{نسرين لي فالصورة} ⬆⬆⬆⬆
........................................................................
✴ريان كيشوف فيا..حط ايدو على حنكي..
ريان : ولكن إكرام عافاك ما تنسايش بلي انا كنبقا ولد..ونتي كتبقاي بنت..
✴حيدت ليه ايدو..
انا : هاد الميساج لي كنت باغا حتا انا نوصلو ليك من البدية..شوف الحركات لي كادير معايا و الهضرة لي كتقول ليا..بحال كلمة حبيبة...انا غير تعاملت معاك بنفس الطريقة لي نتا كتعامل معايا بيها..دابا فهمتي اشنو يقدر يوقع..حسيتي باش كنحس..داك الشي علاش كنقول ليك متبقاش تقول ليا حبيبة..حنا غدي نطلقو ريان..مبغيتش العلاقة بيناتنا تمشي للمرحلة الثانية..حيت مستحيل غدي نخرجو منها..عافاك قبلما تقول ليا حبيبة تفكر بلي انا كنبقا بنت حتا انا راني كنحس انا ماشي مونيكة...و نتا كتبقا ولد...فهمتي ?
ريان : اوكي..نتي متبقايش تقولي ليا هضرة حنينة و انا منبقاش نقول ليك هضرة حنينة..
انا : مزيان 😏 دابا كمل قهوتك غدي تبرد..
ريان : اش بان ليك نخرجو ?
انا : بغيت نتقيد فلاصال..خاصني ضروري نتدرب مرة مرة..ميمكنش ليا نعيش بلا البوكس..
ريان : متحتاجيش لا صال..كينا عندنا صال فالڤيلا..فيها كلشي..😉 نقدر نكون المدرب ديالك إلا بغيتي..
انا : قول والله 😱 اجي يالاه وريها ليا دابا..
✴ريان بقا كيضحك..خرجت انا وياه و هبطنا لواحد البلاصة..فيها بزاف البيبان..والحد الباب دخلنا منو كينا فيه صال كبييرا..فيها كلشي 😍 منحتاجش نخرج من الدار باش نتدرب..ريان كيشوف فيا..
انا : ايمتا غدي نبداو ?
ريان : وقتما بغيتي إكرام..
انا : دابا دابا..تسناني نبدل حويجي و نجي..
ريان : خودي راحتك..
✴طلعت بالزربة لبيتي لبست شورت و تيشرت ديال البوكس جمعت شعري لفوق..و هبطت كنجري فرحانة..دخلت لا صال بان ليا ريان لابس غير شورت ديال البوكس و لفوق عريان 🤤 كيبان زوين الفورمة عندو مطراسية..كلشي مقاد..مقدرتش نحيد عيني على الجسم ديالو...ريان هز راسو شاف فيا..
ريان : اجي اش واقفة كاديري تما..
✴مشيت عندو..ريان كيقاد فالصاك ديال البوكس..
انا : مولف تلعب البوكس ?
ريان : حياتي كلها و انا كنلعب البوكس إكرام..
انا : علمني كلشي لي كتعرف..
ريان : إنشاء الله..يالاه بداي..نشوف طريقة اللعب ديالك..
✴وجدت راسي و تكالميت..من بعد بديت كنضرب فالصاك..كنحاول ندير كل الحركات لي تعلمت..ريان مربع ايديه و كيشوف فيا..كيلاحض كل حركة درت..مني كملت جلست فالارض..
ريان : براڤو عليك..مكنتش عارفك كتعرفي تلعبي البوكس بهاد الطريقة..صراحة صدمتيني..
انا : اشنو النيڤو ديالي ?
ريان : النيڤو ديالك فايت حتا النيڤو ديال شي دراري صحابي..خاصك غير تركزي..انا غدي نعلمك شي حاجات جداد..انا متأكد غدي تعلمي بالزربة إنشاء الله..
انا : إنشاء الله..
ريان : خودي عشرة الدقايق..خاصك تستاراحي فيهم..متبقايش ديما تخلي جسمك يعيا..ستاراحي..من بعد غدي نبدا معاك انا اوكي ?
انا : اوكي..
✴ريان ناض..مشا لواحد الثلاجة صغيرة و جبد عصير ديال الليمون..خدا واحد و جاب ليا واحد..
انا : فكرة زوينة دير ثلاجة صغيرة هنا..
ريان : كنت ديما كنتدرب هنا..و كنحتاج نشرب شي حاجة باردة..
✴لمهم بقينا كنهضرو على البوكس من بعد بدينا التدريب..ريان علمني شي حاجات جداد..حركات مكنتش عارفاهم قبل..و كنضن حتا عيسى معارفهمش..جاوني صعاب معرفتش ليهم ولكن انا متأكدة مع المدة غدي نتعلم ليهم مزيان..حتا حاجة ما مستحيلة..مني كملنا..كل واحد فينا طلع لبيتو..دوشت و بدلت حويجي و هبطت كنوجد فالعشا..محسيتش حتا لقيت ريان واقف كيشوف فيا فباب الكوزينة..
انا : علاش واقف تما..دخل جلس..العشا مبقا ليه والو و يتحط...فيك الجوع?
✴ريان كيشووف فيا..
انا : هيهووو كنهضر معاك..
ريان : كيعجبني الحال مني كتوجدي ليا ناكل..الايام اللولة كنتي كتخليني بالجوع كتعقلي??
انا : مكنتيش كتعامل معايا مزيان داك الشي علاش..
ريان : غدي نهضر مع صحابي و نجي نتعشا..
انا : اوكي..
✴ريان مشا..داز الوقت حطيت العشا عيطت ليه يتعشا سمعتو كيهضر معصب..مني جا للكوزينة كان وجهو مغوبش..سولتو مالو معصب قال ليا والو..جلسنا كنعشاو ريان غير ساكت..كياكل و ساهي كيفكر..
انا : ريان..مكيعجبنيش مني كتخبي عليا شي حاجة..
✴ريان شاف فيا..ولكن مجاوبنيش..
انا : شحال من حاجة مبغيتيش تقولها ليا ولكن حيت كنتيق فيك كنقول معليش مع الوقت غدي يقول ليا كلشي..إلا بقيتي كتخبي عليا بحال هكا ريان غدي نولي نكرهك..و انا مبغيتش نكرهك..
✴ريان شد ليا ايدي..
ريان : بعد مرات كنضطر نخبي عليك لمصلاحتك..نتي عارفة راسك مريضة..مخاصكش تعرفي شي معلومات لي يقدرو يأثرو فيك فهمتي..انا كنخبي عليك باش نعتقك ماشي غير حيت بغيت..وخا تكرهيني إكرام انا منقدرش نعرض حياتك للخطر و نقول ليك شي حاجة لي ميستحملهاش العقل ديالك و تجيك شي كريز..
انا : ريان..حياتي هادي انا لي نقرر اش نعرف و اشنو منعرفش..و انا دابا كنقول ليك بغيت نعرف كلشي..مبقيتش مريضة..مبقيتش كنحس براسي كيضرني صافي انا بيخير..غير قول ليا..وخا غير شي حاجة عافاك..
✴ريان بقا كيشوف فيا..
انا : عافاك ريان..
✴ريان مجاوبنيش..حتا انا شديت ليه ف ايدو..
انا : اوكي جاوبني على حاجة وحدة...واش مني درت هاديك الحادثة..و تضربت ف راسي..فقدت الداكرة ?? واش انا فاقدة الداكرة ريان ?? واش هاداك الشي لي كنتخيل فايت ليه وقع ليا ??
ريان : اشنو كتخيلي ??
انا : جاوبني على سؤالي عافاك...
ريان : نتي عارفة انا مكنتش معاك مني درتي الحادثة إكرام..انا معارف عليها والو كنحلف ليك..انا معارفكش حتا كيفاش فقدتي الذاكرة..
انا : يعني كان عندي الحق..انا بصح فقدت الذاكرة...و حتا واحد مقدر يقول ليا شي حاجة???
ريان : مكانش خصني نقول ليك هاد الشي..
انا : شوف ريان..هانتا قلتيها و هانا موقع ليا والو..انا مستعدة نسمع كلشي لي نتا كتعرف..بغيت نعرف كلشي ريان..اكيد عيسى او بابا قالو ليك شي حاجة على حياتي..
ريان : انا معارفش بزاف..انا عارف غير...نتي فقدتي الذاكرة من بعد الحادثة لي درتي..
انا : بابا قال ليا كنت خارجة من المدرسة و ضربتني سيارة..ولكن انا معقلتش على هاد الشي..معقلت على حتا حاجة من هاد الحادثة..
ريان : حيت فقدتي الذاكرة..واقيلا مبقيتيش عاقلة على داك الشي لي وقع ليك قبل الحادثة..تقريبا شي فترة صغيرة من حياتك نتي نسيتيها..ولكن معليش..هاد الشي ماشي مهم..لي مهم هو صحتك..بسباب هاديك الضربة فراسك..منقدروش نقولو ليك شي حاجة لي تقدر تبرزطك..حيت غدي تعرض حياتك للخطر..
انا : كينا شي حاجة وقعات ليوم خاصني نعرفها ?..مني هضرتي فالهاتف و نتا معصب..قول ليا اش واقع ??
✴ريان حدر راسو..
انا : ريان ?
ريان : عيسى ضارب مع فريد..ضرب فريد بموس..خلاه كوما..وخوك داوه البوليس..
✴قلبي تزعزع من بلاصتو..مكنتش متوقعة عيسى يدير هاد الشي..علاش ضربو?? اوووف كلشي بسبابي..خاصني نرجع للمغرب..ميمكنش ليا نبقا هنا..لا خاصني نكون مع عيسى فهاد الوقت..و بابا إلا عرف اش غدي يدير ?? و فارس إلا عرف غدي يبغي ينتاقم لخوه باينا..يقدر يآدي بابا و لا عصام و مراتو..حسيت براسي كيضرني بزاف..شفت فريان..عينيا فيهم الدموع..ميمكنش ليا نتخيل عيسى يدخل لحبس بسبابي..وانا بعيدة عليه..كنحس بالصداع..
انا : ريان..ضرني راسي...ع..عيسى..خ..خويا عيسى..
✴جاتني الدوخة و كنسمع صداع فراسي بزاف...فلحضة مبقيت عقلت على والو...مني حليت عيني..لقيت راسي باقا واقفة فبلاصتي..ريان معنقني..ضهري لاصق مع صدرو..دموع فعيني..ريان شاد ليا راسي..وكيهضر فودني..
أنت تقرأ
اكرام : زواج غير حياتي ♥
Romantik( القصة كتبتها ف انستاغرام عاد حطيتها ف واتباد إلا كنت غالطة او نسيت شي فقرة قولوها ليا نصححها ) ♥ القصة كتهضر على اكرام..بنت زوينة بزاف لدرجة كل الناس فالدرب لي هي ساكنة فيه كيهضرو عليها خصوصا الدراري..هاد الشي لي خلى خوها يحبسها من الخروج...بنت عن...
