#الشاهين21
بورتسودان..
امي وابوي اصلهم م̷ـــِْن هناك،البيت الكبير حقهم اعمامي المتزوجين والما متزوجين كلهم عايشين في بيت واحد، طلعه ابوي م̷ـــِْن البيت وجيتو للخرطوم كنت انا السبب فيها،لأنهم كانو م بعاملوني كويس ابداً لٱ اعمامي ولا نسوانهم ولا كانو بلقو تعقيب م̷ـــِْن حبوبه على تصرفاتهم معي على الحاجه دي،كنت بشتغل في البيت زي الدربكين،اغسل واكوي وانضف واي شي كنا متحملين مسؤليتو انا وامي رغم انو كل واحد بمرتو وبناتو بس لٱ واحدة فيهم بتغسل ولا واحدة فيهم قايمه بواجباتها، وطبيعي البيت مليان ضيوف،والصالون طبيعي مليان رجال، نحن في حاله وقوف دائم في المطبخ بتذكر ٱڅڑ مرة منها وطلعنا م̷ـــِْن البيت طلعنا بسبب شكله طويله عريضه م بحب اذكر تفاصيلها بس وصلو بيها لمرحله إنهم يرفعو يديهم على بعض ابوي واعمامي إتضاربو لمن دمهم دة جرى، وحبوبه قالت لي ابوي بتخسر اخوانك وأولاد اخوانك المن لحمك ودمك قصاد كلام مرتك وبت م معروف جايبنها من وين؟
ابوي قال ليها بت م معروف جايبنها م̷ـــِْن وين لَـگِنْ عارف اربيها انتِ الجايباهم ديل اعرفي ربيهم، وانا بيتكم دة طرفي منو، بعدها طلعنا الخرطوم بي شنطنا بس..
ابوي وامي في السنوات المضت رجعو كم مرة بس انا لا، كانو بخلوني مع مهند، ف هسي رجعتي هناك وقعدتي وسط ناس البيت شبه غريبه ومخلياني اكون حذره في تعاملي،
رجعنا فتحنا بيتنا الكان مقفول ،ابوي قال عشان م نتضايق ونكون مرتاحين في بيتنا..
جيت م̷ـــِْن الخرطوم عشان اهرب م̷ـــِْن حاجات كتيرة بس بالعكس جيت وانضغطت اكتر هنا،
كل م اطلع م̷ـــِْن حوشنا وامشي على اتجاه م̷ـــِْن اتجاهات البيت اللقاهم يتكلمو عن موضوع نحن جينا هنا ليييهه؟
البت اتطلقت م̷ـــِْن راجلها ليه؟
إتخطو مرحله إنهم يتكلمو مع بعض يوم شالو جبنتهم وجونا في البيت،اثناء م امي بتسوي ليهم فيها ،مرت عمي اسمها خالدة قالت ليها انتِ ي بثينه البت دي الراجل طلقها ليييه م تم كم شهر والله نحن وجعتنا الكم شهر دي اكتر م̷ـــِْن الطلاق نفسو
امي قالت ليها م اتفقو بس والله
كيفن م اتفقو يعني اجي؟
امي قالت ليها ماف قسمه،اها قلتو لي إنصاف مسافره السعوديه متين؟
عمري م كنت بحب الطلعه من البيت بس هسي بقيت مخنوقه
بت جيرانا بالحيطه إسمها خُضيرة م̷ـــِْن عرفت إني جيت بقت تجينا،
يوم وهي قاعدة معي امها إتصلت عليها اول م فتحت الخط قالت ليها مالك؟م جايه م تكرهيني، م جايه قلت ليك الله؟ وقت م اجي اجي بس م شغلتك بي، اي كلميهو ان شاءالله يكسر رقبتي
وقفلت الخط بقيت اعاين ليها
قلت ليها دي امك؟
قالت لي اي
قلت ليها وبتتكلمي معاها كدة لييييهه؟
قالت لي طايرة ليها ساي م عندها موضوع
قلت ليها خضيرة عيب دي امك
قالت لي افصلك؟
سكتت وانا بعاين ليها
خلال اقل م̷ـــِْن شهر بس مليت القعدة م̷ـــِْن البيت،مليت م̷ـــِْن عقلي البودي وبجيب،م̷ـــِْن اكلي لضفوري كل الوقت م̷ـــِْن تلفوني الفاضي وم فِيَھ رسائل ،احساس الوحدة،احساس إني م عندي زول،في فترة وجيزة علاقتي ساءت مع الدنيا كلها، حتى مع صحباتي، حتى صحباتي خزلوني فيهم 💔
م بحب الضعف والحزن دة في ملامحي قدام امي وابوي ابداً انا كويسه م̷ـــِْن برة بس جواي في خراب، في قيامه قايمه وعايزة اشغل نفسي بي اي شي عشان اتناسى، في يوم قلت لي ابوي طلعني ي ابوي، وديني الكورنيش،
قال لي سمح اللبسي،
لبسنا وطلعنا لما وصلنا عزمني شاي لبن بزلابيه وهو قهوة،
بقيت اعاين يمين وشمال
قلت ليه ابوي
قال لي اها
قلت ليه ارح نعمل تربيزة نبيع فيها الاقاشي هنا وانا بساعدك
ضحك
قلت ليه جادة انا، بالمرة اكون لقيت حاجه شغلتني بدل القعدة في البيت وسماع كلام نسوان اعمامي
