عمي وعمتي .شكلهم متفقين علي من قبل ما اجي .. انا لازم اعمل فيها رايحه.. اعمل اني ماسمعت اي شي ..
عمي قال لعمتي كدي ياسعاد هسي الموضوع خليهو الايام جايه..
انا طبعا اتغظت من عمي ..عايزاهو يتكلم ياخ .. انا دايره اعرف الشمار شنو .. لكن مابقدر اسال شينه في حقي ..
والونسه اتغيرت ..
وعمتي بقت بتحكي لي بي بتها الوحيده البتريدها ..قالت لي دكتورة هاديه بتي.. طبيبة اسنان في الخرطوم ..
عندها عياده في شارع الستين .. هاديه زي اسمها.. طيبه وبت حلال وزينه ورزينه.
متزوجه واحد من ناس الجريف راجل كان ختوه في الجرح يبرا.
وهاديه بتي شايلاهو فوق ايديها ..وخاتاهو فوق راسها .. هديه ورضيه ..مابتغلط عليهو.. ولابتغلط ليها علي زول..
هسي كان بتتعارفن كنتي لاقيتيها هناك في الخرطوم ..
قلت ليها ان شا الله برجع وازورها ..
شوقتيني ليها ياعمتي.. ما دام هي بتك لازم تكون كدا ..
المراه بقت تتبسم وانا اشيل وامدح.. دايره الشغل يتم والموضوع يمشي لقدام ..
انا تاني شكلي ماماشة الخرطوم .. هه
بس ماكتير جات عربيه لاندكروز وقفت.. نزلو منها اتنين .. راجل كبير قريب الستين.. ومعاهو شاب والشاب كان سايق العربيه.. شكله ده الراجل الكبير ده ابوهم ..وده الاخو التاني.
ونزلو حاجات جايبنها من السوق ودخلو سلمو علينا .. عمتي قالت لي ده ابو اولادي الصادق . وده ولدي الكبير مامون ..
اها مامون ده .شكلو ما اكبر من اخوهو كتير ..فرقهم ما اكتر من سنتين ..لكن مابشبهو بعض نهائي ...مامون ده بشبه ابوهو.. وايوب بشبه امه.
مامون اسمر شويه ..وقصير وشعرو سبيبي.. ابوهو بالكربون.. بس الابو شعرو شايب..لكن ايوب !!! عيني بارده.
سلمو وطلعو مشو علي ديوان الرجال.. معاهم عمي فتح وقمنا انا ونهله مع عمتي نجهز معاها الغدا..
وهي بس تتكلم عن دكتورة نهله ومامون
مامون ركيزة البيت مامون سيد الرجال مامون مامون ..
انا ماعجبني غايتو .. شكلو عادي.. لكن بارد ..وملامحو جامده .. مابحب الناس الكدا..
قربت اقول ليهو ياهناي عاين .. لمن تجي تسلم علي ناس ..فر وشك شويه كدا ..وابتسم حبه..
الجديه في اللقاء الاول بتعمل انطباعيه ما لذيذة ولاشنو؟
المهم الغدا جهز ..وجا ايوب شال الصينيه.. وانا عايزة اعاين ليهو وخجلانه من عمتي ونهله .. خايفة يلاحظو لي..
عامله تقيله لكن الصراحه قلبي ما متماسك.. كمان هو الاهبل شايل الصينية وطالع عاين لي بابتسامه كدا .. استغفر الله العظيم .. وانا عاملة فيها ماجايبة خبر. وجادة كدا .ومن جواي مكسرة كسير كباية القزاز الطقو بيها السراميك ..
بعد الغدا والشاي وصلاة العصر.. عمي كورك لي يامهج نمشي ..
عمتي قالت ليهو .. هي يافتيح ماتصبرو شويه. نعرف البينا من العلينا..
علي الاقل خليها تبيت معاي الليله..
انا قلت ياعمتي بنجيك بكرة.. انا ونمارق المسافة قريبه بكرعينا بنجي ..
قالت لي خلاص راجياكن من الصباح ماتتأخرن ..
عمتي مرقت في الحوش بره . وكوركت لعمي فتح ..جا وقف معاها زحت بيهو شويه عشان نحن مانسمع.. لكن انا سمعت هه
قالت ليهو خلاص سوقها ..لكن عليك الله اتكلم معاها ..انا البت دي وقعت لي في قلبي ..ان شاءالله مايكون عندها قصة في الخرطوم ..وزول دايرها هناك.. السماحه دي الناس مابخلوها..
قال ليها ان شا الله يحصل كل خير يا سعاد..
ورجعنا انا وعمي ونهله البيت.. وفي الشارع عمي يحكي لينا في قصص ناس السوق..
وانا بالي مشغول بناس عمتي..
اول حاجه الناس ديل تريانين بالقروش.. وابوهم ده شكله تاجر كبير .. من العربيه الجو بيها ..وشكل البيت والشي ماشا الله..
وتجي خالتي اميمه تقول لي ..اهلك طمعانين في نص بيتك ..
تاني حاجة اووووعا يكون الزول الاسمو مامون ده ياهو سيد الموضوع بموت انا بموووت ..
اها عمي بعد خلص حكاوي ناس السوق بقى يحكي لي عن اولاد عمتي .. وده العايزة اعرفو انا بالذات... بالتحديد .
مالي ومال ناس السوق انا؟
قال لي طبعا ايوب وهاديه ديل كانو شطار وقرو ..هاديه بقت دكتورة.. وايوب مهندس مدني .وزول عاقل ومهذب وذكي .. وجواهو طيب ..اها مامون ماقرا كتير ..ماكان شاطر في الدراسه .لكن شاطر في التجاره ..اشتغل مع ابوهو .. وهسي شغال براهو ماشا الله . البلزو مابرميهو..
وانا بس بقول ليهو ماشا الله ربنا يزيدهم..
اللاحظتو انو عمي بريد ايوب ..وعمتي سعاد بتريد مامون ..لانو عمي بتكلم عن ايوب كتير .. حسيت احساس حقيقي انو عايزني لايوب .. واطمأنيت شديد ..
..وبقيت بفكر في حياتي معاهو .. وشكلها كيف .. ونسيبتي عمتي .. واني ح اسكن في البلد الساحرة دي .والله حكاية جميلة ياخ ..
وصلنا البيت وعمي عمل رايح من الموضوع .. وانا نفسي يحكي لي الحنك ياخ ..
عمي طبعا بالو طويل.. ابا يفتح معاي الموضوع كلو كلو .. وانا كل مرة اتخيل انو يكورك لي يقول لي ..عايزنك لي ايوب الطيوب ..
تاني يوم مشينا الصباح انا ونمارق لناس عمتي .. ولقينا عمتي وايوب بس في البيت .. وانا طبعا .. اتبسطت اني لقيتو قاعد .. لمن شافني ابتسم ابتسامة جميلة كدا .. قال لي اها بت عمي .. كيف البلد معاك؟.. قالو بنات الخرطوم ما بتأقلمن مع الاجواء دي ..
قلت ليهو لالا ابدا.. انا من اصول ريفية ..انا لمن جيت هنا حسيت باني جيت للمكان البنتمي ليهو .. قال لي هوي.. والله بعد يومين تزهجي وتقولي ماشة .. قلت ليهو ( انا في وانت في) .. ح تشوف .. مااااا مااشة ..
المهم قعدنا كلنا الاربعة انا وعمتي ونمارق وايوب .. الزول ده طيب ورقيق بشكل .. وعنده حضور كدا اللهم بارك .. وشكلو هو ذاتو ميت فيني .. لانو بتكلم معاي باهتمام شديد .. ولمن يعاين لي بعاين لي جووووه عيوني لمن انا بقرب ادحل في الواطا ..
يعني بعد القعدة اطمأنيت انو الزول ده عايزني .. والموضوع ماشي زي الترتيب ..
بس برضي خايفة من انو كونو دايرين يعرسو لي الزول الدمو بارد داك الاسمو مامون ..
بس من دلايل الاحوال .. انو عايزني لايوب اوريكم كيف .. ايوب بسلم علي بحفاوة ومحبة .. وبعاين لي معاينة ريدة شديد .. وبتونس معاي وظاهر اهتمامو بي ..
ومامون ولا عاين لي زاتو.. سلم علي سلام بارد وجادي كدا ولا عمل تعبير عن الترحيب بوشو .. لكن احتمال طبعو كدا ماعارفة ..ماعارفة غايتو ..
المهم رجعنا البيت وانا التفكير ح يعمل لي شلل .. وماعارفة المركب دي ترسى على ياتو بر ..
بعد كم يوم امكن تلاتة يوم .. والحتة وكت المغيب الوقت الجميل في البلد ..
..عمي قال لي يامهج دايرك في كلمتين انا قلبي قال ..وووح..
لمن نفسي كتم .قلت ليهو حاضر ياعمي ....
مشيت ليهو في الديوان برانا ..
قال لي انا في مقام ابوك ولالا؟
قلت ليهو والله في مقام ابوي بالضبط
قال لي بدورلك حاجه كعبه؟؟ قلت ليهو حاشا لله ..قال بتوعديني لو طلبت منك طلب ماترديني؟؟ ..
قلت ليهو بوعدك .. قال لي خلاص امشي صلي المغرب ..وجيبي لي الشاي تعالي اشربي معاي الشاي... واقول ليك..
غايتو عمي ده عنده جنس جرجره .. قلت ليهو حاضر ومشيت ..ياخي انا هسي حيلي كلو مات.. تجي تقول لي امشي صلي ؟ اصلي هسي بياتو قلب؟..
كلمت خالتو نادية تجهز ليهو الشاي ومشيت اصلي .. ياخي انا في الوضو غلطت .. من كترة التفكير ..
وسرحت بالخيال انو خلاص المواضيع مشت ..
ياربي الخطوبة بتكون وين؟ وهل خالتي ح توافق ؟ وموقفها بكون شنو؟
لالا بقنعها ؟ دي حياتي وانا مخيرة فيها .. اها والعرس بكون وين؟ .. في بيت عمي؟ ولا بيت خالتي في الخرطوم؟ ولا في بيت عمتي .. والصح ياتو ؟
وانا هسي اسأل منو؟
ضحكت علي نفسي وهزيت راسي . وقمت على صلاتي ..
المشكلة انو انا مصدقة الموضوع زي الكأنه تم ..
صليت وخالتو نادية كوركت لي اشيل الشاي لي عمي .. ومشيت .. كبا الشاي وقال لي ..
اسمعي يامهج ..والله انا مبسوط منك انك بتسمعي كلامي زي بناتي .. والله انا تاني مابفرق بينك وبين بناتي .. واحتمال اقرب لي من بناتي وبراك ح تشوفي والايام بتثبت ليك .. ومبسوط انك وعدتيني ..
ومتأكد ح توفي بوعدك انا عرفتك شديد انتي شنو؟ تمام ؟
الموضوع كالاتي ..
انا بعد لاقيتك المرة الاولى في الخرطوم .. جيت راجع وحكيت لي سعاد عن اخلاقك وطيبتك .. واقترحنا انو لو وافقتي نزوجك لي مامون ودعمتك ..
اصلا هو الكبير .. بيتو جاهز ووضعو ممتاز شديد ..
تسكني معانا هنا في الحلة وتكوني وسط اهلك وارحامك .. وفي اي لحظة لو دايرة تمشي لخالتك.. مامون بعربيتو يوصلك ليها ..
اها قلتي شنو؟؟؟
انا طبعا راسي لفه وعيوني كبتن .. ماموووون؟؟
ده حظ شنو ياخوانا ده ؟؟ الحمد لله على مراد الله..
قال لي يامهج ؟؟؟؟ قلت ليهو.. أأأي اي.. س س س سامعاك ياعمي
مالك سكتي؟؟ انا راجي ردك ..
فتحت خشمي واتكلمت بدون تحكم .. قلت ليهو ..انا وعدتك ياعمي .. وعد الحر دين عليه .. والخير فيما يختاره الله .. والبتشوفو تعملو انا موافقة عليهو..
والله الكلام ده طلع مني غصبا عني .. ندمت عليهو جنس ندامة ..
بس عمي لمن سمع كلامي....
بطول حسو قال.. الله اكبر الله اكبر ..
ومسك يدي يقبل فيها .. ويقول لي الله يكرمك زي ما أكرمتيني ..
بس انا حيلي مات وحصل لي احباط .. وبطني طمت وحسيت اني رميت نفسي في ورطة ..
مامون ده زول رخم ماحبيتو نهائي . لو بقى عندو مال قارون .. ماااااحبيتو ..
قربت اقول لي عمي لالا ياعمي انا بتكلم ساي ..ماعايزة الزول ده ..
في النهاية قلت يامهج لو الزول ده قسمتك ..
ارضي بالمكتوب خلاص .. واقنعي من من ايوب ..
واعتبريهو اخوك وخلاص يعني شنو؟
يعني الزول ما لازم يلقى كل العايزو في الدنيا دي .. اهم حاجة لقيت لي اهل يلموني وبحبوني .. وعايزني .. تاني شنو؟
لكن والله مابقدر .. ياخي هسي الناس ديل .كان ادوني ايوب ده ربنا بحاسبهم؟؟ ..
المهم مشيت من عمي مكسورة الخاطر.. وغم الدنيا كله فوق راسي .. لازم القى لي طريقة اتخارج من الزول ده ..
ماعايزة اكون زي سوسن السوسة ..
اتزوج الراجل.. واحب اخوهـ..
اعوذ بالله من اللعنة والخيانه ..
اعمل شنو ياجماعة ..
اهرب من البلد دي ؟ اقبل بالزول ده وخلاص ؟ اصدم عمي بالرفض؟
الى اللقاء
