يلا نحن طبعا جايين من الحاج يوسف مع عمي فتح .. وطول السكة لا اتكلم معاي لا اتكلمت معاهو .. اول ما وصلنا كوبر قال لي انزلي .. ونزلنا على محل كدا وطلب اكل وقعدنا ..
قال لي عليك الله بٍسألك سؤال .. ابوك ما حكى ليك عني؟ .. وليه نحن متقاطعين الفترة دي كلها ؟..
قلت ليهو حكا لي .. لكن ياعمي شوف الكلام الحكاهو لي ليهو كم سنة ..
ابوي اتوفى سنة 2001 ونحن هسي في 2010
يعني كيف اتذكر .. لكن في حاجات طبعا متذكراها ونفسي أسالك منها
انت كيف بتقول عن ابوي ماراجل؟ .. لو ابوي انا ماراجل. تاني الراجل منو ف الدنيا دي ..
وبتتكلم عنو كلام زي الوسخ .. وبتقول الجنا الفي بطن مرتو ما منه .. يعني انا بت حرام يا فتح ؟؟
قول لي احكي لي قلت كدا ليه؟؟ ..كيف تقول كلام زي ده لاخوك ود امك وابوك؟ ..
قال لي طيب اسمعيني كويس .. شكله ابوك حكا ليك اي شي ..
وانتي سمعتي من جانب واحد.. اسمعي مني انا.. وبعدين احكمي علي ..
اولا سبب المشكلة مراة كان متزوجها ابوك. اسمها سوسن هي بت عمتنا باللفة كدا ..
المراة دي تافهة وحقيرة لدرجة انتي مابتتصوريها .. وهي الخربت بيني وبين اخوي فيصل ..
الحصل انو ابوك كان متزوجها سنين وماولدت .. والناس دايما بسألوها من الحمل والولاده ..خصوصا امي وابوي .. واخواتي واقربانا.. وضايقوها شديد بالكلام ..
يوم انا جيت لقيتها بتبكي .. قلت ليها مالك؟ .. الوكت داك انا كنت شاب مامتزوج تلاتين ماتميتها .. قالت لي انا اعمل شنو يا فتح؟؟
لو اخوك ماقادر؟ انا اجيب جنى من وين؟ ..
قعدت جمبها مخلوع .. قلت ليها كيف الكلام ده؟ ماقادر كيف يعني ؟
قالت لي وطي صوتك مايسمعونا ..
اخوك عنده (عجز ) يا فتح .. وانا ماعايزة اطلقو عشان سمعتي وسمعته .. يقولو طلقها ليه وهي بت عمتو ..
طبعا يامهج يابتي نحن عندنا عيب.. الزول يطلق بت عمو او بت عمتو مهما كان السبب .. لانها دي عرضك ..
المهم .. المراة كانت بتحكي لي وبتبكي .. انا حاولت اهديها.. مسكتني وقالت لي ساعدني يا فتح انا تعبانة .. قلت ليها اساعدك كيف ؟
قالت لي لو ماعارف تساعدني كيف .. خلاص قوم من جنبي ..
انا من كلامها وطريقة مسكتها حسيت باحساس غريب. مابشبهني والله ..لكن كان طبيعي.. الشيطان في الوقت داك يرميني في الاحساس ده ..
وبقيت بفكر فيها ..
وكل مرة بلعن الشيطان.. وتاني القى نفسي بفكر فيها ..
وهي بقت طول الوقت .بتعمل لي في حركات تعين علي الشيطان .. تتعمد تطلع قدامي بملابس النوم .. وتمشي بطريقة مغرية .. ومتعمده.. وتعاين لي وتتبسم .. لو زول من الصالحين شافها الشيطان بلعب بيهو ..
يعني انا نبي ولا ملاك ؟
لكن يشهد الله مالمستها ولا خنت اخوي .. بس كل ماتلاقيني بتقول لي اخوك الميتان .. اخوي المنتهي .. اخوك الشنو... اخوك مستحيل يلد ..
لو منتظر ليك جنى عشان يقول ليك ياعمي ما تنظرو يافتح ..
المهم بمرور الزمن بقيت قريب منها.. وبتحكي لي تفاصيل. التفاصيل في حياتها .. وانا الاهبل بستمع ليها .. وبقيت عندي ليها مشاعر مابنكر الكلام ده ..
بس لانها مراة اخوي ماحصل هبشتها والله ..
المهم في يوم من الايام فيصل من دون سبب .. مع انها صابرة معاهو ساقها وداها اهلها وطلقها .. لانها زهجت منه ..وقالت ليهو لو ماطلقتني براك.. بفضحك وبقول للناس انت ماراجل ..
طبعا ياجماعة الكلام ده هنا كذب ..انا هنا قاطعت عمي فتح ..قلت ليهو ياعمي .. مين القال كدا؟
مين القال انها هددت ابوي وعشان كدا طلقها ..
قال لي .. براها قالت لي كدا يامهج ..قلت ليهو .كذابة ياعمي ماحصل الكلام ده
قال لي صح كذابة خليني اكمل ليك ..
قلت ليهو كمل ياعمي ..
قال لي يلا لمن ابوك طلقها.. رسلت لي جيتها في البيت .. قالت لي اخيرا اتفكيت من اخوك الباطل .. هو وقت ماراجل ومابقدر على العرس مبشتني ومخوزقني مالو ؟
قلت ليها طلقك؟ قالت لي ايوة طلقني.. لانو مابقدر على الفضيحة ..
وقالت لي انت ارجل منه .. وهو بكرهك وبقول انت باطل وحرامي ..
المهم طلقني وانا ارتحت ومنو وهم نزل من قلبي ..
انا يامهج ماكنت مصدقها انو اخوي عندي غجز .. لكن من قصة الطلاق دي بديت اصدق ..
براي قلت لنفسي انا بمشي بطلب من اخوي يرجعها ..اخوي مابكسر لي كلمة .. لو رجعها معناها
اخوي راجل مافيهو كلمة .. ولو مارجعها ورفض كلامي معناها المراة دي كلامها صاح ..
لانو سوسن زولة سمحة شديد. ومافي راجل بطلقها كدا بلا سبب ..
لمن مشيت لاخوي قلت ليهو ترجع المراة دي .. دي بت عمتنا.. وماصاح
يسمعو الناس انو فيصل طلق عرضو ..
فيصل قال لي تاني المراة دي لو بقت قبلة مابصلي عليها ..
قلت ليهو لو مارجعتها انت ماراجل .. قال ما راجل ماراجل مابرجعها ..
قلت ليهو لو مارجعتها تاني لابيني لابينك..
قال لي حتى لو قاطعتني عمرك كلو مابرجعها .. والغريبة كان بعاين لي وبتبسم بطريقة ساخرة .. وما اشتغل بكلامي ..
انا قلت خلاص .. سوسن كلامها صاح . اخوي منتهي .. تاني قلت نصبر اذا اخوي ده ماعايز المراة دي..احتمال يتزوج تاني .. لو اتزوج تاني معناها ماعنده مشكلة .. ولو ابى يتزوج معناها .. فعلا عندو مشكلة ..
قعد فترة عزابي.. واي عرض زواج يعرضو ليهو ابوي او امي يرفضو ..
كدا نحن اتأكدنا من كلام المراة ..
والعجيب انو سوسن.. ماقالت الكلام ده لي براي .. بعد فيصل طلقها .. قالت الكلام ده لامي وابوي واخواتي .. انو ولدكم ما تمام .. وكلمت اهلها .. والخبر انتشر في الحلة ..
لمن فيصل قاطعني.. وبقى مابسلم علي.. ولو عيان مابجي يشوفني .. ولو اتكلمت معاهو قدام الناس مابرد لي.. ومرات بحرجني ..
حتى اخواتي لاحظو لكراهيتو لي .. ووقفو معاي لاني ماغلطت عليهو في حاجة .. بعداك فعلا انقلبت ضده.. وبقى ماعندي عدو في الدنيا غيرو ..
مرت الايام والسنين وابوك سافر .. واتزوج امك من امدرمان .. وكلنا عارفين انو زواجه ده زواج صوري ساي ودعاية ..
اتخيلي لمن نسمع انو مراته حامل ح نقول شنو؟
صاح قلنا معناها الجنا ده ماحقو .. لانو معروف ابوك مابلد .. وده ما كلامي انا ده كلام مراتو .. والراجل بتعرفو مراتو مابعرفوهو الناس ..
طبعا انا ياجماعة بسمع في كلام الراجل ده وساكتة .وبغلي من جوة .. وبقول حسبي الله ونعم الوكيل .. بس .
وهو مواصل في كلامو ..قال لي وسمعنا انو جابليهو بت .. بعد فترة سمعنا انو مراتو ماتت واتشلا .. وقلنا ده كله بسبب ظلمه للمراة المسكينة الضيع ليها حياتها ..
ومقاطعتو لاهله .. وبسبب عداوتو لي اخوانو الماعندها اساس ..
طبعا سوسن حاولت المستحيل.. انو انا اتزوجها بعد اخوي .وانا طبعا مستحيل اعمل كدا.. لانو كدا عندنا عيب .. مراة يطلقها اخوك تتزوجها انت .. مابنكر اني فكرت اعملا مكايده لي فيصل .
لكن خفت من كلام الناس ..
هي بعد فترة اتزوجت من راجل من الحلة ماببقى لينا .. وجابت منه بت والبت ماتت .. وجابت ولد والولد مات .. وجابت تاني بت والبت ماتت ..
في النهاية راجلها ذاتو مات .. وهي مرضت مرض شديد ..
جاها مرض غريب كدا اسمو الذئبة الحمراء .. وبقت تشبة القرد المشمش .. وكل يوم ماشة هلكانة ..
يوم رسلت لي في البيت .. عشان اجيها لمن جيت شفتها .. عاينت لوشها ده لقيتو كأنه مكتوبة فوقو اللعنة والشقاء والعياذ بالله ..
قالت لي يافتح انا حاسه اجلي قرب.. وبقيت احس بالموت واقف قدامي.. وخايفة الاقي ربنا بحق فيصل اخوك ..
قلت ليها فيصل مالو؟ قالت لي .. اقفل الباب النقول ليك ..
انا موش قلت ليك فيصل حاصل عندو كدا وكدا ومابلد ولاراجل ؟
ابدا والله ماحاصل الكلام ده.. والله فيصل راجل.. وانا اتهمتو بالزور ربنا يغفر لي .. والله انا ماهددتو انو يطلقني ..هو طلقني براهو بدون سبب ..
وانا اترجيتو مايطلقني لكن طلقني .. وانا شاكة انو عرف علاقتي الكانت معاك في الايام ديك عشان كدا طلقني ..
ويا فتح انا فتنتك في اخوك.. وقلت ليك بقول عنك حرامي وباطل .. والله ماحصل قال كدا فيصل كان بحبك شديد .. والله يافتح انا بتذكر في عمايلي ..وحاسه انو ربنا انتقم مني وحرق حشاي في اولادي التلاتة اطفال .وابوهم .وجاني لي المرض الملعون .. بسبب ظلمي لفيصل ..
انا قلت ليها ياسوسن الله يلعنك .. الله يلعنك .. ان شاء الله ربنا مايسامحك .. هسي جيتي تقول لي الكلام ده بعد اخوي مات ليهو سنين؟
القاهو وين انا تاني اخوي.. عشان اعفيهو ..
انا طبعا ياجماعة هنا اتذكرت ابوي .. وبكيت بكيت بكيت .. لمن الناس الفي المحل بقو يعاينولي ..
الى اللقاء .
