اكرام : زواج غير حياتي ♥

Chapitre 1

فقت فالصباح على الهاتف كيصوني..شكون غدي يكون كيعيط ليا فهاد الصباح..شفت النمرة لقيت بابا..جاوبتو..
انا : الو بابا..
بابا : صباح الخير باقا ناعسة ?
انا : صباح النور..يالاه فقت..
بابا : تقدري تجيي عندي الخدمة ? محتاجك ضروري..
انا : ياك لاباس..
بابا : لا غير تعاونيني ف شي حساب..مؤخرا وليت كنغلط بزاف..
انا : اوكي..شوية و نكون عندك..
✴قطعت الهاتف ومشيت كنوجد راسي..بابا اول مرة يحتاجني نعاونو على خدمتو..كليت بالزربة و خرجت..تفاحة باقا ف ايدي كناكل و كنلبس جاكيت ديالي..تلاقيت بولاد الدرب..ديما جالسين فنفس البلاصة..مكنهضرش معاهم حيت كلهم صحاب آدم..سمعتهم كيهضرو معرفتش اش كيقولو..انا ديما هكا غير كنخرج لدرب كتكثر الهضرة معرفتش واش انا جايا من الفضاء?? كلشي كيبقا غير حاضيني دراري بنات و حتا عيالات كبار كيشدو فيا الهضرة..كنضن هاد الشي علاش آدم مكيخلينيش نخرج..بنادم كيهضر كيهضر سوا خرجت سوا بقيت فالدار و هاد الشي آدم مبغاش يفهمو..ديما كيبرد العصاب ديالو فيا غير انا..ركبت فالطاكسي..اوف الحمد لله خرجت من هاداك الدرب المنحوس..وصلت عند بابا للخدمة..دخلت..جبدت الهاتف عيطت ليه..
انا : الو بابا..انا دخلت فينك ?
بابا : انا هابط عندك تسنايني..
انا : اوكي..
✴يله قطعت المكالمة حسيت بشي حيوان دخل فيا طاح ليا الهاتف..
انا : اووو شوف قدامك 😡
الحيوان : نتي اصلا علاش واقفة هنا..
انا : نوقف فين بغيت ماشي سوقك 😡
✴كيشوف فيا بهادوك العينين عندو..كيسحاب ليه راسو غدي يخلعني..
بابا : اكرام بنتي جيتي..
انا : اه كنت كنتسناك محتاجني ف شي حاجة ?
الحيوان : جبران مغديش تعرفني على بنتك ?
بابا : ب..بطبيعت الحال..احم..ه..هادي اكرام بنتي...اكرام هادا نعمان ولد الباطرون..
✴تعصبت حيت شفت بابا خايف منو..شكون هو باش يخاف منو ?? حيت هو ولد الباطرون صافي ?? بقيت كنشوف فيه مغوبشة..بغيتو يعرف بلي انا مغديش نتخلع ولا نتزعزع حيت عرفتو هو ولد الباطرون..
الحيوان : مشرفين اكرام..😏
✴قالها و هو ضاحك..اش كيسحاب ليه راسو..علاش كيضحك..كيشوف فيا بهادوك الشوفات..اوف كنكره هاد النوع لي فيه التكبر..بقيت كنشوف فيه مغوبشة بابا جرني من دراعي و مشينا طلعنا ف المصعد (الاسنسور)..
بابا : اكرام واش هبلتي ?? كيسحاب ليك هادا آدم باش تشوفي فيه بهاديك الطريقة ? هادا راه يقدر يخرجني ف اي لحضة من الخدمة..
انا : اصلا من شحال هادي قلت ليك جلس ترتاح فالدار باراكا عليك من الخدمة..انا نخدم فبلاصتك..
بابا : الخدمة لي دخلتي ليها غدي يخرجك منها آدم راك عارفاه كيف داير..
انا : اووف مالو كيتدخل ليا فحياتي بحال هكا مبغاش يخليني نعيش بحال گاع الناس..
✴مشيت مع بابا البيرو ديالو..بيرو صغيور فيه كمبيوتر..
بابا : كنحسب و نعاود كنلقا راسي غالط..عافاك عاودي الحساب راسي داخ..مبغيتش نتيق بلي غلطت حيت قفرتها..
انا : اوكي انا غدي نشوف..
✴بقيت كنحسب داك شي لي داير بابا..قريت الاقتصاد و كنفهم شوية فالمحاسبات..حسبت شحال من مرة و النتيجة نفسها..بابا دار غلطة كبيرة وليت خايفة عليه..بحال هاد الغلط غدي يضيع الشركة بزاف و غدي تخسر اموال كثيرة بسباب الغلطة..و غالبا مول الغلطة كيدخل للحبس الله يحفض..شفت فيه..اول مرة فحياتي كنشوف بابا بحال هكا..شي حاجة كثر من الخوف فعينيه..معرفت ما نقول ليه..
بابا : القضية حامضة ياك?
انا : بابا كان خاصك ترد البال بحال هاد الشي مامعاهش اللعب..كون سمعتي هضرتي و خرجتي من الخدمة..
بابا : معندي ما ندير..غدي نهضر مع الباطرون..هو ضريف يقدر يعاوني..
انا : مكنضنش يعاونك بابا راه حتا هو متضرر بزاف من هاد الغلط..واش عارف شحال ديال الفلوس غدي يضيعو ليه..معرفتش ولكن..جرب تهضر معاه..كلشي ممكن..
بابا : داك شي لي غدي ندير..
انا : نمشي معاك عندو ?
بابا : اه..خايف نمشي وحدي..
✴مشيت معاه للبيرو ديال الباطرون..دق و دخلنا..
الباطرون : جبران اجي شرح ليا راه من قبيلة و انا كنحسب و نفكر مقدرتش نفهم هاداك شي لي درتي فالحساب..عافاك متقولش ليا غلطتي غلطة بحال هادي..
✴كنشوف بابا حدر راسو..محملتوش يدير هكاك..هو غلط ماشي دارها بلعاني..
بابا : اه..هاد شي علاش جيت لعندك..حتا انا يله كتاشفت بلي غلطت فالحساب..
✴شفت الباطرون دار ايديه على راسو و بقا ساكت..
انا : الغلط كيوقع..هو غير غلط..شحال من عام هادي و هو خدام عندكم..هادي اول مرة يغلط فيها..
✴الباطرون شاف فيا..حتا بابا شاف فيا مخلوع واقيلا ندم علاش دخلني معاه..من الشوفة ديالو باينة مبغانيش نهضر..
الباطرون : شكون نتي بعدا ??
بابا : ه..هادي اكرام بنتي..قلت ليها تجي تعاوني فالحساب حيت مقدرتش نتيق فالاول..مضنيتش اني غدي نكون غالط هاد الغلطة..
الباطرون : اوكي اكرام واش عارفة شحال ديال الفلوس غدي نضيع ?? واش عارفة شحال من عام ديال الحبس غدي ياخد باباك ?? متهضريش المرة جاية حتا تفكري 😡..
✴كيشوف فيا معصب..انا عارفاه غدي يخسر فلوس ولكن يقدر يسمح لبابا وميدخلوش الحبس..الفلوس مشاو مشاو اصلا..معندو ميدير ليهم..حشومة واحد كبير فالعمر بحال بابا يدخل الحبس مع المجرمين و القتالة...
انا : علاش منهضرش ? نتا ماشي الباطرون ديالي نتا الباطرون ديال بابا..انا كنهضر معاك دابا بصفتي انسانة عادية كتهضر مع انسان عادي..معندي علاش نخاف منك ولا نحشم منك هادي هي طبيعتي و شخصيتي مغديش نبدلها حيت نتا زعما الباطرون ديال بابا..ونتا عارف الحبس مغديش يدخل ليه إلى نتا سمحتي ليه..مسامح كريم والغلط كيوقع..إلى سمحتي لشي إنسان و عتقتيه من عقوبة مكيستاهلهاش..الله غدي يعوضك على الخسارة ديالك..دير هاد الفلوس لي مشاو ليك بحال صدقة و انشاء الله مغديش تندم..الفلوس ديجا مشاو..الحبس ديال بابا مغديش يرجعهم ليك..
✴الباطرون كيشوف فيا مصدوم..انا متاكدة بابا فشلو ليه الركابي..ولكن الواحد مني كتوريه الضعف ديالك والخوف ديالك كيطلع ليك فوق ضهرك..اللهم الواحد يبقا بكرامتو و لي بغا يوقع يوقع..بابا قال بلي الباطرون ديالو ضريف..بغيتو يحس و يفهم اش خاص يدير..بغيتو يعرف بلي إلى دخل بابا الحبس راه غدي يكون حتا هو دار غلطة كبيرة لي غدي يبقا ضميرو يأنبو عليها..شفت الباطرون وقف..دار ايديه فجيبو..باقي كيشوف فيا معرفتش علاش..الشوفة ديالتو فشكل..مكيبانش معصب مني..
باطرون : جبران..بنتك كتفهم فالاقتصاد ديال الشركات ??
بابا : اه كتفهم فكلشي علاش انا عيطت ليها تحسب معايا..اي حاجة كتخص الشركات اكرام كتعرف ليها..
الباطرون : إكرام..نقولو باباك كبير فالعمر..عيان ميقدرش على الحبس..ولكن ضروري من العقاب..هو غلط..اي واحد غلط خاص يتعاقب..إلا جينا نسمحو لكلشي لي غالطين غدي تولي السيبة فالبلاد..اش بان ليك نعاقبك نتي فبلاصتو..اش قلتي ?
انا : اوكي انا مستعدة ندخل الحبس فبلاصت بابا..غير سمح ليه هو و دخلني انا للحبس فبلاصتو معنديش مشكل..
بابا : لا واش حماقيتي..سكتي من صباح ونتي داوية ملقيتي متقولي ? نتي بنت مخصكش دخلي الحبس اش غدي يقولو عليك فالدرب ?? انا راجل نقدر نصبر تما..
الباطرون : شكون قال ليكم غدي نعاقبها بالحبس ??
✴انا و بابا شفنا فيه..هادا اش بغا يقصد ??
الباطرون : إكرام انا بغيتك تزوجي بولدي..من شحال و انا كنقلب على شي وحدة بحالك..
✴تصدمت اويلي هادا اش كيقول..مالو حماق ?. آخر واحد نتزوج بيه هو داك المتعجرف ديال ولدو من اول نضرة كرهتو..
انا : واقيلا مسمعتش مزيان...واش كنحلم ولا باغي تزوجني بزز ???
الباطرون : كنت عارف مغديش يعجبك الحال..البنات بحالك قلال بزاف..هادا بالنسبة ليك نتي عقاب ولكن بالنسبة لبنت آخرة راه مكافئة زوينة..بزاف البنات كيحلمو يدخلو لعائلتي..بزاف البنات باغين يديرو المستحيل باش يطيحو ولادي فالشبكة..على قبل الفلوس طبعا كيفما كتعرفو عائلتنا هي من العائلات الغنية بزاف..اكرام عجبتني شخصيتك.
انا : ماموافقاش على هاد الزواج..
باطرون : قلتي غدي تقبلي بالعقاب..
انا : كيسحاب ليا الحبس..مازال الحبس غدي نبقا فيه شحال من عام و نخرج..نتا راك بغيتي تزوجني بزز..راك غدي تحبسني حياتي كلها..زواج ديال بزز انا بالنسبة ليا كثر من الحبس..انا مستحيل نوافق على الزواج..
الباطرون : اوكي اكرام سمعي اش غدي نقول و سيري حتا تفكري مزيان عاد جاوبيني..
انا : اشنو بغيتي تقول ??
الباطرون : ختاري..يا إما الزواج..ولا الحبس لباباك..وحدة فهاد الجوج..
✴صدمني..واش هادا كيهددني..لا ميمكنش..
انا : واش كتهددني...
باطرون : مكنهددكش..بغيتك تكوني مرات ولدي..عتابريه تهديد...عتابريه كيفما بغيتي..معندكش حل آخر ? بزز منك خاصك توافقي..
انا : نتا بالزربة حكمتي على شخصيتي..باقي معارفنيش مزيان..تقدر تكون غالط و انا ماشي هي لي مناسبة لولدك..
باطرون : قولي لي بغيتي..انا عرفت شخصيتك غير من هضرتك..ونتي لي مناسبة ولدي..
بابا : ح..حنا غدي نفكرو فهاد الشي لي قلتي و نجاوبوك غدا..
✴بابا كيدفع فيا بغا يخرجني من البيرو ولكن انا كنشوف فالباطرون مغوبشة..بغيتو يفهم بلي مخايفاش منو..لمهم..خرجنا من البيرو..بزربا دخلنا للمصعد..
بابا : واش حماقيتي ?? كيفاش قدرتي تهضري مع الباطرون بهاديك الطريقة..
انا : عل اقل قول شكرا حيت عتقتك من الحبس..
بابا : يعني موافقة على الزواج 😃
انا : بان ليك عندي شي حل آخر ? مبغيتكش تدخل الحبس..
بابا : مزيان والله احسن قرار درتيه فحياتك واش عرفتي العائلة ديالهم شحال مشهورة ??
انا : زعما فرحان من نيتك بابا ?? فرحان حيت بنتك غدي تزوج بزز منها بواحد مكتحملوش..
بابا : فين هضرتي معاه اصلا ? بالزربة درتي راسك مكتحمليهش نتي شفتيه غير دقيقة..انا لي كنعرفو والله راه دري ضريف بزاف..كيخدم مزيان و الباطرون كيعتامد عليه فكلشي..
انا :ولكن انا مدخلش ليا لخاطري..اصلا الباطرون ديالك غير كيهضر..عندي امل هاد ولدو المبعصص ميوافقش على هاد الزواح..ونتهنا منو..
بابا : جامي شفت شي بنت كتحبس رزقها بحال هكا..
انا : جامي شفت شي اب فرحان حيت بنتو غدي تعدب حياتها كلها مع واحد ولد الفشوش بحالو..
بابا : اكرام انا كنعرفك..يكون كيفما بغا يكون هاد الولد لي غدي يتزوجك..نتي غدي تفقسيه مسكين..هو لي غدي يعيش معاك فالعداب انا متاكد...
✴ركبنا فطاكسي و مشينا لدار..هضرت مع عيسى بغيتو ينصحني..فالاول مكانش موافق ولكن بابا قال ليه بلي الولد ضريف و من اكثر العائلات الغنية..عيسى مني سمع هكا حتا هو ولا موافق على الزواج مفهمتش..هو لي علمني منتبعش الفلوس..هو لي علمني نبقا بعيدة على ولاد الفشوش..علاش دابا وافق بسوهولة على زواجي ??
✴دازو شي ايام..بابا قال الباطرون على الموافقة ديالي..عيسى قال ليا هو وافق على قبل بابا ميدخلش الحبس..عصام فرح گاع عجبو الحال..واش لهاد الدرجة بغاو يتهناو مني كلهم فرحانين حيت غدي نتزوج..مفكروش بلي راه بزز مني غدي نعيش مع واحد مكنعرفوش..كنت فالكوزينة كنوجد فالغدا..بابا فالخدمة..عيسى خارج..آدم يالاه دخل الدار ليل كلو سهران منعرف فين..حطيت الغدا و جلست بغيت نعيط ل عيسى فالهاتف باش يجي يتغدى..دخل آدم على غفلة للكوزينة خلعني..
آدم : اووه العروسة وجدات الغدا ?
✴مجوبتوش حيت عارفاه كيبغي يجبد الصداع..ولكن هو شدني من شعري..
آدم : مني نهضر معاك جاوبيني الكلبة 😡
انا : نتا هو اكبر كلبة 😡 ليل كلو ونتا سهران مع الكلاب بحالك..
✴آدم ضربني لحنكي حسيت براسي كيدور..شفت فيه وضربتو حتا انا..نفس الضربة..حسيت براسي قصحتو مزيانة فيه..ولكن هو تعصب وبدا كيضرب فيا..طحت فالارض بدا كيضربني برجلو..مقضرتش نوقف باش ندافع على راسي..
آدم : كنقول ليك متبقايش تهزي عليا ايدك الكلبة كيسحاب ليك صحاحيتي بهادوك جوج حركات لي علمك عيسى ?? مزيان مني غدي تزوجي نتهناو منك..اش كيسحاب ليك راسك? نتي الاميرة فهاد الدار ?? لا الكلبة نتي راك غير زايدة اصلا كلهم بغاو غير ايمتا يتهناو منك كيسحاب ليك نساو بلي نتي لي قتلتي ماما ?? بابا غير صابر عليك مسكين..مبقاش قادر يصرف عليك و عصام ولات عندو عائلتو دابا و مشاكيلو..غير عيسى لي كيجي من جيهتك حيت كتبقاي فيه..اصلا نتي مكانش خاصك تكوني فهاد الدار من نهار جيتي جبتي لينا غير العداب و الهضرة ديال الناس..كلشي الدراري كيهضرو عليك غير نتي فالدرب..علاش جيتي علاش ? كون غير متي فبلاصت ماما و هنيتينا من الاول..
✴هاد الهضرة لي قال ليا ضراتني فقلبي..ديما كيقول ليا هضرة كتجرح ولكن دابا صدمني..حطمني مبقاش عندي الجهد لي نجاوبو ولا نوض نضربو...والو..بقيت غير فالارض..هو مشا خرج..مبغيتش نبكي جامي بكيت قدام شي واحد سوا كان من عائلتي سوا كان شي حد آخر..مبغيتش نبين الضعف ديالي..ولكن كنجمع كلشي فقلبي..و كنتعصب..نضت مشيت للبيت ديالي..بقيت كنضرب فكلشي و كنهرس فكلشي..تعصبت بزاف..انا ديما هكا..فبلاصت ما نبكي..كنتعصب و نبدا نضرب...بقيت فبيتي العشية كلها مخرجتش من البيت...فالليل كنسمع شي حد دق فالبيت..انا عارفاه غير عيسى..
انا : دخل..
✴عيسى دخل و جا عندي جلس حدايا..
عيسى : شفت الضو شاعل عرفتك باقا فيقا..مالكي ?
انا : راك عارف مالي..
عيسى : الحمار ديال آدم برزطك تاني ?? اش دار قولي ليا باش نمشي نوريه 😡ياكما ضربك ? جاوبيني إكرام والله حتا نقتلو عصا ليوم...كيسحاب ليه كينا السيبة فالدار ولا شنو ??
انا : والو..صافي غير سير تنعس خليني عافاك...
عيسى : اوكي..نخليك وحدك..ولكن عافاك نعسي..غدا الناس غدي يجيو بكري مبغيتكش تفيقي معطلة بحال ديما..
انا : شكون هاد الناس تاني ??
عيسى : والله كنت عارف داك الحمار مغدي يقول ليك والو...لبارح كنتي ناعسة و بابا قال ل آدم يقول ليك راه غدا غدي يجيو يخطبوك..
انا: مقالش ليا..
عيسى : المهم كوني واجدة غدا..بغيتك تكوني صحيحة و متبانيش ليهم ضعيفة اوكي..انا عارفك صحيحة منخافش عليك..
انا : اوكي...
✴عيسى مشا خرج..انا متاكدة غدي يمشي ينقي ل آدم ودنيه مزيان..هو ديما كيدافع عليا..ولكن كنفكر فالهضرة لي قال آدم..عندو الحق من واحد الناحية..انا غير زايدة عليهم..بابا مسكين عيا و كبر فالعمر و باقي خدام مبغاش يخرج من الخدمة حيت خاصو يصرف عليا..عصام ولات عندو عائلتو..قريب يتزاد عندو ولد و غدي تزاد عندو المسؤلية يعني انا صافي نساني..كنحس براسي بصح غير زايدة عليهم..داك شي علاش فرحو حيت غدي نتزوج..حتا من عيسى كنحس بيه مضيع حياتو كلها على قبلي..جامي شفتو مع شي بنت..معرفتش فاش خدام ولكن تقريبا الفلوس كلها لي كيربح كيخسرها غير عليا انا و متطلبات ديالي..دابا عاد فهمت علاش كيقول ليا انا هي الاميرة الوحيدة فحياتو..يعني مكيتقربش من البنات و مكيحاولش يدير شي علاقة جدية مع شي بنت..يعني من حدي انا فحياتو هو جامي غدي يتزوج..انا لي حابساه..انا لي مامخلياهش يعيش..من حقو حتا هو يعيش و يتزوج..آدم بلا ما نهضر علييه هاداك مكيحملنيش اصلا من نهار تزاديت..اوف..من احسن نتزوج و نبعد عليهم نخليهم يعيشو شويا..معليش إلا تعدبت انا..لمهم هما يعيشو مرتاحين و بابا ميدخلش الحبس..بقيت كنفكر حتا نعست..فالصباح فقت بكري..غسلت و مشيت الكوزينة..باقا كيف ما هي الغدا ديال البارح فوق الطبلة..بديت كنجمع..كنعدب فراسي على والو حتا واحد مكياكل فالدار اصلا كلهم كياكلو فالزنقة..يمكن مكيعجبهمش الطياب ديالي..جمعت الدار كلها و طلعت كنوجد فراسي..لبست كسوة عادية..معنديش قفطان و لا داك شي ديال المناسبات..كنشوف فالمراية و كنفكر...معنديش مكياج..إلا قلت ل عيسى خاصني ماكياج ياكلني..اي حاجة خصتني كيجيبها ليا..ولكن المكياج لا..معرفت ما ندير..بقيت كنشوف فوجهي..حتا سمعت الدقان فالباب..
انا : دخل..
✴دخل بابا و جا عندي..
بابا : كتباني زوينة بهاد الكسوة حياتك كلها و نتي كتلبسي حويج خوك..
انا : كنرتاح فيهم..
بابا : الناس جاو..بغيت نهضر معاك قبلما تمشي عندهم..
انا : اشنو..
بابا : كلهم كينين إلا نعمان..
انا : شكون هاد نعمان? ياكما العريس ولد الفشوش?? كنت عارفاه مغديش يبغي يتزوج بنت فقيرة بحالي..اوف الحمدلله....