حقيقة ياجماعة انا لمن سمعت كلام عمي حسين جاتني صدمتين اتنين الاولى احساسي بانو عمي حسين تعبان وتاني ماح اشوفو .. والصدمة التانية طلبو المابقدر ارفضو .. جاوبت ليهو بدون اي تردد ..
قلت ليهو.. كل طلباتك مجابه لو داير روحي والله تستاهلا ..بس انت ماتتعب نفسك بالتفكير كتير في الموضوع ده لغاية ما اجيك..
سلامتك بس يا ابوي التاني ... سلامتك عندي اهم من روحي وربنا يشهد.. انا لازم اجيك لو مابكره بعد بكره..
انا طبعا ياجماعه ابديت موافقة لعم حسين.. لاني مستحيل ارفض ليهو طلبو واصدمو.. وهو في الحاله دي.. لمن اصلو هناك.. واشوف حالتو كيف.. وبالمهله كل شي بتحلا.. وربنا قادر علي ادارة الامور.. انا اصلا استخرت في مامون.. واطمانيت.. لو ربنا كاتبو لي ..مافي شي بفرقني منو..
والكلام القلت مجرد كلام لعمي حسين.. لكن بيني وبين نفسي انا ربطت مصيري وحياتي بمامون وبس.. واليوم داك كلو انا بفكر في الهم الجاني ده.. وماحكيت لاي زول الكلام القالو لي عمي حسين... لاعمي ولاعمتي ولاناديه.. بس قلت لي عمي انا لازم اسافر.. عمي حسين صوتو تعبان شديد..
قال لي خلاص بعدين العصر امشي كلمي عمتك.. وودعيها بكره انا بسافر معاك.. قلت ليهو لكن ياعمي انت المفروض تسافر بعد اسبوع.. قال لي صاح بس مابخليك تسافري براك..
حقيقه انا ماكنت عايزة ازعج عمي واتعبو.. لكن مابقدر والله اقعد.. انا خوفت علي عمي حسين زي خوفي علي ابوي .. مااابقدر اقعد..
حالتي اميمة اتصلت علي وسألتني قالت لي اتصلتي على حسن بتاع الفرن؟
قلتا ليهو اي اتصلت عليهو .. قالت لي عايزك في شنو؟
قلت ليها خطبني لولده اسمه محمد وانا وافقت .. والله قلت الكلام ده ساي بس دايرة اشوف ردة فعلها شنو؟
قالت لي بلاي عليك ؟
قلت ليها انا جاية .. قالت لي لمن تجي ونتفاهم ..
العصر مشينا انا وعمي لناس عمتي سعاد ..عشان اودعها واقول لمامون.. انا فكرت وافقت عليك ..
محمد ود عمي حسين ده ماعندو مكان جواي ابدا.. المكان ازدحم.. ملاهو مامون والله ماخلا فيهو نفس..
قابلت عمتي وكلمتها بالحاصل علي عمي حسين وانا لازم اسافر .. قالت بابتي والله انتي متل (لبينة العيمه) ماشبعنا فيك.. لكن نقول شنو.. سافري ربنا يحفظك.. قلت ليها انا عايزة اتكلم مع مامون.. قالت مامون هسي بجي.. ان شا الله خير؟
قلت ليها الف خير ياعمتي..
قالت خلاص من داب ماجا مامون.. اظبط ليكم شاي واجي.. دخلت المطبخ انا قلت لعمي والله ياعمي ...عمتي سعاد دي.. الزول يتمني مايفارقها ولا لحظه.. الزوله حنينه شديد.. قال لي بس انتي بعد تطمني علي عمك حسين تجي راجعه معاي..
تقعدي معاها لمن تشبعي منها.
قلت ليهو والله ان شا الله َ. نشوف البحصل شنو..
قلت ليهو ياعمي شنو يعني (لبينة العيمه)؟؟ ..
ضحك وقال لي اللبن الشويه في زمن الناس يكون عيمانين.يعني مشتهين اللبن.. والعيمه يعني عدم اللبن والناس مشتهنو..
قلت ليهو ايواا فهمت كلامها.. عرفت قاصدة شنو.. يحليلا شوف كلامها ده حلو كيف.. زي (لبينة العيمه) .. عمي ضحك وقال لي ايوة كدا صح.. جبتيها في مكانها..
دخل ايوب جاي من بره ..ريحة السجاير ماشه قدامو.. سلم علي خالو بكل احترام.. وسلم علي ..قلت ليهو انا مسافرة بكرة يا ودعمتي.. وجيت اودعكم..
قال لي ماقلتي تاني مابتمشي وقلتي لي (انا في وانت في) ..
قلت ليهو بس انا جايه راجعه.. ماتفرح..
ضحك وقال لي. اي اي.. سمعت بالموضوع.. ان شا الله ربنا يتم علي خير..
بس الزول ده. مامضمون مايقوم ينط..
الكلام ده كلو قدام عمي.. قلت ليهو الاقدار بيد ربنا..
عمي قال ليهو يازول علي الطلاق مامون مازول نطه.. الدايرو بسويهو والمودايرو من الاول بشطبو من دفاترو.. انت مابتعرف اخوك؟؟..
امه جات طالعه قالت ليهو.. كتر خيرك يا ايوب.. مامون الناس عارفنو كان بنط ولا مابنط..
قال ليها يا امي انا بهظر.. وفعلا ياجماعة الزول ده كان بهظر.. بس عمي وعمتي اخدو الموضوع بحساسيه عشان انا قاعده..
انا طوالي اتدخلت.. هنا الصمت مابنفع.. قلت ليها فعلا ياعمتي ايوب بهظر.. قالت لي لكن هظارو شين .يابتي ..
هو طبعا وجعو كلام امو.. ودخل جوه..
الشي الفهمتو انو ايوب عرف اخوه طلبني.. وماهاميهو الموضوع كتير.. يعني ماعندو لي حاجه الحمد لله .. وانا بالاكتر ماعندي ليهو حاجه..
سبحان الله كنت معجبه بيهو .. لكن بطني طمت منو ..بطريقه عجيبه خلاص..
دايما الانطباع الاول مابيدي الحقيقه.. الزول لو داير تعرفو.. لازم تتعامل معاهو.. وتسمع منه وتشوف مواقفو بعداك تحكم..
بعد شربنا الشاي فضلة خيركم.. عمتي دخلت غرفتها ونادت اخوها اللهو عمي فتح.. واتكلمت معاهو كتير.. يمكن قريب النص ساعه وصوتها يعلا وينخفض ..وشكلها زعلانه من حاجه..
وعمي جا طالع منها زعلان ووشو مقلوب.. انا خوفت الموضوع يكون بخصني.. لكن ماشكلو لانو طلعو ..واتكلمو معاي طبيعي.
مسافه كدا ومامون وابوهو جو ..وقفو العربيه ونزلو.. مامون ده لمن شافني الفرحه ظهرت في وشو..
ابوهو سلم علينا من بعيد..ودخل علي الديوان.. وهو جا سلم علي خالو.. و سلم علي بابتسامه خفيفه كدا.. التقول شاحدها. (كتيرة منك ياصباح الخير..
شوفتك دي بالدنيا.. تبقى لي زاد في سفري) ..في سري هه
امو قالت ليهو.. مهج دي مسافره بكرة يامامون.. وجات تودعنا ..وقالت عندها معاك كلمتين وماشه..
انزعج جدا ..لمن التوتر والخوف ظهرن فوقو.. قال ليها مسافرة ليه؟ .. ان شا الله مافي عوجه؟.. النتايج لسع.. والجامعات لسع ..مستعجله مالك؟
قلت ليهو والله سفريه مستعجله كدا وبجي راجعه.. وحكيت ليهو مرض عمي حسين وعلاقتي بيهو .. قال دايما اصيله يابت خالي.. تسافري طوالي انتي زوله بتعرفي الواجب ماشا الله..
وامه تسمع فيهو وتتبسم.. وعمي يعاين ليه..
انا طبعا لمن مدحني كدا ..حسيت باني زدت طول وعرض.. وقلبي بقى يقول احم احم ..
يلا قال لي بس لحظات وبجيك.. مشى غاب ليهو زي ربع ساعة ..وجا مستحمي ومغير .. ولابس طاقية . نادى امو في غرفة قدامها عريشة كدا في الناحية الشمالية من البيت ..
امو مشت ليهو وانا قاعدة مع عمي .. .
بعد شوية امو نادتني .. قعدتني في العريشة دي فيها سراير بتاعة حديد منسوجة بحبال عصب ..قعدت وهو جاني من جوة .. قعد في السرير المقابلني ... وربع يديهو كدا زي الزول البردان .. وامو تمرق وتدخل .. خايفين هو وامه من اني ارفض ..
قال لي اسمعي يامهج .. عليك الله لو الموضوع ماموافقة عليهو ..وصليني الكلام براحة كدا .. انا مابستحمل الصدمات ..
انا والله عايزك شديد .. وكل لحظة بتمر ي ال24 ساعة دي انا بزيد اصرار عليك .. اها قلتي شنو؟ .. بس اتأكدي انا عايزك انتي وبس .. اها قلتي شنو؟
ههه لالا الزول ده بقت حالتو صعبة شديد بالجد ..
بشتنه شديدة ..
قلت ليهو طبعا انت قلت لي اخدي راحتك في التفكير .. واديني النتيجة وانا استخرت وفكرت.. وشايفة نفسي مرتاحة للموضوع شديد .. وانا برضو ماعايزة غيرك .. والموضوع ده جواي اتحسم ..
الزول ده بكى تاني .. ياجماعة البكا ده انا بكسر قلبي .. عمري كلو معدياهو بكا .. اعرس لي زول بكاي برضو؟ الزول ده حنين وقلبو رقيق شديد ..
قال لي والله فرحتيني فرحة .. الحمد لله ربنا استجاب دعوة امي .. دايما بتقول لي ان شاء الله ربنا يديك لامن يرضيك .. انا دايما ربنا برضيني الحمد لله لك الحمد يارب ...
عايني انا عندي رغبة اوصلكم الخرطوم انتي وخالي بالعربية .. واشوف معاك عم حسين .. وناخد يومين واجيبك معاي .. رايك شنو؟
قلت ليهو طيب وشغلك ؟ قال لي مافي شغل اهم منك بعد ده.. انتي بقيتي كل حاجة بالنسبة لي .. انتي ... وتاني خنقتو العبرة ..
وحات الله انابكيت معاهو ..
قلت ليهو خلاص ارح معانا .. مافي احسن من الرفقة الطيبة .. كلم عمي وشوف رايو..
قمنا مشينا على عمي وعمتي قاعدة معاهو.. لمن قربنا نصل ليهم ..مامون مسك يدي .. وجا ماشي .. وقال ليهم يلا يا جماعة نحن وافقنا .. نكون لبعض .. عمتي بدون ماتحس فكت ليها زغرودة ..
لمن انا خجلت .. عمي فتح قال ليها ده شنو ياسعاد؟ قالت ليهو وحات الله من غير ما احس ..
قال ليها المراة ماتت لاهسع تربتها مانشفت ..تقومي تزعردي الناس يقولو فينا شنو؟
قالت ليهو اي والله نسيتها كلو كلو بالفرحة.. ان شاء الله مايكون في زول سمعني..
مامون قال ليها..ولايهمك يا امي.. لو في زول سألك انكري ..ههه.. غايتو الزول ده مبالغة ..
مامون قال لي عمي يا خال انا ماشي معاكم الخرطوم اوصلكم ..
عمي قال ليهو الزمن كلو ..انا بمشي الخرطوم اتلتل بالمواصلات ..
يوم واحد قلبك ماحنه علي توصلني .. ولا المرة دي عشان مهج؟..
قال ليهو والله الحقيقة صاح عشان مهج .. تاني الزولة دي بقت مسؤليتي ياخال .. ولاشنو؟ قال ليهو صدقت والله ..
اها ودعتا عمتي وطلعنا انا وعمي ..ونحن طالعن مامون قالينا الصباح بدري انا بجيكم نطلع خليكم جاهزين ..
في الشارع ونحن ماشين على البيت ..عمي قال لي .. شفتي ايوب الكلب عمل شنو؟ والله ماكنت بتخيلو كدا .. امه تدسدس ليهو الزمن كلو لمن الموضوع طلع من يدها .. جات تشكي لي..
انا طبعا الشمار حرقني لكن مارديت عليهو باي حاجة .. بس عرفت ده الموضوع الكان بتكلمو فيهو هو وعمتي قبيل .. وهو نفس الموضوع بتاع المشكلة حقتو مع ابوه ..
عمي قال لي طبعا انتي يا مهج ماعليك مدسة انتي اصلا من الاسرة .. وهسي بقيتي نفر من بيت ناس سعاد .. لازم احكي ليك ..
قلت لي احكي لي ياعمي . الحاصل شنو؟ ايوب مالو ؟ ..
الى اللقاء .
