اليوم ده انا مليت الحلتين لي خشمهن . والطعمية في كيس كبير ابوي قال ل عشان ماتنشف . وخاتاها جوه الحله .. والعيش في كيس اكبر واكتر من امبارح .. والقفة بقت اتقل .. لكن قدرت عليها
المهم الليلة انا ماكنت عشوائية زي امبارح ..اها اول ما جيت قعدت فوق طوباتي .. وطلعت حاجاتي ..
وباقي زي نص ساعة من الفطور .. المراة الاسمها فايزة ..
بدت تنبز فيني ..
اول شي قالت لي اسمعي يا عديمة التربية .. ده اخر ماتوصلتي ليهو دايرة تضايقيني في عيشتي ..
يا مطلوقة ياماعندك اهل .. محتاجة تربية ..
بتكورك بطول حسها ..وتقول ياتافهة يا ما مربية .. هسي عليك الله دي حركات العملتيها مع مهند دي؟؟ ... هسي انتي بت ناس؟ ..انتي في عمرك ده بتعملي كدا ..لمن تكبري تسوي شنو؟
كمان جاية تبيعي في مكاني.. بدون خجلة.. والله انا الا اطيرك من المكان ده ..
وكلام كتير بتقول فيهو المراة دي .. كلام انا ذاتي اول مرة اسمعو ..
بس انا ماعارفة ارد اقول ليها شنو؟ .. ساكتة ساي .. وهي تتكلم وانا ساكتة .. زي الكانو الكلام مامعاي ٍ..ولابعنيني بشي
بس كنت خايفة انو كلامها يستمر والبنات يسمعوها..
وكت لقتني ماشغالة بيها سكتت .. بعد شوية البنات طلعن .. وهي تاني بدت تتكلم في نفس كلامها الاول ..عشان البنات يسمعن وانا اتفضح .. والبنات كللهن يسمعن فيها ..
قالت ليهن يابنات شفتن البت دي .. عملت حركات ماكويسة مع مهند ولدي .. وانا طردتها من البيت .. والله مهند براهو حكى لي .. انتو ماعارفين انها كانت شغالة معاي ؟ بس بت مامربية يخسي عليها ..
هي بتتكلم بصوت عالي وانا اصلا ماشغالة بيها .. بس انا شغالة ببيع للبنات .. والبنات شالن سندويتشاتهن .. وقعدن ياكلن ويسمعن فيها .. وانا بس ساكتة .. وكأنها بتتكلم عن زول تاني .. لغاية ماخلصت العندي الحمد لله .. لمن الجرس ضرب انا كان خلصت ..
وطوالي لميت حاجاتي ومشيت البيت ..
لمن وصلت البيت حكيت لابوي الحصل .. ابوي زعل واتضايق .. قلت ليهو يا ابوي اقول ليك حاجة؟.. والله هي بتتكلم وانا ساكتة ومبسوطة من نفسي .. انا لو رديت عليها كان اكون زيها .. يلا خليها تتكلم .. وانا ابيع النشوف البكسب فينا منو ..
ابوي يعاين لي بس.. وقال لي انتي يامهج عقلك اكبر من عمرك بكتير ..
والله البتعملو فيهو ده .. الرجال الكبار مابقدرو عليهو ..
انا من اليوم ده ياجماعة اتعلمت حاجة .. انو الزول لو اتكلم عنك او اتكلم معاك كلام فارغ .. وحاول يجرحك بكلامو .. اجمل حاجة ممكن تعملا .. انو تسكت وتعمل فيها ماسامع .. اعمل كدا وشوف بتحس بشنو بتحس (بمتعة الصمت) .. ولذة الانتصار على النفس والغضب ..
بقيت كل يوم امشي واسمع كلام فارغ من المراة الاسمها فايزة دي.. واصلا ما زهجت ولامليت بالعكس .. كنت مستمتعة بسكاتي ..
البنات بقوا يكرهوها .. ومابشتروا منها .. والاساتذة في المدرسة سمعوا انها بتنبذني وبتشمني يوميا .. وما برد عليها .. هي بتتكلم وانا بتبسم ..
وكل يوم زباينها ناقصين.. والبنات بقو يبعدو منها .. وبجو يشتروا مني .. ويقولو لي اصلك ماتردي عليها .. ولا تعبريها .. وماعارفين انا مستمتعة بالصمت والسكوت.. ومستحيل اتكلم اصلا ..
بس مع متعة الصمت..شوفو البحصل في الظروف دي .. الزول بلقى مناصرة من الاخرين مابعدها مناصرة .. وربنا يرسل ليك جنود من عنده ..
يوم مدير المدرسة جا .. وفايزة تتكلم ماشايفاهو.. تقريبا كان براقب فيها .. لانو سمع عن حركاتها معاي .. بس بقت تطاعن فيني بالكلام .. طوالي المدير قال ليها اسمعي ياحجة ..
انتي ناسية انك بتتكلمي مع بت قاصر؟ .. وكلامك قدام بنات قاصرات ..
انا تاني لو سمعت انك اتكلمت كلام زي ده .. بفتح فيك بلاغ و بطردك من هنا بالبوليس والله ..
اسمعي يابت تاني لو اتكلمت معاك تعالي كلميني جوه طوالي ..
قلت ليهو حاضر يا استاذ ..
المراة سكتت ساي تاني من اليوم داك مافتحت خشمخها معاي..
وبقيت شغالة الحمد لله ..
مكفية مصاريفي انا وابوي وقاعد اوفر .. ورجعت لعم حسين سيد الفرن قروشو في مواعيدها ..
في البداية ابا يشيلا مني .. لكن انا قلت ليهو شيلا مني .. عشان انا تاني لو احتجت اجيك وما أخجل منك ..
قعد يضحك وقال لي ربنا يكبرك بعلقلك يابتي ..
المهم بقيت شغالة ومستمتعة بشغلي .. مع انو بسمع كلام الناس واحدين بستهترو بي ..
وواحدين بضحكوا علي وواحدين بحنو علي..
واحدين بتحرشو لفظيا ..
لكن كلو ماشغالة بيهو .. في ناس مفتكريني هبلة او مسكينة ..
وانا فاهمة اي حاجة بس ماشغالة بالمواضيع دي ..
لكني بجيد السكوت ..
................
يوم من ذات الايام خالتي اميمة جات من الحاج يوسف ولقت ابوي براهو في البيت ..
وشكلها سألت مني وابوي قال ليها مشت المدرسة ..
المهم لمن خالتي عرفت اني شغالة بييع طعمية في المدرسة ..
هاجت وقعدت تهرج .. وقالت ليهو كيف تخلي بت زي دي تطلع تبيع في السوق ..اصلو ابا يرد عليها ابوي ..
المهم انا لمن رجعت لقيت الهرجة شغالة وابوي ساكت ..
اها لمن جيت قالت لي كيف يعني يامهج تطلعي تبيعي الطعمية في المدرسه؟
قلت ليها مالو يعني عيب ولاشنو؟
اها يعني نعمل شنو ياخالتو ؟..
نشحد من الناس انتي عارفة ابوي عيان ..
ابوي لمن كان كويس ماكان مقصر ..
بس هسي هو مابقدر يشتغل عشان يجيب قروش . انا بشتغل لغاية ما ابوي ييبقى كويس..
قالت لي ابوك تاني ماببقى كويس..
يعني انتي ح تشتغلي عشان تعيشيهو ؟؟
قلت ليها ايوة بشتغل ومالو موش ابوي ..
قالت لي انا سايقاك معاي ..
قلت ليها انا كلمتك قبل كدا يا خالتو .مابمشي اخلي ابوي ..
قالت ابوك بسوقو معاك ..
ابوي قال ليها انا ما طالع مني بيتي..
بيتي ده يكتلني ويحييني .. شكرا ليك يا اميمة ..
نحن الحمد لله عايشين تمام ..
المهم المرة دي وترتتنا ومسخت علينا اليوم ..
ومشت .. انا قلت يمكن خايفة علي .. وقلبها علي ..
لكن ماعايزة ابوي .. ولا عايزة تتبالا بيهو ..
غايتو في النهاية قنعت مننا ومشت ..
كلامها ثر فيني شديد لمن بكيت ..
انا بقيت عندي زي النفسيات ..
من مشيتي للمدرسة زملاي كلهم جوة يقروا ويذاكروا..
وانا ببيع في الطعمية لكن اعمل شنو ياها الظروف الحمد لله ..
اتخيل بت في عمري تمشي تقعد برة المدرسة بحالة زي دي ..
وتشوف صحباتها كلهم لابسات ملابس المدرسة.. ويقرن وشايلات الشنط وانا لابه لي قفة ملانة اكل ببيع فيها .. الحكاية دي حازة في نفسي شديد .. لكن والله كوني انا مامحوجة ابوي للناس..
ولابمد ايدو لانسان انا مبسوطة وابوي مبسوط .. ابوي نفسه كبيرة حتى من شغلي انا نفسو محرجه.. احكي ليكم حاجة غريبة
طبعا ابوي فترة كدا ..بقى بعد يصلي الصبح ..
يدور كرسيهو ويجي يقعد جنبي انا بعمل في الطعمية .. ويونسني ويحكي لي ..
يانا اصلا بجهز حاجاتي من بالليل عجيني وزيتي واموري .. اها ..يوم صحيت من النوم متأخرة لقيتو ولع الفحم وشغال يرمي في الطعمية .. وهو قاعد في كرسيهو والله المتحرك .زي مابحكي ليكم .. والله فرحت لمن بكيت .
يوم قال لي والله يا مهج لو البيت ده ينفع ابيعو ابيعو عشان اريحك من التعب ده .. لكن زي ما انتي شايفة البيت لامينا وساترنا .. ولو بقى كبير انا كان قسمتو وبيعت جزء لكن هو صغير زي ما شايفة ..
نحن البيت الساكنين فيهو ملكنا .. لكن بس صغير فيهو اوضتين وحوش صغير.. ومطبخ وحمام .. يعني هو اصلا اهلو لمن باعوهو لابوي ..باعوهو ليهو نص بيت ..
المهم باختصار حياتنا استمرت كدا ..لمدة سنة واكتر لمن المدرسة اجزت ..وفتحت تاني واجزت .. وابوي ما اتكلم معاي في قرايتي ورجوعي للمدرسة .. وزملاي فاتوني ..وانا خلاص قنعت من حكاية الدراسة دي .. واتاقلمت على انو مافي مدرسة .. وابوي هو حياتي ..
اها يوم مدير المدرسة جا لابوي في البيت .. وقال ليهو .. حرام البت دي تقعد كدا بدون قراية .. واتكلمو في الحتة دي كتير .. ابوي قال ليهو انا اصلا متمني بتي تتعلم.. لكن هسي هي الماسكة البيت.. وانا زي ماشايف حالتي ..
قال ليهو نحن لازم نتصرف.. ان شاء الله السنة الجاية تقرا من منازلهم المهم لازم تحصل دراستها ..
وانا بحاول اساعدها في الموضوع ده ..
يعني ممكن تجيب حاجاتها من الصباح.. وتجي تقرا وفي فترة الفطور تبيع حاجاتها للبنات عادي .. مابتتعارض الحكاية دي .. ابوي قال ليهو يعني انتو ماعندكم مانع؟.. قال ليهو يا حاج نحن ممكن نخت ليها طعميتها في المكتب .. وحتى ممكن نشتري منها للاساتذة .. يعني الامور بتمشي ان شاء الله ..
ابوي فرح فرح شديد بكلام المدير .. وقال لي خلاص يامهج مسألة القراية اتحلت .. وانا بصراحة فرحت وخايفة في نفس اللحظة.. فرحت اني بقدر اقرا .. وخايفة اني ما اقدر اوفق بين القراية والشغل .. لكن الله كريم ..
نشوف البحصل شنو والقدر مخبي ليا شنو؟
اها في الاجازة دي انا الحمد لله وعيت اكتر ..وعمري 11 سنه وشوية ..
وشكلي ذاتو اتغير وبقيت بهتم بي روحي اكتر.. من زمان وبقيت بحس بالحياء والخجل.. وبلبس طويل .. ولازم اطلع بي طرحة طويلة وكدا ..وجبت الكتب بتاعة السنة الجاية.. عشان اجهز روحي.. لاني حاسة باني مابلقى طريقة مع الشغل اذاكر ..
المهم بتذكر انو كان عندي افكار واعية.. يعني دي الفكرة العايزة اوصلا .. مع كل الحاصل لكن تفكيري وهيئة جسمي اتغيرت ..
مرت الايام ..وافكاري ذاتها اتغيرت ..
قررتا حاجة .. وريت بيها ابوي .. انا كلام المدير اني اكون طالبة وببيع الكلام ده حسيت بيهو مابجي معاي ماعارفة ليه ..
قلت لابوي اسمع يا ابوي ..
تاني ما ح امشي ابيع الطعمية في المدرسة .. ح نعمل الطعمية بالمساء ونبيعها قدام بيتنا .. بالليل انا وانت .. لاني فعلا بقيت استحي من قعدتي قدام باب المدرسة .. ونظرات فايزة العدائية المابتنتهي .. ونظرات الناس المامحترمه .. والرزق البجيبو لينا الله بكفينا رايك شنو؟
قال لي انا معاك في اي حاجة ..
وكمان دي بتديك فرصة الصباح تمشي مدرستك عادي .. وبالليل نجي على شغلنا ..
اها من الوقت داك بقيت بعمل الطعمية والسلطة بالليل وبنطلع انا وابوي نبيع قدام بيتنا والامور ماشة .. مشي مبالغ فيهو .. وفكرنا نعمل لينا قدرة فول .. لكن ما اتوفقنا ..
وبقت ارباحنا ماشة تمام .. واشتريت لابوي كرسي جديد .. واشتريت ليهو جلابيتين وطاقية وفتيل ريحة .. واشتريت لي نفسي ملابس حلوة .
الحمد لله مية المية ..
وكل يوم زباينا من ناس الحلة زايدين .. وفي ناس بجونا من اخر الحلة يشتروا يوميا ..
بالجد ناس الحلة فيهم ناس بجو يشترو مننا عشان يساعدونا .. انا حاسة كدا ..
وانا منتظرة الاجازة تنتهي لمتين عشان امشي اواصل قرايتي ..اي متحسسة لاني ح اقرا مع طالبات اصغر مني عمرا .. وانا ح اكون الطويلة العوقة ..
بس برضو فرحانة اني ح ارجع اقرا .. وما ح اكون البت ست الطعمية تاني .. فعلا بقيت بفكر في مستقبلي . لمن بجيني هم .. لاني ماعارفة الأقدار مخبية لي شنو تاني ..
