمت .. لكن الحمد لله ربنا عوضني بالخير..
انتي مالك ساكته كدا قولي حاجه..
قلت ليهو بسمع فيك..
قال لي شكلي اتكلمت كتير وابتسم .لاول مرة اشوف ابتسامتو..
الليله ده يوم يأرخوه تأريخ.. اني شفت دموعو وشفتو ابتسم ..
في اللحظه دي امو طلعت من جوه .. مخلوعه..
قالت يا اولاد مامون مهج.. انتو ماسامعين؟
قال ليها في شنو يا امي؟ قالت ليهو ماسامعين صوت البكا
قال لي لالا والله ماسامعين .. وفعلا كلامو صاح انا ماسمعت اي حاجه.
قام سريع حفيان .طلع من الهول .. قال لي صاح في صوت بكا .. دقيقة اشوف الحاصل جرى الشارع خلا شبشبو قدامي. انا يادوب سمعت طق الكوراك..
جا راجع قال لامو ..
اتوفت سوسن بت بتول يا امي..
قالت ليهو الحي الله يا مامون ..متين ماتت؟ قال تقريبا الان ..
قبل علي قال لي بتعرفي سوسن دي؟ .. بتكون عمتك تقريبا وهي زوجة ابوك الاولى.
قلت ليهو ايوة بعرفها ابوي حكى لي بيها ..
قال لي الله يرحمها تعبت شديد عيانه ليها فترة ..
انا لازم اطلع سريع..نكمل كلامنا في وقت تاني يامهج خير؟؟
قلت ليهو خير..
امه قالت ليهو الفطور جهز يامامون ..اخد لك لقمة بتحصل.. قال ليها ..لالا ..مابقدر يا امي المراة خالتنا. لازم اكون قدام .
انا في سري قلت ليهو ..انت دايما قدام ان شا الله ..يا الهادي الرزين .. .. وسوسن ماتت ..وانا الليله اول يوم احس اني حيه..
امشي ربنا يحفظك محل ماتقبل .. بتكلم بيني وبين نفسي ..
الزول ده طلع ..وانا روحي طلعت وراهو .. بالجد بالجد زول كدا مبالغة ..
ياخي بتكلم بدون اي تكلف.. زول على طبيعتو .. زول كلامو يحسسك بانك قدام انسان يستحق الاستماع ..
ايوب وينو؟ هه .. راقد جوة في العرفة لغاية الان.. ماطلع .. ولا اظنو عارف البكا .. زول يمشي يقولليهو سوسن ماتت.. وانت ذاتك طلعت ميت ..
امه دخلت عليهو .. هو شكله ماكان عارف.. انو انا ومامون قعدنا قعدة تاريخية .. امو شكلها كلمتو بالبكا .. وجات مارقة منو تتكلم براها .. قالت غايتو الزول ده ماعندو اي احساس .. كلمتو بالبكا وماداير يقوم ..
اها اظنو دخل نام بعد الشكلة دي .. وابا يقوم يمشي العزاء ..
ابوهو جاء شال الفطور براهو .. وماسأل منه .. وعمتي ختت لينا الفطور فطرنا فضلة خيركم .. قالت لينا انا بمشي البكاء انتظروني هنا ماتمشو اساسا بيتكم ح يكون فاضي يا نمارق.. امك وابوك ح يكونو طول اليوم ده في البكا .. انا طبعا فرحت اني ح اقعد شوية عند ناس عمتي .. ماعارفة ليه
اها عمتي وقفت الاكل وسرحت وبقت تقول سبحان الله ياسوسن .. سبحان الله .. ربنا يرحمك ياسوسن بت بتول .. عمتي تكون اتذكرت الموضوع بتاع المشكلة البين اخوانها الاتنين .. الكانت اتسببت فيها سوسن ..
وقايلاني ماعارفة حاجة.. وانا معايشة القصة كأني كنت حاضراها .. حاكنها لي ابوي وعمي بالتفاصيل ..
والله كان نفسي اشوف سوسن.. واقول ليها انتي عملتي كدا ليه؟ شوف انا قاعدة هنا قريب العشرين يوم ولايوم اتذكرتها بخير ولا بشر .. فجأة كدا ربنا يحضرني موتها .. وماتت يوم الجمعة دي من علامات السعادة .ان شاء الله يكون ربنا سامحها وغفر ليها .. المراة ندمت وصلحت غلطتها.. حتى بعد فوات الاوان .. لئن تأتي متأخرا خيرا من ان لاتأتي ..
بس يلا ربنا يرحمها ..
قعدنا انا ونمارق في بيت عمتي برانا .. وايوب داك لسع نايم جوة .. قريب وقت الصلاة كدا قام جا داخل على الهول .. قال لينا كيف يابنات؟ .. انا رديت ليهو قلت ليهو .. تمام الحمد لله .. قال امي مشت البكا؟
قلت ليهو ايوة نعم .. ونمارق لاردت عليهو ولا بتعاين ليهو .. خاته يدها في حنكاتها .. ومركية نظاراتها وتعاين في الأرض .. وقف ثانيتين .. و دخل المطبخ .. اكل جوة وطلع .. مشى وين ماعارفه لكن اكيد ما ماشي الصلاة .. ولا ماشي العزاء ..
مرا اليوم ده في بيت عمتي انا ونمارق نضفنا البيت واستحمينا وصلينا .. وانا حومت البيت ده من اطرافو ماخليت حتة ماشفتها .. هه
متخيلة انو ح يكون بيت نسابتي .. غايتو عندي احساس بعد مامون اتكلم معاي ماقادرة اوصفو .. مابشبه اي حاجة ..
قريب الساعة تلاتة كدا عمتي سعاد وصلت .. وبعد شوية جا زوجها .. وانا اشيل واعاين للباب .. وينو الزول ده مالو ماجاء ؟؟ نفسي اسأل ابوهو اقول ليهو مامون بجي متين؟ .. ومالو اتاخر؟ .. ونفسي اقول لي عمتي انا عايزة اقعد باقي الايام دي معاك هنا .. المهم جواي فرحة كدا لي زمن ماحسيت بيها ..
بس ياجماعة زي ماعارفين الفرحة الزي دي الزول بخاف منها .. وخاصة انا ..
كل ما اكون سعيدة ومبسوطة قدري يفاجئني بحاجة مافي الحسبان ..
الى اللقاء
