انا طبعا مشيت من عمي ماقادرة اشوف قدامي .. ودخلت الغرفة القاعدين فيها انا ونمارق .. نادية مراة عمي جات لاحقاني جوة ..لقتني قاعدة مغمومة .. قعدت جنبي.. قالت لي بسم الله يابتي مالك ؟ عمك قال لك شنو . قلب ليك وشك كدا؟ وبكبر كدي مالو ؟
قلت ليها مشاورة عادية لكن ماي شي .. بس هسي حالتي دي .مامن كلام عمي ..عندي حبة صداع شوية ..الله يغفر لي كضثت عليها .
شكلها ما اقتنعت بكلامي.. لكن فاتت خلتني .. وانا الليل داك كلو بفكر في خطة اطلع بيها من ورطة مامون دي .. لكن عملت استخارتي ..
صحيت الصباح نشيطة .بس لسه مغمومة وتعبانة نفسيا .. وخالتي نادية جاتني تاني وسألتني قلت ليها انا طبيعية ياخالتو كويسة ..
قالت لي اسمعي يابتي نحن حريم ..وبنعرف بعض ..لو ماحكيتي لي الجواك مابتلقي زول تحكي ليهو .. قولي لي .. والله العظيم سرك في بير ..
اها .. انا عاينت ليها كدا في وشها ..وحسيت انو المراة دي محل ثقة.. وممكن تساعدني في المخارجة من الحتة الانا فيها دي ..
قلت ليها والله ياخالتي ماعليك مدسه.. عمي اقترح علي زواج .. وانا وافقت لكن ماعارفة ما مرتاحة للحاجة دي ..
قالت لي قال مامون موش كدا؟
قلت ليها نعم .. قالت لي بس في زول اتكلم مع مامون في الموضوع ده؟
احتمال مامون ذاتو مايوافق .. ماتضايقي ساي.. خلي الامور على الله ..
لكن اقول ليك شي ؟؟
انتي لو مامون وافق بيك.. يابختك يابتي .. امك تكون داعيه لك ..
مامون ده ملاك في صورة انسان
من الله خلقو لا سكر لاعربد .. ولا عاين ليهو لي بت ..ولا فرط في صلاتو ..
ما زي الطويل الأهبل الاسمو ايوب ده ؟
قلت ليها .. ايوب؟؟؟ قالت لي منو غير قشور ؟.. خسارة فيهو الاسم ..قلت ليها والله يا خالتو هسي انا ايوب عاجبني اكتر من مامون ..
قالت لي لانك مابتعرفيهم .. لا بتعرفي ايوب ولا ولابتعرفي مامون ..
شوفي يامهج... انا لو مامون بقبل بي بناتي.. ماكنت خليتو لغاية الليلة .. لكن مامون اي بت يرشحوها ليهو .. بقول ادوني فرصة استخير ..ويجي باكر يقول القسمة ما أدت .. ويرفض ..
انا والله كنت دايراهو لي نهلة بتي .. ورفضها .. وهسي لو بقبل بنمارق لا أنا لاعمك ما عندنا مانع .. بنات الحلة كلهن بتمنن مامون خلي بناتي انا ..
اما زولك الطويل العوقة ده .. تافه وصعلوق وقليل ادب .. وهمو بس يعاين للبنات ويقعد يتبسم .. وداير يعمل علاقة مع اي بت يشوفها ..
متخرج ليهو سنين وقاعد عاطل .. يمشي الخرطوم
عشان يقولو شغال يشيل القروش من امه يمشي يسكر بيها ويجي ايد ورا وايد قدام .. والناس عارفنو لاشغال ولاشي ..حتى شهاداتو مشكوك يها .. اختو البت احسن منو ..
المشكلة عمك بريدو ..لانو ماعارف عنو شي .. لانو بنافقو وقدامو يعمل الحمل الوديع ..
وعمك الغبيان ماشايف زيو ... مرة عمك قال لي نعرس نهلة لي ايوب.. قلت ليهو والله لو ضبحتها ما ح تقبل بيهو ..
قال لي ليه؟ قلت ليهو .. يهوديك أسالها هي بتوريك ..
مشى عمك سأل نهله ..قالت ليهو يا ابوي لو قعدت بدون زواج طول عمري.. مابعرس ايوب ..لمن سألها من السبب .. قالت ليهو بكرهو بس ..
الزول ده يامهج .. مافيهو خير لا ليك لا لي اهلو .. قاعد عاطل في البيت و بالليل يمشي يسكر ويحي ماشي سبعة تمانية ..
امو بتخاف عليهو.. لمن يجي البيت سكران .. تقفلو في المحزن عشان خالو مايعرف .. والله عمك فتح كان عارفو كان علقو من لسانه .. اصلا البوظتو امه بالدلع .. اي حاجة بطلبها بلقاها قدامو .. ولو غلط تدافع عنه .. لكن هسي بقالا حار .. وندمت سفت التراب .. لكن بعد شنو؟
وكل يوم عنده حبيبة جديدة ولسانه معسول والبنات بصدقنو .. وفي النهاية بتصدمن بالواقع المر .. هسي عندو مشكلة الناس بتكلمو .. بس ما متأكده بالضبط عمل شنو تاني .. لكن مصيرها تتعرف ومافي شي بتدسه .كل مرة جايب ليهو كفوة.
انا طبعا بسمع فيها ومذهولة ..
وهي تشيل وتشكر في مامون .. مامون الراجل.. الكريم .. الشهم ..اخو الاخوان .. بار بامو وابوه .. مافي زول محتاج .الا ويلقى مامون قدامو .. العيان و المنكوب .. اي زول يقع في مشكلة .اول مايفكر يفكر في مامون لانو مابخيب الرجاء ..
غايتو لو انتي دايرة نصيحتي .. لو مامون قبل بيك تكوني انتي اكتر انسانة محظوظة في الدنيا ..
اصلك ماترفضي .. وبعدين قولي نادية ضرتني ..
انا بالمناسبة عمك كلمني .. وقال لي دايرين مهج لمامون .. قلت ليهو .. مامون عجبو قاسي ..ما اطنو يوافق بواحدة مابعرفها قبل كدا ..
عمك قال لي انا متأكد لو شافها وقعد معاها وعرفها كويس ..
مابرفضها .. بس انا بوصيك يابتي لو مامون رفضك .. وده احتمال كبير يحصل ..
وقالو ليك يدوك ايوب .. اوعك تقبلي ..
انا قلت ليها .. حاضر ياخالتو ..
انا ياجماعة والله كلام المراة دي صدمني اكتر من كلام عمي .. معقول تكون المظاهر خداعة بالطريقة دي؟..
هوي هوي احسن اتخارج امشي على الخرطوم .. انا راسي ده بقى ما مزبوط ..ماقادرة استوعب ..
لكن هل اصدق المراة دي طوالي في كلامها ؟؟ موش احتمال تكون ظالمة ايوب .؟
ياخي الزول اتونس معانا ..وكان ظريف وطيوب كدا .. ماعارفة والله اعجبت بيهو شديد ياخ .. سبحان الله يا ما تحت السواهي دواهي .. معقول ؟ معقول.؟ ؟ ماقادرة اصدق ..
لكن فعلا انا في حاجة انا لاحظت ليها.. كل ما امشي ناس عمتي بلقى ايوب قاعد في البيت .. ومامون في السوق .. يعني فعلا شكلو عاطل ..
طيب مهندس مدني فوق سجم خشمو ؟
لكن مامون ده معقول يكون رهيب كدا ؟ وكل الصفات الطيبة دي فيهو ؟. لكن ياخي زول دمو تقيل .. وجادي كدا شديد ..
غايتو خالتي نادية ساطت لي راسي .سواطة العصير في الخلاطه.
المهم انا جواي قررت حاجة ..مامون ما ركب لي في راسي .. وايوب طلع فشنك وبطني طمت و ربنا مرقني منو ..لازم اتخارج من الحكاية دي كلها .واسافر الخرطوم .. واواصل دراستي .. بلا عرس بلاغم ..
لكن اقنع عمي كيف ماعارفة ..
وبعد تفكير وتخطيط . حضرت الكلام البقولو لعمي ..
المهم هسي اطلع من حالة الصدمتين المتتاليات ديل واكون عادية واستمتع بوقتي في البلد دي عشان مافي زول يلاحظ علي حاجة ..
طبعا نسرين ونهلة مشو بيوتهم وبقينا قاعدين انا ونمارق .. هي ساكتة وانا ساكتة ..
مرة مرة لمن خالتي نادية تكون فاضية تجي تونسنا ..لكن نحن الاتنين ماعندنا تواصل شديد كدا .. هي والله زولة طيبة لكن بس سكوتة سكوتة ..
الزول طبعا بمل من القعدة الكدا ؟ قلت لي عمي نحن دايرين نمشي زيارة لي نسرين .. قال لي نسرين يوم السبت بتجينا .. لانها ساكنة في قنيص..
قنيص دي جيت فيها انا بعد ماقطعنا الكوبري من الدمازين على الرصيرص .. قالو دي قنيص ..
قلت ليهو طيب نهلة ؟
ضحك قال لي انا عارف نمارق مابتتونس وزهجتك .. صاح ؟ قلت ليها لالا ياعمي نمارق طيوبة ..لكن بس عايزة اقعد مع بنات عمي فترة كدا ..قبل ما أسافر ..
قال لي مسافرة وين مخلية الامور وراك مفتحة كدا ؟؟؟..
قلت ليهو طبعا ياعمي انا منتظرة النتيجة.. وعندي رغبة اواصل دراستي .. ده لو مامون بقدر ينتظر ..
قال لي اسمعيني كويس يامهج يابتي .. مامون ده نحن بنتعامل معاهو بحذر .. هسي لو قلنا ليهو البت دايرة تقرا بقول خلوها تقرا انا ماعايز عرس ..
انتي بس سيرة القراية دي ماتجيبيها ..لامن تتزوجي ان شاء الله.. تقولي ليهو .. وهو بقريك ويكمل ليك دراستك..
قلت ليهو طيب ياعمي لو رفض بعدين اعمل شنو؟ قال لي مابرفض انا موجود .. وبوعدك تكملي دراستك للنهاية بس هسي الكلام ده ماتقوليهو عشان خاطري ..
هسي بكرة الجمعة عمتك قالت لازم مهج تجيها .. امشي ليها معاك نمارق ..وهناك بتلاقي مامون . وتتعرفي عليهو اكتر لانو يوم الجمعة مابمشي السوق ..
انا براي قلت دي فرصة الاقي الزول ده واشوف .. احتمال يكون ربنا اختار لي الخير .. ولو مانفع معاي بعرف كيف اتماسخ معاهو .. هو اصلو متحيل طوالي بقول ماعاوزها شكلو ..
المهم بكرة الجمعة من الصباح شربنا الشاي .. وطلعنا انا ونمارق مشينا لعمتي سعاد في بيتها .. لقينا اللاندكروزر واقفة .. معناها مامون وابوهو موجودين ..
دخلنا سلمنا على عمتي .. وقعدنا شوية .. عمتي قالت لي مامون ده قلنا ليهو مهج جاية .. من الصباح يمرق ويدخل .. ماقادر يقعد في مكان ..ان شاء الله يكون عارضو اتفك بي بركتك يامهج يابتي ..
قلت ليها عارض كيف يا عمتي .. قالت لي كل ما نرشح ليهو بت للعرس يقول ماعايزها .. يمكن لي قسمتك انتي ربنا كريم علينا ..
مامون يا يمة انا عافية منو .. مامون ان شاء الله ما أشيل يدي عليهو .. بس مامون مابطلع من خشمها .. كل ما اجيها هي بتشكر في مامون وبتدعي ليهو .. الزول ده اصلو بعمل شنو؟.. الناس ديل بريدوه كدا؟
قعدنا شوية كدا وانا ماشايفة ايوب .. لانو طوالي بلقاهو في البيت مع امه ..
شوية كدا سمعت ابوهم بتكلم مع زول بنفس حار كدا .. زي الكأنو بتشاكلو خوفت شديد .. عمتي طلعت .. نادت مامون قالت ليهو قول لابوك ده اتكلم براحة نحن معانا ضيوف.. بس انا ماعرفت الحاصل شنو؟
الهرجة وقفت ..وجاء ابوهم سلم علينا .. وقعد معاي شوية كدا اتونس معاي قال لي المرة الفاتت مالقيت لي فرصة ..
انا اتكلمت معاهو بادب شديد ..الحمد لله اصلي مؤدبة هه
وشكل الابو ده داير يشوفني كويس ..ويتأكد مني .. لانو الناس ديل مابعرفو عني اي حاجة.. بس قبلو بي لاني بت فيصل وعمي شكرني ليهم ..
بعد شوية جاء ايوب داخل صاري وشو .. ومتضايق شديد .. من شكلو ظاهر انو ابوهو كان بتشاكل معاهو ..
دخل الغرفة الغربية ولا سلم علينا .. احتمال عشان ابوهو قاعد بتكلم معاي ..
وامه تعاين ليهو وتهز في راسها .. مابتحبو شكلها ..
وانا لسه بتكلم مع راجل عمتي .. وبسأل فيني قريت وين؟ .. وخالتي القاعدة معاها ساكنة؟ وين وكدا .. الاسئلة العادية يعني ..
كمل كلامو معاي والجو شكلو متوتر من مشكلة... هي شنو الله اعلم ..
انا حسيت انو جيتي دي ما مناسبة... واتحرجت جدا .. يعني مابحب احضر لي مشكلة .. الناس دايما مشاكلهم الخاصة بينهم ..ما بحبو زول يعرفها .. لكن انا عمي قال لي امشي .. وعمتي هي الطلبت اني اجيها الليلة ..
والله خالتو نادية شكلو كلامها صاح في ايوب ده شكلو بتاع كفاوي
المهم ..
بعد ابوهم قام ..عمتي قالت ليهو ..عليك الله نادي لي معاك مأمون ..
مامون جا ..قال لينا السلام عليكم بنفس طريقتو الجادة .. والبرود الانقليزي .. انا قلت ليهو عليكم السلام .. انا ونمارق قاعدين في الهول ..
هو عاين للمطبخ وقال لامه ..ايوة يا امي .. انا جيت .. امو من جوه في المطبخ بتجهز في الفطور .. قالت ليهو .. حبابك يانور عيوني .. تعال لي جوه ..
دخل ليها في المطبخ اتوسوست معاهو .. ماعارفة قالت ليهو شنو قدر مارخيت اضاني ماسمعت.. اول مرة اضاني تخذلني هه
طلع برة جا قعد معانا بره في الهول .. ومدنقر في الواطه
قال لي كيف الحال مهج؟؟ ان شاء الله كويسة ..
قلت ليهو الحمد لله تمام ..
قال لي انا اسف المرة الفاتت ماقدرت اقعد معاكم لاني كنت مشغول بموضوع كدا مع خالي فتح .. ولمن اتفرغت انتو مشيتو ..
قلت ليهو مافي مشكلة الله يديك العافية انا ماغريبة .. البيت بيتي ..
شوية كدا عمتي جات طالعة.. قالت لنمارق تعالي يانمارق ساعديني..
عمتي عايزة تفضي لينا الجو عشان نتكلم انا وهو براحتنا ..
قال لي طبعا عرفتي انو الناس ديل مدبرين لينا موضوع .. بتاع ارتباط وكدا .
انتي طبعا مابتعرفيني .. وانا مابعرفك .. والحكاية دي بالطريقة دي مابتجي يابت الخال .. بس انا ماعايز اعاكس الناس ديل واكسر كلامهم ..
خصوصا انو الكلام جاي من امي وخالي .. ومصرين علي لحكاية دي شديد .. .. والله هو الاقتراح منهم كويس ولفتة بارعه .. لكن المفروض الناس تتريس ولاشنو؟؟؟ قلت ليهو صاح كلامك ..
الزول ده بتكلم معاي بررراااااحة كدا.. بصوت واااطي .. عشان امه ماتسمع ..
قال لي عايني.. انا عايز اسألك سؤال قبل ما نتكلم عن اي شي ..
قلت ليهو اتفضل ..
الى اللقاء ..
