اول ما دخلت شافت المنظر اللهو كان منظر طبيعي الراجل المهذب قااعد بكل ادب .. وانا قاعدة في السرير المقابلو .. ولا بسة عبايتي حتى شعري مغطياهو ..
قالت .. والله ماشاء الله ماشاء الله .. على القعدة والونسه ..والضحك والحب الأعمى ..
خلاص لقيت البيت فاضي يامحجوب .. وداير تسرح وتمرح بوراي .
عليك الله كان تدخلا جوه وتكمل معاها حبك وغرامك..
قال ليها يا اميمة .. اتكلمي كويس. الله يخليك .. مافي داعي للكلام البندم ..
قالت ليهو اسكت اسكت.. انا حسابي معاك بعدين ..
طوالي قبلت علي. قالت لي ..اسمعي يا فاجره انتي .. مابتخجلي تتضحكي وتتونسي مع الرجال ؟
انا اصلا حاسة انو سلوكياتك ما اوكي. لكن علطانة انا ..البخليك بوراي مطلوقة.. المفروض اقفل عليك باب الاوضة واطلع لانك..
مامضمونة نهائي..
قلت ليها انا عملت شنو ياخالتو ؟
قالت لي كمان بتردي علي؟
انا موش كلمتك قلت ليك تاني ماتطلعي من الغرفة دي من دون اذني ؟
قلت ليها بس الكهربا قطعت. والغرفة سخنت .. وطلعت في البرنده اتهوا شوية..
قالت لي الهوا اليبلعك . اسمعي انا ماعايزة أذيك .. وماعايزة اضربك ..
بس لو سمحتي اسمعي كلامي ونفذي البقول ليك عليه ..
تاني الراجل ده ما القاك معاهو ...
سبحان الله ..قبل ما اقول ليها حاضر ..
الراجل قام علي حيلو.. واتنفض في المراة .. لمن انا خفت منه!!!!
قال ليها اسمعي يا اميمة.. انا سكت ليك كتير ..
دايرة تقللي احترامي قدام البت؟ مالي انا؟ شوفتي علي شنو؟
عشان قعدت اتكلم مع الطفلة .واواسيها من الظلم والانتقام البتعمليهو فيها ..
انا مما دخلت عليك حصل شفتي علي حاجة؟
كمان جاتنا الشكوك ؟ كلو صبرنا عليهو دايرة تتكلمي في سلوكياتي واخلاقي؟
المراة طيرت عينيها .وبقت تعاين للراجل .. اظنو اول مرة يتكلم معاها كلام زي ده ..
انا طبعا خوفت شديد ..لانها ح تنتقم مني ..لاني بقيت سبب في المشكلة ..
المهم الراجل رفع صوتو شديد. وهاج فيها.. وقال ليها ادخلي جوة قبل ما افقد اعصابي ..
قبل علي قال لي سمعي يامهج .. انا في البيت ده الراجل وفي مقام ابوك .. ماتشتغلي بيها
لو عندك اي حاجة . تعالي اتكلمي معاي انا ..
اي هي خالتك لكن انا في مقام ابوك .. وما ح اسمح ليها تاني تحقر بيك ..
انا كل الوكت متحاشي المشكلة معاها .. ماعايز اسبب لبناتي نفسيات
لكن تاني يا اميمة الله اكبر عليك ..
بس المراة قعدت تبكي .. وتقشقش في دموعها .. ههه اول مرة اشوفها بالضعف ده ..
سبحان الله في ناس مابجو الا بالهرشة ..
بكت كداااا .. ومشت دخلت اوضتها .. بس عمي محجوب جرى وراها . حصلها وقعد يحنس فيها ويعتذر .. ويتأسف ..
غايتو الناس ديل حيروني المراة وراجلا ملو راسي ..
انا قاعدة في حتتي اصلا مادخلت الاوضة .. بسمع فيهو يتكلم معاها وهي تبكي .. وتقول ليهو زح يدك دي مني .. ماتتكلم معاي .. تهيني يامحجوب عشان البت الهبلة دي؟؟
بتعرفها من وين ؟ انا موش مرتك مالي الحق اغير عليك ؟
قال ليها انتي مجنونة ؟ تغيري من منو؟ من مهج الطفله؟
مهج دي قدر سلمى يا اميمة ..
قالت ليهو قدر سلمى بالعمربس ..لكن يهدي بقت مراة. وجسمها بقى قدر جسمي ..
وانتو الرجال ماااابتنضمنو..
قال ليها ياخ الناس بعيشو حياتهم بالثقة ..هسي انتي في اليوم بتطلعي مرتين وتلاتة مرات ..وانا مابعرفك طلعتي وين .. حصل يوم شكيت فيك ..
حصل يوم ساكت سألتك انتي جيتي ومن وين وماشة وين ؟
تشكي فيني يا اميمة؟ وكمان مع منو مع مهج الطفلة؟
عليك الله ماتعملي مشكلة في الفارغة.. هسي البنات بجو من المدرسة يلقوك بتبكي. يقولو شنو؟؟ .. خلااااص يلا قلنا اسفين ..
قالت ليهو خلاص امشي مني وجعت قلبي ..
قال ليها خلاص رضيتي .؟ سكتت.. ماعارفة احتمال تكون هزت ليهو راسها.. لاني ماشايفاهم سامعة بس ..
قال ليها خلاص طيب انا طالب منك طلب ..
ياخي البت دي بت يتيمة مكسورة الجناح ..وماعندها زول غيرك .. ارحميها شوية .. وتاني ماتسجنيها في الاوضة .. وخليها تمشي تقرا في مدرستها ..
هسي الناس يقولو علينا شنو؟ اولادنا بقروا ونحن مقعدين البت اليتيمة في البيت بدون قراية ..
انا عارفك ما دايراها تقرا .. وقصة ماشة اجيب ليك التحويل دي تخدير ساي
قالت ليهو اسمع ..
دي بت اختي وانا مسؤلة منها انت ما تتدخل ..
قال ليها بس انا مسؤول منك انتي ومن تصرفاتك ..
والبت يتيمة الابوين دي ذاتها مادام قاعدة معاي في البيت .. انا مسؤول منها زي بناتي بالضبط ..
ولو قصرنا فيها ربنا انا بسألني والناس بلوموني انا ..
يا اميمة .. كونو ربنا يقسم لينا يتيم يعيش معانا في البيت .. دي نعمة من رب العالمين والله يزيد الرزق .. ويبارك لينا .. استغلي الحتة دي واحسني
فيها والله ربنا ينعم علينا ويبارك لينا ..
انتي قايلة انو مهج دي ح تضيق علينا عيشتنا ..والله بالعكس ربنا ح يفتح علينا ابواب الرحمة بسببها هي .. ياريتك لو بتفهمي الكلام ده ..
لكن البتعملي فيهو ده حرام ربنا قال فاما اليتيم فلاتقهر ..
وانا والله تاني مابسكت على اهانتك وحقارتك ليها ..
كل مرة انا بسمعك فيك بتهيني فيها وهي ساكتة .. وتنبذي ليها ابوها وهي ساكتة .. وحتى بناتي بتمساخو معاها. وهي بتسكت. ويهينوها بالكلام والمطاعنة وهي بتسكت ..
اذا هي مابتقدر تدافع عن نفسها. انا البدافع عنها .. والحشاش يملا شبكتو..
انا طبعا ياجماعة من اليوم داك عرفت انو عمي محجوب مازول ضعيف لكن زول مهذب واخلاقو عالية .. وزول حقاني ..
بس ياجماعة خالتي اميمة الكلام ماجاب فيها اي اثر ..
الفرق الوحيد انها بقت تتعامل معاي كويس قدام راجلا .. اول مايكون مافيش عينك ماتشوف الا النور ..
يوم عمي .. محجوب قال ليها يا اميمة لو ماعايزة تجيبي التحويل للبت دي عشان تواصل دراستها .. انا بمشي المدرسة واجيب ليها التحويل ..
نطت سلمى . قالت ليهو لكن يا ابوي ام قالت .. ما ح تخلي مهج تمشي المدرسة .لانها مابتقدر تقرا وما ح تنجح عشان عيانة .. والبنات ح يضحكو عليها في المدرسة .. ونحن ذاتو ح يضحكو علينا ويقولو لينا بت خالتكم داون .. هو يا ابوي مهج عيانة مالا؟ وداون ده شنو؟
قال ليها ابدا يا سلمى. مهج ماعيانة ولا في زول ح يضحك عليها. في المدرسة .. وح تقرا وتنجح .. وتمشن المدرسة مع بعض ..وتساندن بعض .. بس امك ما فاهمة ..عشان مهج بتسكت كتير ..امك افتكرت انها عيانة ..
شفتو عمي محجوب لمن يكون موجود في البيت انا بعد الله .بلقى لي سند ومحامي ..
والحمد لله سكاتي نفعني يعني هسي لو كنت برد علي خالتي وبدافع عن نفسي ماكان هو اتعاطف معاي .
عشان كدا كل مرة بكرر .. الصمت مع متعتو بتلقى الانسان البقيف معاك ضد الظلم والتعدي . لكن اذا انت هبطت مع الهابط .. الناس بتتفرج فيكم وخلاص .. والاشرار يلقو متعة المشاهدة ..
المهم العايزة اقولو هنا شنو انو عمي محجوب لمن يكون مافيش انا بعاني .. ولمن يكون موجود بتعاملو معاي بكل رقي .. بالجد والله ..
يوم عمي محجوب كان قاعد بتغدى وانا ماعارفه انو جا .. خالتي قالت لي مهج حبيبتي تعالي عملت ليك كباية عصير .. اشربيها وجيبي الفرشة والمشط اسرح ليك ..
انا طبعا استغربت شديد .. وقلت الليلة المراة دي ماطبيعية الله يستر ..
بس جيت اشوف ليك عمي محجوب قاعد يتغدى ويتبسم .. مبسوط منها ..
طبعا . عمي محجوب افتكر انو الناس ديل اتغيرو معاي وبقو يجبوني ..
لدرجة انو سألني قال لي شايف خالتك بقت تتعامل معاك كويس ..
قلت ليهو اي الحمد لله الامور بقت تمام ياعمي محجوب الله يبارك فيك ..ده كلو بسببك ..
بس شوفو البحصل علي لمن يكون مافي .
يوم نحن في يوم الخميس بالليل .. عمي محجوب قال انا بكرة الصباح بدري مسافر مدني
وبجي يوم الاحد امشي اجيب التحويل لمهج .. قام بعد صلاة الصبح طوالي لبس وسافر ..اها اظنو قبل ما يصل موقف البصات خالتي صحتني ..
قالت لي قومي امشي البقالة ..جيبي لينا لبن وشاي وشنو.. كدا ماعارفة .. الوقت بدري شديد ..والبقالة بس في ناصية الشارع يعني نهاية المربوع مابعيدة من البيت .. قلت ليها خلاص صحي سارة تمشي معاي .. قالت لي ساره ابت تصحى وبتزهج فيني .. قلت ليها خلاص صحي لي قدورة .. قالت لي قدورة عيان من امبارح عندو قحة .. وكله كذبت فيهو .. لا صحت سارة ولا قدورة عندو قحه ..
بس عايزاني امشي براي ..
قلت ليها خلاص بصحى سلمى تمشي معاي انا بخاف ..
قالت لي سلمى متين بنخليها تمشي البقالة امشي براك الجاييك شنو اساسا الناس عارفين انك مجنونة وبخافو منك .. قلت ليها طيب اغسل وشي واتسوك وشعري منكوش .. قالت لي لالا .. امشي بحالتك دي .. وانا حالتي فعلا زي المجنونة ..وهي طبعا عايزة تثبت للناس اني انا فعلا ماطبيعية .. وانا ماعايزة امشي براي خايفة وقلبي يضرب كاني حاسة انو حتحصل لي حاجة في المرقة دي .. لاني خايفة من الحتة .. الحي غريب .. والحاج يوسف مابعرف عنها شي ..
سامعه مسمنها الحاج منفى .. وقالو فيها نيقرز وعصابات وفيها حرامية كتار ومنظمين .. بس ربنا يستر
المهم شلت منها القروش ومشيت على البقالة الكلام ده الصباح قبل الشرقة .. وانا ماشة براحة وبتلفت خايفة .. وكل خطوتين بتلفت لوراي ..
في ولدين شباب في العشرينات كدا .. جو من نهاية الشارع رادفين فوق عجلة .. شكلهم ما اولاد ناس .. اشكالهم بتدل فعلا على الاجرام .. اهااا لمن شافوني ..
جو ماشين علي .. انا عملت فيها ما خايفة مشيت محاذية للحيطة ..
والشارع فااااضي .. لمن قربو لي واحد قال للتاني عاين البت شكلها مجنونه.. انزلاكا عليها ..
قال ليهو لالا بتكتمها فينا .. مافاضين الواطه صباح ..
قال ليهو ياخي دقيقة دي شكلها مابتفهم اي حاجة .. كمان عاين ليها .سمحة كيف والله مبالغة..
داك طوالي استجاب ليهو وانا ماشة بسرعة .. وعاملة فيها ماسامعة ..
بس وقفو العجلة ونزلو .. وفجأة كدا القا واحد فيهم جا وقف قدامي .. لمن عايزة ارجع لورا .. لقيت التاني وراي..
قال لي مافي طريقة ماشة وين ياحلوة ؟؟ خشي الحوش ده ..عايزين نديك هدية .. بالحسنى...
لو عملتي حركات وفتحتي خشمك .انا بضربك واغمرك ..
انا اتلفت يمين شمال عشان اشوف زول.. يجيني ينقذني والشارع فاضي.. وبيت ناس خالتي بعد خمسة بيوت من هنا.. والبقالة في اخر الشارع .. والحيطة المتكلة عليها انا دي ..حيطة حوش فاضي ..وفيهو اوضة مهدمة قديمة ..ده القالو لي خشي فيهو .. والقدامي ماشي متقدم علي.. والوراي ماشي متقدم علي .. وبقيت محاصرة بينهم الاتنين..
عايزة اصرخ بطول حسي .. لقيت صوتي مافي من الخوف ..
وخشمي برجف .. ويدي برجفو .. وحاسة الحتة بدور بي ..
الى اللقاء ..
