(وجهة نضر ريان)..
✴غير وصلت للڤيلا ديالي ففرنسا دخلت دوشت و من بعد بدلت حويجي..جبدت سلاح خزنتو ورا ضهري..سمعت الدقان فالباب ديال البيت..مشيت حليت..بان ليا نعمان..حتا هو موجد راسو..
نعمان : واجد ؟ نمشيو ؟
✴خرجت انا وياه ركبنا فالسيارة..مكانتش راشقة ليا نسوق السيارة عطيت لنعمان يسوق..هو عارف دار ديال ماماه فين كينا..إنشاء الله منكونوش غالطين و نلقاو إكرام تما..تفكرت الهاتف ديالي..مني ركبت فالطيارة و هو طافي..هزيت الهاتف شعلتو..لقيت بزاف مكالمات من عيسى لبارح..و مكالمات من يسرى و رعد هاد الصباح..شي حاجة واقعة..شفت فنعمان..
انا : فين تيليفونك ؟ هضرتي مع شي حد هاد الصباح؟
نعمان : لا تيليفوني طافي من الشارج..
✴عيطت لعيسى..بالزربة جاوبني..
انا : الو ؟
هو : الو ريان قريتي ميساج ديالي ؟
انا : إنا ميساج ؟
هو : راه سيفطت ليك رقم فميساج..هاداك الرقم هضرت معايا منو إكرام لبارح بالليل..
انا : إ..إكرام ؟؟ واش هي بيخير ؟ اشنو قالت ليك ؟؟؟؟
هو : قالت ليا نعتقوها من هاداك الحمار حيت كيهددها بولدكم بغا يآديه..انا سيفطت ليك الرقم لي هضرت منو..هي كينا تما ففرنسا..
✴قطعت عليه قبلما يكمل الهضرة..ضربت ايدي للسيارة بالجهد..كيفاش كيهددها ب سيف هاداك الكلب والله و يقيس شعرة من ولدي حتا ندبحو مغديش نرحمو..شفت الرقم لي مسيفط ليا عيسى الحمد لله حيت هي كينا هنا ففرنسا..يعني الشك ديالنا كان فمحلو..سيفطت الميساج لناصر و شرحت ليه..من بعد دقائق قليلة جاتني مكالمة من ناصر..
انا : الو ناصر..
ناصر : لقينا الهوية الجديدة لي داير فارس..كان عندكم الحق..عندو كارت آخرة و هوية آخرة..و املاك آخرين..و إسم آخر..و عرفتي شنو ؟
انا : شنو ؟
ناصر : عندو شركة و ڤيلا ففرنسا بهاداك الاسم المزور..يعني عندو حياة آخرة عايشها و حتا واحد ميقدر يعرف..
انا : الكلب..كيسحاب ليه مغديش نلقاه 😡
ناصر : انا رسلت ليك العنوان ديال الڤيلا و الشركة..اكيد غدي يكون فوحدة من هاد البلايص..
انا : شكرا والله..ليوم غدي يموت على ايدي..
ناصر : سمع ريان..مديرش بحالي انا شحال هادي..دابا عندك ولد..متحاولش دير شي حاجة لي تندم عليها..هضر مع البوليس..و خليهم هما لي يتدخلو..متقتلوش..
انا : كون هاني..
✴قطعت المكالمة..شفت العنوان لي سيفط ليا ناصر..وريتو لنعمان و شرحت ليه..بدلنا الوجهة ديالنا و مشينا نيشان للڤيلا ديال فارس..هضرت مع البوليس و شرحت ليهم اش واقع..عندي معارف هنا ففرنسا و حتا فالبوليس..عطيتهم المواقع بتلاثة لي انا شاك فيهم..الڤيلا ديال فارس و الشركة و الڤيلا ديال مرات بابا..إنشاء الله نلقاك إكرام..لمهم وصلنا للڤيلا ديال فارس..
(وجهة نضر نعمان)..
✴غير وصلنا لدار فارس شفنا سيارات ديال الشرطة واقفين..ريان هضر معاهم قالو ليه بلي مستعدين يدخلو للدار..دخلنا بالشوية..انا و ريان مجبدناش السلاح ديالنا..الڤيلا كتبان خاوية..مكين حتا واحد..كنسمعو البكاء ديال شي دري صغير..ريان بغا يطلع ولكن البوليس حبسوه..طلعو هما الاولين عاد تبعناهم انا و ريان..تبعنا الصوت حتال واحد البيت..حلو الباب بالزربة و دخلو..مكين حتا واحد..تصدمت..كين غير سيف كيبكي فواحد الناموسية صغيرة..ريان مشا بالزربة هزو عنقو و بدا كيسكت فيه..قربت عندو بالشوية..و اخيرا غدي نشوف ولد خويا..حسيت بإحساس غريب..زعما انا دابا وليت عم..مكنتش كنتخيل شي نهار يكون عندي ابن اخ يقول ليا عمي..كنشوف ريان معصب و متوتر بزاف..ايديه كيترعدو..حطيت ايدي على كتفو..
انا : متخافش..حتا إكرام غدي نلقاوها بيخير إنشاء الله..
✴ريان هبط جلس فالارض. كنشوف الدموع فعينيه ولكن حابسهم..
ريان : اكيد عرف بلي حنا جايين..هو غدي يغبرها تاني..
✴جا ضابط و قال لينا بلي الڤيلا خاوية مكين حتا واحد..مفهمتش كيفاش قدرو يخليو الولد وحدو فالدار و هو باقي صغير..كون ما جيناش حنا كان غدي يبقا هنا..شفت فريان..
انا : ريان الولد فيه جوع واقيلا..علم الله شحال و هو هنا وحدو..انا غدي نمشي نجيب ليه حليب اوكي..
✴خرجنا انا و ريان و هبطنا للسيارة..ريان كيسكت فولدو..انا مشيت لاقرب فرماسيان شريت ليه حليب و رضاعة صغيرة و كلشي داك الشي لي غدي يحتاج..و رجعت..عطينا لسيف يشرب الحليب..
ريان : الضابط دابا قال ليا بلي فارس مكينش حتا فالشركة..بقات لينا بلاصة وحدة هي دار ماماك..
✴قلت ليه اوكي و ديماريت السيارة..بديت كنسوق نيشان الڤيلا ديال ماما..مني وصلنا شفنا سيارات ديال الشرطة واقفين تما..خرجت انا و ريان..سمعنا صوت رصاص..ريان شاف فيا مخلوع..حط سيف فكرسي ديال الاطفال فالسيارة و دخل بالزربة..انا قلت لواحد البوليسي يرد البال للولد و مشيت تبعت ريان..دخلنا دار طلعنا نيشان فالدروج الطابق الثاني..اول حاجة شفتها هو فارس..فالارض و دم ضاير بيه..ريان مشا بالزربة دخل للغرفة لي فيها البوليس انا تبعتو..شفت إكرام معلقة كلها مجروحة..ايديها مربوطين لفوق..البوليس كيحلو ليها ف ايديها..ريان مشا عندها..كتبان سخفانة مسكينة..كتنزف من كرشها..
إكرام : ر..ريان..
✴بدات كتغمض فعينيها..غير حلو ليها ايديها طاحت نيشان بين ايدين ريان..هو كيشوف فيها مصدوم..شفت ماما فالارض..كنضن البوليس لي ضربوها بقرطاس..تصدمت والله..انا كنت عارف ماما قلبها قاصح..ولكن ماشي حتال هاد الدرجة..سمعت صوت الاسعاف..شوية شفت فرمليات داخلين...
(وجهة نضر ريان)..
✴إكرام طاحت بين ايدي..كنشوف فيها مصدوم..عينيها كيتسدو..ياربي اش دارو ليها هاد الكلاب ؟ جسمها كلو مجروح و موشوم..بالزربة هزيتها و خرجت كنجري بغيت نديها للمستشفى..ولكن سمعت صوت الاسعاف و دخلو شي فرمليات..عاونتهم يدخلو إكرام فسيارة الاسعاف و دخلت حتا انا..كنشوف فيهم كيديرو ليها إسعافات اولية..كيحاولو يحبسو النزيف من كرشها..قلبي كيضرب بالجهد..م..مقدرتش نستحمل نشوفها بحال هكا..محسيتش ايمتا هبطو ليا دموع..بالزربة هزيت ايدي و مسحتهم..وصلنا للمستشفى..
فرملية : مراتك نزفت بزاف..شنو فصيلة دم ديالها..
✴قلت ليها فصيلة دم ديال إكرام..خرجوها داوها نيشان غرفة العمليات..بقيت كنتسنا..كنمشي و نجي..شوية شفت نعمان جاي داخل و هاز سيف..
نعمان : إكرام بيخير ؟
انا : م..معرفتش..ق..قالو نزفت بزاف..
✴نعمان حط ايدو على كتفي..
نعمان : إكرام صحيحة..متخافش إنشاء الله غدي تولي بيخير..
انا : إنشاء الله..
✴داز الوقت..دكتور خرج و قال لينا بلي إكرام ولات بيخير..اوف الحمد لله يا ربي..دخلنا شفناها..باقا مغيبة..كتبان زوينة وخا كل هاد الشي لي وقع ليها..جلست حداها كنشوف فيها..لاحضت بلي فعنقها آثار ديال بوسات..اش دار ليها داك الحمار..نضت وقفت معصب..مستحملتش نشوف هاد الشي..اسم فارس موشوم فجسمها و فوق هاد الشي عنقها كلو مزوق..طلع ليا دم بغيت نعرف اش وقع..اشنو دار ليها فارس..بقيت كنمشي و نجي معصب..ضربت ايدي للحيط بالجهد..شفت فنعمان..
انا : عافاك قول ليا فارس مات حيت انا ناوي ندير شي جريمة فهاد النهار..
نعمان : ك..كنضن مات..شفت الجتة ديالو مني دخلت لدار..معرفتش اش وقع..كنضن البوليس لي ضربوه..و..و ماما حتا هي ضربوها برصاص..
انا : خاصني نهضر مع الضابط..
✴خرجت من الغرفة باش نهضر فالهاتف ولكن تلاقيت بالدكتور..
دكتور : نتا هو زوج مدام إكرام ياك ؟
انا : اه.علاش كين شي مشكل ؟
دكتور : قالو ليا فرمليات بلي عندكم طفل رضيع..
انا: اه عندنا ولد..
دكتور : خاصك تعرف بلي مراتك كانت واكلة شي مادة مسمومة..قدرنا نعتقوها متخافش..ولكن إلا كانت كترضع يعني خاصني نفحص حتا الولد..بغينا نتاكدو بلي هو بيخير..
✴تصدمت..كيفاش إكرام كلات شي حاجة مسمومة..دخلت بالزربة هزيت سيف من عند نعمان و ديتو عند الدكتور..مشيت معاهم دار ليه شي فحوصات..دگو ليه شي برا وكتبو ليا ادوية..من بعد مشيت دخلت للغرفة..
نعمان : هضرت مع العائلة قلت ليهم لقيناإكرام و سيف..
✴يله بغيت نجاوبو شفت إكرام كتحرك..بالزربة شديت ليها ايدها..
انا : إ..إكرام ؟
✴إكرام بدات كتحل فعينيها..شافت فيا بالشويية..
هي : ريان..
✴بدات كتبكي..
(وجهة نضر إكرام)..
✴ حليت عيني..غير شفت ريان الدموع بداو كيخرجو وحدهم..
ريان : إ..إكرام..متبكيش عافاك انا معاك دابا..صافي كلشي سالا..
✴ريان عنقني كيبوس فيا..حتا انا عنقتو بالجهد توحشتو بزاف..خديت من عندو سيف..الحمد لله يا ربي ولدي بيخير..
انا : بغيت نمشي للدار عافاك..
ريان : إكرام يلاه فقتي من عملية جراحية..ميمكنش نخرجك دابا..
انا : ريان عافاك بغيت غير نرجع دار..مبقيتش باغا نبقا هنا..بغيت نرجع للمغرب الله يخليك..
ريان : اوكي غدي نهضر مع الدكتور نشوف اشنو غدي يقول..
✴ريان مشا خرج..ضرت شفت فنعمان..فالاول مني فقت ملاحضتش وجودو..معرفتش اش كيدير هنا..يعني سمعت مزيان عيسى مني قال ريان و نعمان ففرنسا..
نعمان : ك..كيبقيتي..
انا : الحمدلله..
نعمان : احم..س..سمحي ليا..ه..هداك النهار..
انا : مبغيتش نهضر على هاداك النهار نعمان..
✴نعمان بقا ساكت حتا دخل ريان..
انا : اش قالو ليك ؟
ريان : ميمكنش نخرجك دابا او نسافر بيك برا البلاد إكرام..غير إلا بغيت نديك للڤيلا لي كينا هنا ففرنسا و تكملي العلاج ديالك تما مع الفرمليات..
انا : ا..اوكي..نمشيو..مبغيتش نبقا هنا..
ريان : اوكي حبيبة..انا غدي نشوف الوراق ديال خروجك..
✴ريان رجع خرج..لمهم داز الوقت ريان داني للدار..الڤيلا لي كنا فيها شحال هادي..تفكرت بزاف دكريات هنا..الفرمليات صاوبو ليا سيروم و كلشي..كيردو البال لكلشي..نعمان مبقيتش شفتو مني دخلنا لدار..ريان دخل لبيت جايب ليا ناكل..جلس حدايا..
ريان : الحبيبة ديالي مرتاحة ؟
انا : اه حمدلله..
ريان : كولي باش تبراي بالزربة..
✴بديت كنضحك..كيتعامل معايا بحال دراري صغار..توحشتو بزاف و توحشت هضرتو..معرفتش علاش جاتني البكية مرة آخرة..ولكن حبستها هاد المرة..
ريان : علاش كتشوفي فيا بحال هكا كولي..
✴بديت كناكل بالشوية..ريان شد ليا ايدي و بدا كيوكلني هو..كناكل و كنشوف فيه..
ريان : بقيت كنقلب على شي اختصاصي فالوشم..كنلقى اغلبية رجال..مبغيت حتا شي حمار يشوف جسمك..بزز باش لقيت بنت..غدي تجي تشوفك ليوم..إنشاء الله اسم هاداك الكلب مغديش يبقى فجسمك..دابا تشوفي..
انا : اوف الحمد لله..كنت كنفكر كيف ندير نحيد هاد الشي..ه..هو دار ليا مخدر مشفتوش مني دار هاد الشي..
ريان : شششت..نساي..منهضروش فهاد الشي دابا..خليك مرتاحة اوكي..
انا : اوكي..
✴ريان قرب ليا و باسني..شوية صونا ليه الهاتف..نيشان عطاه ليا انا..
ريان : يسرى فضحاتني باش تهضر معاك..
✴خديت من عندو الهاتف و جاوبتها..البقرة كتبكي فالهاتف..بقيت داويا معاها شوية من بعد دوزت ليا طاطا و ادهم..لمهم داز الوقت..رضعت سيف و عطيتو لريان..انا كنعس وحدي فالسرير...
(وجهة نضر يسرى)..
✴مني فقت و انا كنوجد فتحضيرات لإستقبال إكرام..دازو ثلاتة ايام من نهار خرجت من المستشفى..هي و ريان ليوم جايين بغيت كلشي يكون هو هاداك..كل العائلة فرحانة..غدي يبقى خاصنا غير نعمان..مسكين كان مضطر يبقا ففرنسا بسباب فارس..كنا كنسحابوه مات ولكن هو باقي حي..الضابط قال لنعمان بلي مرات بابا هي لي ضربت فارس بالرصاص..ثلاتة القرطاصات..وحدة فيهم جاتو فالعمود الفقري..هو دابا فغيبوبة..الاطباء كيقولو وخا يفيق من الغيبوبة غدي يبقى مشلول كل حياتو..ميقدرش يحرك لا ايديه لا رجليه..صراحة تصدمت فمرات بابا..مكنتش متخيلة توصل بيها لدرجة انها تحاول تقتل ولدها..الضابط تأكد من هاد الشي بكاميرات مراقبة ديال المنزل ديالها..كتبان الجريمة واضحة فالڤيديو..هي دابا فالسجن من بعد ما خرجت من المستشفى..نعمان كان خاصو ضروري يبقى حيت كان خاصو يكمل شي إجراءات بخوصوص ماماه و حتا بخوصوص فارس..حيت هو الوحيد لي مكلف بيهم..قال ليا مني غدي يكمل كلشي غدي يجي..لمهم..نسرين تبدلات بزاف..وليت كنهضر معاها مرة مرة..لاحضت بلي رعد كيهضر معاها كتر مني..انا متاكدة كينا شي حاجة بيناتهم هاد الجوج..غارقة فتفكيري و كنبدل ديكور الصالون..حتا جات لمياء..
انا : لمياء فنضرك نخلي هاد الورد الاحمر او لا نجيب الابيض؟
لمياء : كيعجبني بزاف الورد الاحمر..خليه جا زوين..
انا : اوكي..حتا انا عجبني..
لمياء : يسرى..هضرت مع ماما..قلت ليها بلي انا جيت للمغرب..خاصني نمشي نشوف عائلتي ليوم..مبغيتش نصدمهم بنعمان على غفلة..خاصني نهضر معاهم عليه قبل..
انا : اوكي حبيبة..غدي تجي فالعشية؟
هي : ضروري مغديش نفلت الوصول ديال إكرام توحشتها..
انا : حتا انا توحشتها بزاف..
✴لمهم داز الوقت..لمياء مشات..انا وجدت كلشي..حتا الاكل لي كيعجب إكرام درتو..فالعشية وصلت إكرام و ريان..عنقتها بالجهد توحشتها..تبدلات بزاف..غير فهاد المدة لقصيرة لي غبرت فيها تبدلت بزاف..كتبان عيانة من وجهها..هزيت من عندها سيف..مبقيتش باغا نطلقو من ايديا صافي..مخليت حتا واحد ياخدو من عندي..بقيت كنلعب معاه و كنبوس فيه..شوية شفت نسرين واقفة كتشوف فيا..عرفتها حتا هي باغا تشوف ولد ريان..ولكن مقدرتش تقول ليا..مشيت عندها عطيتو ليها تهزو شوية..فرحات..بقات كتشوف فيه ضاحكة..
انا : شفتي شحال كيشبه لريان؟
هي : اه بصح والله..كيشبه ليه بزاف..
✴داز الوقت و تعشينا كلنا مجموعين..من بعد كل واحد فينا طلع لبيتو..قبلما ندخل لبيت سمعت الهضرة..كنضن هادا صوت نسرين..قربت شوية و شفت رعد و نسرين واقفين كيهضرو بعاد..
نسرين : و..ولكن انا مكيهمونيش لفلوس..
رعد : قلت ليك غدي نرجعهم ليك..حيت عاونتيهم باش يلقاو إكرام صافي..مبقيتش باغي نعاقبك..غدا غدي يرجعو ليك ممتلكاتك..
✴هادو علاياش داوين ؟ اشمن ممتلكات مفهمت والو..تخبيت و بقيت كنتصنت..اوكي اوكي انا عارفة هاد الشي ما مزيانش ولكن ضرني راسي بغيت نعرف اشنو بيناتهم..
هي : رعد راه ديجا قلت ليك مبغيت لا فلوس لا والو..انا مبغيت حتا حاجة و مكتهمني حتا حاجة منين كتفهم..انا بغيتك نتا..بغيتك غير نتا..عافاك خلينا نرجعو كيف كنا..ا..انا كنبغيك و نتا عارف هاد الشي..
هو : هاد الشي مستحيل حيت انا مكنبغيكش..غدي نرجع ليك املاكك و من بعد صافي نسايني..رجعي لحياتك كيف كنتي..
هي : مستحيل نرجع كيف كنت رعد مستحييل..ا..انا حاملة عافاك متخلينيش وحدي..
✴😱اش هاد شي كنسمع..تصدمت..نسرين و رعد بيناتهم علاقة..وهي حاملة منو..خوتي و بابا غدي يقتلوها إلا عرفو..شفت رعد تصدم حتا هو..باينا مكانش عارف..
هو : ك..كيفاش؟
هي : كنت كنسحابك حتا نتا كتبغيني..مكنتش كنشرب مانع الحمل..كنت غالطة فيك بزاف..نتا قدرتي تضحك عليا..و..و انا دابا حاملة..انا عارفاك مكتبغينيش..غ..غير متخلينيش عافاك..انا مكتهمني حتا حاجة فهاد الدنيا من غيرك نتا وولدي..
✴كنشوف رعد بقا ساكت..كيشوف فيها مصدوم..
هي : أ..أوكي..صافي فهمت..انا غدي نمشي و نخليك..من غدا مغديش تبقى تشوفني..انا مغديش نبقى نبرزطك..
✴نسرين يلاه بغات تمشي ولكن رعد شدها من دراعها..
رعد : م..من ايمتا و نتي عارفة راسك حاملة..
نسرين : علاش بغيتي تعرف..ياك مكيهمكش هاد الشي..
رعد : جاوبيني نسرين 😡 و اصلا شكون قالك مكيهمنيش هاد الشي..هادا ولدي لي نتي حاملة بيه..
نسرين : ماشي بزاف باش عرفت..
رعد : مشيتي عند طبيب ؟
هي : اه مشيت..صحة الولد مزيانة..
رعد : قلتيها لشي حد..
هي : نتا الوحيد لي كنهضر معاه عادي فهاد الدار..كلهم كيهضرو معايا ناقص..حتا واحد معارف..نعمان غدي يقتلني إلا عرف..و ريان حتا هو..
رعد : متخافيش انا غدي نصلح الوضع..سيري تنعسي..متبقايش تفكري بزاف..رتاحي راك حاملة..غدا نخرجو انا وياك و نهضرو فهاد الموضوع مزيان ونقررو اش نديرو..
✴نسرين قالت ليه اوكي و مشات..انا مشيت لبيتي..دخلت و تكيت فبلاصتي..بقيت كنفكر فهاد الشي لي سمعت..حسيت ب ادهم كيدير حركات حنان ففخضي..ضرت عندو شفت فيه..حط ايديه على خصري و جرني عندو حتا لصقت مع صدرو..
ادهم : مالكي مقلقة حبيبة ؟
✴عاودت ليه كلشي..حتا هو تصدم..
ادهم : رعد قفرها..
انا : انا خايفة ينوض شي صداع..
✴بقينا شحال كنهضرو فهاد الموضوع..من بعد نعسنا..
أنت تقرأ
اكرام : زواج غير حياتي ♥
Romance( القصة كتبتها ف انستاغرام عاد حطيتها ف واتباد إلا كنت غالطة او نسيت شي فقرة قولوها ليا نصححها ) ♥ القصة كتهضر على اكرام..بنت زوينة بزاف لدرجة كل الناس فالدرب لي هي ساكنة فيه كيهضرو عليها خصوصا الدراري..هاد الشي لي خلى خوها يحبسها من الخروج...بنت عن...
