سلم علينا كدا .. وقعدنا كلنا في الحوش بره .. وخالتي مستغربة لمن مطيرة عيونا..ماسلمت عليهم كويس ..
عمي حسين الرجل البشوش .. قال والله نحن جينا لمناسبة هنا في شارع واحد .. وقلنا نجي نسلم عليكم ونشوف البنية دي .. ماشاء الله عليها اتصلت علي ..وكلمتني بالمدرسة وعزمتني اجيكم زيارة واناوعدتها .. ووصفت لي البيت .. جينا للمناسبة انا وعلوية .. واهو يامهج وفيت بوعدي وجيت ..
هو بقول في الكلام وانا ماااااامقتنعة بكلامو ..يعني جيتو دي ماشكلها غاشي غشوه ساي ..
انا حاسة بيهو بتململ كل مرة يعاين لي .. شكلو عايز يقول لي كلام مهم ..لكن ديل ما مدنو فرصة ..
شكلو لمن قنع واقتنع .. انو ماح يلقى فرصة يكلمني بحاجة براي .. قال لي يامهج بكرة الجمعة رايك شنو تمشي تعدي معانا الجمعة ونجيبك بعد بكره يوم السبت العصر تحصلي دروسك يوم الاحد .. قلت ليهو مافي مشكلة ياعمي حسين بس نشوف راي خالتي..
خالتي كانت بتعمل في شاي في المطبخ .. جات قالت ليهو لالا مافي طريقة ياحاج.. البت عندها مذاكرة وانا مابطمن عليها بعيده مني .. قال ليها بالنسبة للمذاكرة تشيل معاها كراساتها .. وكونك مامطمنه عليها ده مامن المنطق ..لاني انا في مقام ابوها .. وبيتي زي بيتها .وممكن احميها بروحي .. رسلي معاها واحده من بناتك لو ما ضامنانا ..
قام هنا عمي محجوب اتدخل .. قال ليهو اسمع ياحاج حسين .. مافي مشكلة تسوقها طوالي ..والله انت مضمون عليها .. وهي ذاتها شايفاك عمها زي انا واحد .. الراي رايها هي .. ماراي اميمة ولا راي انا ..
انتي عايزة تمشي يامهج ؟؟.. قلت ليهو ايوة ياعمي محجوب.. انا مشتاقة لعمي حسين واولاوده . وخالتو علوية
.. لكن بجي بجي يوم السبت طوالي ياخالتي ..وعد .. قالت لي انا قلت ماتمشي.. عمي محجوب قال ليها انا قلت تمشي ا اميمة .. الله؟ .. حنفت وشها كدا ورجعت مطبخها ..
عمي محجوب . قبل علي قال لي تمشي طوالي يامهج . يلا جهزي غياراتك ..
فعلا جهزت غياراتي ومشيت مع عمي حسين .وخالتو علوية للبيت .. والله الراجل ده اتعامل معاي معامله
انا ماشفت زيها قريب ..بس ذكرني ابوي .. وخالتو علوية مراة ملائكة بس .. وبتحترم راجلها ده احترام فوق الخيال
مراة سكوتة وحكيمة .. وعندها حضور وكاريزما بطريقة تحير..
وصلنا البيت بالليل .. عمي حسين عنده ولدين وبتين .. الاولاد كبار واحد متزوج وقاعد في جزء من البيت والتاني في عمر الكم وعشرين .. والبنات اصغر الاتنين بقرن في الجامعة ..
ولمن جيت فرحو بي شديد .. وعاملوني بحنية فعلا بتليق باليتيم ناس بتعرف الاصول والله .. البيت كله ناس في منتهى الروعة ..
الكلام ده كان يوم الخميس بالليل .. وقعدو كلهم مع بعض .. تاج السر ود حسين وزوجته نبيلة .. ومحمد اخوه .. ولبنى وفدوى .. وعلوية امهم ..وعمي حسين زي السلطان المحبوب بينهم ..
يتونسو ويضحكو والله اسعدوني .واتعشينا كلنا في صينية واحدة.. اتخيل شكل الترابط ده كيف ..
حتى والله شكل الحب والاحترام بين نبيلة زوجة السر .. ونسيبتها علوية حاجة تشرف .. ياسلام ..
انا مشيت نمتا مع لبنى وفدوى في اوضتهم .. بحبو بعض شديد .. وبتكلمن مع بعض باحترام ومحنة كدا تخلي الزول ينبسط .. اتمنيت انو تكون عندي اخت .. لمن خنقتني العبرة ..الحمد لله ورضيانة بقدري ..
لا اخو لا اخت لا ام لا ابو .. الحمد لله عندي ربنا وربنا كفايه ..
من الصباح بدري عمي حسين ناداني قال لي تعالي يامهج ..
انا طبعا جبتك هنا عشان ابصرك وافهمك .. ايوة انتي صغيرة في السن لكن بي عقلك زولة كبيرة وفاهمة احسن من الناس الكبار ..
خالتك اميمة ليها اكتر من اسبوع مسوية الدرب ساساقة .. فوق البيت حقكم .. ونحن مراقبين كل حاجة .. اولا بالتبادي جابت لوري شحنت العفش ماخلت حاجة ..
حتى ملابس ابوك واغراضو شالتها .. وانا الجيران مابقصرو صورولي اي حاجة .. شالت العفش ودته وين ماعارف لكن شكلها باعتو ..
لا اله الا الله .. (انا طبعا اتخيلت خالتي اميمة باعتو في سوق ليبيا .. لانو قريب من هنا .. لو الزول وقف في باب بيتنا ..بعاين للشارع الجاي من ود البشير .وماشي علي سوق ليبيا .. لكن بعدين عرفت . ودتو دلالة السوق الشعبي ) حرام عليها تبيع عفش بيتنا .. والله قربت ابكي من القهر ..)
عمي حسين .. قال لي . بعد فضت البيت من العفش ..وجابت ناس نضفوهو .. مشت جابت ليها ناس .. واجرت ليهم البيت بي عقد من المحامي ..
وانا لمن سمعت بالموضوع كله من ناس الحلة .. اتصلت بالمحامي ومشيت ليهو في مكتبه وسألته..
قال لي المراة الاسمها اميمة دي ..جابت ورقة من اللجنة الشعبية بتاعة الحي االساكنة فيهو .. وجابت شهادة ان البت بت اختها .وريثة البيت .. واثبتت الكلام ده من خلال شهادة البت وشهادة امها المتوفية .. وقاعدة معاها في بيتها ..وهي متكفلة بيها وانها عيانة وعندك حالة تخلف.. بشهادة سكان الحي واللجنة الشعبية .. وانها هي الوصية عليها ..
وشكلها والله اعلم ..كانت ح تعمل توكيل منك لروحها.. .. لكن المحامي قال ليها ماينفع الا البت تبلغ ال18 سنة .. والمسألة تتم باشهاد شرعي من المحكمة.. والقاضي يشوف البت ..ويعرف انها عيانة ومامكلفة ..
وطبعا لوقدرت عملت التوكيل ح تبيع البيت وتاكل قروشو ..
وانا متأكد يامهج الكلام ده كلو .. انتي ماعندك بيهو علم صح؟ قلت ليهو ابدا والله ياعمي حسين.. الا في هسي انت قلت لي ..
انا طبعا ياجماعة هو بحكي لي في الكلام .. والله انا راسي ده ضرب لمن عيوني ضلمن .. انا كنت قاعدة مع خالتي مطمنة ..انو بيتنا مقفول ومطبل ..وحاجاتنا في الحفظ والصون .. اتاريهو البيت بوراي اتعفش وانسكن ..
قلت ليهو طيب ياعمي حسين .. في اوراق مهمة حقة ابوي ..وصور امي وابوي وشهاداتي ..في دولاب ابوي .. ودتن وين؟
قال لي والله يابتي الله اعلم .. انا طبعا ماعندي الحق اسألها من الكلام ده ..
قلت ليهو كونها تأجر البيت وتشيل قروش الايجار مافي مشكلة .. في النهاية هي خالتي وانا قاعدة معاها في البيت لكن انا هسي مشكلتي في الاوراق والصور والحاجات حقة ابوي المهمة ..
قال لي رايك شنو لمن ارجعك هناك ليهم أسالها قدام راجلها من الموضوع كله .. قلت ليهو ممكن امشي بيتنا اشوفو .. وادخل فيهو اشوف الحصل شنو؟ مشتاقة لبيتنا .. دايرة بس احس فيهو اني شفت ابوي ..
قال لي مافي مشكلة نمشي بعد شوية ونسلم علي الناس المؤجرين البيت وعلى الاقل يعرفو انك انتي ست البيت
وماعيانة .. وانا لو موافقة لي اوديك للمحامي عشان يشوفك ويعرف انو خالتك كذبت عليهو وجابت ليهو اوراق مزورة ..
قلت ليهو لالا يا عمي مافي داعي .. بس انا هسي عرفت انها ليه كانت عايزة تثبت لناس الحلة اني عيانة ومتخلفة عقليا ..
قال لي طيب في فكرة .. انا امشي معاك لناس اللجنة الشعبية بتاعة الحي حقكم.. واوريهم انك انتي طبيعية وماعندك مشكله .. ويعرفو انو خالتك خدعنهم وشالت منهم اوراق عشان تشيل حقك ..
قلت ليهو كدا ممكن يشتكوها ويعملو ليها مشكلة ويسجنوها لانه غشتهم صاح؟
قال لي صاح ممكن ..لالا ماابرضى كدا .. بس نكلم عمي محجوب وهو يتصرف .. قال لي تمام مافي مشكلة ..
البتشوفيهو يابتي انا قصدري احفظ ليك حقوقك ..
انا في الوقت داك ماكنت مستوعبة قصة حقوقي دي .. ولا حجم المسألة وخطورتها .. كان همي الوحيد كان في اوراق ابوي وصور امي .. غايتو الجهل مصيبة ..
يعني ما كنت مهتمة بالبيت تبيعو او تأجره .. او تمشي تسكن فيهو .. بس كنت بحب البيت عشان بيتنا وكان فيهو امي وابوي واتربيت فيهو وعشت فيهو احلا ايام حياتي .. وما عندي احساس انو البيت بقى ملكي او انا الوريثة الوحيدة .. ما في استيعاب .. انتو فاهمني ؟؟
عمي حسين طلع مشى الفرن وجاب ليهو عيش حاااار .. وجينا شربنا الشاي واتونسنا وقال ليهم عندنا مشوار انا ومهج وبنجيكم هسي .. قومي يابتي ارح ..
مشيت معاهو بنفس الشارع الجينا بيهو ..يوم ابوي مات .. لمن اتذكرت الوكت داك ..انو هو ماشي سريع وانا نفسي اقول ليهو اجري ياعمي حسين اجري .. لمن اتذكرت اللحظة ديك..حسيت بي لهب من النار حرق قلبي علي ابوي ..
ياحليلك يا ابوي .. والله انا مشتاقة ليك شوق شديد ..
الحمد لله على قضاء الله ..
المهم وصلنا البيت .. وعمي حسين دقة الباب وجانا ولد صغير كدا ..في العمر بكوون زي ناس قدورة ود خالتي ..
وقال عايزين منو؟ عمي حسين قال ليهو امك ولا ابوك الفي منو قاعد ؟
قال ليهو ابوي وامي الاتنين قاعدين .. الليلة طبعا الحمعة والناس قاعدة في بيوتها ونحن هجمنا الناس من الصباح .. الولد جري كلم ابوي والراجل جانا طالع وقال اتفضلو وشكلو مابعرف عمي حسين .. عمي حسين مشهور في الحلة لكن الناس طبعا مامن هنا ..
المهم ..دخلنا عمي حسين كلمو وقال ليهو البت دي ست البيت الاصلية والمراة الاجرت ليكم دي خالتها ..
والبت دي يتيمة قالت دايرة تزوركم وتشوف البيت لانها ساكنة مع خالتها في الحاج يوسف ..
الراجل طبعا استغرب وبقى يعاين لي من راسي لكرعيني .. لانو شكلو برضو فام اني مجنونة .. انا ما اشتغلت بالموضوع كتير بقيت بعاين ف البيت وبتحاوم .. من حتة لحتة .. ودخلت في الغرفة حقة ابوي .. ودموعي جرن .. وفعلا عفشنا كلو مافي بس الناس ديل وعفشهم ..
المهم اني زرت بيتنا فرحت بشوفة البيت وحزنت بي بيع العفش .. وبكيت من ذكريات امي وابوي ..
وطلعنا مشينا انا وعمي حسين رجعنا البيت وعديت اليوم داك معاهم كأجمل يوم في السنة ديك ..
وتاني يوم رجعنا مشينا الحاج يوسف معاي عمي حسين وبنتو اسمها فدوى .. وانا ماشة على الحاج يوسف حسيت بي غم .. زي المودني السجن .. بقيت ماعايزة اقعد في بيت خالتي .. لكن مجبورة ..
وحزنت انو ح افارق عمي حسين واسرته الطيبة ..
وفي نفس اللحظة خايفة من ردة الفعل البتحصل لي لمن خالتي تعرف اني كشفت لعبتها .. وعمي محجوب لازم يعرف انها باعت عفشنا .. واجرت بيتنا لناس .. ولازم انا اعرف اوراق ابوي وصورنا انا وابوي وامي ودتن وين .. انا سكته بمافيهو الكفاية .. لكن هسي مابسكت .. ليه يعني الحقارة دي .. ده كلو وانا بتكلم في سري في عربية عمي حسين ونحن ماشين على البيت ..
لمن وصلنا الكلام كان يوم السبت بعد الغداء مع صلاة العصر .. ولقينا عمي محجوب قاعد يسلم من كل بلا ..
وعمي حسين قعدو وحكى ليهو الشي العملتو مراتو من طقطق للسلام عليكم .. وانا قاعدة معاهم بسمع .. طوالي عم محجوب ناداها .. قال ليها اقعدي هنا يا اميمة .. ده شنو العملتيهو ده .. وسألها من العفش وديتيهو وين؟
قالت ليهو اولا البت دي ماعندها وصي غيري انا يامحجوب .. لا انت ولا الراجل ده ..
بدل العفش مايقعد في البيت بالسنين ويبوظ.. شلتو وبعتو كلو واشتريت للبت دي بيهو دهب .. يقعد ليها لمستقبلها ..
قال ليها وين هسي الدهب ده ان شاء الله؟؟ قالت ليهو جوة قاعد داساهو .. اجيبو ليك تشوفو؟
قل ليها طيب باي حق ..تأجري البيت لناس وتشيلي الايجار؟ ..
قالت ليهو ياخوي حق الايجار مافايت مصاريف البت.. ورسومها الدراسية .. بدل البيت مايبقى فاضي .. والبت عندها احياجات لمستقبلها .. اجرتو عشان يجيب قروش .. والبت تصرف من حقها .. انا غلطانة في حاجة؟ .. جيتو الاتنين قعدتو لي كدا؟ .. كدي بالله انا مافاضية عندي ستين شغلة في راسي ..
البت دي انتو ما احن عليها من خالتها اخت امها .. قبلت على عمي حسين قالت ليهو ..شكرا ليك يا حاج .. ده هسي انت ..حالنا ده اديناك البت تمشي معاك ..زي ابوها .. سقتها ومشيت عايز تحرشها علي .. وتوصل ليها فكرة خالتك عايزه تشيل حقك؟؟ ..انا ابرا من حق اليتيم .. العندي مكفيني الحمد لله ..
عمي حسين سكت ومالقى كلمة يقولها والمراة ام لسان طقطقتو ليك طقطقه .. وراجلها ذاتو مالقى كلمة يقولا ..
بس عمي حسين سألها سؤال .. قال ليها ده كلو مافي مشكلة يا اميمة ..
بس انتي كيف تقولي للمحامي البت عيانة وما مكلفة .. قالت ليهو .. اااااي قلت .. انا مافاضية كل مرة اسوق البت اوديها للمحامي عشان تمضى وهي طفلة .. واضيع عليها دراستها .. خلي يفهم انها عيانة ضاريها بشنو؟ بعرفها من وين؟ خلاص كملتو التحقيق معاي؟ .. اقوم امشي؟
.. قال ليها امشي .. قامت مشت وادتني عين كدا يالطيف ..كانها بتقول لي اصبري الليلة بنظمك .. وانا جاتني خوفة من الراجيني ..
الى اللقاء.
