بدا عمي يحكي لي في الكارثه العاملا ايوب.
قال لي ايوب طلع متزوج ليهو واحده.. من ناس الحي الشرقي .. (بدون علمنا) .. لانو عارف مابنقبل بيها .. واحدة لاهي ولا اهلها مابشبهونا ولابشبهو سلوكياتنا ولا عاداتنا .. ياخي ديل ناس استغفر الله بس .. متزوجها وعنده منها بت كمان .. وهسي هي طالبة منه الطلاق .. ورافعة عليهو قضية .. وهو ماداير يطلقها .. قال شنو ؟ قال بحبها .. شفتي البلاوي الواقعين فيها نحن ..هسي مقاطع ابوهو عشان قاليهو لازم تطلقها .. خليني امشي الخرطوم.. واجي راجع بعرف اتصرف معاهو انا ..
قلت ليهو ياعمي مادام هي ماعايزاهو .. يمسكها ليه ؟ كدا ماصح.
قال لي ده زول طلع وهم ..بس الحمد لله..
قلت ليهو بتتحلا ياعمي ان شاء الله.. عشان عمتي قلبها طيب ربنا بقيف معانا ان شا الله..
مشينا البيت.. ولقيت نسرين بت عمي جات الليل كلو بتونس معاها ..والليله قاعد معانا صديق ودعمي فتح برضو اب سديري ..
سمع اني مسافرة اول مرة يتونس معاي ..قال لي انتي بتقري في الخرطوم ؟قلت ليهو ايوة ياصديق.
قال لي بصح مدارس الخرطوم مافيها دق؟ قلت ليهو غايتو انا ماحصل دقوني..
قالي اظنك شاطره..
المهم اصبح الصباح وقمنا بدري.. صلينا وشربنا الشاي وشلت شنطتي طلعتها قبل الشرقه مامون وقف باللاندكروزر
ونزل جا سلم وشال شنطتي وشنطه عمي هاندباك وختاهن في العربيه وركبنا انا استلمت الكنبه الورا وعمي ركب مع مامون قدام..
وودعناهم وطلعنا..
طول الطريق بتونسو وبحكو في قصص وبتكلمو بمحن ناس السوق. وقصص الناس البزوغو بالديون وناس الشيكات الضاربه..
وكل مرة مامون يديني نظرة مسروقه بالمرايه .. انا زحيت علي جانب عشان ما يعاين لي... يقوم يعمل بينا حادث..
هو حس اني زحيت من نظراتو تاني ماحاول يكررها هه..
المهم لاختصار الطريق وصلنا مستشفى السلاح الطبي الراقد فيهو عمي حسين حوالي الساعه ٣ ظهرا..
ومامون كانت في دكتورة منتظراهو ..تقريبا وصتها ليهو دكتورة هاديه اختو زميلتها وكدا .. المهم دخلونا طوالي..
وعلى طول دخلنا علي عمي حسين..لقينا معاهو السر وعلويه زوجته.
سلمنا عليهم وكفرنا .. والله فعلا الراجل تعبان شديد..انا قعدتا جنبو في سريرو ..
وقلت ليهو الحاصل شنو ياعمي؟
قال والله يابتي ماكان في داعي تتعبو ..لكن انتي اصيله وبت اصول..
ده عمك فتح صاح؟ قلت ليهو نعم ..
قال لي حكالي بيهو السر ولدي
وده منو ؟.. قلت ليهو ده مامون ودعمتي سعاد .الاتنين جو مرافقيني عشان يشوفوك.
قال لي والله انتو اسرة كريمه .ربنا يديم المعروف.
انا يامهج يابتي ظهرت اورام في الغدد الليمفاويه واتعبتني شديد.. واتهموها بانها اورام خبيثه ..بس لغاية الان مافي تاكيد الفحوصات مختلفه..مرة يقولو حميده ومره يقولو خبيثه..
قلت ليهو ان شا الله تكون خفيفة وتقوم بالسلامه..
قال لي والله الليله انا احسن من امس كتير بفضل الله ..
قلت ليهو صاح امس في التلفون صوتك كان كعب الليله احسن ..
اخدنا معاهو قعدتنا وماجاب لي سيرة الموضوع وانا ماجبتها ليهو .. قلت ياعم حسين دايرين نمشي الحاج يوسف لناس خالتي ناخد الليل ده وبكرة الصباح بنجي نطمن عليك تاني..
قال لي خلاص امشو انتو تعبانين والسفر الجيتو منو ده طويل انا مشيتو..
ودعناهو ودايرين نطلع .. قال يامهج دقيقه دايرك في كلمه..
عمي ومامون والسر طلعو وبقينا معاهو انا وعلويه..
قال لي والله يابتي ماعارف اقولك شنو.
لكن انا محرج منك شديد ..طبعا انا طلبت منك طلب.
وانتي وافقتي مشكورة ..ومحمد ولدي اتقبل الموضوع..
مع انو كان عندو واحده من بنات الجريف دايرها خلاها ..عشان رغبتي ..
بس امس العصر اتصلت علي خالتك اميمه .. وقالت لي اديني محمد عايزة اوضح ليهو حاجه مهمة ..
ناديت محمد واديتو خالتك ي التلفون ..
قالت ليهو اسمعني كويس يامحمد .. طبعا مهج كلمتني.. انك كلمت ابوك يطلبها ليك..
عايزه اقول ليك مهج عيانه يامحمد ..انت عارف المعلومة دي ؟ مهج بتجيها تشنجات وصرعه.. اثناء النوم.. من فترة لفترة ..
لازم تكون عارف المعلومه دي.. عشان ماتقول غشوني ودسو علي المرض..
محمد كلمني بالقالتو ليهو خالتك .. انا قلت ليهو يامحمد ياولدي المرض من ربنا ..ياولدي وممكن البت تتعالج..دي بتنا مابنتخلا عنها ..عشان المرض.. بس الولد لقاها فرصه.. وقلب وشو.. وابا يتفاهم معاي.. وقال لي ماعايز الموضوع ده .. قلت ليهو طيب علي الاقل اتصل علي مهج واسالها احتمال مايكون المرض الكعب.؟
قال لي لالا مابتنفع معاي يا ابوي.. الحكايه نفسيات.. زعلت منو ..وزفتها معاهو..
وهسي عامل زعلان من امس.. بالليل تاني ماشفتو..
انتي الحكايه جاتك من متين يامهج ؟ لمن كنتي معانا هنا مع ابوك كانت عندك؟..
قلت ليهو ماعارفه والله ياعمي حسين ..اول مرة اسمع بالكلام ده ..
احتمال يكونو داسينها علي..
لانو ماحصل في زول قال لي عندك كدا ولا كدا .ولا ابوي ولاناس خالتي وطبعا الزول البكون نايم مابعرف الحاصل عليهو ياعمي .
انا بيني وبينكم ..عرفتها دي خطه خبيثة من خالتي اميمه ..عشان تطفش مني العريس.. وهي ماعارفه انها بخطتها دي.. مرقتني من مشكله قدر الجبل ..
قلت ليهو ولايهمك يا عمي حسين.. انا اصلا مامون ودعمتي ده اتكلم معاي وانا ابديت ليهو موافقه ..ماكانت رسميه لكن لمن جا طلبك انت انا مابقدر اكسر كلامك..
قال لي انا عافي منك تسلمي دايما رافعة راسي .. خليك مع ودعمتك .. محمد اصلا ماعندو حظ..
وزول برفضك عشان المرض ..ده ماراجل سترة خليهو ..
قلت ليهو بس محمد والسر اخواني.. غصبا عنهم ومافي زول بقيف معاي غيرهم.. انتو اسرتي بعد اسرة ابوي ياعمي .. الكلام ده كلو علويه تسمع وتقشقش في دموعها ..
ياخ وحات الله انا فرحت جنس فرح..اصلا انا اتوكلت علي الله.. وربنا براهو بظبط امور الزول البتوكل عليهو ..
شوفو.. لمن ربنا يقيف معاك .. الزول العايز يضرك.. ينفعك من دون يقصد ..هه.. والله عجايب ياخالتي اميمه..
والله انا لو ماخجلانه من عمي ومامون.. ماعندي رغبه امشي ليها ولا اشوفها .. لكن برضو في النهايه خالتي.. وبرضو مشتاقه اشوف عمي محجوب الرجل الملاك..
اتصلت عليها وقلت ليها نحن وصلنا وجايين عليكم في البيت .. واخيرا وصلنا الحاج يوسف .. وعمي محجوب قابلنا احسن مقابلة .. اما خالتي العزيزة اميمة ..سلمت علي انا سلام مسيخ. براس اصابعيها .. ومامون لاحظ للجفاء الحاصل منها ..يعني لي كم وعشرين يوم منها .. وهي تسلم علي بالطريقة دي؟ ..
انا بس ماكنت عايزه مامون يلاحظ.. لانه ح يكون جواهو الف سؤال ..
وح ياخد عني فكرة سيئة .. ح يقول مادام خالتها بتسلم عليها بالطريقة دي .. معناها مهج دي زولة سيئة وخالتها بتكرها ..
المهم مامون وعمي مشو الديوان واخدو راحتهم الكلام .
انا وصلت الحمد لله ولاتعبانة .. ومحل الضربة حقة الحادث بقت مابتألمني .. ماعارفة اللاندكروزر مريحة ولا الامور معاي احسن ..
خالتي اميمة بعد اكرمت الضيوف فضلة خيركم .. جات قعدتني وقالت لي ده شنو العملتيهو ده ؟؟
قلت ليها شنو؟
قالت لي كيف بتفكري في زواج وانتي لسه قدامك قراية .. قلت ليها لكن محمد زول كويس.. وابوهو راجل في مقام ابوي ..
وانتي عارفة علاقتي بيهم ..لقيتها دي فرصة مادايرها افوتها .. عليك الله ياخالتي وافقي ..ههه
قالت لي بس لو دايرة محمد.. انا لاخالتك ولا بعرفك ..
ولي عرسك مابجي ..
الراجل الاسمو حسين واولادو ديل.. ما دايرنك عشان سواد عيونك .. هدفهم بيتك .. ماشفتي الراجل ده انا لمن اجرت البيت قوم الدنيا وماقعدها؟
قلت ليها الناس ديل عينهم ملانه ..
قالت لي هسي انا قلت تلقي ليك عريس عند اهلك هناك .. ودعمتك الجا معاكم ده متزوج؟؟ صلاة النبي عربيتو تسوي كدي ..
قلت ليها لالا ما متزوج .. لكن ياخالتي اشحدو؟ قالت لي زي ده مابكون طمعان في حقك زول مقرررش ظاهر عليهو ..
طبعا ياجماعة في فهمها لو اتزوجني مامون ح أسكن في البلد ..واخلي ليها البيت تسفيد من الأيجار الشهري .. غايتو خالتي الله يديها العافيه .. ممكن تبيعني في الشارع عشان القروش ..
سبحان الله الامور ماشة مرتبة زي مابتمنى .. وانا بقيت بتعامل مع خالتي بذكاء زي ماملاحظين.. غير كدا ماينفع .. البراءة الزمان ديك بتضرني تاني ..
اها عمي ومامون قالو لي خالتي نحن عايزين نتكلم معاك..
جو وقعدو معاها ..
عمي قال ليها نحن دايرين مهج دي لمامون ودعمتها ده .. وانتي خالتها وربيتيها زي امها .. ليك الشورة طبعا ..
قالت ليهو .. والله عاد يوم المنى ؟ بس اهم حاجة يكون دايرها ودايراهو ..
عمي قال ليها .. أٍساليها نشوف رايها شنو؟
انا سريع قلت ليهو الكلام البتقولو انت وخالتي انا موافقة عليهو يا عمي ..
خالتي دي فرحت فرح ..
قالت ليهو انت شغال وين؟؟ قال ليها انا تاجر في سوق الرصيرص .. قالت ليهو يعني مهج ح تسكن في البلد ؟ قال ليها اي نعم ..
قالت ليهو لكن انا بقدر على فراقها؟ ههه بلاي عليك ؟
طبعا ده اجمل خبر تسمعو خالتي .. لكن دايرة تظهر حنية مكذوبة وانا فاهماها..
قالت ليهو بس عندي شرطين.. قال ليها قولي ..
قالت ليهو تخليها تواصل قرايتها .. قال ليها موافقين ..
والتاني .دي بتي ومن الواجب تنزوج في بيتي ده .. وانا البجهزها..
مامون قال ليها تواصل دراستها دي مسؤليتي وانا مابتخلا عنها ...لكن تتزوج وين ده حسب اختيارها هي ..
هنا عمي قال .. مهج ح تتزوج ف بيتي.. وح تتزف من بيتي.. وانا ولي امرها ..
والكلام ده مافيهو نقاش..
مما ممكن ناس البلد يتكركرو يجو الخرطوم .. لكن انتي واسرتك خفيفين .. تجينا هناك نتم الامر ..
خالتي وكت لقت كلام عمي قاسي زي السيف..رضخت وقالت ليهو على خيرة الله ..
قالت لي اها يامهج .ح تأخري الزواج وتواصلي دراستك.. ولا ح تدرسي وانتي متزوجه ..
انا قلت ليها الكلام البقولو لي عمي بعملو ..
خالتي قالت (كدي يايمه.. عان الفصاحه),, يعني الحمد لله البقى عمك مهم .. بعد الكان حاصل زمان ..
عمي فتح عاين ليها بطرف عينو جنس معاينة .. انا اتخيلت لو ماعمي محجوب قاعد .. كان صمتها كف ..
اها هنا في زول حقاني بداا يتكلم..اللهو عمي محجوب .. قال ليها يا اميمة مهج دي عندها دهبات عندك .. سلميهم ليها تمشي بيهم امورها ..
قالت ليهو دهبات شنو ياراجل انت؟؟ الدهبات انا صرفتهن عليها من سنين ..
انا قلت ليها مامشكلة ياخالتي.. انتي العملتيو معاي .. مابساويهو دهب الدنيا ..ماقصرتي .. ربنا يكرمك ويديك العافية ..
محجوب قبل علي قال لي شلتي اوراق بيتك؟
قلت ليهو لالا ..قال ليها قومي يا اميمة جيبي ليها ورق البيت .. واي مستندات بتخصها وبتخص والديها ..
قالت ليهو ياتو بيت يامحجوب؟ اجي؟؟؟
الى اللقاء ..
