اكرام : زواج غير حياتي ♥

تعريف

السلام عليكم بنات اسمي إكرام..بنت عادية..انا كنشوف راسي عادية..ولكن صراحة كلشي كيقولو بلي الزين ديالي مكينش فحالو..معرفتش واش كيقولو الصراحة ولا كينافقوني..مكنتيق فتاواحد..هاد الشي لي علمني خويا..التيقة فهاد الزمان غير كتخرج عليك..داك شي علاش معنديش صحابات..حتا شي بنت فالبنات لي عرفت فحياتي كلها مكتشبه ليا..كلهم منافقات و لسانهم حلو..مكيقولوش الصراحة..وانا اكثر حاجة كتعجبني هي الصراحة..مكنافقش بنادم واي حاجة كنفكر فيها نقدر نقولها عادي..كنقول الصراحة و مكنحشمش..عنيدة بزاف و راسي قاصح..كلشي هاد الشي تعلمتو من خويا عيسى...عندي ثلاتة خوتي..عصام هو الكبير..عيسى..وآدم..باقي عندي الاب ديالي الحمد لله ولكن ماما ماتت مني ولداتني..بابا مغربي و ماما سورية...جامي شفتها..الله يرحمها..كلشي كيقولو ليا كنشبه ليها بزاف..خصوصا فالعينين..انا الوحيدة فخوتي لي عندي لون عينين فاتح..شعري بحال شعرها..ملامح ديال وجهي بحاها..حتا الجسم ديالي كيقولو ليا بلي نفس الفورمة كانت زوينة بزاف و عندها فورمة زوينة..ولكن مني كنشوفها فالصور كنحس بيها هي زوينة بزاف عليا..انا شوييية ضعف منها فالفورمة...هي اي حاجة كانت لابساها فالصور كتجي معاها واعرة..لمهم..من ناحية الخدمة..انا جالسة غير فالدار حاليا..خرجت من الخدمة شحال هادي بسباب آدم..كنضن قلت كلشي علا حياتي..فالقصة غدي تعرفو عليا كثر إنشاءالله..
[عصام]
=>هو خويا الكبير..مزوج و ساكن وحدو مع مراتو حاملة..صراحة كنحس بيه بحال شي اب ثاني لينا..كيرد البال لكلشي و كيعاون بابا على المصروف ديال الدار..مكنشوفوش بزاف مؤخرا حيت مراتو حاملة مكيقدرش يخليها وحدها..
[عيسى]
=>الاخ الاوسط..اكثر واحد عزيز عليا و كنتفاهم معاه..هو الوحيد لي كنتيق فيه و كنعاود ليه كلشي..ديما كيقول ليا بلي عندو اميرة وحدة فحياتو لي هي انا..مرة مرة كيخرجني نضور و نسا شوية الشقا ديال الدار و نحيد الملل..مني كنت صغيرة و هو كيعلمني البوكس..عندو صاك ديال البوكس فبيتو كنتدرب فيه انا وياه..هو لي علمني منخاف من تاواحد و منتيق فتاواحد..وخا يكون دري ولا درية نقدر ندافع علا راسي مني كنت فالمدرسة كنت كنغلب حتا الولاد..مني كيكون عيسى فالدار عاد كنفرح..العكس مع آدم..
[آدم]
=>صغر من عيسى غير بعامين تقريبا..ولكن كبر مني..اكثر واحد كيكرهني فهاد الدار..مني كنت صغيرة لحد الآن عمرو مقال ليا كلمة زوينة ولا ضحك معايا..كل نهار انا وياه كنجبدو شي صداع..اولا كنضاربو..كل نهار كنسمع منو غير المعيور..مكيخلينيش نخرج حابسني فالدار..بالنسبة ليه انا مكانش خاصني نتزاد..ديما كيقول ليا كان خاصني نموت فبلاصت ماما....