في القعدة بتاعة القوانين ديك خالتي كان عندها هدف .. بس كان ممكن توصيني باسلوب .. احسن من اسلوب الارهاب .. ياخي انا كلما اتذكر وشها اليوم داك كان عامل كيف بستغرب.. رغم السنين المرت علي . مابنسى الموقف ده ..
اها تعالو اسمعو القوانين ..
قالت لي مافي نوم للضحى .. ومافي طلبات ودلع . قروش في يدك مافي ..امل في غير مواعيد مافي .. غرفتك البوريك ليها دي ماتطلعي منها الا باذن مني .. والبيت يقتلك ويحييك .. مرقة من البيت مافي ..
حتي لو طلعنا انا وبناتي انتي بتكوني قاعدة هنا .. طلعة من غرفتك مافي الا باذن مني .. شفتي كررت ليك الكلام ده كم مرة؟
شغل البيت مقسم عليكم التلاتة .. كنس ..غسيل مكوة ..عدة ..
تاني مابكرر ليك الكلام .. لو قلتي كدا ولا كدا ..بكفتك لمن وشيك يتورم ..المهم شكله البيت ده معسكر تدريب .. ولا حاجة كدا عندها انضباطات النشوف غايتو ..
بقيت قاعدة في بيت ناس خالتي اميمة اليوم الاول زي الضيفة ..
ساكتة لمن خشمي عفن .. وهي تتونس وتضحك مع بناتها ..
طبعا الايام دي المدرسة على الابواب
وروني اخت هدومي وين .. واقعد في ياتو اوضة .. طبعا مع البنات الاتنين انا بقيت التالتة .. سارة لئيمة ومسيخة ..وسلمى هبلة ومدلعة غايتو الله يستر..
وانا بس كلما يكونوا قاعدين بتونسو ..بكون قاعدة في سريري جوة في الاوضة
عشان خالتي تو طلعت بدون اذن خاتكورك فيني.. الايقولو لي تعالي للاكل ..
المراة من اول يوم سببت لي رعب وارهاب نفسي ..
ومن تاني يوم صحوني.. وقالو لي قومي كنسي الحوش .. وسارة قالو ليها غسلي عدة الشاي .. وقاعدة تنقنق ..
انا كنست الحوش كويس يعني الحوش..
نضف انا اصلا متعودة اكنس بيتنا براي ..
وبرضو خالتي قامت فيني.. وسمعتني ليك كلام زي السم .. قال لي هسي ده كنس ده يا خرقاء يا عفنة؟ .. دي بشتنه اريتك كان خليتيهو بي وسخو ..وانا في الاول كنت ساكته بسمع فيها وبعاين ليها يعيوني ..
وكت كترت الكلام والهرجه ..قلت ليها خلاص ياخالتي بعيدو .. بكنسو تاني .. قالت لي اصلا ح تعيديهو يلا...
عودتني الكنس تلات مرات.. لمن ضهري وجعني ..وكرعي خدرن ..
البيت كبير طبعا ماقدر بيتنا ..
بيتهم فاتح شمال .. حوشو كبير فيهو ديوان مضيفة شكل صالون كدا .. في الناحية الشرقية .. مفصول براهو بحيطة
والبيت الداخلي غرفتين معكوسات بي برندات ..في الناحية الغربيه ..والمطبخ في ركن البيت الشمالى الغربي .. والحمامين مع بعض .. ومفصولات بين البيت الداخلي وبين الصالون.. واقعات في الناحية الشمالية ..
وابواب الشارع اتنين .. الاتنين فاتحات شمال.. في شارع ماشي شرق غرب .نحن البنات غرفتنا الغربية بنوم فيها وحاجاتنا فيها ..
وقدورة مرة بنوم معانا ومرة بنوم براهو في البرندة .
وخالتي غرفة نومها الغرفة الشرقية.. والقعدة بتاعة الاكل والونسة في البرندة الفاتحة فيها غرفة خالتي تمام؟
بعد كنست البيت ..
قالت لي تاني تكنسي الصباح والمساء عشان تتعلمي ..
وسارة ماكملت غسيل العدة كلها .. لانا اتشاكلت مع امها .. انا بسمع فيها. هاجت في امها وهرجن الاتنين ..واسمع ليك في العدة (كركبت الكربت) . بطريقة قليلة ادب .. وفي النهاية قالت ليها .. ابيت مابكملها .. ومشت رقدت في الاوضة مع سلمي النايمة لسع ماقامت ..
خالتي قالت لي بعد كنستي خلصي باقي العدة دي .. ماتقعدي تعايني لي كدا .. قلت ليها حاضر ياخالتي .. مشيت قعدت في العدة وغسلتها غسيل بمزاج كدا .. اصلا بحب الشغل ماعندي مشكلة في الموضوع ..
المهم كل ما اخلص من حاجة بتمسكني شغلة تاني ..
واستمر البرنامج ده كدا .. وماعايزة اديهم فرصة يغلطوني في اي حاجة لا بتكلم .. ولا بودي ولابجيب .. والبقولو لي اعمليهو بقوم اعملو وخشمي ساكت ..
بعد كم يوم البنات بدو يتجهزو للمدرسة وانا قلت لخالتي .. المدرسة كيف ياخالتي اميمة؟
قالت لي اصبري عشان القى فرصة وامشي اجيب ليك تحويل من مدرستك الكنتي فيها واحولك هنا مع ديل.
فرحت شديد اني ح ارجع اقرا في المدرسة بدون هم وطعمية ..
بس مرت الايام والبنات بدن في دراستهن وانا خالتي مامشت تجيب لي التحويل .. قلت ليها ياخالتي التحويل؟؟
قالت لي قلت ليك اصبري القى فرصة امشي .. انا مافاضية هسي ..تاني ماتسأليني من الموضوع ده براي بمشي اجيبو فاهمة؟
قلت ليها حاض وسكت ..
بقو البنات يطلعو مدرستهم وانا بكون قاعدة في البيت بساعد خالتي في الشغل بتاع البيت .. وبتعامل بكل ادب معاها .. وبشتغل بدون اي حرج ولا كلل ولاملل ..
بس المشكلة انو خالتي بتعاملني معاملة ماكويسة .. وبتنهرني وبتحرجني وبتستفزني واكتر حاجة بتوجعني .بتنبذ لي ابوي الله يرحمو ..
وبكون الكلام قدام بناتها ..لمن البنات شافن امهن بتهيني كدا وانا ساكتة..
هن ذاتن الاتنين حقرن بي ..
وكل يوم بسمع كلام زي الحنضل .. لكن الحمد لله .. ربنا منعم علي بنعمة الصمت .. مافي زول بسمع مني كلمة شينة .. ولابرد علي واحدة فيهم بكلمة جارحة والكلام الشين البسمعو بقول ده مالي انا .. وبتكلم مع نفسي اسمعي يامهج الكلام ده ماقاصدك انتي .. انتي ماكدا .. انتي عارفة نفسك بس اسكتي .. اسكتي اسكتي ..
والاهم من كدا تعابير وشي مابتتغير ..
بكون بغلي من جوه لكن وشي عادي اصعب حاجة الصبر على الذلة والاهانة
واكتر حاجة بتغيظ خالتي شنو؟؟؟ ..
لمن تجي مراة من الجيران..
وتقول ليها بت اختك دي جميلة وحلوة .. وماشاء الله عليها وربنا يحفظها .. اول ما تطلع المراة بتقوم خالتي تشاكلني .. انا ذنبي شنو؟ ماعارفة ..
لدرجة انها مرة قالت لي تاني لو جاتني ضيفة هنا .. او عك تطلعي .. يشوفو وشك القبيح ده؟
سبحان الله انا وشي قبيح ؟
انا بشبه امي اماني نور الكون ربنا يرحمها..
لمن اعاين لنفسي بالمراية.. بقول تبارك الله يامهج .
تقول لي وشك القبيح؟؟
اها اكتر حاجة اثرت في نفسياتي ..
يوم كانت في مراة من الجيران اسمها ماجدة .
كانت قاعدة مع خالتي وانا طلعت الحمام ورجعت غرفتي.. والمراة شافتني .
قعدن يتكلمن عني واناسامعه .. جارتنا قالت ليها بت اختك دي حلوة ماشاء الله ..
خالتي قالت ليها اي والله ..بس خسارة ..المشكلة .بت اختي دي ..
من ذوي الاحتاجات الخاصة ..
مسكينة شوية الله يشفيها .. قالت ليها يا الله.. يا اميمة ماتستاهل والله .. عايني العيون واللون تبارك الله .. الله يعينك يا اميمة ..اصعب حاجة تربي ليك بت معاقة عقليا ..غايتو ربنا مابدي الزول اي حاجة الكمال لله ..
المراة طبعا .شكلها صدقت اني عندي تخلف عقلي او اعاقة .. مامشكلة خليها تفتكر عني اي حاجة انا مستفيده منها شنو؟
لكن المشكلة انو الجارة العزيزة دي ..مشت نشرت خبري في الحلة..
اني انا معاقة ذهنيا ومن ذوي الاحتياجات الخاصة ..
بس انا ماعارفة انو خالتي قالت كدا ليه؟
وهدفها شنو؟ من انها تطلع فيني سمعة زي دي ؟.. لقدام حتعرفو عملت كدا ليه ؟.. هل حسادة منها؟ لاني اجمل من بناتها الاتنين مثلا؟ لالا ما اظن..
بس بوريكم ..
اهااا في بنات من بنات الحلة في عمرنا كدا .بجو بتونسو معانا في البيت .لمن خالتي تجي تلقاني قاعدة معاهم بتطردني.
امشي البرندة او امشي الزقاق ..
الزقاق ده في غرب البيت بين حيطة الجيران وبين غرفتنا ..
بتقولي قومي اقعدي في الزقاق ..
ولا كمان تألف لي شغل عشان اشتغل .
وما اقعد اتونس مع البنات ..
انا اساسا بقعد اسمع اكتر مما بتكلم ..
لمن خالتي تكون مافي والبنات ديل يجو .. انا بلقاها فرصة واجي اقعد معاهم من الضيق والوحشة الحاسة بيها ..
يوم جات لقتنا بنحكي ونضحك ونتونس في الاوضة حقتنا الاسمها اوضة البنات ..معاي اتنين من بنات الحلة .
جات وقفت في باب الاوضة.. وغزت كيعانها كدا ..
وقالت ليهن اسمعن يابنات..
البت دي عيانة.. وما مستقرة عقليا ..
وبتجيها حالة هيجان ..
لو ضربت ليها واحدة فيكن او عوقتها انا مامسؤلة ..
واحدة من البنات اسمها تودد .. قالت ليها كيف يعني يا خالتو اميمة؟؟
.. قامت سارة بت خالتي .ردت علي تودد ..
قالت ليها مهج مجنونة بتقوم عليها حالات ..
متخلفة شوية
انا طبعا خنقتني عبرة ..
وقمت من الحتة مشيت الزقاق..
بكيت بكيت لمن حسيت باني بطني قلبت ..
المهم ياجماعة عشان ما اوجعكم كتير ..
انا عشت معاناة ما طبيعية من خالتي وبناتها ..
مافي زول في البيت واقف معاي غير ابوهم ..
كل مايلاقيني بقول لي اصبري يابتي .. ربنا موجود ..
مابضيع حق انسان ..
بقول ليهو حاضر ياعمي محجوب ..
وبمرور الوقت عرفت انو عمي محجوب برضو خالتي مضوقاهو المر ..
في يوم من الأيام جا عم محجوب لقاني براي في البيت.
كنت قاعدة في البرندة القدام اوضتنا ..
وخالتي مافي طلعت .. والبنات في المدرسة ..
جا قعد في السرير المقابلني ..
وقال لي كيفك يامهج يابتي ..قاعدة براك؟
قلت ليهو نعم ياعم محجوب ..
قال لي شوفتي يامهج العذاب الانا قاعد فيهو 16 سنة..؟؟
قلت ليهو ربنا يديك العافية ..
قلت ليهو بس ياعم محجوب انا عايزة اسألك سؤال ماقادرة افهم خالتي بتكرهني ليه؟ انا ماعملت حاجة وبتتعامل معاي معاملة انتقامية .. ومطلعاني مجنونة ومتخلفة عقليا ..
قال لي انا افهمك عشان تكوني على علم ..
اول حاجة خالتك مابتكرهك .. بتكره روحها ..
خالتك يا مهج من ابخل من خلق الله على وجه الارض.. ياخي دي بتستكتر الاكل على نفسها .. ياخي دي بتدس الرغيف في الدولاب لمن ييبس وبرضو بتقرقشو .. ياخي دي بتطبل الملح بالطبلة .. يا خي دي بتعد اللقمات البتاكلهم.. وبتعد اللقم البناكلهم انا واولادي ..
والمشكلة هي ماعايشانا ولاصارفة علينا ..
انا الشغال وانا البجيب القروش..
والحمد لله ربنا رازقني وما مقصر معاي ..
هسي هي خايفه من قعدتك معاها ..
وحاسة انك ح تضيقي ليها معيشتها ومعيشة اولادها ..
اصلا ما كانت عايزاك ..لكن مجبورة وخايفة من كلام الناس . من يوم ماتت امك وهي هامة بعيشتك .. وهامة بابوك .. حمدت الله لمن ربنا اختاره .
وطوالي بتتكلم .. بتقول نحن اولادنا ماقادرين نعيشهم .. نجيب لينا تاني بت تقعد معانا وتضايقنا ونتبالا بيها تاكل وتشرب ..
عارفة المراه دي ..مرات بتأكل معانا بسيط.. عشان نحن نشبع ..
ومانقول دايرين اكل تاني .. لمن ترجع المطبخ تلقى نفسها جيعانة ..تبل الرغيف اليابس بالموية وتاكل .. ياخي نحن بيتنا مافيهو فيران .. ولافيهو نمل .. لانهم مابلقو اي بواقي اكل في حته ..
انا قعدت اضحك من الحاجة الغريبة دي ..غلبني اسكت من الضحك ..
قال لي طيب اوريك هي قالت انك مجنونة ليه ؟ قلت ليهو اها ؟ وانا لسه بضحك ..
في اللحظة دي خالتي جات من بره .. ولقتتني بضحك مبسوطة وبتونس مع عمي محجوب .. وتعال شوف ..
الى اللقاء ..
