Kennsch das ou: völlig entspannt z'Züri dur d'Bahnhofstross goh, Liechter gnüsse, während z'rings om dech ome alli am seckle ond schimpfe si? Denn esch definitiv Dezämber, gnauer no: denn esch chorz vor Wiehnachte. So schön, aui die Liechtli, die festlichi Belüchtig. Aber für wär hängt me das eigentli genau uf, we aui am seckle si? Die händ jo gar kei Zyt för das - niemert luegt häre. Dört no rasch ine - das muesi no - weisch, ha jetz grad kei Zyt, es esch u'vel los. Das esch da, woni ghöre, öberall. Ke Zyt, Hektik, Druck - sogar bim feschte ond schänke. Ich gloube fascht, de Ebenezer Scrooge het scho rächt gha, wenn er seit, Wiehnachte sigi Humbug.
Noch em stressige Fescht denn schnäll alles verruume. Skiferie müend vorbereitet sii. Wieso fahre die ned? Fahred doch! Mer wänd möglichst schnäll am Skilift go ide Schlange astoh. So vöu Lüt ide Beiz. Git's ächt ou mol öppis z'Ässe? Mer mache do ned mit, mer göhnd id Karibik, zäme met zähtuusig anderne zwänge mer eus dor de Flughafe ond stöhnd am Zollschalter aa, demit mer denn chönne mit eme Tüechli euse Liegestuel bsetze bevor öpper anders druffe liegt.
Bi all dere Hektik bruchts natürli ou Entspannig, mues jo sii. Aber ned ergendwie, scho gar ned ufem Liegestuel deheime im Garte. Nei, es git jo so äxtra Wellness-Ferie. Mol usspanne, d'Seele lo bambele, d'Bei lo hange. Tee statt Caipiriña, Naturkläng statt Beats, en Krimi statt Börsezahle. Tuet das guet. Ahhh, uftanke ond Energie uffülle. Wellnessprogramm. Z'erst chli ligge, denn mol chli schwitze, denn weder ligge, denn Schuum-Massage, go ligge, denn Öl-Massage, denn ligge ond Tee trinke. Denn vierhundert Franke zahle.
Ich be gar ned gäge das. Wörkli ned. Ich gnüüsse Vals, ich gnüüsse Hamam, Heumassage ide Bärge, Thai-Massage am Strand ond Sauna am Sunntig Morge. För mech aber esch Wellness ned eifach reduziert ufes Programm zum bueche, es esch ned eifach nume en Insle zum mol usspanne. Wellness esch im Chopf. Wellness fendi öberall. De Drängler am Skilift dore loh ond halt s'nöchste Sässeli näh. De Stresser uf de Stross lo überhole ond derför chli Diesel spare. Sech ned öber de Schüeler ufrege, wo d'Husi ned het, sondern sech an all dene freue, wo gärn chöme ond d'Husi mache. D'Liechter ide Stadt gseh ond sech drüber freue. Blib doch eifach mol stoh. Lueg ume ond gseh dini Wält. Si esch schön ond wenn du das erkennsch, werd si nome no schöner. Ond genau dorom gohni völlig entspannt mitts im Dezämber z'Züri dur d'Bahnhofstross.
DU LIEST GERADE
Einseitige Texte
RandomDas ist die neue Fassung dieses Buches, mit neuem Cover - Es werden nicht mehr alle Texte drin sein. Wer einen Text vermisst, soll sich bitte melden. Ich stelle den Text dann wieder online. - Dieses Buch existiert auch in Papierform, so als richtige...
