خالتي اميمة اخت امي .. الكانت معاي في حياة امي كانت زمان حنينة وطيبة..
لغاية ما امي شالا اجلها .. هسي بقت متغيرة شديد . حتى وقت جات ماسلمت علي كويس .. وصارة وشها بطريقة غريبة .. وتتأفف كدا وتتلفت في البيت زي الشامة ليها ريحة ماكويسة ,, وكل مرة تعاين لي من راسي لي كرعيني ..
وانا لي منها قريب الستة او سبعة شهور .. والسنة الفاتت اخر مرة لمن جاتنا ماقعدت معانا .. نفس حركاتها دي بس المرة دي ظهرت على حقيقتها ..
المرة الفاتت بس كانت جات الضهر ومشت صلاة العصر ..
وكان شكلها مابتحبني نهائي ..برضو كنت ماعارفة في الوقت داك بتخيل لي ولا فعلا صاح الكلام ده ..
بعدين بتتكلم مع ابوي بعدم احترام شديد ..وبتتماسخ معاهو .. ابوي المابستاهل الا الخير .. ابوي المهذب الما بتسمع منه الا الكلام الطيب ..
قالت ليهو انت لمن انشليت.. ماتكلم بتك تتصل علي.. اجي اسوقها ..
قال ليها أساليها يهدي براها اتصرفت ..واتصلت عليك بس تلفونك مقفول .. نحن هسي شفقنا عليك وقلقنا من تلفونك المقفول قلنا مايكون حاصلة ليك حاجه ونحن ماعارفين ..
ابوي مابعرف يقول الكلام الشين ..وكلامو دايما بطيب الخاطر .. لكن هي بس تتماسخ ..
وانا بس ساكتة وبعاين بعيوني ..
قالت ليهو اها هسي البحصل شنو؟ يعني انا اعمل شنو هسي؟ ..
اخلي بيتي واقعد اخدمك؟.. ولا اخمك اشيلك معاي ؟
وانا راجلي ماقادرة اخدمو واولادي متعبني ..
كمان امشي اتبالا بي زول مشلول بي بتو ؟
بالله شفتو المراة دي بتتكلم بياتو اسلوب .؟غايتو الحمد لله انا والله حسيت باحساس .. اصلو مابتوصف .. وقلبي وجعني..
شفت الزول لمن يحس بي روحو من جوة بتموت وبتتقطع ..
قلبي قال لي : انفصمي فيها وردي ليها في وشها . لكن سكت وبقيت بغلي من جوه ..
سكتت مسافة.. وقامت قالت لابوي اسمع.. انا بسوق البت دي معاي.. انت تضرب لاهلك يجو يشوفو عملهم معاك.. انا مابقدر عليك ..
ابوي قال ليها خلاص خير سوقيها .. انا الله كريم علي.. وربنا ماشقالو حنكا ضيعو..
اهاااا .. انا هنا اتدخلت قلت ليهو.. اسمع يا ابوي .. انا والله لو كتلوني مابفوتك ..
ياخالتي انتي ماتشتغلي بالموضوع .. نحن بنتصرف .. انتي امشي مشكورة علي جيتك دي ..
اتخيلو انا كان عمري 9 سنوات وكم شهر .. قالت لي يعني تتصرفو تعملو شنو؟
قلت ليها ربنا كريم ياخالتو .. وربنا معانا ان شاء الله .. ابوي بقى يعاين لي انا بتكلم .. وهو دموعو ماشات .. والله منظر يقطع القلب الحمد لله ..
اهاا لمن خالتي اميمة شافتني مصره ..
قالت لابوي خلاص اعمل شنو ؟.. ح اسوقك معاي انت وبتك.. وامري لله..
ابوي عاين لي كدا .. زي الكانو عايزني اتكلم .. قلت ليها لالا ياخالتي.. انتي مابتقدري خلينا في بيتنا ده ..
ابوي قال ليها وانا راي زي راي بتي ..يا اميمة انتي جزاك الله خير ماقصرتي وربنا يديك العافية ..
خالتي عدت معانا اليوم داك لغاية المساء وفاتت ..
المراة دي سبحان الله مما جات لمن رجعت ما اتوضت صلت .. انا وابوي نقوم نتوضا ونصلي وهي تعاين لينا متمحنة ..
قلت لابوي خالتي مالا تاركة الصلاة ..
قال لي احتمال عندها عذر .. انا فهمتو قاصد شنو .. لكن برضو ما انا مقتنعة ..
المهم فاتت مننا .. واتنفسنا الصعداء ورجعنا نضحك ونتونس انا وابوي ..
وحياتنا استمرت غايتو .. عمي حسين سيد الفرن برسل لينا العيش يوميا .. والجيران مامقصرين .. والله في الشهر الأول كله بعملو الاكل ويجيبوهو لينا .. يعني الزول ما ينكر احسان الناس.. والله جيرانا كانوا نعم الجيران.. وده لانو ابوي كان زول معشرو طيب.. ومواصل الجيران في الحارة والبارده ..
لكن ناس خالتو نعمة المحسية .. الوقفت معاي في مرض ابوي ..
سيد البيت طلعهم من البيت ومشو سكنو في الاسكان ..
هم كانو افضل جيران عندنا وفقدناهم برضو ..
لمن الايام مشت والشهور جرت.. الجيران بقو ينسونا.. وانا بشتري بصل وبعمل سليقة بصل وارشها فوق العيش ناكل انا وابوي ونضحك ونتونس .. ويحكي لي في القصص ..
ابوي يوم الصباح قال لي يا بتي انتي غايبة من المدرسة ليك كم؟
خلاص انا ماعندي عوجة امشي شوفي مدرستك ..
قلت ليهو يا ابوي انا ماعايزة اقرا .. انا عايزة اقعد معاك انت .. انت مدرستي وحياتي ..
قال لي لالالا .. مافي كلام زي ده .. ماتخليني اتسخط من قدري ..
انا رضيان بالحصل لي .. لكن لو يبقى ليك سبب في عدم مدرستك .. انا بعيش في حالة نفسية يابتي ..
قلت ليهو لكن يا ابوي اقرا بدون رغبة ؟؟
وانا في الحقيقة مافاقدة الرغبة في المدرسة.. وبحب المدرسة وكنت متفوقة ..
لكن للضرورة احكام ..ابوي مافي زول جنبو وهو محتاج لي .. مابقدر امشي اخليهو براهو مابكون مطمنة ..
قال لي انتي عندك رغبة بس عشان مرضي ماعايزة تقري ..
وحسيت بيهو اتضايق ..
قلت ليهو يا ابوي خلاص نتفق على حاجة .. بس عشان خاطري ماترفض .
قال لي اها شنو؟
قلت ليهو .. انا بمشي هسي احكي للمدير عشان يجمد لي السنة دي
والسنة الجاية بنزل من اولها .. وانت تكون بقيت تمام ومشيت على رجولك ابوي الحبيب وافق على مضض .. ومشيت جمدو لي السنه ..
وبقيت بس قاعده مع ابوي.. ومالي علي حياتي وانا مالية ليهو حياتو ..
وكنا اسعد اتنين برغم الحال الضايق والمعيشة الضنك .. اصحاب ابوي بجو يزوروهو من فترة لفترة ..
وبدوهو الفيها النصيب .. وابوي لمن اصحابو يطلعو بقعد يبكي .. يقول لي والله يا بتي .. انا مابقبل اكل من يد الرجال ..لكن الحمد لله على ما اراد الله .. وهو يبكي وانا ابكي معاهو .. وماعندنا حل في يدنا .. غير صلاتنا ودعوة ربنا في كل وقت انو يتولانا بي رحمتو ..
انا بقيت الليل والنهار بفكر في حاجة نتعيش بيها.. انا وابوي من غير ما احوج ابوي يشيل حاجة من زول ..
فجأة كدا ربنا هداني لفكرة عجيبة .. في مراة من جيرانا .. اسمها فايزة .بتعمل الطعمية .. وسلطة الاسود وبتبيعها قدام المدرسة ..
ايوة بس لقيتها لقيتها ..
اها انا استأذنت من ابوي قلت ليهو طالعة مشوار ضروري وبجي ..
مشيت لفايزة دي .. وقلت ليها ياخالتو فايزة انتي عارفة ظروفنا .. وماعايزين نحتاج للناس .. انا عايزة اشتغل معاك .. انا بساعدك واخدمك في اي حاجة عايزاها .. وتديني بس حق اكلي انا وابوي والمراة وافقت ..
وجيت كلمت ابوي .. ابوي قال لي مافي اي مشكلة احسن ماعملتي ..
انتي بت افضل من الاولاد ..
بقيت كل يوم من الصباح بمشي ليها اترسل ليها واخدمها .. لغاية ماتجهز حاجاتها ..
وتمشي تبيعهم في المدرسة ..هي تمشي على المدرسة وانا بجي على البيت .. وفي الاجازة بتمشي تبيع في سوق صغير.. في نص الحلة .. وبتديني حقي مع انو بسيط.. لكن كان مكفينا وتاني ما احتجنا لزول ..ومافي زول شايفنا بناكل شنو..
.. وانا بمرور الايام اتعلمت اعمل الطعمية وسلطة الاسود .. والله بقيت بعملهم احسن من فايزة .. بدليل انو لمن اعمل ليها الطعمية انا.. بتبيع كل الكمية .. ولمن تعملا هي . بتجي بي باقي طعميتها باااايره ..
بس بقت عاصراني في الشغل .. واتعبتني تعب شديد خلاص .. ماقدر الشي البتديني ليهو .. لكن انا رضيانة .. لانو برضو افضل من الحوجه للناس ..
المهم المراة اعتمدت علي ..ومبسوطة ومرتاحة معاي ..بقيت الصباح اجيها بدري ..واعمل الطعمية براي..
واظبط الحاجات واجهزهم ليها ..ماعليها الا تجي تشيلهم تمشي تبيع بس ..
وانا لمن امشي البيت بشيل لابوي حبات طعمية وسلطه .. والعيش طبعا ثابت بجينا من الفرن ..
وناكل احسن الاكل .. وف يالغداء سليقتنا ثابتة ..
يعني الامور كانت ماشة ..
لكن برضو كل ما الزول يقول المعاناة زالت تجيهو مصيبة من وين ماعارف
بس الحمد لله ..
يوم كنت بعمل في الطعمية في بيت فايزة .وفايزة مافيشة .. طلعت تجيب حاجات من السوق تقريبا .. اها عندها ولدها عمره زي 19 سنة.. قاعد في البيت ..عاطل واهبل كدا .. لمن لقاني براي قعد يعمل في حركات .. ماعجبتني .. وبتكلم وبغمز في عونو زي الباطل ..
والله انا كنت عايزة اضربو بالكمشه البعمل بيها في الطعمية ..
بس خفت اعوقو وامه تجي تقطع عيشتي .. قلت ليهو والله تبطل حركاتك دي ولا انا ح أكلم ليك امك وابوك ..
اتخيلو رغم اني هددتو .... شوفو الحصل شنو؟
..
