عمي محجوب قال ليها ..كيف ياتو بيت ..يا اميمه؟ .. بيت فيصل ..
قالت ليهو ..طيب ..طيب.. عارفاهو بيت فيصل .. اها مهج الورق تعمل بيهو شنو؟ الورق ده قاعد عندي ليهو كم سنه؟ موش انا وكيلتها القانونيه ؟ .. وقايمه بكل الاجراءات ..وصلحت البيت واجرتو؟..
والعقد حق الايجار باسمي؟؟ ..مهج تشيل الورق كيف يعني؟
وانا ساكته بسمع فيها ..وبعاين بعيوني .. ماعايزة اقول لي كلمه الناس يمسكوها لي..
ليك ولي زمانك... لو في زول ظلمك.. وفي ناس كبار عاقلين وقاعدين ..الزم الصمت وشوف النتيجه..
اها .عم محجوب قال ليها عقد الايجار يتغير الليله قبل بكرة .. ويطلع باسم مهج .. والايجار يمشي ليها هي. نحن ما محتاجين مال البت اليتيمه..
قالت ليهو بس هسع الورق رايح.. ماعارفه مكانو.. داير ليهو فتاشه خليها تمشي برسلو ليها..
عمي فتح قال ليها اسمعي يا اميمه.. نحن الورق ماني دايرنو.. خليهو معاك ..بكرة بنمشي الاراضي .وبنطلع شهادة البحث باسم فيصل ..وتطلعها مهج ببطاقتها وشهادة وفاة ابوها..وبعدها بنبطل عقد الايجار.. وبنعمل ايجار جديد .. في اسم مهج ... والموضوع مابياخد مننا اي زمن ..الموضوع انا بحسمو خلال ال24 ساعه الجاية دي .. ودي مسؤليتي وانا ولي امرها ووكيلها ..
قالت ليهو قلتو كدي؟ .. سمح ..
اها والورق العندي ..قال ليها مافيهو ليك فايده. اهم مافيهو التنازل من نصيبي ونصيب عمتها في تركة البيت .. رستليهن مشكورة مارسلتيهن بنعملن ليها تاني .. انا موجود وعمتها موجوده..
المهم ياجماعه عمي الغالي كتل ليها الدش في يدها وخلاها الليل داك تشرب ماتروي .. والله انا انبسطت منو بسط ..
اها يلا .. اختصر ليكم الحصل .. عدينا الليل داك معاهم وخالتي شكلها مانامت من المغسة ..
طلعنا الصباح مشينا لي عم حسين بدري.. ولقيناهو الحمد لله اتحسن ..وفحوصاته طلعت حميده ..وانا فرحت ليهو لمن بكيت..ونحن طالعين منو الاقي ليك محمد ولده ..لمن شفتو . خليت مامون وعمي اتقدمو شوية .. وقلت ليهو براحه كدا.. اسمعني يامحمد .. انا كلمت ابوك ..اني ماعايزاك.. انا عايزة ودعمتي ده الشايفو ماشي قدامك ده .. وابوك هسي مازعلان منك خلاص الموضوع انتهى ..امشي راضي ابوك.. ربنا يفتحها عليك..
قال لي بالجد؟
قلت ليهو بالجد .. وربنا يتم ليك علي بت الجريف.. ضحك ومشى..
ومشينا لمكتب الاراضي ..وطلعنا شهاده البحث بغرض التاكد وشلناها ومشينا للناس المجؤرين البيت وفهمناهم الحاصل ..
واديناهم صورة من شهاده البحث.. وقالو مافي داعي لعقد جديد ..
ومامون قال ليهم البت دي يتيمه.. ترسلو ليها حق الايجار ومايتاخر ..وخالتها تاني ماتدوها الايجار .. عشان البت مسافرة. رسلوها في رقم الحساب ده..
واداهم رقم حسابه البنكي.. يرسلو لي فيه.. والناس طلعو ناس طيبين وبعرفو الاصول .مراة وراجلها فقط بس معاها اخوها بقرا في الجامعه ..
وانا طبعا الجماعة ديل يخدمو فيني. عمي .. وودعمتي سيد ريدي.. وانا بتفرج زي الهبله.
واليوم ده مشينا لدكتوره هاديه. في ناصر. زوله مكمله خلقه واخلاق تبارك الله..بيتنا معاها اليوم داك تاني يوم قمنا منها
باختصار ظبطنا امورنا ولملمنا اطرافنا
ومشينا للمرة التانيه لناس خالتي .. عندي حاجات كتيرة حقتي عندهم .. شايلاها معاي.
ماخليت حاجه عند ناس خالتي.. اي حاجه بتخصني شلتها ..
لمن خلاص دايرين نطلع ..اتخيلو خالتي جابت لي ورق البيت.. قالت امسكي ورقك.. فتشت ليهو ولقيتو .. ابرى من حق اليتيم انا ..شوفو بالله الزولة دي .
بعد ماتعبنا ولفينا وعينا طلعت.. وبقينا مامحتاجين ليهو ؟؟.. الله يسامحك . المهم شلتو .. وما اتكلمت معاها ..غير قلت ليها ربنا يديك العافيه ..
شلتا منها ورقي ولملمتا حاجاتي منهم واتلاشى من جواي احساس بالانتماء . .وتاني ماجايه الخرطوم .. وسافرنا ..وحات الله فرحانه فرح ..
وحاسه بالامان مع عمي الغالي ومع حبيب روحي ..
طالعه من الخرطوم زي الكاني هاربه من شي مخيف..لمتين اصل الرصيرص اللقيت فيها الامان والحب..
السفريه دي كشفت لي شخصية مامون اكتر .. قالو لو داير تعرف زول معرفه حقيقية سافر معاهو..
ويسمى السفر بالسفر. لانه يسفر عن الاخلاق اي يكشفها .. رايكم شنو موش خطيرة..
مامون الادب الذوق والكرم والاحترام .وكلامو ذاتو شويه وحلو .. زي (لبينة العيمه). هه علي قول عمتي..
ماحصل في السفر علق ليهو علي زول.. ولا جاب كلام فارغ..
ياخي بحترم خالو ده احترام .. بفتح ليهو الباب.. يركب ويفتح ليهو ينزل وللاكل بغسل ليهو يديهو.. وبملا ليهو الابريق.. وبفرش ليهو المصلايه.. وبجيب ليهو المركوب يختو ليهو قصاد رجلينو.
بكل محبه واستمتاع .. ياسلام عليك يا قلبي انا ..والله فعلا انت صباح خير زي مابتقول امك..
انا لسع بخجل منه ..وماقادرة اعبر ليهو عن الجواي . الجواي شي عجيب .. بريدو بريدو شديد يا هنايه.
نحن يا الملوك .وصلنا الرصيرص وما اخدنا تلاته يوم اسبوع..
والخبر انتشر انو مامون داير بت خالو اليتيمه.. المعا ناس ناس فتح ..والزواج حددو ليهو بعد شهر..وشويه.
بنات الحله قالن والله البت الرمت مامون دي ماهينه..كلهن كانن خاتات عينن عليهو .. وانا ربنا حفظو لي ومنتظرني بيهو.. احمد الله .. انا في الشهر ده عشت اسعد ايام انتظار في حياتي.. وغيرت مهج الكئيبه البكايه..لمهج جديده .. دايما باسمه عشان اسعد حبيبي .. وودعت حياة الهمله والضياع.. والاحساس بالوحدة.. من ما اتوفى ابوي الله يرحمو .. وانا حاسه اني وحيدة وضايعه.. كملت البكا الفي الدنيا كله ..لكن ربنا كريم عوضني بصبري ونيتي.. اهم صفة عندي مابقدر احقد على انسان مهما كان..
والله العظيم خالتي اميمه بناتها اكتر ناس عذبوني في الدنيا دي ..ماحصل حقدت عليهم ..ولا اتمنيت ليهم الشين ..وكنت متاكده انو ربنا في النهايه بتكفل بي ..
هسي والله عمي فتح عاملني بحنيه مافيها فرق من محنه ابوي.. والعجب مامون والله بريدني ريده تذكرني ريدة امي الزماااان .. بخاف علي من هبوب النسمه..
المهم .. مررررت الايام
والحمد لله تم زواجي من الانسان الاتمنيتو ..ويوم الزواج ده كنت خايفه خوف .. كل مايقرب وقت العقد انا قلبي ده داير يطلع مكانه.. اول ماسمعت ليك ضرب السلاح وقالو عقدو بكيت .. بكيت جنس بكا.. لمن البنات بقن يقول لي ياخي ضيعتي لينا تعبنا وبوظتي المكياج..
وانا ذاتي ماعارفه ببكي مالي.. اظنها زي بكيه مامون يومي الوافقت بيهو ..
فرحت شديد انا .. وكانت سعادتي مكتمله .. الخاجه الوحيده الناقصه.. خالتي اميمه ماكان جات العرس ..لانو سارة بت خالتي اتضربت في عينها وعينها اتضررت شديد يحليلا.
والله لمن اتذكر انها اتضربت.. الفرحه تمسخ علي..
عملو ليها عمليه مانجحت .. وانا بالجد فقدتهم في عرسي ..وبالذات سلمى.
وقدورة طيب القلب ..وعمي الغالي محجوب الملاك .
لكن ان شا الله مابنقطع منهم ..
بعد زواجي عشت احلا ايام برفقة حب حياتي ولفينا ماخلينا حتة . اسطنبول القاهرة بيروت .. احكي ليكم شنو واخلي شنو؟
وانا هسي ياجماعة بكتب ليكم في القصة دي وقاعدة في بيتي .ساكنه جيران ناس عمتي في اجمل بيت.. مع تاج راسي ..افخم بيت في الحته دي .. بس طول اليوم انا مفقلاهو .. وقاعدة مع عمتي .. ونهاية اليوم يجي مامون من السوق يسوقني بيتنا
مابفارق عمتي نهائي انا..بتريدني ريدة تقول بس امي .. مرات لمن مامون يتاخر.. بجي يلقانا راقدين انا وعمتي في سرير واحد ونايمين ..
قاعدين برانا في البيت ..طبعا ايوب طلق المراة وسافر الشماليه للدهب بعد زواجنا مباشرة..
ماعارفه ده مخ شنو ..مهندس مدني يمشي الخلا؟ ..غايتو الفهم قسم.. الخلا عندو ناسو الخشنين ..ايوب مدلع وجلدو ناعم ..
ومرت الايام و هسي انا لي قريب السنه متزوجة وربنا مارزرقني ذرية لسع ربنا كريم .. نفسي اكون ام ..
ونتيحتي طلعت سمحه شديد جبت نسبة مشرفة احمد الله
وقبلوني في جامعة النيل الازرق كلية الهندسة .. بس فاتت علي سنة .. زي سنين كتيره فاتت مني ..كانت في الامراض والحوادث والمأسي .. لكن السنه دي كانت اجمل سنة .. بحور من السعادة الحمد لله..
طبعا نادر في الدنيا الزول تكتمل سعادتو.. لكن انا حاسه باني اسعد انسانه خصوصا بعد الحياة العشتها في العشرين سنه الفاتت دي .. حاسه بيها ستين سنه .. لكن هسي كانها كانت حلمه فيها كوابيس..وصحيت منها..
مع حبيبي في اجمل انسجام.. وبفهمني وبفهمو .. اهتماماتنا واحدة . وافكارنا واحدة .. نصي التاني ياخ بس ..و الحمد لله من ناحية ماديه وضعنا فوق الممتاز .. مع انو مامون مامحوجني لحاجه ..شهريا بسلمني ايجار بيتي الفي الخرطوم .. ولو بقيت اغنى انسانه بيت ابوي ماببيعو .
هسي بقى بمليارات وماشي زايد ..
ومامحتاجه عشان ابيعو ..
شوفو انا البت بتاعة الطعمية .. الكانت لمن تبيع ليها عشرة سندوتشات محشيات بتفرح . البتجي متلتحة بحله مليانه اكل ..وتقعد فوق طوبات تبيع للبنات زميلاتها البدرسن وهي محسورة..
انا ياها البت البتشتغل مع مراة زي فايزة خدامه.. عشان ماتحتاج وتشحد ..
شوفو كيف ربنا وقف معاها ..وفتح ليها ابواب رحمتو من كل جهة ..
وبقيت اكتر واحدة مرتاحة في المنطقه نفسيا وماديا ومعنويا..
لكن روحي ياها روحي ..
وطبعي ياهو طبعي .
لابتغرني القروش ولابستكبر..
انا مهج البستمع بالصمت لمن اتأذي..
وبسامح لمن اتالم ..
ومابشيل في قلبي حقد علي زول ..
مهما ظلمني ..
لانو ربنا شاهد ..وربنا ما بضيع حق ..
وربنا مابرضى الظلم ..
انا مهج الماليه قلبي بالمحبه ..لكل الحولي ..
وما مخليه فيهو حته بتخص الكراهيه..
قلبي ضعيف مابقدر يكره ..
بقويهو بالمحبه..
حياتي علمتني اليقين.. وزادتني ايمان بالله..
عشان كدا حبيت احكيها ليكم
وودعتكم الله وفي امان الله ..
..
كتبها محبكم طارق اللبيب ..
فبراير 2021
