𝗠𝗮𝗿𝗶𝗴𝗼𝗹𝗱(Completed)

Final

Unicode

အချိန်မှီလေး!!
မဟုတ်ဘူး တကယ်တော့ ကြိုတင်ပြင်ဆင်မှုတစ်ခုပဲ။သတိကြီးတဲ့မြေခွေးအကြီးအကဲ၊ကံကြမ္မာစာအုပ်ကို ကြေအောင်ဖတ်ထားတဲ့မြေခွေးအကြီးအကဲက စစ်ပွဲကိုလက်လွယ်စပယ် စတင်ခဲ့တာတော့မဟုတ်ဘူး။ကြိုတင်ပြင်ဆင်မှုပေါင်းများစွာနဲ့ အကွက်ချချစီစဥ်ခဲ့တာ။

ကံကြမ္မာကိုတော့ပြောင်းလဲယူလို့မရဘူး။သို့သော်ရှောင်းလီလီ သူမလက်ထဲက ကံကြမ္မာကိုတော့ စိတ်ကြိုက်ဖန်တီးယူမယ်။ကြယ်တာရာနတ်ဘုရားမ ချန်ထားရစ်ခဲ့တဲ့ အသန့်စင်ဆုံးနှလုံးသားက သေလူကိုပြန်ရှင်စေနိုင်တာကလွဲလို့ အမှန်စင်စစ် ဘာစွမ်းအားမှမရှိဘူး။အဲ့လိုသုံးမရတဲ့အရာကို ဘာလို့အမွေအဖြစ်ပေးခဲ့တာလဲ။သေချာပေါက်အသုံးဝင်မယ်ဆိုတာသိနေလို့ပေါ့။

ဒါပေမယ့်လည်း ကြီးမားတဲ့စိန်ခေါ်မှုတစ်ခုဖြစ်နေတုန်းပဲ။သတိမေ့နေတဲ့ ရှောင်းကျန့်ဆီက ယွီပင်းအကူအညီနဲ့ သန့်စင်တဲ့နှလုံးသားကို ထုတ်ယူနိုင်ခဲ့သော်လည်း ဝမ်ရိပေါ်ခန္ဓာကိုယ်နဲ့ အသားကျအောင် အချိန်အတော်ပေးရတယ်။တစ်ခါသေပြီးသား အားနည်းနေတဲ့ဝမ်ရိပေါ်ကိုယ်ခန္ဓာဟာ လူသားတစ်ယောက်သာသာပဲ။ဒဏ်ရာတွေကိုလည်း အမြန်ကျက်အောင် ကုသနိုင်ခြင်းမရှိဘူး။

ဒီထဲအေးချမ်းရာဘုံရှိ မြေခွေးဘုရင်နဲ့ကြယ်တာရာနတ်ဘုရားမဟာ သူတို့သားအတွက် ဝမ်ရိပေါ်ကိုစမ်းသပ်မှုတွေလုပ်ရန် လွင့်မျောနေတဲ့ဝိညာဥ်ကိုခေါ်သွားပြန်တယ်။အခြေအနေတွေက တကယ်ကိုကမောက်ကမပါပဲ။မနည်းကယ်ဆယ်ထားရတဲ့ အသက်ကိုအာမခံချက်မပေးနိုင်ခဲ့ဘူး။

အချိန်မရွေးသေသွားနိုင်မည့် ဝမ်ရိပေါ်အတွက် သေပြီဟုသာသတင်းလွှင့်ပြီး သူတို့စောင့်ကြည့်နိုင်မယ်။မျှော်လင့်ချက်တွေပေးပြီး ထပ်သေခဲ့ရင် စောင့်ဆိုင်းနေရသူဟာ ထုံအောင်နာကျင်ရတယ်။ကလေးတွေနဲ့ရှောင်းကျန့်က ဒီလောက်နာကျင်ရရင်ပဲ တော်ရောပေါ့။မဟုတ်ရင် အဖိုးတန်နတ်ဘုရားတောင် လောကကြီးထဲရောက်မလာသေးပဲ ရှောင်းကျန့်ကိုပါဆုံးရှုံးရလိမ့်မယ်။

အဆင်ပြေသလို အမြဲဟန်ဆောင်နေတတ်တဲ့ ရှောင်းကျန့်ကိုကြည့်ပြီး အဖြစ်မှန်ကိုသိုဝှက်ထားရတဲ့ သူတို့လူကြီးတွေမှာလည်း ပင်ပန်းလှပါရဲ့။နှစ်၁၀၀တိကြာပြီးနောက်မှာတော့ သူတို့မျှော်လင့်ချက်တွေ ရောင်နီသမ်းလာတယ်။အေးချမ်းရာဘုံက ပြန်လာတဲ့ဝမ်ရိပေါ်ဟာ ရှောင်းကျန့်မိဘတွေရဲ့ စမ်းသပ်မှုတွေကိုလည်း အောင်မြင်ခဲ့ပုံပင်။ပြောင်းလဲသွားတဲ့ ခန္ဓာကိုယ်အချိုးအဆစ်နဲ့ အသွင်အပြင်တွေဟာ သူ့ဝိညာဥ်အတိုင်း ခန္ဓာကိုယ်ကလည်းလိုက်ပြောင်းလဲသွားခြင်းပင်။ပိုပြီးကြံ့ခိုင်သန်မာလာတဲ့ ယောကျ်ားတစ်ယောက်။