ﻗﺸﻘﺸﺖ ﺩﻣﻮﻋﻲ ﻛﺪﺍ ﻭﺑﻘﻴﺖ ﺍﺗﻠﻔﺖ ﺍﺷﻮﻑ ﺍﻟﻨﺎﺱ ﺍﻟﺒﻌﺎﻳﻨﻮ ﻟﻲ ..
ﺍﻟﻤﻬﻢ ﺍﻟﺮﺍﺟﻞ ﻭﺍﺻﻞ ﻓﻲ ﻛﻼﻣﻮ ﺍﻟﺒﻘﻮﻝ ﻟﻲ ﻓﻴﻬﻮ .
ﻗﺎﻝ ﻟﻲ ﻭﺍﻟﻠﻪ ﺍﻟﻤﺮﺍﺓ ﺩﻱ ﺍﻧﺎ ﺩﻋﻴﺖ ﻋﻠﻴﻬﺎ ﺩﻋﺎ .. ﺷﻮﻓﻲ ﻗﺒﻞ ﻣﺎ ﺍﺩﻋﻲ ﻋﻠﻴﻬﺎ ﺍﻟﺤﺼﻞ ﻟﻴﻬﺎ ﺷﻨﻮ؟ ﻭﺍﻟﻠﻪ ﻛﻞ ﺍﻟﺤﺼﻞ ﻟﻴﻬﺎ ﺗﺴﺘﺎﻫﻠﻮ .. ﺍﺻﻠﻮ ﺭﺑﻨﺎ ﻋﺎﺩﻝ ﻓﻲ ﺍﺣﻜﺎﻣﻮ .. ﻣﺎﺑﻀﻴﻊ ﺣﻖ ﺯﻭﻝ ..
ﻟﻜﻦ ﻭﺍﻟﻠﻪ ﻳﺎﺑﺘﻲ ﺍﻟﻨﺪﺍﻣﺔ ﺍﻟﺤﺼﻠﺖ ﻋﻠﻲ ﺍﻧﺎ ﺍﻟﺒﺤﺮ ﻣﺎﺑﻐﺴﻼ ..
ﺍﻟﻜﻼﻡ ﺩﻩ ﻣﻦ ﻗﺎﻟﺘﻮ ﻟﻲ ﻣﺎﺗﻢ ﻟﻴﻬﻮ ﺗﻼﺕ ﺍﺳﺎﺑﻴﻊ .. ﻭﺍﻧﺎ ﺑﻘﻴﺖ ﺍﺑﻜﻲ ﺍﻟﻠﻴﻞ ﻭﺍﻟﻨﻬﺎﺭ ﻏﺎﻟﺒﻨﻲ ﺍﻻﻛﻞ ﻭﺍﻟﺸﺮﺍﺏ . ﺍﺩﺧﻞ ﺍﻭﺿﺘﻲ ﺑﺮﺍﻱ ﺍﻗﻌﺪ ﺍﺗﻨﺨﺞ ﺯﻱ ﺍﻟﺸﺎﻓﻊ .. ﻭﻣﺸﻴﺖ ﻛﻠﻤﺖ ﺳﻌﺎﺩ ﺍﺧﺘﻲ ﺑﺎﻟﻈﻠﻢ ﺍﻟﻌﻤﻠﺘﻮ ﺍﻟﻤﺮﺍﺓ ﻓﻲ ﺍﺧﻮﻱ ﻓﻴﺼﻞ .. ﻭﺍﻟﺨﺮﺍﺏ ﺍﻟﺨﺮﺑﺘﻮ ﺑﻴﻨﺎ ..
ﺳﻌﺎﺩ ﻋﻤﺘﻚ ﻻﻣﻦ ﺣﻜﻴﺖ ﻟﻬﺎ ﺑﻜﺖ ﺑﻜﺎ ﺷﺪﻳﺪ .. ﻭﻗﺎﻟﺖ ﻟﻲ ﺍﻧﺖ ﻳﺎﻓﺘﺢ ﻻﺯﻡ ﺗﻤﺸﻲ ﺍﻟﺨﺮﻃﻮﻡ .. ﻭﺗﺸﻮﻑ ﺑﺖ ﺍﺧﻮﻙ ﺗﻜﻮﻥ ﺑﻘﺖ ﻛﺒﻴﺮﺓ .. ﻗﺎﻟﻮ ﻗﺎﻋﺪﺓ ﻣﻊ ﺍﻫﻞ ﺍﻣﻬﺎ . ﻭﻗﺎﻟﺖ ﻟﻲ ﺍﻧﺎ ﺍﻟﺤﻤﺪ ﻟﻠﻪ ﻣﺎ ﻗﻠﺖ ﻟﻲ ﻓﻴﺼﻞ ﺍﺧﻮﻱ ﻛﻼﻡ ﻳﺠﺮﺣﻮ .. ﺍﻧﺖ ﺍﻟﻜﻨﺖ ﻣﻌﺎﺩﻳﻬﻮ ..
ﻭﺑﻘﻴﺖ ﺷﺎﻳﻞ ﺍﻷﺣﺰﺍﻥ ﺑﺮﺍﻱ .. ﻣﺎ ﻟﻘﻴﺖ ﺷﻲ ﻣﻤﻜﻦ ﻳﺨﻔﻒ ﻟﻲ ﺍﻻﻟﻢ ﻭﺍﻟﻨﺪﺍﻣﻪ ﻏﻴﺮ ﺍﺯﻭﺭﻙ ﻭﺍﻻﻗﻴﻚ ﻭﺍﺣﺴﻦ ﻓﻴﻚ .. ﺍﻧﺘﻲ ﺑﺖ ﺍﺧﻮﻱ ﺣﻘﻴﻘﺔ ﻳﺎﻣﻬﺞ .. ﺍﻧﺎ ﻟﻮ ﺟﻴﺖ ﺯﺭﺗﻚ ﻣﻦ ﺯﻣﺎﻥ ﻛﺎﻥ ﻋﺮﻓﺘﻚ ﺑﺖ ﺍﺧﻮﻱ ﺑﺎﻟﺸﺒﻪ .. ﻋﻮﻳﻨﺎﺗﻚ ﺩﻳﻞ ﻳﺎﻫﻦ ﻋﻮﻳﻨﺎﺗﻨﺎ .. ﻭﻗﻄﻌﺔ ﺍﻟﻜﻼﻡ .. ﻫﻬﻬﻪ ﺍﻱ ﺍﻧﺎ ﻃﺒﻌﺎ ﻋﻨﺪﻱ ﻗﻄﻌﺔ ﻓﻲ ﻧﺺ ﺍﻟﻜﻼﻡ ﺯﻱ ﺍﺑﻮﻱ ﻧﻔﺴﻲ ﺑﺘﻀﺎﻳﻖ .. ﻭﺍﺑﻮﻱ ﺑﺮﺿﻮ ﻛﺎﻥ ﻛﺪﺍ ﺍﻟﻠﻪ ﻳﺮﺣﻤﻮ ..
ﻗﺎﻝ ﻟﻲ ﻋﺸﺎﻥ ﻛﺪﻱ ﺍﻧﺘﻲ ﺫﺍﺗﻚ ﺍﻧﺎ ﻇﻠﻤﺘﻚ .. ﻳﺎﻣﻬﺞ ﺑﺖ ﻓﺼﻞ ﺍﺧﻮﻱ ..
ﻭﺍﻥ ﺷﺎﺀ ﺍﻟﻠﻪ ﺗﺒﻘﻰ ﺯﻳﺎﺭﺗﻲ ﻟﻴﻚ ﺩﻱ ﺑﺪﺍﻳﺔ ﺧﻴﺮ ﻟﻲ ﻭﻟﻴﻚ ..
ﻭﺩﻩ ﻛﻞ ﺍﻟﺤﺼﻞ ﻳﺎﻣﻬﺞ ﻣﺎﺗﺒﻜﻲ .. ﻭﻣﺎﺗﺴﻜﺘﻲ ﺭﺩﻱ ﻋﻠﻲ .. ﺍﻣﻜﻦ ﺭﺩﻙ ﻳﺨﻔﻒ ﻋﻠﻲ ﺍﻟﻤﻲ ﺍﻟﺤﺎﺳﻲ ﺑﻴﻬﻮ ..
ﻃﺒﻌﺎ ﻳﺎﺟﻤﺎﻋﺔ ﺍﻧﺎ ﻧﻔﺴﻲ ﺍﻗﻮﻝ ﻟﻴﻬﻮ ﺍﺑﻮﻱ ﻗﺎﻃﻌﻚ . ﻋﺸﺎﻥ ﺳﻤﻊ ﺍﻟﻜﻼﻡ ﺍﻟﺒﻴﻨﻚ ﻭﺑﻴﻦ ﻣﺮﺍﺗﻮ .. ﻟﻜﻦ ﻓﻜﺮﺕ ﻓﻲ ﺣﺎﺟﺘﻴﻦ ﻗﺒﻞ ﺍﻗﻮﻝ ..
ﺍﻟﺤﺎﺟﺔ ﺍﻻﻭﻟﻰ ﺍﻧﻮ ﺍﺑﻮﻱ .. ﻛﺎﻥ ﺩﺍﺳﻲ ﺍﻟﺤﺎﺟﺔ ﺩﻱ .. ﻭﻣﺎ ﺻﺮﺡ ﺑﻴﻬﺎ ﺣﺘﻰ ﻻﺧﻮﻫﻮ ..
ﻭﻣﺎ ﻛﻠﻢ ﺯﻭﻝ ﻏﻴﺮﻱ ﺍﻧﺎ .. ﻣﻌﻨﺎﻫﺎ ﺩﻩ ﺳﺮ ﻣﻦ ﺍﺳﺮﺍﺭ ﺍﺑﻮﻱ ﺍﺩﺍﻧﻲ ﻟﻴﻬﻮ .. ﻣﺴﺘﺤﻴﻞ ﺍﻃﻠﻌﻮ ..
ﺍﻟﺤﺎﺟﺔ ﺍﻟﺘﺎﻧﻴﻪ : ﻋﻤﻲ ﻓﺘﺢ ﻧﺪﻣﺎﻥ ﺍﻧﻮ ﺍﺗﻬﻢ ﺍﺧﻮﻫﻮ ﺑﺎﻟﻜﺬﺏ . ﺑﺴﺒﺐ ﻛﻼﻡ ﺍﻟﻤﺮﺍﺓ ..
ﻟﻤﻦ ﻳﻌﺮﻑ ﺍﻧﻮ ﺍﺧﻮﻫﻮ .. ﻛﺎﺷﻒ ﻋﻼﻗﺘﻮ ﺑﺰﻭﺟﺘﻮ .. ﻭﻛﺎﻥ ﻛﺎﺗﻢ ﺍﻟﻜﻼﻡ .. ﺍﻟﻨﺪﺍﻣﺔ ﺑﺘﺰﻳﺪ ﻋﻠﻴﻬﻮ .. ﺍﻟﺮﺍﺟﻞ ﺩﻩ ﻣﺎﻧﺎﻗﺺ ..
ﻓﻘﻤﺖ ﺍﺧﺘﺮﺕ ( ﺣﺒﻴﺒﻲ ﺍﻟﺼﻤﺖ ) ﺍﻟﺒﺴﺘﻤﺘﻊ ﺑﻴﻬﻮ ﺩﺍﻳﻤﺎ ﻭﺳﻜﺘﺎ ..
ﻭﻣﺎﺟﺒﺖ ﻟﻴﻬﻮ ﺳﻴﺮﺓ ﺑﺎﻟﻤﻮﺿﻮﻉ ﺩﻩ .. ﻛﻨﺖ ﻣﻨﺪﻣﺠﺔ ﺑﻜﻞ ﺣﻮﺍﺳﻲ ﻣﻊ ﺍﻟﻜﻼﻡ ..
ﺑﺲ ﺍﻟﻘﻌﺪﺓ ﺟﺎﺑﺖ ﻟﻲ ﻭﺟﻊ ﻓﻲ ﻣﺤﻞ ﺿﺮﺑﺔ ﺣﺎﺩﺙ . ﺣﺼﻞ ﻣﻌﺎﻱ ﺍﻟﺴﻨﻪ ﺍﻟﻔﺎﺗﺖ . ﺑﺤﻜﻲ ﻟﻴﻜﻢ ﻋﻨﻪ ﻟﻘﺪﺍﻡ ﻛﺪﺍ ..
ﺍﻫﺎ ﻗﻠﺖ ﻟﻴﻬﻮ ﻳﺎﻋﻤﻲ ﻓﺘﺢ ﺍﺭﺩ ﻋﻠﻴﻚ ﺍﻗﻮﻝ ﻟﻴﻚ ﺷﻨﻮ؟
ﺍﻭﻻ ﺍﻧﺖ ﻛﻴﻒ ﺗﺼﺪﻕ ﻛﻼﻡ ﻣﺮﺍﻩ ﺧﺎﻳﻨﺔ .. ﻓﻲ ﺍﺧﻮﻙ ﻭﺩ ﺍﻣﻚ ﻭﺍﺑﻮﻙ .. ﻣﻮﺵ ﻛﺎﻥ ﺍﻟﻤﻔﺮﻭﺽ ﺑﻤﺠﺮﺩ ﻣﺎﻗﺎﻟﺖ ﻟﻴﻚ ﺍﺧﻮﻙ ﻋﻨﺪﻭ ﻭﻋﻨﺪﻭ .. ﺗﻤﺸﻲ ﺗﺴﺄﻟﻪ .. ﻭﺗﺤﺎﺳﺒﻮ ﻟﻴﻪ ﺍﺗﺰﻭﺝ ﺍﻟﻤﺮﺍﺓ ﻣﺎﺩﺍﻡ ﻫﻮ ﻛﺪﺍ؟؟
ﺷﻮﻑ ﺗﺼﺪﻳﻘﻚ ﻟﻠﻜﻼﻡ ﺍﻟﻜﺬﺏ ﻓﻲ ﺍﺑﻮﻱ ﻋﻤﻞ ﺷﻨﻮ . ؟
ﺣﺮﻣﺖ ﺍﺑﻮﻱ ﻣﻦ ﺍﻫﻠﻮ .. ﻓﺮﻗﺘﻮ ﻣﻦ ﺍﻣﻪ ﻭﺍﺑﻮﻩ .. ﻭﻣﻦ ﺍﺧﻮﺍﺗﻮ .. ﺍﺗﻬﻤﺖ ﺍﻣﻲ ﺍﻟﻠﻪ ﻳﺮﺣﻤﻬﺎ ﻓﻲ ﺷﺮﻓﻬﺎ .. ﻭﺭﻣﻴﺘﻬﺎ ﺑﺎﻟﺮﺯﻳﻠﻪ .. ﻭﻃﻠﻌﺘﻨﻲ ﺍﻧﺎ ﻣﻮﻟﻮﺩﺓ ﻏﻴﺮ ﺷﺮﻋﻴﺔ ..
ﻭﺍﺧﻮﻙ ﻣﺎﺕ ﻏﻀﺒﺎﻥ ﻋﻠﻴﻚ .. ﻭﺣﺮﻣﺘﻨﻲ ﺍﻧﺎ ﻣﻦ ﺍﻫﻠﻲ .. ﻭﺍﻧﺎ ﺍﺗﺸﺮﺩﺕ .. ﻭﺍﺗﺒﺸﺘﻨﺖ ..
ﻭﻣﺎﻛﺎﻥ ﻋﻨﺪﻱ ﺳﻨﺪ ﻏﻴﺮ ﺭﺏ ﺍﻟﻌﺎﻟﻤﻴﻦ .. ﻻ ﺍﺑﻮ ﻻ ﺍﻡ ﻻ ﺍﺧﻮ ﻻﻋﻢ ..
ﺍﻧﺎ ﻣﺎﻣﺸﻜﻠﺔ ﻋﺎﻓﻴﺔ ﻟﻴﻚ ﻣﻦ ﺣﻘﻲ ﺭﺑﻨﺎ ﻳﺪﻳﻚ ﺍﻟﻌﺎﻓﻴﺔ .. ﻟﻜﻦ ﺍﺑﻮﻱ ﻭﺍﻣﻲ ﺣﻘﻬﻢ .. ﺩﻩ ﻣﺎ ﻋﻨﺪﻱ ﺍﻧﺎ .. ﺍﻣﺮﻭ ﻋﻨﺪ ﺭﺑﻨﺎ ﻳﻮﻡ ﻳﺠﻤﻊ ﺍﻟﺨﻼﻳﻖ ﻭﻳﺤﻜﻢ ﻓﻲ ﺍﻟﻤﻈﺎﻟﻢ ..
ﻗﺎﻝ ﻟﻲ ﺭﺑﻨﺎ ﻛﺮﻳﻢ ﻳﺎﺑﺘﻲ .. ﻭﻫﻮ ﺍﻟﻌﺎﻟﻢ ﺑﻲ ﻛﻞ ﺷﻲ ..
ﺍﻟﻤﻬﻢ ﻫﺴﻲ ﺍﻧﺘﻲ ﺍﻋﺮﻓﻲ ﺍﻧﻚ ﻋﻨﺪﻙ ﻋﻢ .. ﻭﺡ ﻳﻘﻴﻒ ﻣﻌﺎﻙ ﻓﻲ ﺣﻴﺎﺗﻚ . ﻓﻲ ﺍﻟﻬﻴﻨﺔ ﻭﺍﻟﻘﺎﺳﻴﺔ .. ﻭﺍﻱ ﺷﻲ ﺗﺤﺘﺎﺟﻲ ﻟﻴﻬﻮ ﺗﻀﺮﺑﻲ ﻟﻲ ..
ﺍﻋﺘﺒﺮﻳﻨﻲ ﺍﺑﻮﻙ .. ﺍﻧﺎ ﻋﺎﻳﺰ ﺑﺎﻱ ﻃﺮﻳﻘﺔ ﺍﻋﻤﻞ ﻟﻲ ﺣﺎﺟﺔ .. ﺍﺑﺮ ﺑﻴﻬﺎ ﻓﻴﺼﻞ ﺍﺧﻮ ﻣﺎﻓﻲ ﻏﻴﺮﻙ ﺍﻧﺘﻲ ..
ﻗﻠﺖ ﻟﻴﻬﻮ ﺧﻴﺮ ﻳﺎ ﻋﻤﻲ .. ﺍﻟﺒﺴﻮﻳﻬﻮ ﺍﻟﻠﻪ ﻛﻠﻮ ﺧﻴﺮ .. ﺭﺑﻨﺎ ﻳﺪﻳﻚ ﺍﻟﻌﺎﻓﻴﺔ ..
ﺑﺲ ﻟﻮ ﺳﻤﺤﺖ ﻋﻨﺪﻱ ﺳﺆﺃﻟﻴﻦ ﻟﻮﻣﻤﻜﻦ ﻳﺎﻋﻤﻲ .. ﻗﺎﻝ ﻟﻲ ﺍﺗﻔﻀﻠﻲ ..
ﻗﻠﺖ ﻟﻴﻬﻮ ﺍﻧﺎ ﺳﻤﻌﺖ ﻣﻦ ﺍﺑﻮﻱ ﺍﻧﻮ ﻋﻨﺪﻱ ﻋﻤﺘﻴﻦ .. ﺳﻌﺎﺩ ﻭﺑﺖ ﺍﻟﻤﻨﻰ ﻭﺷﺎﻳﻔﺎﻙ ﻣﺎ ﺍﺗﻜﻠﻤﺖ ﻟﻲ ﻋﻦ ﺑﺖ ﺍﻟﻤﻨﻰ .. ﻗﺎﻝ ﻟﻲ ﺑﺖ ﺍﻟﻤﻨﻰ ﺍﺗﻮﻓﺖ ﻗﺒﻞ ﺧﻤﺴﻪ ﺳﻨﻴﻦ ﺍﻟﻠﻪ ﻳﺮﺣﻤﻬﺎ .. ﻗﻠﺖ ﻟﻴﻬﻮ ﺍﻟﻠﻪ ﻳﺮﺣﻤﻬﻢ ﺟﻤﻴﻌﺎ ﺍﻥ ﺷﺎﺀ ﺍﻟﻠﻪ .. ﺍﻫﺎ ﻣﺎﻋﻨﺪﻫﺎ ﺍﻭﻻﺩ ﻗﺎﻝ ﻟﻲ ﺍﺗﻮﻓﺖ ﻓﻲ ﺍﻟﻮﻻﺩﻩ .. ﻛﺎﻧﺖ ﺑﻜﺮﻳﻪ ﻳﺎﺩﻭﺏ ﺍﻟﻮﻟﺪﺓ ﺍﻻﻭﻟﻰ ﻟﻴﻬﺎ .. ﻭﺟﺎﺑﺖ ﺑﺖ ﻣﺎﺗﺖ ﺑﻌﺪ ﺍﺳﺒﻮﻉ ..
ﻗﻠﺖ ﻟﻴﻬﻮ ﻃﻴﺐ ﺍﻟﺴﺆﺍﻝ ﺍﻟﺘﺎﻧﻲ ﻳﺎﻋﻤﻲ ..
ﻃﺒﻌﺎ ﺑﻴﺖ ﺍﺑﻮﻱ ﺩﻩ .. ﺑﻌﺪ ﺍﺑﻮﻱ ﺍﺗﻮﻓﻰ .. ﺑﻘﻰ ﻭﺭﺛﺔ ﺑﻴﻨﻲ ﻭﺑﻴﻨﻚ ﻭﺑﻴﻦ ﻋﻤﺘﻲ .. ﻭﺩﻩ ﺣﻖ ﻣﻦ ﺍﻟﺤﻘﻮﻕ .. ﻻﺯﻡ ﺍﻱ ﺯﻭﻝ ﻳﺎﺧﺪ ﻧﺼﻴﺒﻮ ..
ﻗﺎﻝ ﻟﻲ ﻳﺎﺑﺘﻲ ﻗﻮﻟﻲ ﺑﺴﻢ ﺍﻟﻠﻪ .. ﺍﻟﺒﻴﺖ ﺑﻴﺘﻚ ﺍﻧﺘﻲ .. ﻭﺍﺑﻮﻙ ﺑﻨﺎﻫﻮ ﻟﻴﻜﻢ ﺍﻧﺘﻲ ﻭﺍﻣﻚ .. ﻭﻫﺴﻊ ﻻ ﺃﻧﺎ .. ﻭﻻ ﺃﺧﺘﻲ ﺳﻌﺎﺩ .. ﻣﺎﻣﺤﺘﺎﺟﻴﻦ ﻟﻴﻬﻮ ﻋﺸﺎﻥ ﻧﻨﺎﺯﻋﻚ ﻓﻴﻬﻮ .. ﺍﻟﻜﻼﻡ ﺩﻩ ﺗﺎﻧﻲ ﻣﺎﺗﻘﻮﻟﻴﻬﻮ .. ﻧﺤﻦ ﺑﻲ ﺧﻴﺮﻧﺎ ﺍﻟﺤﻤﺪ ﻟﻠﻪ ..
ﻗﻠﺖ ﻟﻴﻬﻮ ﻳﺎﻋﻤﻲ ﺩﻩ ﺣﻖ ﺣﺘﻰ ﻟﻮ ﻣﺎ ﻣﺤﺘﺎﺟﻴﻦ ﻟﻴﻬﻮ ..
ﻗﺎﻝ ﻟﻲ ﻃﻴﺐ ﺭﺍﻳﻚ ﺷﻨﻮ ﺍﻧﺎ ﺍﻛﺘﺐ ﻟﻴﻚ ﺗﻨﺎﺯﻝ ﻋﻦ ﻧﺼﻴﺒﻲ .. ﻭﻋﻤﺘﻚ ﺗﻜﺘﺐ ﻟﻴﻚ ﺗﻨﺎﺯﻝ ..
ﺑﻌﺪﻳﻦ ﺍﺑﻮﻙ ﻋﻨﺪﻭ ﻧﺼﻴﺐ ﻓﻲ ﺍﺭﺽ ﺟﺪﻙ ﻋﻤﺮﻭ ﻣﺄﺳﺄﻝ ﻣﻨﻬﺎ .. ﻫﻨﺎﻙ ﻓﻲ ﺍﻟﺒﻠﺪ ﺍﻧﺘﻲ ﺡ ﺗﺠﻲ ﺗﻜﻮﺳﻲ ﻟﻴﻬﺎ؟ ﻗﻠﺖ ﻟﻴﻬﻮ ﻻﻻ ﻃﺒﻌﺎ ..
ﻗﺎﻝ ﻟﻲ ﺧﻼﺹ ﺑﻴﺘﻚ ﻋﺎﻓﻴﻨﻮ ﻟﻴﻚ .. ﻟﻮ ﻓﻲ ﺯﻭﻝ ﻣﻦ ﻧﺎﺱ ﺍﻟﺒﻠﺪ ﺳﻤﻊ ﺍﻧﻲ ﻓﺘﺤﺖ ﻣﻌﺎﻙ ﻣﻮﺿﻮﻉ ﻓﻲ ﺑﻴﺖ ﺍﺑﻮﻙ .. ﺑﺸﻴﻠﻮﻧﻲ ﻓﻲ ﺧﺸﻮﻣﻬﻦ
ﺍﻟﺤﻘﻴﻘﺔ ﻭﺍﻟﻠﻪ ﻳﺎ ﺟﻤﺎﻋﺔ ﻋﻤﻲ ﻃﻠﻊ ﺭﺍﺟﻞ ﻭﺩ ﺭﺟﺎﻝ ﻣﺎﻓﻴﻬﻮ ﻛﻠﻤﺔ .. ﻣﻊ ﺍﻧﻲ ﻛﻨﺖ ﻏﻀﺒﺎﻧﺔ ﻋﻠﻴﻬﻮ .. ﻛﺎﺭﻫﺎﻫﻮ ﻛﺮﺍﻫﻴﺔ ﺍﻟﺘﺤﺮﻳﻢ . ﻣﻦ ﻛﻼﻡ ﺍﺑﻮﻱ ﺍﻟﻘﺎﻟﻮ ﻋﻨﻪ ..
ﺍﻟﻤﻬﻢ ﺑﻌﺪ ﺩﺍﻙ ﺍﺗﻮﻧﺴﻨﺎ
ﻗﺎﻝ ﻟﻲ ﺍﺣﻜﻲ ﻟﻲ ﻋﻦ ﺣﻴﺎﺗﻚ ﻭﺍﻟﺤﺼﻞ ﻋﻠﻴﻚ ﺷﻨﻮ ﺑﻌﺪ ﺍﺑﻮﻙ ﻣﺎﺕ .. ﻭﻛﻴﻒ ﻋﺸﺘﻲ ﻣﻊ ﺧﺎﻟﺘﻚ ﻭﺭﺍﺟﻠﻬﺎ؟ .. ﻗﺒﻴﻞ ﻗﻠﺘﻲ ﻟﻲ ﺍﺗﺒﺸﺘﻨﺖ ﻭﺍﺗﺸﺮﺩﺕ ..
ﻗﻠﺖ ﻟﻴﻬﻮ ﺍﻟﺤﻤﺪ ﻟﻠﻪ ﻳﺎﻋﻤﻲ ﺧﺎﻟﺘﻲ ﺍﻧﺴﺎﻧﺔ ﻓﺎﺿﻠﺔ .. ﻓﺘﺤﺖ ﻟﻲ ﺑﻴﺘﻬﺎ ﻭﻣﺎﻓﺮﺯﺗﻨﻲ ﻣﻦ ﺑﻨﺎﺗﻬﺎ .. ﻭﻣﺎﺣﺴﻴﺖ ﻣﻌﺎﻫﺎ ﺍﻧﻲ ﻏﺮﻳﺒﺔ ..
ﺍﺩﺗﻨﻲ ﻛﻞ ﺍﻟﺤﻨﺎﻥ .. ﻭﺭﺍﺟﻠﻬﺎ ﺭﺍﺟﻞ ﻣﻼﻙ . ﻭﻗﺮﻭﻧﻲ ﻓﻲ ﺍﻟﻤﺪﺭﺳﺔ ﺍﻟﺨﺎﺻﻪ ﻭﺑﺪﻓﻌﻮ ﻟﻲ ﺍﻟﺮﺳﻮﻡ ﺳﻨﻮﻳﺎ ﺍﻟﺤﻤﺪ ﻟﻠﻪ ﻣﺎ ﻣﺤﻮﺟﻨﻲ ﻟﺤﺎﺟﻪ .. ﺭﺑﻨﺎ ﻳﺪﻳﻬﺎ ﺍﻟﻌﺎﻓﻴﺔ ﺍﻟﺰﻭﻝ ﻣﺎﻳﻨﻜﺮ ﻓﻀﻞ ﺍﻟﻨﺎﺱ ..
ﻭﺍﻟﺤﻤﺪ ﻟﻠﻪ ﻣﺎﺷﺔ ﻓﻲ ﺩﺭﺍﺳﺘﻲ ﻛﻮﻳﺲ ﺑﺎﻟﺮﻏﻢ ﻣﻦ ﺍﻧﻲ ﺣﺼﻠﺖ ﻟﻲ ﻋﻮﺍﺭﺽ . ﻟﻜﻦ ﺍﻧﺎ ﺍﻟﺤﻤﺪ ﻟﻠﻪ ﻣﺼﺮﺓ ﻋﻠﻰ ﺍﻟﻤﻮﺍﺻﻠﺔ ﻻﻧﻲ ﻣﺘﻔﻮﻗﺔ ﻭﺷﺎﻃﺮﺓ ..
ﻟﻤﻦ ﺍﺑﻮﻱ ﻛﺎﻥ ﻋﻴﺎﻥ .. ﺧﻠﻴﺖ ﺍﻟﺪﺭﺍﺳﺔ ﺳﻨﺘﻴﻦ ﻭﺍﺷﺘﻐﻠﺖ ﻃﻌﻤﻴﺔ ﻭﺳﻠﻄﺔ ﺑﺒﻴﻌﻬﺎ ﻟﺒﻨﺎﺕ ﺍﻟﻤﺪﺭﺳﺔ ﻋﺸﺎﻥ ﺍﺑﻮﻱ ﻣﺎﻳﺤﺘﺎﺝ ﻟﺮﺍﺟﻞ ..
ﻭﻟﻤﻦ ﻗﺒﻠﻮﻧﻲ ﻫﻨﺎ ﻓﻲ ﺍﻟﺤﺎﺝ ﻳﻮﺳﻒ ﻓﻄﻄﻮﻧﻲ ﺳﻨﺔ .. ﻭﻧﺰﻟﺖ ﻣﻊ ﺑﺖ ﺧﺎﻟﺘﻲ ﻓﻲ ﻓﺼﻞ ﻭﺍﺣﺪ ..
ﺑﺲ ﻓﻲ ﺳﻨﺔ ﺗﺎﻣﻦ ﺍﻧﺎ ﻋﻴﻴﺖ ﺑﺎﻟﺘﺎﻳﻔﻮﻳﺪ .. ﺭﺍﻗﺪﺓ ﺳﺖ ﺷﻬﻮﺭ .. ﻭﺍﻟﺴﻨﻪ ﺿﺎﻋﺖ ﻋﻠﻲ .. ﻭﺍﻟﺴﻨﺔ ﺍﻟﻔﺎﺗﺖ ﻓﻲ ﺑﺪﺍﻳﺔ ﺍﻟﻌﺎﻡ ﺍﻟﺪﺭﺍﺳﻲ . ﺣﺼﻞ ﻟﻴﻨﺎ ﺣﺎﺩﺙ ﺭﻛﺸﺔ ﺍﻧﺎ ﻭﺑﺖ ﺧﺎﻟﺘﻲ . ﻭﺍﻧﺎ ﺣﺼﻞ ﻟﻲ ﻛﺴﺮ ﻓﻲ ﺍﻟﻤﺨﺮﻭﻗﺔ ﻭﺷﻖ ﻓﻲ ﺍﻟﺤﻮﺽ . ﻭﺭﻗﺪﺕ ﻗﺮﻳﺐ ﺍﻟﺨﻤﺴﺔ ﺷﻬﻮﺭ ﻭﺑﺮﺿﻮ ﺍﻣﺘﺤﺎﻧﺎﺕ ﺍﻟﺸﻬﺎﺩﻩ ﺿﺎﻋﺖ ﻋﻠﻲ .. ﻭﺑﻄﻨﻲ ﻃﻤﺖ ﻣﻦ ﺍﻟﺪﺭﺍﺳﺔ .. ﺑﺴﺒﺐ ﺍﻟﻌﻮﺍﺭﺽ ﺍﻟﺒﺘﺤﺼﻞ ﻟﻲ . ﻟﻜﻦ ﻣﺼﺮﺓ ﺍﻭﺍﺻﻞ ﺩﺭﺍﺳﺘﻲ ..
ﺑﺖ ﺧﺎﻟﺘﻲ ﺍﻟﻜﺎﻧﺖ ﻣﻌﺎﻱ ﻓﻲ ﺍﻟﻔﺼﻞ . ﺍﺗﻘﺪﻣﺖ ﻋﻠﻲ ﻓﻲ ﺍﻟﺪﺭﺍﺳﺔ ﻫﺴﻲ ﻓﻲ ﺍﻟﺠﺎﻣﻌﺔ ﻭﺍﻧﺎ ﻳﺎﺩﻭﺏ ﻣﻤﺘﺤﻨﺔ .. .. ﻟﻜﻦ ﻣﺘﻔﺎﺋﻠﺔ .. ﻣﺎ ﺡ ﺍﺳﺘﺴﻠﻢ ..
ﻗﺎﻝ ﻟﻲ ﻣﺎﺷﺎﺀ ﺍﻟﻠﻪ ﻋﻠﻴﻚ ﻳﺎﺑﺘﻲ .. ﺩﻩ ﻃﺒﻊ ﺍﺑﻮﻙ ﺍﺻﻠﻮ ﻣﺎﺑﺴﺘﺴﻠﻢ .. ﻭﻛﺖ ﻳﻘﻊ ﻻﺯﻡ ﻳﻘﻮﻡ ﺑﻜﻞ ﻗﻮﺗﻪ .. ﻗﻠﺖ ﻟﻴﻬﻮ ﺻﺪﻗﺖ ﻳﺎﻋﻤﻲ .. ﺍﺣﻜﻲ ﻟﻴﻚ ﺣﺎﺟﻪ .. ﻋﺎﺭﻑ ﺍﺑﻮﻱ ﻛﺎﻥ ﻣﺸﻠﻮﻝ ﻓﻲ ﺍﻟﻜﺮﺳﻲ ﻭﺑﺮﻣﻲ ﺍﻟﻄﻌﻤﻴﺔ .. ﻭﻳﻜﺴﺐ ﻗﺮﻭﺵ ..
ﻭﻓﻲ ﻧﺎﺱ ﺍﻟﻮﺍﺣﺪ ﺻﺤﺘﻮ ﺯﻱ ﺍﻟﺘﻮﺭ .. ﻭﻗﺎﻋﺪ ﻋﺎﻃﻞ ..
ﻗﻌﺪ ﻳﻀﺤﻚ ,, ﺍﻟﻤﻬﻢ ﺍﻧﺎ ﺑﺘﻮﻧﺲ ﻣﻌﺎﻫﻮ ﺍﺗﺒﺴﻄﺖ ﻣﻦ ﺟﻴﻬﺔ ﻭﻣﺘﻀﺎﻳﻘﺔ ﻣﻦ ﺟﻴﻬﺔ .. ﻛﻞ ﻣﺮﺓ ﺑﺘﺬﻛﺮ ﻭﺻﻴﺔ ﺍﺑﻮﻱ ..
ﺑﻘﻮﻝ ﻟﻲ ﺍﻟﻨﺎﺱ ﺩﻳﻞ ﻣﺎﻋﻨﺪﻙ ﻣﻌﺎﻫﻢ ﺍﻱ ﻋﻼﻗﻪ .. ﺍﻧﺘﻲ ﻣﺎﻋﻨﺪﻙ ﺍﻫﻞ ﺍﺑﻮ ﻳﺎ ﻣﻬﺞ ﻓﺎﻫﻤﺔ؟ .. ﻟﻤﻦ ﺍﺗﺬﻛﺮ ﻛﻼﻣﻮ ﺩﻩ .. ﻗﻠﺒﻲ ﻳﻮﺟﻌﻨﻲ ﻣﻦ ﻗﻌﺪﺗﻲ ﻣﻊ ﻋﻤﻲ .. ﻟﻤﻦ ﺍﺷﻮﻑ ﺍﻟﺮﺍﺟﻞ ﺍﻟﻘﺪﺍﻣﻲ ﺩﻩ ﻭﻃﻴﺒﺘﻮ ﻭﺍﺻﺎﻟﺘﻮ .. ﻭﻧﺪﻣﻮ . ﺑﺤﻦ ﻋﻠﻴﻬﻮ ﺑﻌﻄﻒ ﻋﻠﻲ ﺣﺎﻟﻪ .. ﺍﻟﻤﻬﻢ ﻭﺍﻟﻠﻪ ﻣﺎﻋﺎﺭﻓﺔ ﺍﻋﻤﻞ ﺷﻨﻮ ..
ﺑﻌﺪ ﺧﻠﺼﻨﺎ ﻗﻌﺪﺗﻨﺎ ﺩﻳﻚ .. ﻗﻠﺖ ﻟﻴﻬﻮ ﺍﻫﺎ ﺍﻧﺖ ﺡ ﺗﻤﺸﻲ ﻋﻠﻲ ﻭﻳﻦ . ؟
ﻗﺎﻝ ﻟﻲ ﻋﻨﺪﻱ ﺟﻤﺎﻋﺔ ﻣﻦ ﺍﻟﺒﻠﺪ ﻓﻲ ﺍﻻﺯﻫﺮﻱ .. ﺑﻤﺸﻲ ﺍﺑﻴﺖ ﻣﻌﺎﻫﻢ ﻭﺑﺎﻛﺮ ﺍﻟﺼﺒﺎﺡ ﺑﺴﺎﻓﺮ ﺍﻟﺒﻠﺪ .. ﺩﺧﻞ ﺍﻳﺪﻭ ﻓﻲ ﺟﻴﺒﻮ ﻃﻠﻊ ﻟﻲ ﻗﺮﻭﺵ .. ﻗﺎﻝ ﻟﻲ ﻫﺎﻙ ﺷﻴﻠﻲ ﺩﻱ ﺍﺗﺼﺮﻓﻲ ﺑﻴﻬﺎ ﺍﻧﺘﻲ ﻃﺎﻟﺒﺔ ﻭﺑﺘﻜﻮﻧﻲ ﻣﺤﺘﺎﺟﺔ ﺣﺎﺟﺎﺕ ..
ﻗﻠﺖ ﻟﻴﻬﻮ .. ﻭﺍﻟﻠﻪ ﺍﻟﺤﻤﺪ ﻟﻠﻪ .. ﺍﻟﺤﺎﻝ ﻣﺴﺘﻮﺭ ﻳﺎﻋﻤﻲ ﺍﻧﺖ ﻗﺪﺍﻣﻚ ﺳﻔﺮ .. ﺗﺴﻠﻢ ..
ﻗﺎﻝ ﻟﻲ ﻟﻮ ﺩﺍﻳﺮﺍﻧﻲ ﺍﻣﺸﻲ ﺿﻤﻴﺮﻱ ﻣﺮﺗﺎﺡ .. ﺷﻴﻠﻴﻬﺎ ﺗﻌﺒﻴﺮ ﻋﻦ ﺍﻟﻤﺤﺒﺔ ﻟﻲ ﻋﻤﻚ .. ﺷﻠﺘﻬﺎ ﻣﻨﻮ .. ﻭﺍﻧﺎ ﻣﺤﺮﺟﺔ ﻟﻜﻦ ﻣﺎ ﺩﺍﻳﺮﺓ ﺍﻛﺴﺮ ﺑﺨﺎﻃﺮﻩ .. ﻭﺍﺿﺎﻋﻒ ﻋﻠﻴﻬﻮ ﺍﻟﻨﺪﺍﻣﻪ ..
ﺷﻜﺮﺗﻮ ﻭﻭﺩﻋﺘﻮ ﻟﻤﻦ ﺧﻨﻘﺘﻨﻲ ﻋﺒﺮﻩ ﻭﻋﺎﻳﺰﻩ ﺍﺑﻜﻲ ﻣﺎﻋﺮﻓﻪ ﻟﻴﻪ . ﻭﻣﺸﻰ ﻭﺍﻧﺎ ﺭﺟﻌﺖ ﻋﻠﻰ ﺑﻴﺖ ﻧﺎﺱ ﺧﺎﻟﺘﻲ ﻓﻲ ﺍﻟﺤﺎﺝ ﻳﻮﺳﻒ .. ﻭﻃﻮﻝ ﺍﻟﻄﺮﻳﻖ ﺍﻧﺎ ﺑﻔﻜﺮ ﻓﻲ ﺍﻟﺤﺎﺻﻞ ﺩﻩ .. ﻫﺴﻲ ﺃﻧﺎ ﺍﻗﺪﺭ ﺍﺗﻌﺎﻣﻞ ﻣﻊ ﻋﻤﻲ ﺩﻩ ﻛﻴﻒ ﻣﻊ ﻭﻋﺪﻱ ﻻﺑﻮﻱ؟ .. ﻭﺍﻗﺪﺭ ﺍﻗﺎﻃﻌﻮ ﻛﻴﻒ ﺑﻌﺪ ﺍﻟﺠﻠﺴﺔ ﺑﺘﺎﻋﺔ ﺍﻟﻠﻴﻠﺔ ﺩﻱ؟ .. ﺍﻟﻠﻪ ﻳﺴﺎﻣﺤﻚ ﻳﺎﺳﻮﺳﻦ .. ﻛﻨﺖ ﺍﻟﺴﻮﺳﺔ ﺍﻟﻤﺪﺳﻮﺳﺔ .. ﻭﺍﻟﺤﻴﺎﺓ ﺍﻟﻤﻨﺤﻮﺳﻪ ..
ﻭﺻﻠﺖ ﺍﻟﺒﻴﺖ ﻭﺧﺎﻟﺘﻲ ﻻﻗﺘﻨﻲ ﻓﻲ ﺍﻟﺤﻮﺵ .. ﺷﺎﻳﻠﻪ ﻟﻴﻬﺎ ﺻﻴﻨﻴﺔ ﺷﺎﻱ ﺑﺘﻨﻀﻒ ﻓﻴﻬﺎ ﺑﻲ ﻓﻮﻃﻪ .. ﻗﺎﻟﺖ ﻟﻲ ﺗﻌﺎﻟﻲ ﻳﺎﻣﻬﺞ ﺍﻫﺎ ﺍﻫﺎ ﺍﻟﺤﺼﻞ ﺷﻨﻮ؟ ﺍﺣﻜﻲ ﻟﻲ ..
ﻗﻠﺖ ﻟﻴﻬﺎ ﺩﻗﻴﻘﺔ ﻳﺎﺧﺎﻟﺘﻲ ﺍﻟﻨﺎﺧﺪ ﻧﻔﺴﻲ .. ﻭﺍﻟﻠﻪ ﻣﻦ ﺍﻟﻘﻌﺪﺓ .. ﺣﺎﺳﺔ ﺑﻲ ﻣﺤﻞ ﺍﻟﻀﺮﺑﺔ ﺑﺘﺎﻋﺔ ﺍﻟﺤﺎﺩﺙ ﻣﺨﺮﻭﻗﺘﻲ ﺑﻨﺘﺢ ﻟﻤﻦ ﺭﺟﻠﻲ ﻣﻨﻤﻠﻪ . ﻭﺣﻴﻠﻲ ﻛﻠﻮ ﻣﻴﺖ .. ﻗﺎﻟﺖ ﻟﻲ ﺧﻼﺹ ﺧﺸﻲ ﺍﺭﻗﺪﻱ ﺷﻮﻳﺔ ﺍﻧﺎ ﺑﺠﻴﻚ . ﺍﻟﻨﻮﺩﻱ ﺍﻟﺸﺎﻱ ﻟﻲ ﻋﻤﻚ ﻣﺤﺠﻮﺏ ..
ﻋﻤﻲ ﻣﺤﺠﻮﺏ ﻗﺎﻋﺪ ﻓﻲ ﺑﺮﻧﺪﺗﻮ .. ﻭﻣﺮﻛﺐ ﻧﻈﺎﺭﺍﺗﻮ ﻭﻣﺎﺳﻚ ﺍﻟﺘﻠﻔﻮﻥ .. ﺍﻟﻜﻼﻡ ﺩﻩ ﻗﺒﻞ ﺍﻟﻤﻐﺮﺏ ..
ﺧﺸﻴﺖ . ﻟﻘﻴﺖ ﺳﻠﻤﻰ ﺷﻐﺎﻟﺔ ﻓﻲ ﺍﻳﺒﺎﺩ .. ﻭﺑﺘﻠﻌﺐ ﻟﻴﻬﺎ ﻓﻲ ﻟﻌﺒﺔ . ﻭﺍﻟﻠﻌﺒﺔ ﺻﻮﺗﻬﺎ ﻋﺎﻟﻲ .. ﺳﻠﻤﺖ ﻋﻠﻴﻬﺎ ﻭﺭﻗﺪﺕ ﺷﻮﻳﺔ ..
ﻭﺳﺎﺭﺓ ﻃﺒﻌﺎ ﻃﻠﻌﺖ ﺍﻟﺸﻐﻞ ﺷﻐﺎﻟﺔ ﻣﻮﻇﻔﺔ ﺍﺳﺘﻘﺒﺎﻝ ﻓﻲ ﻣﺮﻛﺰ ﺻﺤﻲ ﻗﺮﻳﺐ ﻣﻦ ﻫﻨﺎ .. ﺑﺘﺠﻲ ﻗﺮﻳﺐ ﺍﻟﺴﺎﻋﺔ ﻋﺸﺮﺓ
ﻣﺮﺍﺕ ﺑﻨﻤﺸﻲ ﻧﺠﻴﺒﻬﺎ ﺍﻧﺎ ﻭﺳﻠﻤﻰ ﻣﺮﺍﺕ ﺑﻤﺸﻲ ﻳﺠﻴﺒﻬﺎ ﻋﻤﻲ ﻣﺤﺠﻮﺏ .
ﺑﻌﺪ ﺷﻮﻳﺔ ﺟﺎﺕ ﺧﺎﻟﺘﻲ ﻭﻗﺎﻟﺖ ﻟﻲ ﺍﻟﺤﺼﻞ ﺷﻨﻮ ﻭﻓﺘﺢ ﻗﺎﻝ ﻟﻚ ﺷﻨﻮ ﻓﻲ ﻣﻮﺿﻮﻉ ﺑﻴﺘﻚ؟ ..
ﻗﻠﺖ ﻟﻴﻬﺎ .. ﻗﺎﻝ ﻟﻲ ﺑﻨﺘﻔﺎﻫﻢ ﻟﻲ ﻗﺪﺍﻡ .. ﻫﺴﻲ ﻣﺎ ﺟﺎﻱ ﻟﻤﻮﺿﻮﻉ ﺍﻟﺒﻴﺖ .. ﺟﺎﻱ ﻳﺴﻠﻢ ﻋﻠﻲ .. ﻗﺎﻟﺖ ﻟﻲ ﻛﻠﻤﻚ ﺑﻲ ﺳﺒﺐ ﺍﻟﻤﺸﻜﻠﺔ ﺍﻟﺒﻴﻨﻮ ﻭﺑﻴﻦ ﺍﺧﻮﻩ ..
ﻗﻠﺖ ﻟﻴﻬﺎ ﺍﻱ ﻛﻠﻤﻨﻲ .. ﺍﻟﻤﺸﻜﻠﺔ ﻓﺘﻨﺔ ﻣﻦ ﻣﺮﺓ ﺍﺑﻮﻱ ﺍﻟﻘﺪﻳﻤﺔ ﻓﺘﻨﺖ ﺑﻴﻦ ﺍﺑﻮﻱ ﻭﻋﻤﻲ .. ﻭﻫﺴﻲ ﻋﻤﻲ ﻋﺮﻑ ﺍﻟﺤﻘﻴﻘﺔ ..
ﻗﺎﻟﺖ ﻟﻲ ﻣﺎﺣﻜﻰ ﻟﻴﻚ ﺍﻟﻤﺸﻜﻠﺔ ﺍﺻﻼ ﺷﻨﻮ؟ ﻳﻌﻨﻲ ﺍﻟﻔﺘﻨﺔ ﻛﺎﻧﺖ ﺷﻨﻮ ﺍﺻﻼ .. ؟؟
ﻗﻠﺖ ﻟﻴﻬﺎ ﺍﺑﺎ ﻳﻜﻠﻤﻨﻲ ﺑﻴﻬﺎ ..
ﺑﺲ ﻗﺎﻝ ﻟﻲ ﻓﺘﻨﺖ ﺑﻴﻨﺎ .. ﻭﻟﻤﻦ ﺳﺄﻟﺘﻪ ﻗﺎﻝ ﻟﻲ ﻫﻲ ﻗﻮﺍﻳﻞ ﺣﺮﻳﻢ .. ﻣﺎﺗﺸﻐﻠﻲ ﺑﻴﻬﺎ ﺑﺎﻟﻚ ..
ﻃﺒﻌﺎ ﻧﻜﺮﺗﻮ ﻟﻲ ﺧﺎﻟﺘﻲ ﻓﺤﻢ .. ﺍﻛﻠﻤﻬﺎ ﻟﻴﻪ ﺑﻤﺸﻜﻠﺔ ﺍﺑﻮﻱ ﻭﻋﻤﻲ؟ .. ﻭﻫﻲ ﺩﺧﻠﻬﺎ ﺷﻨﻮ ﻓﻲ ﺍﻟﻤﻮﺿﻮﻉ؟ ﻫﻤﻬﺎ ﻛﻠﻪ ﻓﻲ ﺍﻟﺒﻴﺖ .. ﻭﺃﻫﻮ ﺍﻟﺒﻴﺖ ﻗﺎﻋﺪ ..
ﻗﻠﺖ ﻟﻴﻬﺎ ﺍﻧﺎ ﻋﻨﺪﻱ ﻛﻼﻡ ﻣﻊ ﻋﻤﻲ ﻣﺤﺠﻮﺏ ﻣﺎﺷﺔ ﻟﻴﻬﻮ ؟ ﻗﺎﻟﺖ ﻟﻲ ﻗﺎﻋﺪ ﻓﻲ ﺍﻟﺒﺮﻧﺪﺓ ﺍﻟﺒﻬﻨﺎﻙ .. ﺍﻣﺸﻲ ﻣﻌﺎﻙ؟ ﻗﻠﺖ ﻟﻴﻬﺎ ﻣﻤﻜﻦ ﺍﺭﺡ .. ﻫﻮ ﺍﺻﻼ ﻣﺎﻓﻲ ﻛﻼﻡ ﺑﺪﺳﻮ ﻋﻠﻴﻚ ﻳﺎﺧﺎﻟﺘﻲ ..
ﻗﺎﻟﺖ ﻟﻲ ﺧﻼﺹ ﺍﻣﺸﻲ ﺑﺠﻲ ﻣﺤﺼﻼﻙ ﺍﺷﻮﻑ ﺍﻟﺤﺎﺻﻞ ﺷﻨﻮ؟
ﻣﺸﻴﺖ ﻟﻘﻴﺘﻮ ﻳﺎﺩﻭﺏ ﺧﻠﺺ ﺍﻟﺸﺎﻱ .. ﻗﻠﺖ ﻟﻴﻬﻮ ﻳﺎﻋﻤﻲ ﻣﺤﺠﻮﺏ ﺍﻧﺎ ﻃﺒﻌﺎ ﻣﺸﻴﺖ ﻣﻊ ﻋﻤﻲ .. ﻭﺣﻜﻰ ﻟﻲ ﺍﻧﻮ ﺳﺒﺐ ﺍﻟﻤﺸﻜﻠﺔ ﺑﻴﻨﻮ ﻭﺑﻴﻦ ﺍﺑﻮﻱ .. ﻓﺘﻨﺔ ﺣﺮﻳﻢ .. ﻣﻮﺻﻠﻴﻦ ﻟﻴﻬﻮ ﻛﻼﻡ ﻛﺬﺏ ﻭﻫﺴﻲ ﻫﻮ ﻧﺪﻣﺎﻥ ..
ﻭﻧﻔﺴﻮ ﻳﺘﻮﺍﺻﻞ ﻣﻌﺎﻱ ﻭﻳﻤﺤﻰ ﺍﻟﻤﺎﺿﻲ .. ﻭﺍﻟﻤﺸﻜﻠﺔ ﻳﺎﻋﻤﻲ ﻣﺤﺠﻮﺏ ﺍﻧﻮ ﺍﺑﻮﻱ ﻣﺎﺧﺪ ﻣﻨﻲ ﻭﻋﺪ .. ﺍﻧﻲ ﻣﺎ ﺍﺭﺟﻊ ﻻﻫﻞ ﺍﺑﻮﻱ ﻭﻣﺎﻳﻜﻮﻥ ﻋﻨﺪﻱ ﻣﻌﺎﻫﻢ ﻋﻼﻗﻪ ﻭﻻﺗﻮﺍﺻﻞ .. ﺍﻧﺎ ﻫﺴﻲ ﺍﻋﻤﻞ ﺷﻨﻮ .. ؟؟ ﺍﺩﻳﻨﻲ ﺭﺍﻳﻚ ﻣﺎﻋﺎﺭﻓﺔ ﺍﺗﺼﺮﻑ ﻛﻴﻒ ؟
ﻗﺎﻝ ﻟﻲ ﻃﻴﺐ .. ﺍﻧﺘﻲ ﺡ ﺗﻌﻤﻠﻲ ﺍﻟﺒﻘﻮﻟﻚ ﻋﻠﻴﻬﻮ؟ ﻗﻠﺖ ﻟﻴﻬﻮ ﻭﺍﻟﻠﻪ ﻣﺎﺑﻔﻮﺗﻮ ﺷﺒﺮ ..
ﻗﺎﻝ ﻟﻲ ﻳﺎﺑﺘﻲ ﻗﻄﻴﻌﺔ ﺍﻟﺮﺣﻢ ﻣﻌﺼﻴﺔ .. ﻭﺍﺑﻮﻙ ﺍﻣﺮﻙ ﺑﻤﻌﺼﻴﺔ .. ﻭﻻﻃﺎﻋﺔ ﻟﻤﺨﻠﻮﻕ ﻓﻲ ﻣﻌﺼﻴﺔ ﺍﻟﺨﺎﻟﻖ ..
ﻫﺴﻲ ﺍﺑﻮﻙ ﻓﻲ ﻗﺒﺮﻭ ﺣﻴﻜﻮﻥ ﻧﺪﻣﺎﻥ ﺍﻧﻮ ﺍﻣﺮﻙ ﺑﻘﻄﻴﻌﺔ ﺍﻟﺮﺣﻢ .. ﺩﻳﻞ ﺍﻫﻠﻚ ﻭﺩﻩ ﻋﻤﻚ ﻟﺤﻤﻚ ﻭﺩﻣﻚ .. ﻣﺎﺑﺼﺢ ﺗﻨﻔﺬﻱ ﻛﻼﻡ ﺍﺑﻮﻙ ﻓﻲ ﻗﻄﻴﻌﺔ ﺍﻟﺮﺣﻢ ..
ﺧﺼﻮﺻﺎ ﺍﻧﻮ ﻋﻤﻚ ﻋﺮﻑ ﺍﻟﺤﻘﻴﻘﺔ ﻭﻧﺪﻡ ﺍﺑﻮﻙ ﻟﻮ ﻛﺎﻥ ﺣﻲ .. ﻛﺎﻥ ﺳﺎﻣﺤﻪ ﺻﺎﺡ؟
ﻭﺍﻧﺎ ﻣﺘﺄﻛﺪ ﻟﻮ ﺭﺟﻌﺘﻲ ﻭﺻﻠﺘﻲ ﺭﺣﻤﻚ ﺍﺑﻮﻙ ﻓﻲ ﻗﺒﺮﻭ ﺑﺮﺗﺎﺡ .
ﺍﻟﻰ ﺍﻟﻠﻘﺎﺀ
