قلت لي نمارق.. كدي يانمارق اتصلي على امك .. شوفيها جات؟ وانا جواي بتمنى انها ماتكون جات.. عشان نتأخر شوية لغاية مايجي مامون .. اصلي حاسة بنفسي ماشبعت من كلامو ..
نمارق اتصلت على امها.. وشدة ماكلامها براحة وصوتها ميتان ..ماسمعتها قالت ليها شنو؟ بس اسمع ليك.. نننن ننن نننن. ماتفرز منها كلمة ..
قفلت التلفون ..وقالت لي امي لسع عند ناس البكاء ..قالت بتجي المغرب ..
كويس شديد .. ننتظر امكن زولي ده يجي ..
وقعدنا نتونس انا وعمتي.. وبتحكي لي بامها اللهي حبوبتي ام ابوي .. قالت لي حبوبتك كانت مراة حكيمة.. وتقعد في المناسبة لمن تطلع مابتقول لها كلمة فارغة .. سكوتة كدا زيك وزي نمارق دي ..
يوم حبوبتك طلعت بالليل.. تتفقد الغنم .. لقت في ولدين دايرين يطلقو الحمار بتاع جدك .. قالت ليهم يا اولاد ده شنو ؟ دايرين تسرقوهو؟
قالو ليها لا والله.. دايرين نمشي بيهو الحفلة ونجيبو راجع..
قالت ليهم الحفلة وين؟؟ قالو ليها في الحلة الفلانية ..
قالت ليهم خلاس اصبرو النجيب لكم اللبدة .. ماتركبو فوقو عري ..
بس ارخو حسكم (وطو صوتكم) مايسمعكم ابو فيصل .. يجيكم بعصايتو يكسركم ..
انا طبعا مافاهمة من عمتي .. كلمة .. قلت ياعمتي يعني شنو اللبدة؟ وشنو عري؟ .. قالت لي اللبدة حاجة زي المخدة .. محشية بالشعر بختوها تحت السرج فوق ضهر الحمار..
وكت الزول يكون مستعجل بختها فوق ضهر الحمار ساي بلاسرج ويركب ..
وعري دي يعني ماتركب فوق الحمار على ضهرو بدون فرش .. ايوااا كدا فهمت .. ونمارق تضحك علي لانها فاهمة اي شي .. غايتو!!!
المهم حكت لي القصة دي .. قالت لي لامن الاولاد جو راجعين من الحفلة مع وش الصباح .. الحفلة كانت صباحية .. جدك شافهم .. وقال ليهم سقتو حماري وين يا ولاد الكلب ؟ وكمان شايلين اللبدة ؟ الحمار عرفناهو .. اللبدة دي كانت جوه.. جبتوها كيف؟ وزنقهم ليك في الزريبة ..
قالو ليهو ادتنا ليها حاجه السرة .
خلاهم فاتو ..وجاء راجع لامي.. قال ليها افو يا السرة؟ بتدي الشفع حماري بي لبدتو ..يمشو بو اللعب؟ يعني الحفلة ..
قالت ليهو .. اها نان الحاج .. اخلي الوليدات يمشو الحفلة المشوار ده كلو بكرعيهن .. يلاقيهم دعت (ثعبان) . ينشفهم .. ولا احسن كان جات بلوة.. تجي في الحمار يا الحاج .. الحمار بتعوض.. الا الرجال مابتتعوض ..ونحن عندنا الجنى يا عشاي .. والبتسوي بتلقاه ..
ابوي تاني ما تكلم مشى طوالي .. هي دايما كدي امي .. كلامها تاني مابنعقب .. وبتعمل بالاصول .. وماشة عدل .. شفتي مامون ولدي ده بس شايل طبعها .. ربنا يتقبلا ..
مامون ممكن يقطع من جلدو عشان يساعد المحتاج .. مابقول ليك انا مالي ومالو دي ماعندو .. بجي ماشي بعربيتو بلقا ليهو زول متعطل في الشارع .. بقيف وبساعدو .. ولو داير ليهو حاجة بمشي بالعربية.. بجيبها ليهو ويجي..
ولو الزول مادور دور عربيتو ومشى مابفوتو .. كل مرة مضيع علينا مشاويرنا بالطريقة دي ..
وكت نسأله يقول لينا ..هسي كان حصل علينا الحاصل على الزول ده .. موش بنحتاج لزول يساعدنا؟
نحن طبعا بنسكت .. مستحيل يلقا ليهو زول مقطوع ويفوتو .. الا يطمن عليهو ..
المراة دي بتشكر في ولدها ده لغاية ماشكيت انها بتبالغ حبتين .. لكن الايام اثبتت لي انها ما ادتو حقو والله ..
المهم نحن قعدنا قريب المغرب مامون مااااا جا .. وابوهو قاعد .. وانا اشيل واعاين ..
فجأة كدا اشوف ليك الجا منو ؟ ايوب ..
جا صاري وشو زي قبيل.. و ماسلم على زول.. كوشت كوشت كوشت .. دخل على الغرفة الغربية ..
خالتي نادية مرة عمي اتصلت قالت البنات يجو .. لانها وصلت البيت جات من العزاء ..
عمتي سعاد طوالي نادت ايوب قالت ليهو تعال وصل البنات ديل بالعربية ..
قال ليها انا تعبان والله ..من الصباح واقف في العزا للفاتحة .
خلي يجي مامون يوديهم ..
انا قلت ليهو في سري .. شوفو بالله الزول هه متين من الصباح؟ انت كملت النوم ومشيت قريب الصلاة .. واخوك قام جارى من سمع الخبر . بدون فطور لاهسي ماجا .. ياحليلو ..
امو قالت ليهو انت عارف مامون لو ما اتاكد الناس كلهم اتعشو .. مابجي .. من ما ماتت المراة متشوبح فوق البكا ..التقول ميتة امو ..
انا قلت ليها مامشكلة ياعمتي.. ايوب لو تعبان خليهو .. نحن ممكن ننتظر مامون .. اصلو انا عايزة اقعد معاك شوية ماشبعت من ونستك والله .. وانا طبعا عندي هدف .. ماعايزة اركب مع الزول ده .. ونفسي يجي يوصلنا الزول دااااك ..
قالت لي خلاص يازولة ..بس اتصلن على نادية كلمنها ..
كلمتها انا ..قلت ليها ياخالتي نادية .. نحن ح نتأخر شوية ..منتظرين مامون يجيبنا بالعربية .. قالت لي خلاص انا ذاتي دايرة امشي لناس البكا بعمود العشا ..
اخدو راحتكم مع عمتكم وتعالو علي مهلتكم .. اها عملتي شنو يا مهج مع مامون؟؟ .. قلت ليها بجي وبحكي ليك .. قالت لي لاكان كدي خلاس ..معناها امورك مشت .. وقفلت ..
نادية مستعجلة على الشمار ..وانا الشمار لسه ما اكتمل في كياني ..
بعد صلينا المغرب .عمتي سعاد قالت لي نمارق .يا نمارق بتي ماتقومي تعملي الشاي لعمك والله انا ضهري ده مقصوص من الوقفة ..
قامت نمارق .. تعمل الشاي وعمتي استفردت بي .. وقالت لي اها يامهج يابتي .. قبيل الحصل شنو؟ .. وكتين قعدتي مع مامون .. ان شاء الله اداك كلامأ سمح ..
قلت ليها والله ياعمتي مامون زول ممتاز.. مافيهو كلام ..وكلامو القالو لي كلو كلام كويس ..
قالت يعني انتي ماعندك مانع ؟ قلت ليها حاليا ماعندي مانع .. بس ياعمتي عايزين نتعرف على بعض اكتر .. لانو دي اول قعدة لينا .. وماعرفنا بعض كويس .. قالت لي يعني ما احرجك واتلاءم معاك ؟
قلت ليها ابدا والله ..
قالت لي شوفي ده ولدي وانا بعرفو .. من اول قعدة لو ماعايزك مابديك وش .. ولابجاملك .. وجنو وجن البنات .. انا ذاتي مستغربة قعد معاك الزمن القبيل ده كلو كيف .. معناها انتي ح تكوني قدم الخير يابتي ..
ان شاء الله يامهج بت فيصل اخوي.. سعد مامون ولدي يكون على ايدك ..
انا بقلبي قلت ليها من خشمك ولباب السما ياحجة ..
قلت ليها ياعمتي ربنا يسوي الفيها خير ..والله مامون مافي كلمة النصيحة لله ..وهي تشيل وتشكر في مامون .. وعافية منو دي ؟؟اظنها قالتها خمسين مرة بدون مبالغة ..
نمارق عملت الشاي ..وكوركو لايوب يودي الشاي لابوه ابا يطلع.. عمل فيها نايم او ماسامع .. قامت المراة الكبيرة شالت الشاي ودتو لراجلها في الديوان قدام ..
بعد العشاء بساعة يمكن تقريبا .. مامون يادوب جا .. وجلابتو الطلع بيها الصباح بقت مابتتقابل ..
دخل سلم .. امو قالت ليهو جيت ياصباح الخير؟ قال ليها كيف امسيتي يا امي .. ان شاء الله ماتعبتي في العزاء؟ .. قالت ليهو الحمد لله مافي عوجه ..
البنات ديل راجياتنك توديهن لي ناس خالك..
قال ليها حاضر بس اغير من وضعي ده .. لو مستعجلين شديد نمشي مافي مشكلة .. انا قلت ليهو لالا اخد راحتك مافي عجلة ..
المهم خشه استحم وغير واتعطر .. والكلام ده زي الساعة 9 ونص مساء .. وقال ياجماعة انا جاهز .. انا كنت عايزة اقول ليهو اخد ليك رقدة شوية كدا انت واقف من الصباح .. والله لمن حنيت عليهو ..
امو قالت لينا يلا قومن يابنات .
قمنا ركبنا في اللاندكروزر انا ونمارق .. نمارق طوالي ركبت ورا .. وهو فتح لي الباب القدام .. ونمارق متمحنة .. وتعاين .. البت فاهمة اي حاجة عاملة فيها رايحة ..
ركب ودور .. ما اتكلم نهائي .. لمن قربنا نصل .. قال اها ياجماعة نحن وصلنا .. وكنتو منورين بيتنا .. واسعدتونا شديد .. تصبحو على خير . كنت بنزل اسلم لكن والله جسمي منتهي عديل .. امشي ارقد واروح في نومة ..
انا قلت ليهو وانت من اهلو ..بارك الله فيك وان شاء الله دايما عامرين ..
انا حسيت نفسي بقيت بتكلم زي ناس البلد .ملاحظين؟؟ .. وده من كترة الونسة مع عمتي وخالتي نادية ..
في كلمات كتيرة بقيت بعرف اقولا .. بقيت اقول.. تر كدي .. (زح كدا) واقول قنب سا .. (اقعد ساي) وبعرف حاجات العواسة ..من القرقريبة لغاية الخمارة ..
بكرة من الصباح خالتي اتصلت علينا خالتي اميمة .. اصبحنا بالصباح وباب الله الفتاح ... سلمت علي وقالت لي يابت انتي حدك وين؟
قلت ليها بس عمي يجي الخرطوم بجي معاهو ..
قالت لي المهم انا اتصلت عليك في موضوع ..
اتصلو ناس عمك حسين بتاع الفرن ..قالو عمك حسين عيان شديد وراقد في المستشفي وطلب انو يشوفك ..
كان بتقدري تتصلي عليهو تكفري ليهو .. وتشوفيهو داير بيك شنو؟
قلت ليها لا حول ولاقوة الابالله مالو ؟
قالت انا بعرفو ليك؟
قلت ليها ياخالتي انا لازم اجي الخرطوم عشان اشوفو .. عمي حسين ده في مقام ابوي والله .. التلفون مابطمني عليهو ..
قالت لي مافي داعي تجي من جنوب السودان.. عشان الراجل العيان ..
شكلها ماعايزاني اجي .. شكلي كنت قاعده ليها في نفسها .. المهم عندها الايجار وماشي ..
انا لازم امشي الخرطوم ياجماعة.. عمي حسين ده لازم اشوفو.. والله مكانتو جواي مابتتقاس.. ربنا يشفيهو يارب ..
كلمت عمي قلت وريتو الحاصل .. قال لي مافي مشكلة.. بس هسي مافهمت منك اي شي .. الزول ده نفع معاك ولا نقنع ؟؟
قلت ليهو انا قلت ليك ياعمي كلامك يمشي.. وده وعدي ومابخلفو .. ومامون قعدت معاهو مافيهو كلمة والله ..
قال لي خلاص بس اشوف رايو هو .. وبعدين تسافري ..
خير؟ .. خير ..
قام قال لي اسمعي يا بتي انا بعد اسبوع ماشي الخرطوم .. لو صبرتي لي تمشي معاي ..
قلت ليهو مابقدر ياعمي .. عم حسين لازم اشوفو .. لو بتعرف معزتو لي مابقدر اقعد ..
قال لي طيب اتصلي عليهو لو لقيتيهو كويس .. يبقى تصبري ولو لقيتيهو تعبان تسافري مافي مشكلة ..
وافقت واتصلت في تلفون عمي حسين الاداني ليهو ..
الو السلام عليكم عمي حسين انا مهج بت فيصل ..
قال لي حبابك يابتي العزيزة ..(صوتو تعبان فعلا) كيف حالك ناس خالتك قالو انتي في الروصيرص ..
قلت ليهو اي والله كلموني انك عيان الف سلامة عليك حسنة واجر ان شاء الله .. اتصالي عليك مابطمني لازم عليك ولازم اسافر اجي اشوفك ..
قال لي لالا مافي داعي.. انا عايزك لموضوع معين .. قلت ليهو اتفضل ياعمي..
قال لي يابتي انا مرضي دا تاني ماظن اقوم منو.. وماعارف اقعد لمتين ..
بس مناي في الدنيا من زمان... انك تكوني في بيتي .. واكون جد اولادك. .. بس ماكنت داير استعجل لانك عندك قراية ..
انا يابتي طالبك لمحمد ولدي .. (محمد ده ولدو الصغير اصغر من السر راجل نبيلة متذكرنو؟) .. اها قال لي مناي في الدنيا تكوني انتي زوجة محمد ولدي .. كلمي عمك .. حتى لو قلتي بعد تخلصي قرايتك .. انا مامعروف اقعد لمتين .. المهم محمد ولدي مايتزوج غيرك ..ده طلبي الوحيد اول مرة في حياتي اطلب منك طلب .. ماترديني ..
الى اللقاء ...
